قدرتی آفت آک، پِر ، سیلاب و بلوچ مخلوق

!بلوچ راج

بلوچستان نا زی آ پاکستانی قوضہ آن گڈ بلوچ راج جتاء دروشم اٹ زوراکی تا گواچی ءِ ۔بلوچ مخلوق نا بیگواہی نا بھلا جیڑہ مرے یا اوفتا ہنکین آتے ٹی فوج نا بھلا بھلا آپریشن آک مریر، پاکستان نا دا ظلم و زوراکی ہفتاد سال نا سے برجاء ءِ ، دا زوراکی تے کس رد کننگ کپک، ولے دا وخت آ بلوچ مخلوق ابرمی شرتگ و طوفانی پر تا بھس کاری تا گواچی ءِ، دا پِر تا سوب آن بلوچستان نا بھلو زمینی بشخ اس زیمی مسنے۔ باز انگا اُرا و خلق آتے دیر درینے و باز انگا بندغاک ٹُبانو۔

دا راست ءُ ہیت اسے کہ دنیا نا تہٹی مد بدل مریسہ کیک ، ولے مد انا بدل مننگ نا سوب طوفان آن بیوس و مسکین آ مخلوق نا اُرا و ہنکین آک زیمی مریرہ ( دن ہم اف کہ آزات انگا ڈیھ و مخلوق گواچی مفک ، ولے زند انا آسراتی تا سوب بھاز مچٹ گواچی مریرہ) ۔ داسا داڑے دا سوچ خلوئی ءِ کہ طوفانی پر تا پلویڑ اٹ بننگ و تاوان تہ گواچی مننگ نا بھلا سوب راجی غلامی ءِ۔ اندن کہ نن ہُرنہ دا وخت آ بلوچستان نا ہمو مخلوق دا پر تا گواچی مسنے ، گڑا او تینا مش و دمگ یا تینا ہنکین و جاگہ آتیان ہمپ بِٹ کرینو و ایلو علاقہ و ہنکین آتیا ہنانو ،ولے غلامی نا سوب بلوچ نا اُراک اندنو کہ کڈ و گدان ءُ او ایہن ہم چنکا چنکا پر و تہو تیان تمرہ ۔دانا مثیل اٹ اندن کہ نن ہرن دا وخت لسبیلہ نا خڑک آ آباد مخلوق یا کہ کوہلو و بلوچستان نا ایلو علاقہ آتا لڑ و بار کروک آ مخلوق مرے۔ دا مخلوق وختی آن پاکستانی فوج نا ظلم و زوراکی تا گواچی ءِ ، مخلوق تینا جند انا ہنکین آتے یلہ کرینو و لسبیلہ کون آ علاقہ ٹی بیوسی ءُ زند اس گدریفنگ ءُ۔

داڑان بیدس دےٹک بلوچستان اندن کہ کوہ سلیمان یا ڈیرہ جات نا بھاز آ علاقہ غاک ہندن پر تیان بھس مسنو ۔کوہ سلیمان نا بھاز انگا جاگہ غاک تمن قیصرانی، تمن لغاری ، تمن کھوسہ تون اوار پین ہم گیشتر علاقہ اریر اوفک ہم دا طوفان نا پلویڑ اٹ بسنو۔ دا ہمو مخلوق ءِ ہرا مالوان غلامی نا خاخر ٹی ہشنگانے۔ ہندن ڈی جی خان شار نا علاقہ غاک سوکڑ منگروٹہ تون اوار پین چندی جاگہ غاک ہندا طوفانی پر تیان بھس مسنو ہراڑے پاکستان تینا فیکٹری تے رکھنگ نا سوب آن بھلو بھلو بند تفینے تاکہ اونا سیمنٹ نا فیکٹریک ، سرکاری کریش پلانٹ ، اٹامک و ایلو فیکٹری نسخان ارفپس، ہندا سوب آن مچ کور و ڈیم آتا مون بلوچ مخلوق نا کنڈا ٹے۔ داڑے دا سوج ارفنگ مریک کہ ہندا اسٹ انگا علاقہ ٹی پر سرکاری جاگہ آتے نسخان تفک ولے بلوچ راج اکن انتئے اسہ بھس کاری اس جوڑ مریک ؟

!بلوچ راج 
دا اسہ گواچن ءُ ہیت اسے کہ پاکستانی زوراکی تا سوب بلوچ ہر وڑ اٹ کہنگ ءِ۔ ہندن پاکستانی ظلم و زوراکیک ہندن کہ بلوچ مخلوق نا زوراکی ئٹ بیگواہی نا ویل مرے، یا دا وڑ انا پین تدینیک۔ منہ وخت مُست ڈیرہ بگٹی نا علاقہ پیرکوہ ٹی دیر انا نیستی، بے دیری نا سوب آن بھلو مخلوق اس کذیت کرے، اوڑے اندا پاننگ مس کہ ٹیوب ویل خلنگ مفک انتئے کہ دیر پیش تمنگ اف، اگہ پر و دیر مف ہم بلوچ کہیک اگہ پر و دیر مرے ہم بلوچ کن مرگ انا سوب جوڑ مریرہ۔ داسا ننے داڑے دا طوفانی پر تا سوب بھس کاری آن زیات راجی غلامی ءِ سرپد مروئی ءِ۔

بلوچ و بلوچ نا ڈغار مدام زوراکی تا گواچی مسنے، حالانکہ 28 مئی 1998 نا ایٹمی تراک آتے کسس گیرام کتنے۔ اوڑے تولوک آ مخلوق اینو اسکان دا تراک آتا سوب آن زیمی ءِ، اندن بلوچ راج ہر وخت اٹ پاکستانی زوراکی تا گواچی مرسا بننگ ءِ ۔ بلوچ راج ءِ تینا ہمو زند اکن سوچ خلوئی ءِ ہراڑے کہ اسہ پرامن ءُ زند اس گدریفنگ کے ، و ہمو زند بلوچ ڈیھ انا آجوئی تون تفوک ءِ۔ اسکان کہ نن بلوچستان نا آجوئی نا عمل نا زی آ باور تخپنہ یا عملی دروشم اٹ اونا بشخ جوڑ مفنہ، نن کہ ہر وڑ اٹ کہینگ تخوک ءِ، وخت اس پر و سیلاب آتا گواچی مرون ، وخت اس زمین جمب وخت اس اندن انگا سیلاب آتا گواچی مرون ۔ اسکان بلوچ راج تینا ڈیھ انا خواجہ تینٹ مفک او اسہ پرامن ءُ زند اس گدریفنگ کپک۔