است انگا وخت آ بلوچ خوانندہ تا ذمہ واری 

!بلوچ خوانندہ آک

بلوچستان نا است انگا جاور تا تہٹی بلوچ خوانندہ ہرا وڑانگا زوراکی تا آماچ ءِ؟ دا ہیت ءِ بلوچ خوانندہ آن بیدس پین کس سرپد مننگ کپک۔ پاکستان نا “کالونیل زوراکی” بلوچ خوانندہ تے اسے “ذہنی دریئو“ ٹی چغل تسونے۔ تینا جند نا اُراغان ہلیس تینا تعلیمی ادارہ تا تہہ آن اسہ دُنو جاگہ اس اف کہ اوڑے بلوچ خوانندہ تینا زند ءِ رکھفنگ کیر۔ ہر جاغہ او پاکستان نا کالونیل بے دادی نا مون ئٹی ءُ۔ اینو نا بلوچ جاور دا وڑ ءِ کہ اگہ اسے ورنا ئسے نا سن کہ شانزدہ سال ءِ او تینا اُراٹی تولنگ کپک،اوڑکن الّمی مریک کہ او تینا زند نا بچفنگ کہ تینا علاقہ آن پیش مریر و ایلو بھلا شار تا کنڈا کار۔ دا امیت ئٹی کہ اوڑے اوفک تینا زند ءِ رکھنگ کیر ولے داسا نن خننگ اُن کہ اسلام آباد وڑ انگا بھلا شار تا یونیورسٹی تا تہٹی ہم اوفتے “بلوچ “ پن نا زی آ خُلیفنگ مننگ ءِ، اوفتے بیگواہ و لٹ تننگ مننگ ءِ۔ پاکستان دا ہیت ءِ اوننگ اف کہ ہرا خوانندہ سیاسی ءِ و ہرا غیر سیاسی ءِ، ہرا خوانندہ سیاسی تنظیم تون تعلق تخک و ہرا نا ہچ ءُ سیاسی تنظیم اسیتون سیالی اف، او تنیا “بلوچ “ کننگ ءِ ارفنگ ءِ”، او بلوچ کیک و ارفک۔

!سرپدانگا بلوچ خوانندہ آک

دا وخت ٹی نم ہرا جاور تا آماچ اریرے دافتا سیالی کالونیل ازم تون تفوک ءِ۔ پاکستان تون اوار جہان نا ہر وڑ انگا گدرینگوک آ کالونیل طاغت اس مسونے اوفتا رویہ تینا کالونی تون اندا وڑ مسونے۔ کالونیل ازم نہ بنماس ظلم و زوراکی تون تفوک ارے۔ دا ہیت ءِ نن و نم کل سرپد ارین کہ بلوچ ورنا بس تینا “بلوچ چاہنداری” نا سوب بیگواہ کننگ مننگ ءِ۔ خوانندہ تا سیاسی بنماس آ بیگواہ کننگ اسے جتاو جیڑہ اس ارے ولے دا زوت اخس کہ خوانندہ بیگواہ کننگ مسونو دافتا تہٹی بازانگا خوانندہ آک پاکستان نا سول سروس، بیورکریسی نا امتحان نا تیاری کننگ آ مسونو، یا بھازانگا خوانندہ آک پاکستان نا بھلا بھلا یونیورسٹی تا تہٹی ایم ۔ فل و لیکچرار شپ نا ٹیسٹ نا تیاری کروک مسونو۔ داڑان دا ہیت پک مریک کہ پاکستان دا اوننگ اف کہ ہرا خوانندہ سیاسی ءِ ہرا سیاسی اف، او تنیا “بلوچ’ کیک و بیگواہ کنگ ءِ۔

!بلوچ خوانندہ آک

است انگا جاور تا تہٹی اِرا اندنو جیڑہ اریر کہ بلوچ خوانندہ تے اوفتا زی آ ٹَک خلوئی ءِ۔ اسٹ کالونیل بے دادی و ایلو اشتماعی جدوجہد۔ نن اُرن گڑا پاکستان بلوچ خوانندہ تے بیگواہ کننگ کن اسے بیانیہ اس جوڑ کرینے کہ ہرا خوانندہ بیگواہ مریسہ ءِ و الّم پاکستان نا برخلاف کاریم کرینے، اگا نہ گڑا بیگواہ کننگ متورہ۔ دا دا وخت نا کالونیل بیانیہ ءِ، کالونیل طاغت تینا بے دادی نا رکھ ءِ کننگ کن ہر وخت اندن بیانیہ جوڑ کیک ولے جیڑہ دادے کہ لس بلوچ مخلوق و بلوچ خوانندہ دا بیانیہ نا آماچ مننگ ءُ (دا جوڑ کروک آ بیانیہ ءِ مننگ ءُ) کہ آو ہر بلوچ خوانندہ کہ دزگیر یا بیگواہ کننگ مننگ ءِ دا الّمی پاکستان نا برخلاف کاریم کرینے۔ بھاز جاگہ نن اُرن کہ وخت اس اسے بلوچ خوانندہ اس بیگواہ کننگ مریک گڑا ایلو خوانندہ پاکستان نا تروک آ اندا بیانیہ نا بنماس آ اندا بیگواہ خوانندہ کن ہچ توار ارفپسہ، انتے کہ او اندا باور کرینو کہ دا بیگواہ آ خوانندہ الّمی سرکار نا برخلاف کاریم اس کرینے ولے ایلو دے اندا خوانندہ نا جند وخت اس بیگواہ کننگ مریک گڑا اودے سما تمک کہ غلام انگا چاگڑد ٹی زور آور نا برخلاف گڑاس کننگ نہ کننگ نا خواست اف، بس تنیا غلام انگا راج تون نا تعلق نے زور آور نا ظلم تا گواچی کننگ کیک۔ کُل آن مست ننے اندا کالونیل بیانیہ آن پیش مروئی ارے و دا سرپد مروئی ارے کہ بلوچ خوانندہ تا بیگواہ مننگ “کالونیل بے دادی” نا بشخ ءِ۔ کالونیل بے دادی اندا خاطر مریک کہ نن پاکستان نا غلام ارین و دا کالونیل بے دادی ہمو وخت اسکا برجاہ سلیک ہرا وخت اسکا بلوچستان نا زی پاکستانی کوزہ برجاہ ءِ۔ داسکا پاکستانی کوزہ بلوچستان نا زی برجاہ ارے، دا نیام ٹی بلوچ خوانندہ آک گڑاس کیر یا کپس بیگواہ کننگ و پاکستانی زوراکی تا آماچ مریرا۔

