زورگیر ءِ یوتھ اینگیجمنٹ پالیسی ءُ بلوچ ورنا
پنتاک

سربُلندیں بلوچ راج
زوراوریں پاکستانی اِستان ءِ ھمک پندل بلوچ ءَ را مُچانکی دروشم ءَ گار کنگ ءِ نیّت ءَ سازگ بیت۔ زوراک ءِ لبزبلد(ڈکشنری) ءَ دیمروی، آسراتی، وشھالی، آسودگی، وانگ، اسکالرشپ، نوکری، سیل ءُ سواد، لئیب ءُ گوازی ءِ گال ایردستیں بلوچ راج ءِ وجود ءِ گار ءُ گُمساری ءِ اندیم ءُ بے تواریں پوجی آپریشن ءِ پیم ءَ کار بندگ بوئگ ءَ اَنت کہ اے دابیں ھاموشیں چُکچینی ءَ گنشپ ھیلی کاپٹر، ڈرون، گِس سوچی، لاش ءُ گار ءُ بیگوائی مان نیست بلکیں اَبیدء ھونریچی ءَ قبضہ گیریں پاکستان بلوچ ءِ چُکچینی ءَ اندیم ءُ چیریں دورشماں کنگ ءَ اِنت۔ مروچی پاکستان ءِ زوراکیں مشینری ءَ جوڑ بوتگیں سیول پروگرام بلوچ ءَ زہنی، باتنی ءُ مورلی بُنیاداں کُشگ ءَ اِنت۔ بلوچ چاگرد ءَ بے حسی، وت پسندی، مورل کرپشن، نپر پسندی، بئیمانی ءُ موہ پرستی گونگیں سِلکاری ءُ بیماری ریاست ءِ اندیمیں تشدد ءِ ھستیں داب ءُ دروشم اَنت کہ ایشی ءِ کارمرزی ءَ اِستان بلوچ ءِ بے تواری ءَ لس کوشے ءَ گوں دست گٹ اِنت۔ مروچی ئیں پوجی دْروگیں بچکند ءُ سرکاری بیان ءِ مھروانی ءَ اندیمیں تشدد ءِ زَھرناکیں نوآبادیاتی نیّت اُلسی پروگرام سازی ءَ بلوچ جُنز ءِ کاؤنٹر پالیسی ءِ رنگ ءَ دیم ءَ آرگ ءَ اِنت۔

ایردستیں بلوچ نودربراں
گُلامیں راجانی ورنا ءُ وانندگ آکبت ءِ سازوک بوتگ اَنت۔ وھدے کہ راجاں زور گیری ءِ وبا ءِ ھلاسی ءَ لانک بستگ گڑا ورنا تبک ربیدگی تاگتے ءِ رنگ ءَ زور گیر ءِ ھمک ھستانکی ءِ نیمون ءِ کُشگ ءِ ھمرائی ءَ راجی جوڑشت سازی ءَ مزنیں کردے پیلو کُرتگ۔ مروچی بلوچ ڈیھ ءَ زور گیریں پاکستان بلوچ ورنا ءُ وانندگاں بلوچ جُنز ءُ بلوچ راج ءَ پچ گِرگ ءَ اِنت، اے ھاٹیگ، بودشت ءُ ساچشت ءَ بلوچ جُنز ءِ نزور ترینگ ءَ کاربندگ ءَ اِنت ءُ بلوچ ورنا ءَ را بے مکسد ءُ بے مانائیں زندے گوازینگ ءَ ٹگی ءُ ٹوری کنگ ءَ اِنت دانکہ بلوچ ءِ ایردستیں نودربر وانگ ءَ پاکستان ءِ بیوریوکریسی ءِ پروٹوکول، روزیگی ءُ نپری وشھالی ءِ گرگ ءِ یک وسیلہ یے سرپد بنت۔ بلوچ نودربراناں سرپد بوئگی اِنت کہ گُلامی ءِ اھد ءَ وانگ ءُ زانشت ایردستی ءَ وْلگوج کنگ، گھگیری ءِگیشواری ءُ راجی جوڑشت سازی ءَ بُندپتری کردے پیلو کنت بلے زور گیر ءِ نپری زندگی ءِ رپک ءَ رد وْرگ ءُ اِستان ءِ لوٹ ءِ پدا وتی بُندپتری زمہ واریاں چہ دزکشی اسل ءَ زور گیریں تاکت ءَ گیشاں گیش تاوانمند کنت۔ پاکستان ءِ نوآبادیاتی یوتھ اینگیجمنٹ پالیسی بلوچ ورناھاں آزاد ھیالی، دروگیں واب، ادارُکی سوچ، چہ بلوچ جُنز ءِ گستائی ءُ ایدگہ گُپتماناں مانگیشگ ءَ اِنت۔

