نمیرانیں فدا احمد ءِ سیاسی میراس: بلوچ وتواجہیں سیاسی تاگت ءُ مہکمیں راجی پارٹی ءِ لیکہ
اداریہ

راجدپتر وتی اندر ءَ سک مزن بیت ءُ راجدپتر ءِ تاکاں نکش بوگ ءِ سکیں مزنیں ءُ جفاکشیں لوٹ اَنت کہ اِد ءَ ھما کارست پہ وت جاھے گپت کنت کہ آ مستر ءَ چہ مستریں ھیال آرگ ءِ ھاٹیگ دار اَنت، آ انچیں عمل کن اَنت کہ گوستانک ابید ء آیانی زکر ءَ ناسرجم مان اِیت۔ اے چندے گچینی کارست بنت کہ وتی علمی ءُ عملی کچ ءَ گوں راجدپترے سازگ ءِ بود دار اَنت، کہ آیانی یات دارگ، ءُ آیانی میراس راجی ھستانک ءِ بھر جوڈ بنت۔ ھمک راج ءِ راجدپتر ءِ تہ ءَ انچیں مزن لیکھیں مردمانی کردانی برورداں ساپ گندگ بنت۔ ھمے پیم ءَ بلوچ راجدپتر ءِ تاکاں اوں پہ وت بُرز شانیں کارست گچین کتگ ھمے تاکانی سر ءَ یک نبشتگیں نامے شھید فدا احمد ئیگ اِنت۔

شھید فدا احمد بلوچ نودربر سیاست ءَ چہ ردوم زُرتگیں ھما چندے سراں یکے کہ آیاں نوکیں دور ءِ راجی جُنزانی لوٹ زانتگ اَنت، پہ درور آئی ءَ نوکیں دور ءِ جُنزانی یک بنکی زلورتے پارٹی جدوجھد ءِ دروشم ءَ مار اِتگ ءُ یک انچیں راجی پارٹی یے ءِ جوڑشت ءِ ھیال آورتگ کہ آئی ءَ چہ بلوچ راجی جنز ءُ سیاست تھنائیں نودربر ءَ کشگ ءُ راجی زمہ واری یے جوڈ کنگ بہ بیت، اے درگت ءَ آئی ءَ کثیرالطبقاتی جھد ءِ ھیال عملی درشم ءَ دیم ءَ آورتگ ءُ عمل کتگ۔ 1948 ءَ دیم داں بی وائی این ایم ءِ جوڑشت ءَ بلوچ سیاست راجی وتواجھی جُنزے ءِ سائنسی لوٹاں پیلو کُت نہ کنت، البت مھلوک جنگ کنت، گھگیری کنت، کربانی دنت بلے اداراجاتی بنیاد ءَ جنزوکیں جُنزے ءِ ھیال اینچو مھکم نہ بیت۔

نمیرانیں فدا احمد ءِ پارٹی ءِ جوڑشتی ھیال بلوچ ءِ ھستیں جنز کثیتر الطبقاتی بوگ ءَ کمک کنت، پیسر ءَ ھم ھمک تبک ءُ تک ءِ مردماں جنگ ءِ میان ءَ بھر زُرتگ بلے سیاسی پڑ ءَ تھنا چندے گچینی مردم بوتگ اَنت ءُ آیانی سیاست ءِ بنجل اوں پارلیمانی سیاست بوتگ، ءُ دومی نیمگ ءَ مستریں سیاسی تاگت بی ایس او ءِ دروشم ءَ نودربر بوتگ اَنت، انچوشکہ آ دگہ تبکانی سیاسی تلو یے نہ بوتگ ھمے پیم ءَ نودربر سیاست ءَ چہ دزکش بوتگیں مردمانی ھاتر ءَ اوں سیاسی بانداتے نہ بوتگ، شھید فدا احمد ءِ ھمے دانشورانہ لیکہ بلوچ ءَ پارٹی سیاست ءِ نیمگ ءَ دلگوش گور کنائین ایت ءُ ادارہی بنیاد ءَ بلوچ جنز ءِ میان ءَ زند ءِ جتائیں پڑاں گوں سیادی داروکیں مردماں پہ تلو اڈ کنت کہ آ بلوچ جنز ءَ کثیرالطبقاتی جنزے ءِ نیمگ ءَ بارت ءُ بلوچ راجمان ءِ تہ ءَ زانتکار، پوریاگر، ءُ ایدگہ کار ءُ کسباں گوں بندوکیں مردماں راجی سیاست ءِ تہ ءَ بھرشتے دنت۔

