جنگ ئنا دنز ئٹ لوڑ دیر ءِ ہرفنگ ءِ؟
نودَل بلوچ
جنگ ئنا لیکو تیٹی بیرہ پاک انگا نظریہ تا لیلڑی چس کیرہ انتئے کہ نظریہ نا روتہ غاک اندن جہی مریرہ ہرافتا پیشتنگنگ بھاز کبین ءِ۔ اینو بلوچستان نا آجوئی نا نظریہ ہرا وڑ تینا جنگ ئنا لیکو تے تینا قوم ئٹی شاغنگ ءِ کہ تیوہ بلوچستان نا کنڈ کنڈ اندا نظریہ ءِ تینا بلوچ و بلوچستان تون اوڑدہ کننگ ءِ۔ اینو جنگ ئنا نظریہ نفسیاتی ردئٹ مونا جوان بننگ ءِ گڑا دا جنگ ئنا دنز لوڑ دیر ءِ ہرفنگ ءِ۔ نن دادے اِرا وڑئٹ ہرنہ:
اولیکو: بلوچ جہدکار آک اینو ہرا گام تے پاک انگا جنگ اٹ تخانو اندن پاک انگا نظریہ ء تینا بروکا بلوچ نا زنک اکن اندن تالان کننگ ءُ کہ جنگ ئنا ہر لوڑ و دنز ءِ تینکن فخر تکرہ و دن انگا تدینی تے تینا دتر اٹ بخیر کیرہ گڑا دا جنگ ءِ بروکا زنک ئنا امن کن، پجار کن، ڈغار کن اینو کننگ ءُ گڑا داڑے نفسیات نا ردئٹ جہدکار آک سرسہب مسنو و مننگ ءُ۔
ارٹمیکو: ناجائز ریاست نا کرایہ دار آ فوج ہراتون ہچ نظریہ اف، خیال اف، انسانیت اف، بیرہ اوڑتون طاغت ءِ۔ ولے طاغت نظریہ ئنا مونا بے سہب ءِ۔ گڑا اینو پاکستان فوج بلوچستان ئٹ نفسیاتی دروشم ٹی مات کُنگنے۔ او مونا ہم اندن نرسا کرو انتئے کہ اوفتون اسٹ نظریہ اف، ایمان اف، جیرت اف او بُل کننگ ءُ تینا طاغت آ ولے سوگو انگا نظریہ نا مونا ہچ وڑ آ طاغت سَلنگ کپرو۔ اینو پاکستان نا فوج اندن نفسیاتی ردئٹ بیمار و ہِربشی مسنے کہ او لَس مخلوق و شار تیا تینا لار ءِ کشنگ ءِ۔ انتئے کہ جنگ ئنا اصول آتا ردئٹ ہُرن گڑا گُڈیکو بے سہبی نا نشانیک جنگ و نفسیات نا اندا مریرہ کہ کوزہ گیر تپک مونا ای انت فیصلہ ہرفو یا انسرجینسی ءِ امر کاؤنٹر کیو گڑا تینا لار ءِ اُلس آ کشک۔
سہولت کار آک کوزہ گیر آتیکن بھلو کمک اس مریرہ او مدامی اندا کوشست کیرہ کہ جہی آ اُلس آن تینکن امر بندغ ودی کین کہ مونا تینا کوزہ ءِ برجا تخن انتئے کہ دا نفسیات کُل کوزہ گیر آتا مسنو و مونا ہم مرو ءِ۔ اگہ بلوچستان اٹ ہرن دا وڑ ئنا غدار بھاز مسنے و اینو ہم ارے ہرا جتا جتا انگا دروشم تیٹی دژمن نا کمک ءِ کیرہ او بلوچ نا زنک ایسری نا بریبر بشخ ءُ۔ اوفتا مثیل ہم کوزہ گیر نا کارندہ غاتا مثیل ءِ۔ اندافتے کوزہ گیر تیکن جوڑ کیک مونا ہتیک و تینا کاریم تے ہلسا کیک۔ دافتے بھاز آ کاریم تا مونا ہتیک او تینا کاریم تے کَشک۔ تانکہ بلوچ نا تحریک ءِ نزور کیو۔
