ابرمی شرتگ، ھور ءُ ھار ءُ بلوچ مہلوک

!بلوچ راج

بلوچستان ءِ سرءَ پاکستانی ایردستیءَ پد بلوچ راج آئیءِ جِتائیں شکلانی زوراکیانی آماچ اِنت ۔بلوچ مہلوکءِ گار ءُ بیگواہیءِ مزنیں جیڑہ بہ بیت یا کہ آیانی ھلک ءُ ھنکینانی سرءَ پئوجی مزن مزنیں آپریشن بہ بنت۔ بلئے اے وھدءَ بلوچ مہلوک ابرمی شرتگ ءُ توپانیں ھور ءُ ھارانی تباہیءِ زدءَ اِنت، کہ چرے ھور ءُ ھارانی تاواناں بلوچستان ءِ مزنیں ھَند ءُ دمگے اسر مند بوتگ۔ بازیں لوگ ءُ جاگہ آپءَ برتگ اَنت ءُ بازیں مردمے بیران بوتگ۔ دنیاءِ تہءَ موسمءِ مٹ ءُ بدلی کاینت، بلئے موسمءِ مٹیءِ سوبءِ توپان گیشتر ایردستیں مہلوکءِ ھند ءُ جاھاں اسرمند کن اَنت(چوش ھم نہ اِنت کہ آزاتیں ملک ءُ مہلوک اسرمند نہ بنت، بلئے زندمانءِ آسراتیانی سوبءَباز کم) توپانیں ھور ءُ ھارانی زدءَ آہگ ءُ تاوان بار بوگءِ مستریں سوب راجی ایردستی اِنت کہ ایردستیں راج ءُ مہلوک چہ زندمانءِ بنکی آسراتی ءُ راھبندءَ زبہر بیت کہ چرائیءِ آسرءَآ بازیں جنجالانی دیمپان بیت۔ مرچی چہ بیلہءَ بگر داں ڈیرہ جاتءُ بلوچستانءِ ایدگہ دمگاں کل ھما مہلوک ھار ءُ ھیروپانی آماچ اِنت کہ چہ پیسرءَ نہ آیاں شریں گسے پہ نندگ بوتگ ءُ نئیکہ گہیں زندمانے۔ پدا ڈیرہ گازی ھانءِ شہرءِ تہءِ ھما دمگ چوشکہ سوکڑ منگروٹہ ، ھوار دگہ بازیں جاہ اے ھاترءَ ھارءِ آماچ بیتگ اَنت کہ اودءَ پاکستانءَ وتی کارجاہ (فکٹری) آنی رکّینگ ءِ ھاترءَ کورانی دیمءَبلاھیں بَند بستگ کہ آئی ءِ سیمنٹ ءِ کارجاہ ، سرکاری کریش پلانٹ ، اٹامک ءُ ایدگہ کارجاہ تاوان مہ ور اَنت، ءُ کورانی ھارانی کشک گوں بلوچ مہلوکءَ کتگ۔ پمیشکہ ھمے یکیں ھندءِ ھور سرکاری کارجاھاں تاوان نہ دنت بلئے پہ بلوچ مہلوکءَ تباہی یے جوڑ بیت!

!بلوچ مہلوک

زورگیر مدام چہ ھرچونیں جاوراں پہ ایردستیں مہلوکءِ کُشگ ءُ جنگ ءُ آئیءِ ڈیھءِ مڈیانی پُلگءِ ھاترءَ موہ لوٹ ایت، کہ کجا ءُ چے پیمءَ وتی تاکتءَ ایردستءِ سرءَ کارمرز بہ کن آں، چوشکہ بلوچ چہ یک انچیں دمگےءَ سیادی داریت کہ اودءَ مدام ابرمی شرتگ ءُ توپان اتکگ ءُ کاینت کہ چرایانی سوبءَ بلوچ مہلوک باز تاوان بار بوتگ، ءُ زورگیرءَ چوشیں جاوراں گیش موہ چست کتگ ءُ بلوچ چکچینی کنگ ءُ گہگیریءِ دیمءِ دارگءِ ھاترءَ نیزگاریں مہلوکءِ کمکءِ نامءَ وتی زلم ءُ زوراکیانی تہءَ گیشی آؤرتگ،ایشیءِ یک مزنیں درورے 2013ءَ آوارانءِ پئوجی آپریشن اِنت، کہ چرائیءِ سوبءَ سرجمیں دمگ تاراج کنگ بیت۔ ءُچوشیں نوبتاں میاں استمانی مالی کمک پاکستانءَ پہ بلوچءِ چکچینیءَ گیش کمک کن اَنت، چوشکہ گوستگیں یکیں ھپتگءِ میانءَ چہ میاں استمانی گَل ءُ مالی ادارہانی نیمگءَ پاکستانءَ را چہ پنجاہ کروڑ ڈالرءَ گیش دیگءِ جار جنگ بوتگ کہ ایش پہ بلوچ مہلوکءَ یک مستریں ترسے جوڑ بیت۔ چےءَ کہ پاکستانی اکانومیءِ دار ءُ مدار گوں آئیءِ پئوجءَ بندوک اِنت، ءُ پاکستانی پئوج چرے زر ءُ مالاں وتی زلم ءُ زوراکیءَ گیش ترندتر کنت، ما گنداِیں کہ ھروھدءَ کہ پاکستانءَ چہ میاں استمانی گل ءُ مالی ادارہانی نیمگءَ مالی کمک رستگ گڑا آئیءِ لٹ ءُ پل ءُ زلم ءُ زوراکیانی تہءَ گیشی اتکگ۔

!بلوچ راج

چہ پاکستانءِ زورآوریءِ سوبءَ بلوچءِ زند جتائیں جنجالانی آماچ اِنت۔چوشکہ چیزے وھدءَ پیش ڈیرہ بگٹیءَ سوئی ءِ دَمگ پیر کوہ ءَ آپءِ ڈکالے اتکگ ات، چہ بے آپی ءِ سوب ءَ بازیں مردمے بیران بوت، اودءَ ھم گُشگ بوت کہ ادءَ بور جنگ نہ بیت ءُ آپ در نئیت۔ادءَ ھور ءُ ھار ءُ آپ نہ بیت ھم بلوچ مر ایت ءُ اگاں ھور ءُ ھار ءُ آپ بیت ھم بلوچءِ آکبت مرگ جوڑ اِنت۔ نوں ادءَمارا اے توپانانی سوب چہ ابرمی شرتگءَ گیش وتی ایردستی سرپد بوگ ءُ زانگی اِنت، ءُ بلوچءَپہ وتی ھما زندمانءَ جیڑگی اِنت کہ اودءَ ایمنیں زندے گوازینت بہ کنت، ءُ آ زند گوں بلوچ ڈیھءِ آجوئیءَ بندوک اِنت، ما داں بلوچ راجی آجوئیءِ عمل ءِ سرءَ بیسہ نہ دار ایں یا عملی رنگ ءَ آئیءِ بہر جوڑ نہ بئیں، ما ھر روچ مِر ایں، کدی ھور ءُ ھارانی آماچ بئیں ، کدی زمین چنڈ ءُ کدی دگہ انچیں شرتگےءِ تہءَ کپ ایں۔ بلوچ داں وتی ڈیھءِ وتواجہ نہ بوتگ آ یک ایمنیں زندے گوازینت نہ کَنت۔