بلوچ دود ءُ ربیدگی روچ

!شرپداریں وانوکاں

دنیا ءِ ھمک زندگیں راج جتائیں ربیدگانی واھند بنت، کہ آ ربیدگ آیاں چہ ایدگہ دری راج ءُ زورآوریں راجانی ربیدگ ءُ پجّارءَ جتا کن اَنت ءُ آیاں جتائیں راجی پجار دینت۔ دود ءُ ربیدگ ءِ تہءَ یک راجے ءِ زند گوازینگ ءِ سرجمیں تک ءُ پہنات ھوار بنت کہ آ ھما راج ءَ زند گوازینگ ءِ یک جتائیں سکینے دینت ءُ آئیءِ راجی پجار ءَ چہ دومی راجاں جتا کن اَنت۔ پہ زندگ بوگءِ ھاترءَ ھمک راجےءِ سرءَ اے المی اِنت کہ آ وتی دود ءُ ربیدگاں بہ پہریز اِیت، ءُ ھاسکار پہ یک گلامیں راجے ءَ دو ھمینکس اژدری اِنت کہ آ وتی راجی ھستمانءِ کلیں شے آنی پہریزءَ بہ کنت، تاکہ دومی دری راجانی ربیدگی رَد یا تاواندہیں ربیتانی اسر ھما راجءِ سرءَ مہ کپ اَنت، ءُ ھما راجی ربیدگءِ بے گواہیءِ گُمان پیداک مہ بنت۔ یک گلامیں راجے ءَ اگاں وتی دود ءُ ربیدگ شموشت اَنت ءُ راجءِ مہلوک چہ وتی ربیدگاں بے سما بوت گڑا زوت بیت یا کہ دیر آ چہ وتی راجی پجارءَ اوں زبہر بیت۔ بلوچ ءِ جتائیں ربیت، زند گوازینگ ءِ جتائیں تک ءُ پہنات، جتائیں تب ءُ میلءُ جتائیں راجی سنچ ءُ سمایاں اے دمگءَبلوچ راجءَ یک جتائیں راجےءِ بستارءَ ناں تہنا زندگ داشتگ بلکیں شعوری بستارءَ ھمینکس مہکم داشتگ کہ آ پہ وتی ڈیھ، زبان، ربیدگ ءُ راج ءُ مہلوکءِ ھاترءَ گہگیری کنگءَ اِنت۔

!بلوچ راج

دنیا ءِ بُندپتر اے گپ ءِ گواہی ءَ دنت کہ کجام ھم زورآوریں تاکتےءَ مہکومیں راجے ءِ ڈیھےءِ سرءَ کبزہ کُتگ گڑا آئیءِ ایدگہ راجی ھستانکیءِ شے آں ھوارآئیءِ دود ءُ ربیدگ لگتمال کُتگ اَنت۔وتی سرجمیں کوشست کتگ کہ ایردستیں مہلوک وتی راجی ربیدگاں یلءَ بہ دنت ءُ منی ربیدگانی بنیادءَ زند بہ گْوازین ایت، پمیشکہ زورآورءَ مدام ایردستانی ربیدگ جہل جتگ اَنت، آھان ءَ بےتہذیب گُشتگ ءُآہانءَ اے باور کنائینگءِ کوشست کتگ کہ شمئے دود ءُ ربیدگ سکیں سِلّیں یا کہ جناوری دود ءُ ربیدگے، چہ آھانی زہن ءَ راجی سماءِ ھلاس کنگ ءُ ولگوج کنگءِ ھاترءَ جہد کتگ۔ربیدگی تشدد (کلچرل وائیلنس) ھمک یک تاکتوریں زورآورےءِ تاکتءِاولی سِلاہ بوتگ کہ تاں مرچیءَکارمرز بوگءَ اِنت ، مرچی ما گنداِیں کہ دنیا ءِ جتائیں جاھاں مارا نیوکالونیل ملکانی دود ءُ ربیدگ ءُ تب ءُ میل گندگ پیداک اَنت، آہانی مکسد ایردستیں راجانی ربیدگاں لگتمال کنگ ءُ آھانی بدل ءَ زوراکیں راجانی ربیدگانی دیم ءِ آرگ اِنت، گلامیں راجے ءَ وھدے وتی دود ءُ ربیدگ شموشت اَنت گڑا آئیءِ تہءَ گہگیری کنگ ءِ سوچ ھم ھلاس بیت ءُ آ کبزہ گیرءِ ھمک زوراکیءَ ھُدا ءِ بکشاتگیں آپتے سرپد بیت بلے باشعورءُ زندگیں راجانی مہلوک اے ردءَ جہد کن اَنت ءُ دژمن ءِ ربیدگی تشدد(کلچرل وائیلنس) ءِ ھلاپ ءَ ربیدگی آشوب کاراَنت، بزانکہ دژمن مئے ھمک ھما شئے ءَ کہ ھلاس کنگ لوٹ اِیت، ما گیشا گیش ھمائیءِ مہکم دارگءِ جہدءَ بہ کن اِیں۔ ھمے سوَب ءَ چہ مرچیءَ سینزدہ سال پیسر بی ایس او آزادءَ اے پیسلہ کتگ کہ بلوچ پہ وتی ربیدگءِ زندگ دارگءِ ھاترءَ ھمک سالی مراگشءِ اڈّ دیگءَ ھوار ءُ یک ھاسیں روچےءِ نامینگءَ ھوار جتائیں دروشماں جہد کنت۔ چیا کہ اے وھداں پاکستان بلوچ ورناہانءَ جنگ ءُ کُشگ ءَ ھوار بلوچ ءِ ھلاپ ءَ ربیدگی تشددھم بنا کتگ کہ آئیءِ ردءَ بلوچ ورناہانی ٹوھیں شلوارانی مگرازءِ سرءَ چنگ بنت، دومی نیمگ ءَ بلوچ زالبولانی زورانسری آوار جنگ، بلوچءِ لج ءُ گیرت ءُ میارانی پادمال کنگ ءُھمک ھما شئے کہ آبلوچءِ ربیدگانی بہر اِنت پاکستانی پوج گوں ترندیءَآئیءِ تباہ کنگ ءِ جہد ءَ اِنت۔بلوچ ءِ ھلاپ ءَ کبزہ گیر ءِ ربیدگی تشدد تاں مرچیءَ برجاہ اِنت بلے مرچی آئیءِ شکل چہ زیکءَ کمو باز جتا اِنت ، مرچی آئیءِ پوجی لشکر وت مزنیں شلوار پادا کن اَنت ءُ پاگ سرءَ کن اَنت، بزانکہ ما ھم بلوچ ءِ ربیدگءِبہر اِنت، بلے راستی ایشیءِ سرجم چپ اِنت، چوشکہ مرچی بلوچستان ءِ جتائیں کُنڑاں مئے مات ءُ گوھار برگ ءُ زندانی کنگ بوگ ءَ اَنت، کماش بے شرپ کنگ بوگ ءَ اَنت ءُ پیر زال دگانی سرءَ وتی بیگواھیں بچانی ھاترءَ در پہ در اَنت۔چوشیں جاوراں بلوچءَ لوٹ ایت کہ آ ربیدگی تشدد ءِ ھلاپ ءَ وتی دود ءُ ربیدگانی زندگ دارگ ءِ ھاترءَ پاکستانی کبزہ گیریں استانءِ ھلاپ ءَ جہد بہ کنت۔

