سینزدہ نومبر بلوچ راجی شہید آتا دے

ہنینا راج

‎جہان ئٹ دے ئنا ہزار آتا کچ ئٹ بندغ آک ودی مریرہ و ہزار آتا کچ ئٹ دا جہان آن موکل کیرہ ہندا وڑ ئٹ بندغ نا خل ئنا دورباری آن الیس اینو نا وخت اسکان بندغی دیہاڑ جتاء جتاء ہنگا زیبا و بد رنگ آ کسہ غاتیا تالان ءِ۔ دا کسہ غاتیٹی بندغی زند، زندہ ئنا خیفی و بڑزی تون اوار سیاست نا شیفی بڑزی و جنگ ئنا ڈکھ چاگڑد نا گندئی و دتر تا روانیک ہم اوار ءُ۔ بندغ تینا بنداوئی دے آن ہلیس اینو اسکان ہندا کوشست ئٹی ءِ کہ امر ہرے اسکان زندہ مننگ کیو و تینا سن ءِ ودیفنگ کیو ولے دا ہم بندغی راستی ئسے کہ بندغ اخس کوشست کہ بچے ولے بچنگ کپک دے ئسے نا دے ئس مرگ ئنا گواچی مریک و ہموڑے اونا زند مدامی کن ایسر مریک۔ولے جہان ئٹ اسہ پین ہم فکر ئس ارے کہ ہرا فکر زیات زندہ مننگ و تینکن زند مننگ آن جتاء ءِ بلکن او فکر ایلوفتیکن زندہ مننگ نا پائک او دا فکر ئتون اوار ایلوفتیکن کہینگ آن ہم پدی مفک۔ ہمو فکر کہ زیات زندہ مننگ نا رند ئٹ متنے بلکن ہرا زند کہ رسینگنانے ہمو زند ءِ گمر ئٹ گدریفنگ و پین تیکن زندہ مننگ آ باور تخانے۔ دا ہمو فکر ءِ ہرانا وسیلہ ئٹ نئے بیرہ چاگڑد آک مون مستی ہنانو بلکن ہمو چاگڑد آک کہ ہرافک تہارمئی تیان گدرینگانو گڑا ہمو چاگڑد آک تینکن آجو و جوانو دے ئس ودی کرینو۔ دا فکر اسہ گچین ءُ مسخت ئسے کن شہید مننگ و شہید آتا فکر ءِ۔

شرف مند آ بلوچ راج

جہان نا دیہاڑ آ نظر ئس شان گڑا جنگ و کہینگ و کھسفنگ نا بھلو داستان ئس ننے دوئی بریک۔ (دا جنگ آک ہمو ظلم و زوراکی تا برخلاف مسونو کہ ہرافک چاگڑد ئٹ ساہ کشنگ کن ہلتنو ولے داکہ دافتا رندگیری ئٹ ہمو فکر کہ ارا جنگ آنا پارینے ہمو فکر ؤ سوچ ئنا سوب ئٹ دا سماج ؤ راج آک نہ بیرہ ایمنی ئٹ ساہ کشیرہ بلکن بروکا زنک آک تینا خنتے ٹی امن ؤ آجوئی خننگو )۔ ہندا وڑ وخت ئس بلوچ راج ئنا ہیت بریک گڑا نن خننہ کہ لکھ آتا کچ ئٹ بلوچ ورناک تینا ڈیہہ ئنا رکھینگ و بلوچ راج ئنا دیمروئی و آجوئی کن تینا ساہ ءِ ندر کرینو ۔ دا ہندا شہید و ندر مننگ نا فلسفہ ءِ کہ بلوچ راج ئنا آجوئی نا جہد اینو سوگو ءُ درشم اسیٹی مون مستی ہننگے۔ اینو بلوچ راج ئنا کاٹم کہ شیف اف و گمر ئٹ بڑزا ءِ گڑا ہمو ندر مروکا بلوچ ورنا تا قربانی نا بھرم ءِ۔ ہمو کاٹم کہ ہرفتے تینکن زندہ مننگ نا است خواہی متنے بلکن تینا راج و تینا ڈیہہ ئکن زند کننگ ؤ ڈیہہ ئکن ندر مننگ نا باور مسنے۔