بلوچستان ئٹ ریاستی سہولت کار آتا بھلو کسہ و داستان ارے کہ اوفک مدامی غداری نا دروشم ٹی چاہنگور۔ بلوچستان ئٹ غدار تا لڑ بھلو وخت اسے آن ارے و برجا تخنگانے۔ اوفتا جتا جتا ءُ دروشم ءُ ولے اریر اسہ بِیش ئنا جُل آن بار۔ کسس سیاسی وڑ ئٹ چاہنگک کسس مُلا تا دروشم ٹی ءِ، کسس دین و مذہب نا دروشم ٹی ءِ، کسس خوانندہ سیاست نا دروشم ٹی ءِ، کسس نظریاتی ڈیتھ اسکواڑ نا دروشم ٹی ءِ، کسس روزگار نا دروشم ٹی ءِ، کسس ٹیچر و پروفیسر و ڈاکٹر نا دروشم ٹی ءِ اندن وڑ وڑ ئنا ریاستی مشینری تا بشخ اریر۔ دافتے کوزہ گیر تینا وڑ ئنا پروگرام ایتک و بلوچ نا راجی تحریک ءِ نزور کننگ کن۔ ولے گپ دادے کہ غدار آک راجی جنگ ئنا مونا آخر دم تیرہ یا تینا غداری نا ڈوہ نا سزا ءِ کُنیرہ۔ انتئے جنگی ماڈل آتیٹ مُخبر و غدار نا خَلنگ کسفنگ چٹ المی ءِ۔ دا آجوئی نا کُل تحریک آتیٹ مسنے و مریک۔ اندن اینو بلوچ تحریک ہم اسہ جوان ءُ عمل اس تینا برجا تخسا مونا ہِننگ ءِ کہ غدار و مخبر تے اوفتا کسر ءِ نشان ترسا ءُ۔
جنگ ئنا دنز اٹ اینو سرفراز بگٹی و مذہبی ڈیتھ اسکواڈ مولانا غفور حیدری لوڑ ئنا پلویڑ اٹ غرق مسنو۔ دا داسہ غرق متنو بلکہ مالو آن شِر و غرق مسنو۔ بس اوفک کوزہ گیر ریاست نا سہولت کار و بلوچ قوم نا غداری ءِ کرسا ءُ۔ انتئے کہ دن انگا سہولت کار آتے کوزہ گیر آ ریاست وخت ئنا ردئٹ مونا ہتیک و تینا کاریم تے ہلیک اینو ہم بیرہ دا اِرا بندغ اف کہ کھڈکوچہ مستونگ نا باغ و اُلس نا باروئٹ گپ و تران کریر بلکہ دا وڑ ئنا بندغ ہڑدے کوزہ گیر ہتیک۔
اگہ دا وڑ ئنا کوزہ گیر سہولت کار ہتیک انتکن؟
دا سہولت کار آتا اوقات انت ءِ کوزہ گیر نا مونا؟
دا دا وڑ ئنا وخت آ انتکن مونا بریرہ؟
دا سہولت کار آک ہرا گپ آتے کیرہ ہمو گپ آک اوفتا ءُ یا آخہ؟
اندا سہولت کار آتے بلوچ اُلس امر ہُرک و انت پہہ مریک؟
گپ دا ودی مریک کہ سرفراز بگٹی جنگی نفسیات نا دنز ئٹ مین ہلکنے کہ کھڈکوچہ مستونگ نا باغ آک بلوچ جہدکار آتا رکھ ءِ کننگ ءُ۔ دا جنگ پاش ءِ کہ کھڈکوچہ مستونگ نا اُلس دیر تون خوش ءِ؟ یخین ئٹ کھڈکوچہ مستونگ نا اُلس تینا بلوچ سرمچار آتیتون خوش ءِ۔ اندن اُلس نا کمک ءِ سرمچار آک تینا نظریہ و دتر تا دروشم ٹی ہلکنو۔ بلوچ جہدکار آک نفسیاتی ردئٹ بیدار ءُ کہ کسس کھڈکوچہ مستونگ آ ہِننگ کپک۔ گڑا داڑے سرفراز بگٹی ہرا وڑ اٹ دا گپ ءِ کیک کہ کھڈکوچہ مستونگ نا باغ آتے ایسر کیوہ۔
