شہدائے مرگاپ ءُ بلوچ راجی جنز

بلوچ راج۔۔۔
وھد پہ وھد بلوچ ڈیھ ءُ اے ریجنءِ سیاسی جاورھال مٹ بوان انت۔ ما گند ایں کہ جاھے زورآور ءُ ایردست، جاھے پروکسی وار، جاھے سول وار ءُ دگہ کسان یا مزنیں جنگ اے دمگءِ جنگانی بہر انت۔ اے دمگءَ بلوچ ڈیھ ءِ ھد ءُ سیمسر یک انچیں جاھےءَ انت کہ دری زورآورانی سرمایہ داری ءُ جہانی بئیپاریءِ راہ ءُ در گوں آئیءَ وڑے نہ وڑےءَ ھمگرنچ انت۔ دومی نیمگ ءَ بلوچ ڈیھءِ جند چہ راجی مال ءُ مڈیاں چہ چکاریں ڈیھ یےءِ بستارءَ سرجمیں دنیاءَ زانگ بیت ءُ ھر زورگریں تاگتانی چم وڑے نہ وڑےءَ بلوچ ڈگارءِ سرءَ سک انت۔ اے وہدءَ بلوچ گوں کبزہ گیریں پاکستان ءَ جنگ کنگءَ اِنت۔ اے جنگءَ پاکستان وتی سرجمیں تاگتاں کارمرز کنگ ءَ انت ۔ پمیشا بلوچ میتگانی میتگ گلامیءِ آسءَ سوچان انت۔ ھلک، کوہ ءُ کوچگ ءُ شہر ءُ بازار اگاں جاھے کبرستان گندگءَ کاینت گڑا دگہ جاھے ویرندان۔۔ ایشاں ھوار نفسیاتی ھسابءَ اوں بازیں جنگی رپکے کارمرزگ بوتگ ءُ بوگءَ انت۔ بلئے چرے زوراکیاں ابید ھم بلوچ راجی آجوئی جہدکارانی مہکمیں کمٹمنٹ، تچکیں لیکہ ءُ پروگرامءَ زورگرءِ ھلاپءَ وتی راجی آجوئی جنز نہ تہنا یک پئیمءَ داشتگ بگندئے آئیءِ کار ءُ پروگرامانی تہءَ وھد پہ وھد گہتری ءُ مٹ ءُ بدلی اوں آؤرتگ۔ اے گپءِ تہءَ ھچ پئیمیں دو رائے نیست کہ مرچی اگاں بلوچ ڈیھ رک اتگ یا کہ دری سرمایہ داراں سرجمیءَ وتی پنجگاں گوں لٹ ءُ پل کت نہ کتگ(یا گپت کت نہ کتگ۔) گڑا ایشیءِ مستریں سوب بلوچ راجی آجوئی جنزءِ ھما باسمائیں راھشون ءُ جہدکار انت کہ آ زورگرءِ ھرچ پئیمیں زلم ءُ جبر ءُ مکر ءُ پندلانی دیمءَ اوشتاتگ انت۔