بلوچ زانوگر ءُ دانشوراں
یوتھ اینگیجمنٹ پالیسی ءَ ھترناکیں دود ءُ تب بلوچ ورنا ءِ روشتاں رُدینتگ۔ اے پالیسی ءِ تاوانباری بلوچ چاگرد ءَ جنگی نپوار، کمپریڈر دانشور، اِستان ریکروٹ ءُ دوازہ ءِ رنگ ءَ ھمنکس تاوانبار اَنت کہ بلوچ چاگرد ءَ بلوچ جُنز ءِ بگیری ءَ تھنا بیانیہ ساز ءِ رنگ ءَ دیم ءَ پیداک نہ اَنت بلکیں اَنچیں آبادی یے رُدوم دیگ بوئگ ءَ اِنت کہ ایشانی تب،روشت، ھیال ءُ عمل بلوچ راجی جُنز ءِ لیکھی ازگاری ءَ اڑاند بوت کُرت کن اَنت۔ ریاست ءِ ڈیتھ اسکواڈ، امن فورس ءُ دفاعی تنظیماں چہ ھترناکتر یوتھ اینگیجمنٹ پالیسی اِنت پرچاکہ بلوچ جُنز ءَ وینگارڈ(بلوچ نودربر) ءِ اندر ءَ بیوروکریٹک سنچ ءِ شئے دیگ دانکہ بلوچ ءِ ورنا ءُ وانندگ ءِ سیادی چہ بلوچ راجی آجوئی ءِ جُنز ءَ بہ سِند ایت ءُ بلوچ نودربر ءِ تہ ءَ انچیں نفسانفسی یے بئیت کہ شپ ءُ روچ ایوک ءَ وتی زاتی وشی، نپ ءُ سیِت، دیمرویءُ ازگاری ءِ سائیکل ءَ زند بہ گوازین ایت۔ یوتھ اینگیجمنٹ پالیسی ءِ سیمینار، ورکشاپ ءُ مراگشاں گیش کارمرز بوؤکیں گالبند ”لاحاصل جنگ” اِنت کہ اے گالبند ءِ کمک ءَ اِستان بلوچ ورنا ءَ آجوئی جُنز ءَ دلپروش ءُ دُور دارگ ءَ کارمرز ئے کنت۔ راجی آجوئی جُنز ءِمستریں تاوان لس ورنا ءَ چہ جُنز ءَ سِندگ ءُ درآمد جوڑ کنگ اِنت۔ بلوچ زانوگر ءُ دانشوراناں ریاست ءِ ھمک چیر ءُ اندریں دروشم بلوچ نگاہ ءِ بُنشون ءَ شوھازگ ءُ پدّر کنگی اَنت، ریاست ءِ شوربندی زانشت ءِ کالب ءَ پریسگی اَنت پرچاکہ گُلامی ءِ اھد ءَ زانشمندی ھما باپُشتی کمک اِنت کہ زوراکی ءِ پیچ ءُ تاباں وتی مھلوک ءَ سرپد کنائین ایت۔

