بیست و سئے میکو بنجاہی کونسل سیشن نا ارٹمیکو دے ئنا احوال

یونی پولر ورلڈ آرڈر پولی سینٹرک ورلڈ آرڈر ٹی بدل مننگ ءِ، بلوچ راجی تحریک ءِ خاص ڈیہہ و ہند آتا جاگہ غا سفارتکاری نا عمل ءِ تیوہ جہان ئٹ تالان کننگ مرے۔

کونسلر آک

بلوچ اسٹوڈنٹس آرگنائزیشن آزات نا بنجاہی ترجمان کونسل سیشن نا ارٹمیکو دے ئنا احوال میڈیا ٹی شینک کریسہ پارے کہ بلوچ اسٹوڈنٹس آرگنائزیشن آزات نا بنجاہی کونسل سیشن بیاد لمہ وطن بانک کریمہ بلوچ و شہدائے آجوئی و بلوچ اسیران آتا پن ئٹ اڈ تننگانے

بی ایس او آزات نا بیست سئے میکو بنجاہی کونسل سیشن ئٹ ہشت ایجنڈا نا زی آ شرہ مرو ہراٹی بنجاہی کماش نا تران، آئین سازی، سیکرٹری رپورٹ، نغدکاری دیوان، تنظیمی ویل، جہانی و علاقائی سیاسی حالیت، بروکا وخت ئکن عمل نا گچین کاری، الیکشن و کماش نا گڈیکو تران نا ایجنڈا غاک اوار ءُ۔ 17 اپریل دو شمبے نا دے ئکن دیوان نا اولیکو مجلس کماش نا تران، آئین سازی، سیکرٹری رپورٹ و نغدکاری دیوان نا ایجنڈا تا زی آ سیر ءُ شرہ ئسے آن پد ایسر مس و اینو 18 اپریل سئے شمبے نا دے ئکن کونسل سیشن نا ارٹمیکو دے تنظیمی ویل، جہانی و علاقائی سیاسی حالیت و آئندہ لائحہ عمل نا ایجنڈا تا زی آ شابیتی شرہ مس ہراٹی تنظیمی کونسلر آک ساڑی مریسہ تنظیمی پروگرام آتا بارو ئٹ تینا خیال تا درشانی ءِ کریر۔

اینو نا مجلس نا کاروائی تا بناء ہر وار ئنا وڑ بلوچ شہید آتا یات ئٹی اِرا منٹ ئنا چپی تون مس ہراڑان پد مجلس نا پنچمیکو ایجنڈا تنظیمی ویل ہرا اِرا بشخ کروک ئس بناء کننگا۔ اولیکو بشخ ئٹ کونسلر آک تینا مکالمہ آتے مونا ہیسر ہرافتے اوفک تنظیمی ویل آتے کن سیکرٹری جنرل نا پاننگ آ تیار کریسر و ارٹمیکو بشخ ئٹی تنظیمی ویل آتے ٹی مونا ہتوک غٹ سَلاہ تا زی آ شابیتی شرہ مس۔

مجلس نا ششمیکو ایجنڈا جہانی و علاقائی سیاسی حالیت آک ئسر ہراٹی کیہی کونسلر آک ایجنڈا نا زی آ جوڑ کروک تینا پرچہ غاتے خوانار بنفیر۔ اوفتا پاننگ ئس کہ جہانی سیاست دے پہ دے بدلی تا عمل آن گدرینگ ءِ و دا لڑ ئٹ روس و یوکرین نا جنگ آن گڈ جہانی سیاسی منظرنامہ بروکا منہ وخت ئٹی تیوہ وڑ ئٹ بدل مننگ آ نظر بننگ ءِ۔ تدوکا اسہ کرن ئسے نا تدینیک ننا دا آزموندہ کن بس ءُ کہ جہانی سیاست ئٹ ہچو اصول، مسخت و مفاد آک مدامی کن مفسہ بلکن وخت ئتون اوار دافتے ٹی بدلی بریسہ کیک۔ ہمو امریکہ ہرا سی سال مست اول طالبان آتون اوار تیوہ جہان ئٹ خاص وڑ ئٹ نیام ایشیا ٹی سوویت یونین نا برخلاف اسلامی تنظیم آتے سوگوْ کرے، اوفتے پوسکن سلہہ تریسہ اوفتا جُوان مالی و سیاسی کمک آن پد تینا تاریخ نا کل آن بھلا جنگ ءِ ہم اوفتا ہی برخلاف کریسہ دوارہ ہنا۔ ہندا وڑ ئنا اسہ معاہدہ اس ننے ہمو وخت نا سوویت یونین و نیٹو یعنی امریکہ نا نیام ئٹ خننگ کن رسینگا ہراتم اوفک جرمنی تون اوار مننگ نا فیصلہ کریر ہراڑے امریکی صدر سوویت یونین یعنی روس فیڈریشن ءِ باور کرفیسس کہ امریکہ نیٹو ءِ دے ٹکی یورپ ٹی تالان کروف ولے سوویت یونین نا بھس کاری آن پد امریکہ زو نیٹو ءِ یورپ ٹی تالان کرے بلکن بالٹک نیشنز آتون اوار یوکرین ہرا کہ روس ئتون مرغنو سیم اس شیئر کیک اوفتے ہم باسک جوڑ کننگ کن امنائی کرے ہرانا سوب آن روس و یوکرین نا نیام ئٹ جنگ بش مسنے ہرا جہانی سیاسی منظرنامہ ٹی یکسر بدلی تا سوب جوڑ مننگ ءِ۔ ہندا وڑ نا مثیل ننے سعودی عرب نا پارہ غان خننگ کن رسینگک، ہراتم عراق کویت آ جلہو کریسہ اِرا دے ئٹی اونا زی آ کوزہ کرے گڑا تینا زی آ جلہو مننگ نا خُلیس آن سعودی امریکہ ءِ سعودی عرب ٹی “سیکورٹی گارنٹی” پالیسی نا رد ئٹ جتا جتا فوجی اڈہ تس ولے برجاء حالیت آتا خواست آتے اُریسہ اوفک ہم تینا چھرک نا مون ءِ بدل کریسہ چین ، روس داڑے اسکان کہ ایران نا وڑ انگا امریکی دژمن ڈیہہ تتون ہم تینا تعلقداری تے نارملائزیشن نا کنڈا ہتنگ ءُ ہرا دا ہیت ئنا شاہد ءِ کہ جہانی سیاسی منظرنامہ ٹی ہچو سمجھوتہ اس گڈیکو اف۔

