لُمہ کریمہ نا راج

لمہ نا بلوچستان

لُمہ نا بلوچستان تینا سینہ ٹی ہزار آ ٹکر تے، ہزار آ کسہ تے، ہزار آ داستان تے و تینا ندر مروکا لال آتے جاگہ تسنے، و دائسکان مزاحمت بروکا زنک آتا روح و سینہ تیٹی ٹِک و نگار مننگ ءِ، بلوچستان ہمو ڈغار ءِ و بلوچ راج لمہ بانک نا ہمو راج ءِ کہ دا ڈغار نا خواجہی کن نسل در نسل تینے ٹکر و بور بور کننگ ءِ۔ ہمو جہدکار آک تینا زند ءِ بلوچستان نا پن آ ندر کرسا ءُ ہرافتے بلوچستان گمر ئٹ لولی ایتک، اوفتا ٹپ آتے تینا راج اکن درمان کیک۔ ہمو شہید آتا دتر تیان بلوچستان اینو تینٹ رنگ ہلنگ ءِ، ہمو رنگ آک بروکا آجوئی نا ضامن ءُ۔

لمہ کریمہ نا راج

بانک کریمہ ننا چاگڑد نا ہمو شہید آتیان ءِ ہرانا رند آتیان اینو ننا راج ئنا باتیک تینکن کسر پٹیر، گودیک تینا زند ءِ پہہ مننگ کن اول بانک ءِ پہہ مریر، بانک نا جہد ءِ سرپند مریر، بانک نا دتر تے تینکن زم زم کیر، اینو تحریک ءِ تینا بروکا زنک نا آسودئی کن امانت تکر۔ بانک نا امانت ءِ تینا کل شہید مروکا سنگت آتا امانت ءِ سرپند مرین، اینو بلوچ ڈیہہ ئنا آجوئی کن کیہی سنگت آک تینے تینا ڈغار کن ندر کننگ ءُ دا الس کن، دا دود و ربیدہ کن، دا راجی بقاء کن، اندا راجی بقاء نا امانت ءِ رکھنگ کن۔

ننا بلوچ مخلوق

بلوچ مخلوق اینو اگہ نن تینا زند ءِ دا ڈغار نا پجار نا پِن آ کتون، سرپند متون، یا لمہ بانک و ایلو سنگت آتیانبار تینے تحریک نا بشخ کتون گڑا ننا ڈغار نا بقا سلپرو، ننا زنک آتا بروکا پدین آ سیخا سلپرو، راج ئنا پجار سلپرو، و بلوچی نشان سلپرو۔ اینو زوراک آ دا ریاست ننے ہر وڑ ئنا پالیسی تیٹ ذہنی و جسمانی غلام جوڑ کرینے، اگہ نن اینو ہمو سنگت آتیانبار دا غلامی نا زمزیر ءِ کشتون گڑا بروکا زنک آک ہم اندا زمزیر ئٹ تفوک مرور۔ اوفتا باہ موغوک مرو، تینا جند ءِ سرپند مفرور، تینا چلتن، گوادر و بولان نا گہوش ءِ ماروفس، دا ڈغار کن ندر مروک آتا ہمو سیخا تے پہہ مفرور۔ بلوچ الس ببو آجوئی نا تحریک ئٹ اوار مرین اخس زوت مننگ کیک ہموخس جوان ءِ، اگہ نن اینو داٹی اُرے کرین ہموخس ننے آن پین لال و سنگت آک ہنور، ہموخس ننا ڈغار نسخان ئٹ ہنو۔

لمہ بانک نا گودی و ایلمک

لمہ بانک نا گودیک ننے و نمے کل ءِ سماء ءِ کہ زوراک آ ریاست اخس پروپیگنڈہ کرینے و اینو اسکان کننگ ءِ۔ اندن زالبول آتا بابت گیشتر ننا مخلوق ءِ چپ پارہ غا درینے، وختس مذہب نا پِن آ ریفینے، وختس عزت و ضد ئنا پِن آ، وختس ننگ ئنا پِن آ، پین ہر وڑئٹ ننے ریفینے۔ بلوچ راج تینے پہہ مرے کہ ننے او امر دن رد انگا کنڈ آ درینے، ننا نیام ئٹ امر رد ءُ ہیت و گپ شاغان ءِ۔ اینو بلوچ راج ئنا باتیک تینا پجار ءِ سرپند مریر، تینا دیہاڑ ءِ خوانر، تینا جنگی آ کسہ تے خوانر، تینا ڈغار تون مہر کروک آ کسہ تے سرپند مریر، تینا مزاحمت نا دیہاڑ ءِ پہہ مریر کہ ننا چاگڑد ئٹ امر ءُ بندغ ودی مسنے۔ ننا بلوچ زالبول آک گل بی بی و بیبو ءِ خوانبو، بانک کریمہ ءِ خوانبو، ندر مروکا گودی تے خوانبو، تاکہ تینا جند ءِ خنبو، تحریک ءِ پہہ مبو، جہان نا ایلو جہدکار آتے خوانبو گڑا غٹ گڑاک نما مونا پاش مریرہ کہ بدر امر ننے ننا گواچن آن چپ کرینے و امر ننے ریفینے۔ اگہ نن بلوچ دیہاڑ ءِ خوانن گڑا ننا مونا دنو ہچو فرخ اس بفک زالبول تا بابت، گڑا داسہ انتکن؟ دادے دیر کننگ ءِ؟ ہمودے ننا راج ئنا باتیک سرپند مریر۔ ننا تحریک نا گچینی دادے کہ او بانک کریمہ ودی کرینے و پین دنو بھاز کڑدار ودی کرینے۔ اینو بلوچ چاگڑد نا ہر ہر بندغ تینا تحریک نا ہمکوپہ مرے، ہر زالبول تینا ایلم تا ہمکوپہ و سنگت مرے دنکہ بانک کل راج ئنا ہم فکر، ہمکوپہ و سنگت ئس۔