دلیر آ بلوچ ورناک

جہان ئٹ ہمو راج آک گچین پاننگرہ کہ ہرانا مخلوق تینا آجوئی نا وڑ ءُ گچین ءُ مسخت ئسے کن ندر مننگ نا کسر ءِ تینکن گچین کرینو۔ جہان نا دیہاڑ ئٹ دا ہیت ارے کہ ہمو راج آک تینا اشتماعی سواد آتیکن آجوئی نا کسر ئٹ تینے ندر کرینو گڑا او راج آک غٹ بھلا ظلم و زوراکی تے شکست تسونو۔ و ہندا وڑ بلوچ راج ئنا خڑک آ تینا ڈیھ و ڈغار کن ندر منگ نا فلسفہ بلوچ چنا تا صدخئی کو کہ ہرافتا سوب آن بلوچ ورنا،پیر و کماش آتیان ہلیس چنا و زالبولک غٹ اسہ راج ئسے نا وڑ ئٹ اواری ئٹ ندر مننگ ءُ۔ ہندنکہ بلوچ ورناک آجوئی نا تغ ئتون تینا راج ئکے ندر مننگ ءُ ہندا وڑ بلوچ لمہ غاتا جیرت و جوزہ غاک بڑز انگا آسمان آن بڑز ءُ۔ دا بلوچ راجی جہد ئنا سوگوی ءِ کہ بلوچ لمہ غاک تینا ندر مروکا چنا تا جشوکا جون تا مون آ تولیرہ و پراد کننگ نا جاہ لیکو و نازینک خلیرہ و دلیری ئٹ تینا چناتے نازیفیرہ ۔

بلوچ راج

جہان نا غٹ راج آک تینا ندر مروکا کاٹم تے استا اتیرہ و اوفتا ندر مننگ نا فلسفہ ءِ مہر و شرف ئنا خن تیٹ ہریرہ و اوفتے خیسن ءُ سلام ایترہ و اوفتے کن اسہ جتاء ءُ دے ئس ہم تخیرہ۔ ہندا وڑ بلوچ راج ہم تینا ندر مروکا بلوچ شہید آتا یات ئٹ و اوفتے دروت ندر کننگ کن اوفتے کن اسہ جتاء ءُ دے ئس تخانے ۔ ندر مروکا بلوچ ورنا تا دے سینزدہ نومبر آ تخنگک۔ دا ہمو دے ءِ کہ ہرستم 1839 ئٹ انگریز لشکر بلوچ ڈیہہ ئنا زی آ قوضہ کننگ کن اوڑا جہلو کیک۔ دا زوراکی نا برخلاف بلوچ تینا کاٹم ءِ شیف کپک و سلہہ بٹپک بلکن مزاحمت نا کسر ءِ ہلیک و خان مہراب خان نا سروکی ٹی انگریز لشکر تون دلیری ئٹ جنگ کیک و ہندا جنگ ئٹ خان مہراب خان تینا سنگت آتون بلوچ ڈیہہ ئنا رکھنگ ئٹ شہید مریک۔ ہمو دے آن ہلیس اینو دے ئسکان بلوچ راج نئے تینا سلہہ تے بٹینے و نئے کہ تینا کاٹم ءِ سیف کرینے بلکن ندر مننگ نا فلسفہ ءِ ہرفینے و اینو دے اسکان دژمن تون مون پہ مون جنگ کنگ ءِ۔ بلوچ تینا ڈیہہ ءِ رکھنگ کن گچین آ فلسفہ کہ ہرا تینا ڈیہہ آ ندر مننگ نا فلسفہ ءِ ہرفینے و تینا دود و ربیدہ ، بولی ، ڈیہہ و راج ئتون تفوکا ہر چنڈ ئنا رکھنگ کن جہد ئٹے۔ دا ندر مننگ نا فلسفہ نئے بیرہ بلوچ چاگڑد ءِ ساہ تسُنے و اونا کاٹم ءِ بڑزا کرینے بلکن ژدمن ہندا ءِ خلیفینے کہ او بلوچ ڈیہہ آ قوضہ کرینے ولے امن ئٹ تولتنے بلکن ہر ساہت مرگ ئنا خلیس نا گواچی مریک و نفسیاتی حوالہ ئٹ ہڑدے کہیک۔

با سماء غا بلوچ راج 

بلوچ تینا دود و ربیدہ تا رکھ ءِ کریسہ تینا ڈیہہ آ ندر مننگ آن پدی مننگ اف۔ ہندا ندر مروکا شہید آتا قربانی و ہمت ءِ است آ ہتنگ و اوفتا رند ءِ ہرفنگ کن سینزدہ نومبر نا دے تخنگانے دا دے بیرہ ندر مروکا کاٹم تے استا ہتنگ نا دے اف بلکن اوفتا قربانی تننگ نا فلسفہ ءِ چاہنگ و اودے تینا مخلوق اسکان سر کننگ تون اوار اوفتا غٹ کڑد و عمل نا رند ءِ ہرفنگ ہم ننے آ فرض ءِ۔ ننا ندر مروکا تا دتر آتیان پھل ترکانے و ہندا پھل آتا خوش گند آن بلوچ ڈیہہ خرن و آبات ءِ و بلوچ جنز دے پہ دے آن سوگو مریسہ ءِ۔ ولے دا پُھلاک مدام دتر خوارہ و ہندا دتر آتیان گواڑخ نا وڑ انگا پھل آک بلوچ جنز ءِ مزل آ دے ئس سر کیرہ دا دے نن کہ عہد و پیمان کنگ نا دے ءِ کہ نن تینا ندر مرکا بلوچ شہید آتا (دتر نا اریفینہ بلکن اندا دتر تینا بلوچستان نا آجوئی نا خیسن ئنگا استار ام ودی کرون۔)