!بلوچ پُسگاں

استیں وھدءَ پہ بلوچ راج ءَ اژدری اِنت کہ آ وتی ربیدگانی پاہازگءَ گوں مہکمیں جہدے ءَ بہ کنت ءُ آہانی پاہازگءِ ھاترءَ برجائیں راجی جنز ءَ ھوار بہ بیت پرچا کہ کبزہ گیر ءَ اے پیسلہ کُتگ کہ بلوچ راجی سنچ ءُ سماءُ آئیءِ راستیں دود ءُ ربیدگ ءَ ھلاس بہ کنت، پرچا کہ تاں ھما وھدءَ کہ یک راجےءِ تہءَ آئیءِ راجی سنچ ءُ سما ءُ وتی ربیدگانی زندگ دارگءِ پکر ءُ سوچ مہکم بوت گڑا ھچ پیمیں دنیائی تاکت چوشیں راجانی ربیدگاں ولگوج کت نہ کنت۔ اے وھدءَپاکستان ءِ مستریں کوشست ھمیش اِنت کہ بلوچ راجی ربیدگءَ ردیں شکلے بہ دنت۔ ءُ ما دود ءُ ربیدگ ءَ تہنا پاگ ءُ مزنیں شلوار ءُ بلوچی چوٹءِ ہدءَ بندوک مہ کن ایں، راستے کہ مٹیریل ربیدگ بزانکہ مئے پچ ءُپوشاک یامزنیں شلوار مئے دود ءُ ربیدگءِ بہر اَنت بلے مئے سرجمیں دود ءُ ربیدگ ایش نہ اَنت بلکیں سرجمیں دود ءُ ربیدگ ءِ تہءَ وتی راجی ھستانکی(بقا) ءِ ھاترءَ جہد کنگ،چہ وتی ڈیھءَ درامدانی کشگ ءُ وتی راجی سنچ ءُ سماءُ ربیدگاں زندگ دارگ کہ ایش کلیں شے مرچی چہ پاکستانی کبزہ ءِ سوَب ءَ ترسءِ تہءَ اَنت۔ ھمے ترس ءِ سوَب اَت کہ وھدے بی ایس او آزادءَ 2 مارچ بلوچ ربیدگی روچ نامینت ءُ ھمے روچءِ درگتءَ خضدارءَ ربیدگی مراگشے اڈّ دات گڑا ھمے مراگشءِ سرءَ استانی ناشرکاریں ٹولیاں اُرش کت کہ چرائیءِ آسرءَ دو بلوچ ورنا سکندر بلوچءُ جنید بلوچ پہ بلوچ راجی ربیدگءِ زندگ دارگءِ ھاترءَ ابدمان بوت اَنت۔ ءُ بلوچ مہلوک ءُ ھاسکار ورنایانءَ وتی تہءَپہ بلوچ ڈیھءِ آجوئیءِ ھاترءَ کربانی دیگءِ جوزگ پیداک کنگ لوٹ اِیت، کہ چرائیءَ اے دمگءَ بلوچ یک زندگیں راجےءِ بستارءَ زندگ بوت کنت۔

بلوچ اسٹوڈنس آرگنائزیشن آزاد