شرپداریں وانوکاں۔۔۔
بلوچ راجی بقاءِ اے برجاھیں جنگءَ راجی سرکیلیں راھشونانی لڑءَ “شہدائے مرگاپ”ءِ سرمتابیں سرانی کار ءُ کرد چہ بلوچ مہلوکءَ اندیم نہ انت۔ بلوچ راجی آجوئی جنزءَ سیاست ءُ ھاس نودربر ءُ پارٹی سیاستءِ مہکمیں تب ءُ مئیلےءِ دیمءَ آرگءَ شہدائے مرگاپ نمیران سرکماش گلام محمد بلوچ ءُ آئیءِ پگری سنگتانی ھاسیں کردے۔ چوشکہ سال 2003 داں 2004 ءَ کماش گلام محمد بلوچءِ سروکیءَ بی این ایمءِ بن ھشت ایر کنگ بوت کہ چرائیءَ بلوچ راجی آجوئی جنزءِ سیاسی سپرءِ تہءَ یک مزنیں آشوبے چست بوت کہ لس مہلوکءَ بگر داں زندءِ ھر کجام پڑءَ گوں بندوکیں مردم بلوچ سرڈگارءِ ایردستی ءُ گلامیءِ ھاترءَ اوشتات انت، بزانکہ اُلسی موبلائزیشنءِ ھاترءَ مہلوکءَ را آگاہ کنگ، آیانءَ سرپدی دیگ ءُ سیاسی درانی توکءَ مہکمی آرگ ءُ بلوچ راجی جنزءَ یک مکامےءَ رسینگءِ پشتءَ مستریں دست چیئرمین گلام ءُ آئیءِ ھمبراھانی مہکمیں کمٹمنٹ ءُ راجی زمہ واریءِ برورد انت۔ کماش گلام محمد بلوچ گوں وتی ایدگہ سنگتاں بلوچ ڈیھءِ ھمک دمک ءُ دراں جتائیں سیاسی مراگشانی شکلءَ بلوچ راجی زرمبشتءِ توار سرکنان کت۔
انچوشکہ شما بلوچ ءُ دنیاءِ راستیں گوستانک(تاریخ) ونتگ ءُ سرپد ات کہ زورآوریں تاگت سال 1948ءَ یک رندے پدا گوں وتی جتائیں ایجنڈہاں بلوچ ڈیھءِ سرا کبزہ کنت تہ پاکستانءِ وجود ءُ بلوچ ڈیھءِ کبزہءَ بگر دانکہ مرچی اے دورانیہءَ چوشیں ھچ ماہ ءُ سالے نیست کہ بلوچ ءُ آئیءِ ڈیھ دری زورآورانی زلم ءُ زوراکی ءُ لٹ ءُ پلانی دیمپان مہ بیت۔ بلوچءِ راجی روایات، زبان، دودمان ءُ گوستانکءَ را مسخ کنگ ءُ آئیءِ جاہءَ پاکستانی ءُ ایدگہ دری زورآورانی پگرانی ایرمشگءِ جہد کنگ بوگءَ انت۔ پرے چیزانی رواج گیجگءَ دری زورآوریں دژمناں ھوار بلوچ نامی ءُ مفاد پرستیں راجدوستانی اوں مزنیں کوشستے۔ بلئے دومی نیمگءَ بلوچ جہدءِ سرکیلیں سرانی کار ،کرد ءُ شپ روچیں دیمونیانی بروردءَ بلوچ مہلوک شعوری بستارءَ مرچی ھما جاہءَ اوشتاتگ کہ وتی نیک ءُ بد کلاں سرپد انت۔ بلوچ مذاحمتءِ روتگ روچ پہ روچ مہکم تر بوان انت۔ کہ بلوچءَ را اے جاہءِ سر کنگءَ شہدائے مرگاپءَ ھوار بلوچ نامی ئیں ءُ گمنامیں جہدکارانی بلاھیں کردے ھوار انت گوں۔

بلوچ مہلوک ۔۔۔
سال 2009 بلوچ راجی جنزءِ ھما زمانگءِ بہر زانگ بیت کہ اے دورءَ “کشگ ءُ چگل دیگ”ءِ استانی پالیسی نوک بندات ات کہ چرے سالءَ رند استانءَ وتی اے پالیسیءِ تہءَ باز ترندی آؤرت۔ ہزاراں بلوچ ورنا، نودربر، استاد، ڈاکٹر، پوریاگراں ھوار زہگ زالبول ھم آوار جنگ ءُ گار ءُ بیگواہ کنگ ءُ آھانی جون ماں ویرانگاں چگل دیگ بوت انت۔ 3 اپریل 2009ءَ کماش گلام محمد بلوچ ،لالامنیر بلوچ ءُ شیر محمد بلوچ زورآورءِ لشکرءَ چہ کیچءَ آیانی وکیلءِ کار گسءَ آوار جنگءَ پد بیگواہ کرت اَنت۔ 9 اپریل2009ءَ مرگاپءَ سئے ئیں راھشونانی ژانگولیں کُنٹ دست کپت اَنت۔ شہدائے مرگاپءَ بلوچ راجی جنزءِ تہءَ نہ تہنا جزبہ کربانیءِ فلسفہءَ را مہکم کت بگندئے بلوچ نودربر ءُ پارٹی سیاستءِ مہکمیں تبے اوں جوڑ کت۔ بلوچ راجءِ ورنا ءُ لس مہلوکءَ لوٹ ایت کہ وتی راجی کلیں شہیدانی کار ءُ پروگراماں گوں آھانی مہکمیں جزبہ کربانیءِ فلسفہءَ داں بلوچ ڈیھءِ آجوئیءَ یک پئیمءَ برجاہ بہ دار انت دانکہ زورگر لاچار بہ بیت کہ وتی لشکرءَ بلوچ سرڈگارءَ چہ در بہ کنت۔

بلوچ اسٹوڈنس آرگنائزیشن آذاد