ہیت دادے کہ او لس مخلوق ءِ خُلیفنگ کن کننگ ءِ، و اندن ریاستی مشینری نا دروشم ٹی زنک ایسری نا کاریم تے کننگ ءِ۔
اولیکو گپ دادے کہ کھڈکوچہ مستونگ نا اُلس اینو اسکان بلوچ سرمچار آتے دا پاتنے کہ نُم داکان ہنبو۔ بلکہ اوفک تینا بروکا زنک نا رکھ اکن تینا کوپہ تکرہ تا۔ ارٹمیکو گپ دادے کہ ناجائز ریاست نا کرایہ دار آ فوجیک بے سہب مسر کہ نن کھڈکوچہ غان سرمچار آتے کشن۔ بھاز آ لشکر کشی تے کرے، شیلنگ کرے، بے ڈوہ آ بندغ آتے خلک۔ ڈرون آتیٹ وس کرے ولے ہر وار مات کُنگ۔ بس داسہ گڈیکو اُلس نا رند اٹ لگوک ءِ کہ اوفتے امر زلیل و خوار کیو۔
مولانا غفور حیدری پاہک کہ اگہ کشیرے تا گڑا اوفتے کن جاگہ و جُگ ئنا وڑ اس کبو۔
گپ دا بریک کہ غفور حیدری دیر ئسے؟
دا انت کاریم کرینے کہ داخہ گمر اٹ پاننگ ءِ کہ دن کبو؟
بلوچ قوم دادے اینو امر ہُرک؟
دا بریک و بلوچ قوم ءِ دا پاہک کہ نم دن کبو۔ اولیکو دا وڑ ئنا غدار آتے مذہب نا دروشم ٹی کوزہ گیر ہیس و بلوچ نا زنک ایسری کن بھلو کاریم ہلک ہرا ننا بلوچ تحریک اٹ کُل ءِ وا سما ءِ و لس الس ءِ ہم سما ءِ کہ دا وڑ ئنا غدار آک ننتون انت انت کرینو۔ اندافتے ہیس کوز گیر بلوچستان ئٹ و گیشتر ساراوان و جھالاوان اٹ اخس کہ مذہبی پروپینگڈا ئسر دا وڑ ئنا غدار آ شیطان آک کریر تا۔ اُلس ءِ اسلام نا پِن آ بے وقوف جوڑ کرسا و ریاستی مشینری تے سوگو کننگ ئسر ولے اینو اسکان برجا تخانو دا شیطانی آ عمل ءِ۔
ہرا وخت کوزہ گیر دن انگا وخت آ بے سہب مریک گڑا سوفراز بگٹی، مولانا غفور حیدری پین باز آ غدار و شیطان تے ہتیک کہ امر نن الس ءِ تینا کنڈا چِکن۔ ولے جنگ ئنا دنز اٹ لوڑ ناجائز ریاست و اونا غدار آتے ہرفنگ ءِ۔
انتکن لوڑ اوفتے ہرفنگ ءِ؟
یخین ئٹ اوفتون نظریہ اف، نفسیاتی ردئٹ او ایسر مننگ ءُ، گوزہ گیر نا سہولت کار آتیکن ڈغار تین مننگ ءِ، اونا ہر کسر و دروغ پاش مننگ ءِ۔ دا وڑ ئنا گپ و تدینی تے ہُرن گڑا دا نن تون بیرہ مننگ اف بلکہ ہرافتا زی آ کوزہ مسنے اوفک ہم دنو وخت خنانو ولے بلوچ قوم بلکہ وڑ وڑ ئنا تدینی خنانے گڑا اینو ہم دافتا مونا سلے تینا طاغت ءِ جوڑ کے۔