او پاریر کہ دا حالیت آک بیرہ نیام ایشیا نا افس ہراڑے امریکہ و یورپ نا برخلاف سوچ تالان مننگ ءِ بلکن ساؤتھ ایشیا تون اوار سینٹرل ایشیا و افریقہ نا وڑ انگا خطہ آتے ٹی ہم دےکہی سینٹرک ورلڈ آرڈر نا برخلاف توار بش مننگ ءِ ، یوکرین و روس جنگ آن پد یورپ آن بیدس چندی ڈیھک یورپ تون سیوتی کننگ آن نمن کرینو، بھارتی وزیر خارجہ تینا اسہ انٹرویو اسیٹ پاریسس کہ یورپ ءِ داسہ تینا دا سوچ آن پیش تموئی مرو کہ “جہان نا ویل آک ننا ویل افس و ننا ویل آک جہان نا افس” ، اندا حالیت نیام ایشیا و خلیجی ڈیہہ تا کنڈان ہم خننگ کن رسینگک ہراڑے امریکہ نا فوجی اڈہ غاک ساڑی اریر اندن عرب ڈیہہ تا پارہ غان تدوکا دے تیٹی عراق، ایران و روس نواز حکومت تون اوار گچینو تعلقداری و افریقی ڈیہہ تا پارہ غان چین ئنا کنڈا ہِننگ جہانی سیاسی منظرنامہ ءِ بدل کرینے۔ عرب ڈیھک و نیام ایشیا ٹی سعودی عرب کون آ مسلم ملک آتا کنڈ آن ہرا وڑ انفراسٹریچر ، سیل و سوات، گوازی و بندغی حق آتے اہمیت تننگ ءُ دا بروکا وخت ئٹ یورپ آن انحصار نا ایسری نا سوب جوڑ مننگ کیرہ ہرانا مثیل قطر کون آ مسلم ڈیہہ تیٹی فیفا ورلڈ کپ آنبار انگا بھلا ایونٹ نا مننگ ءِ۔

