اٹھائیس مئی یومِ آسروخ

28 MAY 2021

بلوچ ڈگار چہ وتی جغرافیہءِ سوبءَ دنیاءِ تہا یک ارزشتداریں ملکے زانگ بیت۔ مروچیگیں اہدءَ آئیءِ ارزشت ھاس پہ مگربی ملکاں روچ پہ روچ گیش ودّان انت۔ چوش کہ رودراتکی ملکاں ہما  وہدی ایشیءِ ارزشت زانتگ ات وہدے  کہ برٹشءَ اے  زمین وتی سپری رو آ ءِ کشک جوڑ کرتگ۔ نوں وہدے ایدگہ ملک بلوچستانءِ دریائی ءُ زمینی کشک ءُ راہانی باروا آشنا ءُ سرپد بوت اَنت تاں دنیا ءِ زوراک ءُ سرمایہ داریں ملک بلوچستانءِ تہا پہ سرمایہ کاریءِ ھاترا دیمءِ کنزگءَ پہ لانک اش بست۔ بلئے چوشکہ بلوچ راج بَہ ھیسیتءِ یک زندگیں راجےءَ ابیدء چہ وتی رزا ءُ منشا ءَ نہ زی کسےءَ را وتی ڈگارءِ سرا پہ لٹ ءُ پل ءُ سرمایہ کاریءَ اِشتگ ءُ نئیکہ مرچی۔ چوشکہ پاکستانءَ بلوچءِ ڈگار گوں وتی لشکرءَ پہ زور کبزہ کتگ، پمیشکہ اے خطہ ءِ ایدگہ سامراجیں تاکت پاکستانءِ وسیلہءَ بلوچءِ زمینءِ سرا سرمایہ کاری ءِ واھشتءَ دار انت۔ بلئے دومی نیمگءَ بلوچ راج پاکستان ءُ ایدگہ سامراجیں تاکتانی دیمءَ چو البرزءَ اوشتاتگ۔ پمیشکہ پاکستان ءُ ایدگہ سامراجیں ریاست گوں مزن مزنیں ٹیکنیکل اسِلاہاں بلوچءِ ڈگار ءُ لس مہلوکءِ چکچینیءَ کنگءَ انت۔ ھمک روچءِ ھسابءَ بلوچ مہلوکءَ کسان ءُ مزنیں کیمیکل بمب ءُ ٹوپانی بلوچ سرزمینءِ ھیاتیات زندگیءَ را تابکاریانی ارجان جنگءَ انت ءُ دومی دیمءَ بلوچ سرڈگارءِ کدرتی گنج ءُ مڈیانی لٹ ءُ پلءَ کنگءَ انت۔ 28 مئی 1998 بلوچءِ گلام دارگءِ سیاہ تریں روچاں چہ یکے پرچہ کہ اے روچءَ زورگریں استان پاکستانءَ بلوچ سرڈگارءَ وتی گیشتر گلام دارگءِ ھاترا چاغیءِ دلبندءَ ایٹمی تراک کرتگ۔

 بلوچ راج۔۔۔

مرچیءَ چہ 23 سال پیسر پاکستانی ریاستءَ بلوچستانءِ الاکہ چاغیءَ ایٹمی تراکے کت، سال 1998 ءَ وھدے پاکستانءَ بھارتءِ جوہری تراکانی پسّہ دیگءِ جار جت، گڑا امریکی سیٹلائٹ آنی چار ءُ بیچارءَ چہ راسکوہ دیمءَ اتک کہ جوہری تراک اے جاہءَ کنگ بہ بیت، چوشکہ اے وھداں امریکی صدر بل کلنٹن انت آئیءَ اے جاہءَ تراک کنگءَ باز مکن کت، آئی پاکستانءَ را جوہری تراکانی بیمناکیں تباہی ءِ تاوان گشت انت، پاکستانءَ پہ ھرچ ڈولیں کمکی جار جت۔ بلئے پاکستانءَ چوشکہ بھارتءِ پسہ دیگی ات، بلوچءِ ڈگار بلوچءِ بزگریں مہلوکءِ زندمانءِ پکر چونہا آئیءَ نیست ات، پمیشکہ ایردستی ءِ کہراں چہ آس ءُ جَسیں بلوچستانءِ دمگ چاغیءِ زمین آئیءَ گچین کت ءُ 28 مئیءَ شش مزنیں تراک کت، ہمے جوہری تراکءِ تابکاریانی سوبءَ مہلوک، زندمان ءّ ھیاتیات وڑ وڑیں نادراہ ءُ التانی آماچ بوت۔ پرچہ کہ ہمے جوہری تراکءَ چہ آئیءَ اے دمگءِ سرسبز ءُ شادابیں کوہ ءُ کہچراں بگر داں مردم ءُ ایدگہ ساھداراں بیا دراہ ویرانداں کرت انت۔ راسکوہءِ مزنیں بالاد گوں جوہری تراکاں داگ دار جوڑ کرت، اے دمگءَ انچیں تہہ آپی یے آورت کہ ہچبر موسمءِ توکءَ چوشیں ڈکال پیسرءَ نہ یتکگ ات کہ چریشیءَ چہ راسکوہءِ زید ءُ کہچر ءّ دلوت ہر دو مرت انت، بلئے جہندم چہ ایشاں بلکیں آزمانی چرند ءُ پرند چہ بالءَ کپت ءُ مرت انت، ہزارانی ھسابءَ مردم شومک(کینسر) ءِ ڈولیں مزنیں نادراھیانی آماچ بوت انت ، تاں روچء مرچیءَ اودءِ ودی بووکیں چُک جتا جتائیں نادراھیانی آماچ بنت۔ اگاں میاں استمانی “آئی اے ای اے” (International Atomic Energy Agency ) ءِ ڈولیں ادارہاں وتی پٹپولی ٹولی بہ ٹھینت ءُ ادءِ مہلوکءِ چار ءُ بیچارءَ پہ دیم بہ دات ایں تاں زانگ بوتگ ات کہ پاکستانءِ اے جوہری تراکءَ چہ ادءِ آب ءُ ہواءِ چنکسیں مزنیں مٹے اتکگ ءُ ھیاتیاتی زندگی چہ کدءَ مرگ آماچ بوتگ۔

