انقلابی سیاست و ردانقلابی عمل
05 May 2021
جہد آ یقین کروکا سنگتاک۔۔۔
مچا دنیا ٹی محکوم آ قوم آتیان الیس آجو اننگا قوم آ تسکان ہراڑے ہم سیاست ٹی سوبری و تُرندی انقلابی ڈول نا سوچ و سیاسی کڑد نا مسخت قومی مفاداک متوس تو ہموڑے ودی مروکا سیاست ہچ بر الس نا مفاد اکن مفک۔ ہان چنکو وخت سیکن دا بے ڈول آ کڑد گڑاس خاص او ٹولی سینا مفاد اکن دوئی مریک۔ اکثر دُن مریک کہ اگہ انقلابی جہد اٹ انقلابی راہشون آتا کمی مرے و ادارہ غاتیان بیدس شخصیت آک تحریک ءِ تینا دُو نا کیرغ آن کیر تو ہموڑے راجی جہد گڑاس مخلوق کن کاروبار ئس جوڑ مریک ہراڑان او تینکن میل و ماڑی جوڑ کیرہ۔ انقلابی تحریک آک سوگو آ راہبند و ساڑی وخت نا گرج آتیتو اوار جوان اننگا حکمت عملی تیان بیدس سرسوب مننگ کپک۔انقلابی جہد اٹ ساڑی ہر جہدکار ءِ دا سوچھوئی مریک کہ دا جہد اٹ انتئے بشخ الکونے و دا جہد نا مسخت انت ءِ۔ انقلابی جہدکار ہچ بر خن تے ترکرسہ عمل سینا بشخ مفک۔ ہراڑے ہم انقلابی سیاست الس نا مفاد، راج نا شونداری و انقلابی سوچ و فکر نا تالانی کن مریک تو اوڑے اسے بندغ سینا ذاتی مفاد، ضد، انا و ہیروازم تینٹ ایسر مریرہ۔ انقلابی جہد اٹ فرد نا کڑد صرف دا مریک کہ او قومی و راجی شونداری ٹی تینا کڑد ءِ دوئی کیک۔ ہرا گَل ٹی ساڑی مریک تو تینا مچا ذاتی واک و اختیار آتے تینا تنظیم کن ندر کیک۔ تنظیم نا بنیاتی و سیاسی مسخت ہم دادے کہ اسے سوچ تخوکا تا مچی ئس مریک۔ اندا سوچ و فکر تیان بیدس کس ئس شاید جوان او انسان ئس مننگ کیک ولے انقلابی جہدکار ئس ہچ بر مننگ کپک۔
انقلابی کرڈ آ یقین کروکا خواجہ غاک۔۔۔
انقلابی جہد اٹ ساڑی مننگ آن پد ننا ہر کڑد اہمیت تخک۔ ہر انقلابی باسک ءِ دا گڑا نا جوان معلومداری مرے کہ انقلابی کڑد حقیقت اٹ انت ئسے۔ انت صرف جون ءِ ندر کننگ سیانڑائی سرپند مننگ کیک؟ انت صرف تینا دتر ءِ وہیفنگ انقلابی مسخت ءِ دوئی کننگ نا پن ءِ یا جہد نا فلسفہ داڑان ہم بھلون ءِ۔ انت دا تینٹ انقلاب نا چِپ مفک کہ اسٹ ئس دا خاطران تینا جان ءِ ندر کیک کہ پگہ مخلوق اونا تعریف ءِ کے دا تینٹ اسے لالچ اسے، دا قربانی مفک، قربانی نا خیال داڑان آن بڑزا ءِ۔ اسے انقلابی جہدکار اسے تینا سوچ و خیال ءِ دا وڑ جوڑ کروئی مریک کہ اونا است اٹ تینا ذات کن ہچو خیال ئس مف بلکہ ہر کڑد جہد نا گرج آتے پورو کے۔ ہرا وخت اسکان جہدکار تینے تنظیم نا راہبند نا پابند کپک او جہد آن فائدہ دوئی کننگ کپک۔ اینو اسے جہدکار سے دا گڑا نا خیال کروئی مریک تحریک نا سرسوبی و بے سرسوبی نا تعلق تنظیم تون گنڈوک مریک۔ اینو جدید سامراج و نوآبادیاتی نظام بھاز سوگو مسونے، سامراج ءِ انسانیت نا ہچو ہمدردی ئس اف، ولے اونا مقابلہ اٹ اسے جہدکار ئس ایمانداری اٹ انسان نا بچفنگ کن جہد کیک۔ حقیقت نا دروشم ات مونی بریسہ سامراج نا برخلاف اسے مقصدی او جہد سے سرسوب کیک۔ ہرا تحریک نا راہشوناک راجی تحریک ءِ مونی دننگ کن سرسوب آ حکمت عملی تیان بیدس جذباتی ڈول اٹ مونا دیرہ تو دا انقلاب نا راہبند آتیان چَپ مریک۔ جدید اننگا حکمت عملی تے دوئی کروئی مریک۔ اینو ننے دا باور کروئی مریک کہ نن اسے ٹولی سینا برخلاف اخہ بلکہ اسے ترند او طاغت سیتون جنگ تننگ اون ہراڑ تون جنگی طاغت آن بیدس پین ہم کئی چم آک اریر ننے کاؤنٹر کننگ کن۔ کل آن بھلا گڑا دادے کہ اوڑ تون ادارہ ارے۔ دن اننگا طاغت آتیتو مقابلہ بیدس جذبات آتیتو مفک، ہر انقلابی جہدکار نا ہر کڑد اونا ادارہ نا حکمت عملی و فیصلہ آتیان دوئی مریک و تنظیم نا کُل کالخوا تا فیصلہ کُل نا صلہ و سوج آن مریک۔ اسے انقلابی تنظیم سینا باسک آتے دا خیال کروئی مریک کہ او تحریک نا راہشونی ءِ تینا کوپہ غاتیا ارفینو۔ دافتا چنکو ردینک ئس ہم انقلابی کارکتار ئے بھاز پدی بٹک۔
راجی مسخت کن تینے ندر کروکا انقلابیک بحیثیت ءِ راجی جہدکار ننے ہر وخت دا سوچ و فکر کروئی مریک کہ اسے قوم سینا شیفی بڑزی ننا کوپہ غاتیا ٹی، ہر ہمو عمل و کڑد آن تینے مُر کین ہراکے ننا راج و قوم ءِ نسخان ایتک۔ اسے انقلابی سینا بنا غا ننے تنقیدی عمل آن گدرینگوئی ءِ۔ ہرا وخت اسکان نن تینے تنقیدی عمل آن گدریفپانہ تو ننا عمل و پروگرام سُوبر و سرسوب مفک۔ ہر انقلابی ءِ تینا و تینا تنظیم نا چنکا بھلا کڑد و عمل ءِ کریٹکل کروئی مریک۔ ہچو فضول او شر سینا گواچی کروئی اف ہراڑان وخت نا ضیان مریک۔ پُورا راہبند نا پابندی کننگ آن بیدس انقلابی نا ہچو کڑد ئس مخلوق ءِ متاثر کپک۔ تنظیم نا باسک و راہشون اٹ دا گڑاس اسٹ مریک کہ او انقلابی عمل اٹ اوار بشخ الوک مریرہ۔اگہ تنظیم نا راہشون اندونو کڑد ئس دوئی کیک ہراکے انقلابی عمل و تنظیم آن برخالف مریک تو بائیدے اودے توننگ ئے۔ اسے انقلابی سے تنقید آن ہچ بر گبرائفوئی اف و ہمش تنقید ءِ تینکن فائدہ سرپند مرے تاکہ او ہمو کڑد ءِ ولدا کپک۔ اسے انقلابی جہدکار سینا حیثیت اٹ ننے تینا راہبند نا سخت پابندی کروئی ءِ۔