دا گواچن ءِ رد کننگ خام خیالی ئسے کہ تیوہ جہان آن امریکہ و یورپ آ انحصار ئنا ایسری داخس زو بس منہ وخت ئٹ مننگ کیک ولے دا گمان ءِ رد کننگ مفک کہ برجاء دے تیٹ ہرا بدلیک مونا بسنو اوفتیان دا گمان کننگ مریک کہ جتاء خطہ تیٹ ساڑی تاغت آک امریکہ و یورپ آن تینا خواست آتا پوروْ کننگ کن اوننگ ءِ ایسر کریسہ تینٹ تینا ماملہ تیٹ آزات و تاغتور مننگ خواہرہ۔ روسی و بھارتی وزیر خارجہ نا نیام ئٹ مروک اسہ اوڑدہی اسیٹ جہان ءِ یونی پولر ورلڈ آرڈر نا جاگہ غا Polycentric World Order نا پارہ غا ہننگ کن پاننگا، ہرا نا مطلب ہر ڈیہہ ئنا تینا اسہ یکہ ءُ تاغت و بنجاہ اس مرو ہراڑے تیوہ جہان ئٹ تاغت نا تول بیرہ اسہ ریاست اس مفرو بلکن ہر خطہ ٹی یکہ ءُ اسہ سینٹرل تاغت و فیصلہ سازی نا بنجاہ اس مرو۔ یعنی امریکہ و یورپ آ اوننگ نا جاگہ غا افریقہ، ساؤتھ ایشیا، نیام ایشیا تون اوار ہر خطہ تینا اسہ بنجاہی تاغت اس ٹہیفنگ خواہک ہراڑے او تینا علاقائی ویل آتے ایسر کے انتئے کہ مغرب سینٹرک ورلڈ آرڈر تیوہ جہان ئٹ ودی مروک ویل آتے ایسر کننگ ئٹ بےسہب بلکن بھاز آ خطہ تیٹ جنگ و بھلا ویل آتا بنماس جوڑ مسنے۔
کونسلر آک جہانی سیاسی بدلی نا نظر ئٹ بلوچ سفارتکاری آ ہیت کریسہ پاریر کہ ہر اسہ راجی آجوئی نا جہد ئکن سفارتکاری نا عمل بھاز اہمیت تخک، ہفتاد و سئے ئنا مزاحمت نا وخت بلوچ سفارتکاری نا بنجاہ یورپ آخہ بلکن نیام ایشیا ئس و بلوچ سیاسی باسک آک عراق کون آ ڈیہہ تیٹ رہینگسہ اخبار تون اوار ایلو سیاسی کاریم تے سر تسرہ اندن او وخت ئنا جہانی سیاسی خواست آتا رد ئٹ بلوچ آتیٹ امریکہ و یورپ نا برخلاف ذہنیت ساڑی ئس ولے 2000 ئٹ بش مروک بلوچ راجی تحریک آن گڈ جہان ئٹ حالیت آک تیوہ بدل مسوسر و یورپ بندغی و بندغی حق آتا رکھوک جوڑ مسوسس ہرا نا سوب آن بلوچ سیاسی باسک آک یورپ آ ہنیسہ تحریکی کاریم تے سر تننگ بناء کریر ولے داسہ جہانی سیاسی منظر نامہ ئٹ دوارہ حالیت آک بدل مریسہ خننگرہ اندا خاطران دا حالیت آتیٹ بلوچ قیادت ہم سفارتکاری ءِ یورپ سینٹرلائزڈ کننگ نا جاگہ غا اودے تیوہ جہان ئٹ تالان کننگ نا جہد کے تانکہ بروک وخت آتیٹ اسہ بھلو بدلی ئسے نا دروشم ئٹ بلوچ راجی تحریک بھلا نسخان تا جاگہ غا حالیت آتیان سواد ارفنگ کے و دا تحریک نا سوگوْی و سرسہبی نا سوب جوڑ مرے۔

ایلو پارہ غا کونسلر آک علاقائی سیاسی حالیت آ تینا خیال آتا درشانی کریسہ پاریر کہ کوزہ گیر پاکستان نا کنڈ آن ہراڑے ہڑدے بلوچ ورنا تا زوراکی ئٹ بیگواہی، سی ٹی ڈی نا دو آن دروغ نا مونتس و جشوک جوْن تے خسنگ نا عمل برجاء ءِ ہموڑے داسہ زالبول تے ہم ہڑدے ئی بنداو آ ٹک کننگک ہرا بلوچ چاگڑد نا تہٹی خُلیس ودی کننگ نا اسہ پین بےسہب کوشست ئسے اندن داڑتون اوار کمیشن کلچر ءِ تالان کننگ، ریاستی پالیسی تا رد ئٹ مذہبی شدت پسندی ءِ ترند کننگ و پرائیوٹ اسکول تے اسہ خاص چم ئسے نا وڑ ئٹ تحریک نا برخلاف کاریم ئٹ ہتنگ، جتا این جی اوز تے تیوہ بلوچستان ئٹ ایکٹو کننگ، شرہ کننگ آن بیدس غیر ملکی و لٹ و پل سرمایہ کاری ءِ بلوچستان ئٹ ہتنگ، سافٹ پاور نا کمک ئٹ الس ءِ تحریک آن بدگمان کننگ نا کوشست کننگ و تحریک نا بابت بیرہ پِن ئنا ٹولی تا کمک ئٹ الس ئٹ نا اومیتی تالان کننگ نا کوشست آتون اوار بیدس انقلابی و رد انقلابی تاغت آتیکن جاگہ اِلینگ، دا غٹ کوشست آتا بنماسی مسخت بلوچستان ئٹ تینا کوزہ ءِ برجاء تخنگ نا بےسہب کوشست ئسے۔ دا وخت ریاستی پالیسی تون مون تننگ راجی تحریک نا اہم ذمہ واری تیٹ اوار مرے۔

ششمیکو ایجنڈا نا ایسری آن گڈ سیکرٹری جنرل نا کنڈ آن آئندہ لائحہ عمل نا ایجنڈا تیٹ تنظیمی کونسلر تا کنڈ آن بروک آ اِرا سالہ پروگرام کن تروک سَلاہ تے دیوان ئٹ مونا ہتنگا ہرافتیا کونسلر تا نیام ئٹ شابیت شرہ آن گڈ راجی تحریک و بی ایس او ءِ گیشتر سوگوْ و متحرک کننگ کن کونسلر آتا اکثریتی سَلاہ تون اوار کیہی اہم و المی فیصلہ ہلنگا۔ اندن حالیت آتا نازرکی و وخت ئنا کمبتی ءِ اُریسہ مجلس نا ایسری اجنڈا غاک گچین کاری، کماش نا گڈیکو تران و سوغند دیوان نا کاروائیک پگہ سر تننگور۔