بگندے بندات ءَ اے ھیال اینچو مھکم نہ بوتگ ءُ بدلی نیاورتگ بلے فدا احمد ءِ ھمے ڈائریکشن ءُ بلوچ جنز ءَ پارٹی سیاست ءَ گوں ھمدپ کتگ کہ وھد ءِ ھمرائی ءَ بلوچ ءِ آدگہ رھشوناں ھمے میراس دیم ءَ بران کُتگ ءُ مھلوک پارٹیانی اندر ءَ جم کتگ۔ پمیشکا بلوچ وتی راجدپتر ءِ کجام کہ کارست ءَ یات داریت داں المی اِنت کہ ھما کارستاں بہ وانیت آیانی ڈائریکش ءُ میراس( لیگیسی) ءِ بابت ءَ باوست دیم ءَ بیاریت۔ مروچی بلوچ جنز ءِ نیام ءَ کہ بیست ءُ یکمی کرن ءَ اے دیمروئی ءَ ما گندگ ءَ ایں، اے ھمے لیکہ ءِ دیمروئی ءِ برورد اَنت۔

انچو گُشنت کہ مدامی اولی گام ءِ چست کنگ درستاں چہ گران تر ایں، ءُ اے درگت ءَ بلوچ جہد ءِ آرگ ءُ ادارہ جاتی جوڑشت ءِ دروشم ءَ دیم ءَ برگ ءَ مستریں کرد فدا ئیگ اِنت، کہ آ زمانگ ءَ نئیکہ اِشاں چُشیں ھاسیں کمکے گون بیت، ءُ نئیکہ سیاسی جاور سازگار بنت، بلے مہکمیں فیصلہ ءَ گوں عمل ءَ بندوک کنگ ءِ جوزہ بیت کہ شہید فدا احمد گوں وتی ھمراہ ءُ سنگتاں بی این وائی ایم ءِ جوڑشت ءَ ایر کنت۔ بیت کنت ھمے ادارہ ءِ جند فدا ءِ زند ءَ ھما کنڈ ءَ پُر نہ کنت، بلے ھمے لیکہ ءِ جند وش وش ءَ ُردان ءَ مہکم بیان بیت، ءُ اِشی ءِ پھتوئی ءِ درور مروچی ئیں بلوچ وتواجھی ءِ جنز اِنت۔

فدا ءَ سما بوتگ کہ آشوب ءِ آرگ ءَ درستاں چہ پیش مارا وتی مہلوک ھمے ایردستیں زہنیت ءَ چہ کشگی ایں ءُ اِشی ءِ کشگ ءَ پہ لازم اِنت کہ ما دژمن ءِ نہ تھنا کالونیل پالیسیاں یک پہ یک ءَ پاشک بہ کنیں، بلکیں وتی مہلوک ءِ یکیں تلو ءِ چیر ءَ موبلائز کنگ لازم اِنت۔ مروچی بازیں جاہاں ءُ بازیں وھد ءَ ھمے ایراد مئے دیم ءَ کئیت کہ بلوچ جنز ءَ پارٹی ءِ زرورت نیست یا بلوچ ءِ تب گوں ادارہ جاتی ذہنیت ءَ ھم تپاک نہ اِنت، بلے فدا ءَ اے جُست ھما وھد ءَ جواب کُتگ اَنت، وتی مہلوک ءِ جنز ءَ ہوار گیجگ ءُ ہمراہ کنگ ءَ ابید آشوب ھچ ھساب ءَ اتک نہ کنت، ءُ پہ وتی مہلوک ءِ ھمراہ کنگ ءَ درستاں مستریں وسیلہ ءُ در پارٹی ءِ جوڑشت اِنت۔

استیں ورنا فدا ءَ وتی دیم ءَ بہ کن اَنت، ءُ وتی کردار ءَ بہ ساز اَنت۔ مئے راج ءِ گوستانک چُشیں بامرداں چہ سرریچ اِنت، کہ آواں وتی زند ءُ سرجمیں متاہ پہ بلوچ ءِ باندات ءِ آجوئی ءُ وتواجہی ءَ ندر کُتگ اَنت، ءُ مارا پہ گامے دیم ءَ سپر جنگ ءَ ایوک ھمیشانی میراس (لگیسی) پد جنگی اِنت، ءُ آوانی واب داں آسرے ءَ سر کنگی ایں۔ فدا ءِ زندگ دارگ ءَ پہ لازم اِنت کہ ما آئی ھیال ءُ لیکہاں زندگ بہ داریں، پہ ایشی ءَ گوں علم ءُ عمل ءَ بندوکیں زمہ واری پیلو کنگی ایں۔