!شرفمند آ خوانندہ آک

داسا سوج دادے کہ دا است انگا جاور ٹی بلوچ خوانندہ تے انت کروئی ارے؟ نن اندا سرپد مرینہ کہ کُل آن مُست بلوچ خوانندہ آک کالونیل بیانیہ آن پیش مریر، او کالونیل ازم و کالونیل بے دادی نا جند ءِ پوہ مننگ نا کوشت کیر۔ وخت اس کہ نن کالونیل بیانیہ و بے دادی ءِ سرپد مرینہ گڑا کم از کم نن اونا بے بنماس انگا بیانیہ تیان رد تمپنہ۔ و ہر گم و بیگواہ انگا بندغ نا دڑد ءِ تینا دڑد سرپد مرینہ، و تینا جند نا بیگواہ مننگ آن مُست ایلو تا بیگواہی نہ برخلاف توار ارفینہ۔ داڑتون اوار است انگا وخت نا ارٹمیکو خاص انگا خواست پاکستانی ظلم و زوراکی تا برخلاف اسے جاگہ مننگ و جہد کننگ ءِ۔ دانا مثیال دادے کہ اینو نا وخت ٹی بیگواہ آ بندغ تیکن اوفتا خاہوت، سنگت یا ہمو تعلیمی ادارہ تون تفوک آ خوانندہ برانز کننگو ولے دا ہیت ءِ سرپد مننگ افن کہ کالونیل بے دادی تنیا اسٹ خاہوت، اسے علاقہ، اسے تنظیم و پارٹی نا خاطر مفس آ دا تیوہ غا بلوچ راج نا ویل ءِ۔ ہر بلوچ کالونیل زوراکی تا آماچ ءِ و آماچ مننگ ءِ۔ کالونیل زوراکی تا برخلاف اشتماعی جہد نا خواست ءِ۔ وخت اس خوانندہ اس خضدار آن بیگواہ کننگ مریک گڑا تربت نا خوانندہ تینا واری نا کسر اُروک مف ولے اونا بیگواہی نا برخلاف توار ارفیر۔ اشتماعی جدوجہد طاغت ءِ پک کیک، بلوچ خوانندہ تے تینا اندا طاغت ءِ سرپد مروئی ارے۔ دا سیوت نا اسے مثیال اس نن دُن ارفن کہ گدرینگوک آ دے پنجگور نا کسر آن اسے خوانندہ اس بیگواہ کننگ مس، بس ٹی تولوک ایلو مخلوق بیدس فرخ و درک آن دا خوانندہ ءِ تینا سرپد مسر و اونا بیگواہی نا برخلاف برانز کریر۔ بس آن دڑینگیرہ و کسر ءِ بند کیرہ۔ اندا برانز نا سوب پاکستانی فوج بیوس مریک و خوانندہ ءِ یلہ کیک۔ ایلو مثال دادے کہ پنجاب یونیورسٹی لاہور آن اسے بلوچ خوانندہ نا بیگواہی نا خلاف ہمو جاگہ نا خوانندہ دوانزدہ دے ہمو یونیورسٹی ءِ بند کیک، داڑے ہم پاکستانی ڈھکوک ادارہ و فوج بیوس مریک و خوانندہ ءِ یلہ کیک۔

!بلوچ خوانندہ آک

دا نما اشتماعی جدوجہد نا طاغت ءِ۔ نمے تینا اندا اشتماعی طاغت ءِ سرپد مروئی ارے و اوار جدوجہد کروئی ارے۔ تینا بیگوائی نا واری کن کسر اُروک مروئی اف ولے بلوچستان نا ڈیہہ نا ہرا علاقہ آن بلوچ اس بیگواہ مریک گڑا جھالاوانی و سروانی اُروئی اف، نہ کہ مکرانی و سلیمانی اُروئی ءِ، ولے بلوچ مننگ و ایلو تینا راجی آ بندغ نا دڑد تون اوار مروئی ارے، و تینا گم و بیگواہ تا خاطر اوار مروئی ارے و توار ارفوئی ارے، کسر و علاقہ بند کروئی اریر، راجی حوالکاری میڈیا ٹی توار ارفوئی ارے، پاکستان نا ظلم و زوراکی تا برخلاف لکھوئی ارے، ہر وڑ انگا کسر اس مرے تینا وس و واک تون زور آور نا برخلاف سلوئی ارے۔ ننا اشتماعی جدوجہد نا طاغت بلوچ سرزمین ءِ پاکستان نا کالونیل زوراکی تا برخلاف رکھفنگ کیک، پاکستان نا کوزہ ایسر کننگ کیک و بلوچ ءِ اسے خوشحال ءُ زند و سرڈغار اس تننگ کیک۔

بلوچ خوانندہ تا جہد زندہ مرے
بلوچستان آجو مرے

:چھاپ و شنگ
سگار پبلی کیشنز
بلوچ اسٹوڈنٹس آرگنائزیشن آزاد