بلوچ سیاسی بُنزھاں
زور گیریں پاکستان ءِ بلوچ کاؤنٹر پالیسی شائیگان اِنت ءُ ایشی ءِ یک پھناتے بلوچ نودربر اِنت۔ زورگریں پاکستان ءَ بلوچ راج ایوک ءَ توپ ءُ بمب ءِ زور ءَ ایردست نہ کُرتگ بلکیں زور گیر ءِ نشانگ ءَ بلوچ راج ءِ ساچشت، بودشت، انسانی ھاٹیگ ءُ توانائی وتی زور گیری ءِ مُھکمی ءُ آجوئی جُنز ءِ دیم ءِ دارگ ءَ شوربندی ءِ بھر کُرتگ اَنت۔بلوچ یوتھ اینگیجمنٹ پالیسی زور گیریں اِستان ءِ ھما بلوچ کُشیں پروگرام اِنت کہ ایشی ءِ کارمرزی ءَ ریاست بلوچ ءِ بودناکیں آبادی ءِ ھمک بودشت ءُ ھاٹیگ ءَ وتی زور گیری ءِ ادارہ ءُ بُنزھانی مھکم کنگ ءِ ھمرائی ءَ بلوچ ءِ ھلاپ ءَ بلوچ نودربراں کارمرز کنگ ءَ اِنت۔اے دابیں شوربندی ءُ پندلانی دیم ءِ دارگ ءَ بلوچ سیاسی سنگر بلوچ راج ءُ ورناھانی میان ءَ سیاسی موبلائزیشن ءِ دْرچ ءَ ھمنکس تاکتور بہ کن اَنت دانکہ زورگیریں پاکستان ءِ ھمک چیریں کاؤنٹرپالیسی پاشک بہ بنت ءُ آیاں دارگ ءِ ہاتر ءَ عملی گامگیجے بہ بیت۔

ہمبلیں بلوچ ورنایاں
زورگیر ءُ ایردست ءِ میان ءَ سیادی مدام کُنّت ءُ دژمنی ئیگ اِنت، زورگیر مدام ایردستیں مھلوک ءَ چو کڑُک ءُ لُلُک ءَ چار ایت ءُ ایردستیں راج ءِ پُسگاں ہچ بستارے نیست۔ پمیشکا وھدے زورگیر کہ سرزاھر ءَ چِزے دنت، دروگیں مھرے درشان کنت داں آئی ءِ پُشت ءَ مکسدے چیر اِنت، اے دروگیں بچکند ءِ پُشت ءَ آ ترا رد دنت ءُ چہ ترا تئی ہمک شئے ءَ پُل ایت۔ راجانی جسدی شئے ءِ پُلگ بگندے اینچو تاوان مہ بیت بلے زورگیر ءَ وہدے تئی مجگ ءُ یاداشت کور کت اَنت، تئی تب مٹ کُت، چہ ترا تئی گھگیری ءِ سِنچ ئِے نزور کُت گڑا اِش تاوانانی پُر کنگ سک باز گران اِنت۔ پمیشکا بلوچ ورنایاں زانگی اِنت کہ آ بلوچستان ءِ واھند اَنت، یک مزن دپتریں راج یے اوبادگ اَنت، ءُ بلے مرچی کہ ڈیھ ایردست اِنت داں دژمن ءِ داتگیں ادارُکی نپ ءُ جاتگیں گزرک آئی ءِ لوٹ نہ اِنت بلکیں آجو بلوچستان آئی ءِ باندات ءُ ہستانک اِنت۔ پہ وتواجہی ءِ گِرگ ءَ آیاں دژمن ءِ ہمک رنگیں پندل پروش دیگی اَنت ءُ پاش کنگی اَنت ءُ پہ گُلیں ڈیھ ءَ وتی زور ءُ ہاٹیگ دیگی اَنت۔