بلوچ پسگاں۔۔۔

دنیاءِ سامراجیں تاکت پہ وتی سرمایہ کاریءِ گیش شاھگان کنگ ءُ مھکم کنگءِ ھاترا پاد لانچ اتگ  انت ءُ دیما جنزان انت، اے وھداں آھانی چم ھما سرڈگاراں سک انت کہ آھانی تجارتی راہ ءُ دَر پہ آھاں نزیک تر ءُ پائیدگ مند تر انت، اے جاور پہ ایردست ءُ گلاماں یک ترسناک ءُ تباہیءِ اھوالءَ چہ ابید دگہ ھچے نہ یے۔ چونھا ایردستیں مہلوکءَ پہ گلامی یک بلائیں تباھی یے بلئے چوشکہ مرچی ایں جھانی جنگءِ تب ءُ جاور باز جتا بوتگ انت۔ پہ ھمے ھاترا یک ایردستیں راجےءِ بستارءَ ما بلوچ پاکستان ءُ ایدگہ سامراجیں تاکتانی پلان ءُ پالیسیاں سرپد بوان بِہ اِیں۔ سامراجءِ ھمک تباھیانی ھاترا وتی راجءَ را آگاہ بہ کن ایں۔ دری سامراج کہ وھدے ایدگہ نزوریں مہلوک ءُ ڈگارانی سرا ایردست بنت گڑا آ وڑ وڑیں پندل ساز انت۔ بازیں وھداں آ وتی سرمایہ کاریءِ کارتوتاں انچو پیش دار انت کہ ایردست آھاں وتی راج ءُ ڈگارءِ وشیں  باندات سرپد بنت۔ بلئے ھمے ٹگیءِ رژناھی پہ ایردستءَ جور ءُ کلپ جوڑ بنت۔

بلوچ مہلوک۔۔۔

1948 ءِ پاکستانءِ زوریں کبزہءَ بگر داں مرچی پہ بلوچءَ ھمک روچ چو 28 مئیءَ یک سیاھیں روچے۔ بلوچ سرڈگار ءُ مہلوکءَ اے دورانیہءَ چوشیں بے کساسیں روچ دیستگ ءُ ہزاراں رنج سگ اتگ، اے جنگءَ مرچی بلوچ انچو توانا کتگ کہ پہ آئیءَ نوں سامراجءِ زوراکی ارزشتے نہ دار انت۔

مرچی یک نیمگے پاکستانی ریاست ھمک روچءِ بنیاتءَ بلوچءِ نسل کشیءَ کنگءَ انت ءُ دومی نیمگءَ پاکستانءِ زَرھوریں کاسگ چٹ ، نامی ایں راجی قوم پرست پاکستانءِ زلم ءُ زوراکیانی پلہ مرزیءَ اوشتاتگ انت،  زوراکیانی پشتءَ مکاریءِ سیاست کنگءَ انت، پاکستانی زورگیریءَ توانا کنگءِ جھدءَ انت، بلوچ وتواکی ءُ راجی آجوئیءِ جھدءَ را پروش دیگءِ ھاترا لانک بند انت، بلئے بلوچ مہلوکءَ اے سرپد بوگی انت کہ مئے راجی بقا ، مئے پر ایمن ءُ وشھالیں راجی باندات بلوچستانءِ آجوئی انت، تا کہ بلوچ یک راجی تاکتےءِ بستارءَ اے دمگءَ ایدگہ سامراجی تاکتانی دیمءَ وتءَ منارینت مہ کنت، گڑا سامراجیں تاکتانی زوراکی ترندءَ چہ ترند تر بوت کن انت، پمیشکہ جہہ جن اِت کہ بیگواھیں راجانی لڑ ءَ چیر مہ تر ات۔ وتی ھوسلہ ءُ جزبہ مھکم کنگی انت، وتی آووکیں پدریچ ءُ راجی آجوئیءِ ھاترا وتی مرچیءِ کربان کنگءَ جاڑی بیگی انت۔

شنگ ءُ تالان
بلوچ اسٹوڈنٹس آرگنائزیشن آزاد