چہ پاکستانی گچینکاریاں دزکشّی چیا الم اِنت؟

بلوچ راج!
انچوشکہ شُما کُل سرپد اِت کہ زورگیریں استان ءَ 8 فروری 2024 ءَ وتگڑیں گچینکاریانی جارجتگ۔ بلوچستانءَ چہ زورگیریں اِستانءِ گچینکاریانی راستیءَ وَ ہرکس سَہی ءُ سرپد اِنت کہ گچینکاریءِ نامءَ چے پیمءَ ڈیتھ اسکواڈ ءُ منشیات پروش استانی آمیدگسءَ دیم دیگ بنت ءُ پدا ھمیش دنیاءِ دیمءَ بلوچءِ راجی جہگیریءِ بستارءَ پیشدارگ بنت، تاکہ یک نیمگے گچینکاریانی نامءِ بنیادءَ ایدگہ دری دنیاءَ اے باور بہ کنائین ایت کہ بلوچستانءِ مردم پاکستانی نظامءِ سرءَ بیسہ دار انت ءُ دومی نیمگءَ وتی داشتگیں ناشریں مردماں سیاسی بستارے بہ دنت ءُ وتی آمیدگسءَ بہ نادین ایت۔ چرے تَہلیں راستیءَ بگندئے کسے اوں نا مہ کنت کہ بلوچستانءَ اے وھدءَ پاکستانی پوج رول کنگءَ انت، پہ بلوچستانءَ دژمنءِ نیمگءَ اے وھداں ھرچینکس کہ پیسلہ زورگ بنت آھاں کوئٹہ کینٹ ءُ اسلام آبادءِ پوجی ادارہ زور اَنت۔ بلئے آمیدگسءَ چندے مردم نادین انت ءُ ھمے بیسہءَ دیگ لوٹ انت کہ بلوچستان چرائیءِ آمیدگسءَ جنزگءَ انت۔ ھمے گچینکاری کہ پرایاں پاکستان وتی سرجمیں زور ءُ تاکتءَ جنگءَ انت کہ ھمے گچینکاریاں اوشتاتگیں مستریں ناماں چہ یکے شفیق مینگل اِنت کہ آئیءِ دست چہ بلوچءِ ھونءَ مین انت۔ پہ پاکستانءَ اے گچینکاری اے واستہ اوں الم انت کہ آ دنیاءَ را بلوچستانءِ سرءَ وتی ناجائزیں کبزہءَ جواز دات بہ کنت۔ اے گچینکاریانی تہءَ بہر زورگ ءِ مراد بلوچستانءَ پاکستانی کبزہءِ منگ اِنت، کجام اوں بلوچ پارلیمانی پارٹی کہ پاکستانی اے سسٹمءِ بہر انت چے پیمیں اوں شکلےءَ آئیءِ دست بلوچ چکچینیءَ وڑے نا وڑےءَ ھوار اَنت۔

باسمائیں بلوچ راج!
پاکستانءِ وتگڑیں گچینکاریاں راجی دزکشی پرے ھاترءَ اوں المی اِنت تاکہ بلوچ مہلوک دُنیاءَ را باور بہ کنائین ایت کہ بلوچ راج اے استانءِ ناجائزیں زورگیریءِ سرءَ ھچ ڈولیں بیسہ نہ دار ایت، بگندئے بلوچ پہ وتی آجوئیءَ جہدءَ اِنت۔ اگاں بلوچ راج اے گچینکاریاں چو گوستگیں گچینکاریانی دابءَ بے سوب بہ کنت تہ اے عمل الم پہ دنیاءَ یک مزنیں کلوھے بیت کہ بلوچ راج پاکستانی زوریں کبزہءِ بہر نہ انت، بگندئے بلوچ وتی آجوئیءِ واستیگ اِنت کہ پاکستان زوراکیءِ بنیادءَ آئیءَ چہ آجوئیءِ جہدءَ دارگءِ کوشستءَ انت۔ زورگریں پاکستانی استانءَ اے وھداں بلوچستانءِ تہءَ اخلاقی بستارءَ سرجمءَ پروش وارتگ۔مرچی چہ بلوچستانءِ لوگ لوگاں مردم پاکستانی زلم ءُ زوراکیانی ھلاپءَ راہ ءُ دگانی سرءَ در کپتگ انت۔ زورگریں استان بلوچستانءَ پاداتکگیں راجی کینگءَ ولگوج کنگءِ ھاترءَ گچینکاریانی مکر ءُ ہیلہءَ سازگءَ انت۔ ءُ دومی نیمگءَ چمے گچینکاریانی وسیلہءَ وتی داشتگیں ناشریں مردماں سیاسی جہگیری دیگ لوٹ ایت۔ سرپدیں بلوچ مہلوکءَ اے ھیال الم گور اِنت کہ بلوچستانءِ جیڑہءِ توجیل تہنا بلوچ ڈیھءِ آجوئی انت۔ تاں ھما وھدءَ کہ بلوچستانءَ پاکستانی زورگری برجاہ بوت تنا وھدءَ بلوچستانءَ ھچ پیمیں آسراتی ءُ ایمنی نئیت اِنت، چیا کہ بلوچستان کہ مرچی ھما آسءَ سچگءَ اِنت، اے آس ھمے پاکستانی استانءِ روک کتگین اِنت۔ باسمائیں ھمک بلوچ پرزند سرءَ الم انت کہ آ پاکستانی گچینکاریاں چہ دزکش بہ بیت تاکہ بلوچ مہلوک ءُ اے استانءِ میانءِ راستی ئیں سیادی بہ گیش اِیت۔ مرچی ھما نامی ئیں پارلیمانی پارٹی کہ بلوچستان ہک ءُ جیڑہانی توجیل پاکستانی آمیدگسءَ سرپد بنت، راستی ھمیش انت کہ پاکستانی درہیں زوراکیانی تہءَ ھمے مہلوک ھوار انت۔راجدوستیءِ نامءَ ووٹ پنڈوکیں اے پارٹی چہ گوستگیں بازیں سالاں پاکستانی ھاکمانی ھمکوپگ ءُ ھمگام انت۔ ما گنداِیں کہ کجام اوں وھدےءَ کہ آھاں چہ پاکستانءِ نیمگءَھاکمی رس ایت تا آ پاکستانی پوجءِ گوما بلوچءِ چکچینی تہءَ گیشی کار انت، کہ ایشانی درستاں چہ یک مزنیں درورے نیشنل پارٹی انت۔

سوہویں بلوچ راج!
بلوچ راجی آجوئی جُنز ءِ ڈُبہ تہنا یک آجوئی لوٹوکیں پارٹیءِکوپگ ءَ نہ اِنت،بگندئے ایشیءِ ڈُبہ سرجمیں بلوچ راج ءَ وتی کوپگاں زورگ لوٹ ایت۔انچوشکہ یک نیمگے ہزارانی کساس ءَ بلوچ ورنا پاکستانءِ زورگری ءِھلاپءَ وتی تنگوئیں جاناں ندر کنگ ءَ اَنت ءُ ھر وڈیں سکی ءُ سوریانی دیمپان اَنتءُ گڑا دومی نیمگءَ بلوچ لس مہلوک انت کہ آئیءِ اوں زمہ داری بیت کہ آ پاکستانءِ درہیں شوربندیاں سرپد بہ بیت ءُ آہاں بے سوب بہ کنت ۔گچینکاریانی ڈولیں استانی عملاں چہ گستا بہ بیت ءُ بلوچ جہدکارانءَ اے کلوہءَ بہ دنت کہ اے جہدءِ میانءَ بلوچ راج ھمایانی گوما انت۔ راجی جُنز راجانی انامت اَنت ءُ اے رنگیں جاوراں کہ یک نیمگے زورگیریں استان بلوچ راج ءِ سرءَ میزائل گوارگ ءَ اِنت ءُ دومی نیمگ اگاں ءَ ما ووٹ بہ داِیں گُڑاراجی گوستانک مئے اے راجی جرمءَ کدی بیھال نہ کنت۔ یک انچیں جاورہالےءِ میانءَ کہ اودءَ پاکستانءَ بلوچءِ چکچینیءِ عملءَ را مہکمیں شکلے داتگ چوشیں جاوراں راجءَ را وت وتی دژمنءِ بہر بوگی نہ اِنت۔ اے گچینکاری کہ بلوچستانءَ بوگءَ انت ایشانی تہءَ کلیں ووٹ اوشتوکیں مردم استانی ناشرکار انت کہ پاکستانی پوج آھاں دیمءَ آرگ لوٹ ایت۔ کجام اوں بلوچ کہ سنچ ءُ سمایے داریت گڑا آ وتءَ چرے کسور وریں عملءَ بہ رکین ایت ءُ چہ ووٹءَ دزکش بہ بیت ءُ گوں بلوچ راجی جہدکاراں ھمکوپگیءِ درشان بہ کنتءُ میان استمانی دنیاءَ را ھم ھمے کلوہ سر بہ کنت کہ بلوچ راجءِ گوں پاکستان ءُ آئیءِ سسٹمءَ ھچ ڈولیں نزدیکی نیست انت بگندئے بلوچءِ مستریں لوٹ راجی وتواکی ءُ راجی آجوئی اِنت۔

بلوچ اسٹوڈنس آرگنائزیشن آزاد