نوآبادیاتی یوتھ انگیجمنٹ پالیسی و بلوچ راج

بلوچ راج

دنکہ نمے سما مرے یوتھ انگجمینٹ پالیسی ناجائز ریاست پاکستان نا ہمو پالیسی تیان ءِ ہرانا مسخت بلوچ زنک ئنا ذہنی تخلیق ءِ ایسر کننگ و بلوچ ورناتے بلوچ قومی تحریک آن مُر کننگ کن جتا جتا پروگرام تا بِنا کننگ ءِ۔ دا پراگرام آتیٹی اسکالرشپ، سیمنار، ورکشاپ، یوتھ سیشن، مجلس، لیپ ٹاپ بشخنگ، اسکل پروگرام، کنٹریکٹ نوکری، فیسٹول، و گوازی تیٹ ورناتے گٹ کننگ، و زالبول آتیکن جتا ءُ پروگرام تخنگ اوار ءُ۔ دا وڑ ئنا پروگرام آک گیشتر اسکول، کالج، یونیورسٹی، و پرائوٹ اکیڈمی تیٹ خننگ ٹی بریرہ۔ دا کل ریاستی پروگرام تا مسخت بلوچ ورنا تے پین ہِڑز و لالچ ئٹ ہتنگ و اوفتے تینا ریاستی مشینری تا بشخ جوڑ کننگ ءِ۔

بلوچ ورناک

بلوچ ورناک اینو چَک خلبو نمے آ داغ اس ارے غلامی نا، زندگی نا کل آن بھلا داغ اندا غلامی نا ءِ، دا راج ئنا دا ڈغار نا دا زنک ئنا ہر ہر غلامی نا داغ پیشانی آ خننگنگ ئٹی ءِ۔ گڑا دا داغ ءِ مُر کننگ کن بلوچ قوم تحریک تون اوار مروئی تمک۔ اینو ناجائز ریاست پاکستان وڑ وڑ ئنا تینا پالیسی تیٹی بلوچ خوانندہ تپہ آن ہلیس پیر و کماش آتسکان کل ءِ ریفنگ کن ہمو وڑ نا چم و ہٹکل جوڑ کرینے۔ گڑا بلوچ راج ئنا کل مخلوق ءِ ہم تینا سما مرے کہ اینو ننے امر ناجائز ریاست پاکستان تینا مشینری تا بشخ کرینے۔

بلوچ خوانندہ غاک

ہر خوانندہ غا بلوچ ورنا نمے دا سما مرے کہ اینو نما تخلیقی آ لائخیک اگہ ایسر مسنو اونا سوب ہم اندا کالونیل ایجوکیشن و کوزہ گیر نا پروگرام آک ءُ۔ دا کل پروگرام آتا گڈی مسخت ہم اندادے کہ بلوچ ءِ پین غلام گُنگ و کور تخن۔
اگہ گڑاس ہیت نما مونا تخن:
اینو نن تینا بولی تیٹی گپ کننگ کپنہ نوشتہ کننگ کپنہ دا ننا کور و گنگ مننگ نا بلا نشانی ءِ۔
اینو نن تینا خلقی شاعری و کسہ غاتے اُست آن درینن اوفتے ٹی ننا ادب نا بھلو کچ اس تخوک ءِ۔
اینو دود و ربیدہ غاک ننا بلوچ چاگڑد ٹی پوسکنو دروشم اس ہلنگ ءُ، اندن کوزہ گیر نا تروکا پالیسیک ننا زی آ تِرپ مننگ ءُ۔
اینو دود و ربیدہ غاک، بلوچ دیہاڑ، چاگڑد، و پین بھاز آ گڑا تیان مُر تخانن دانا ہم اندا سوب آک ءُ تانکہ بلوچ قوم تینا راستی آ دروشم ءِ پہہ مف مونا اندن کنا غلام سلے۔ کوزہ گیر پاکستان پین تینا جتا انگا دروشم تے ہر ہر تپہ کن جوڑ کرینے دا کل ئنا سوب غلامی ءِ، اندن غلامی ءِ برجا تخنگ کن ناجائز ریاست پاکستان تینا کیہی سافٹ پالیسی تے ہیسنے و اینو ہم مونا ہتنگ ءِ، گڑا یوتھ انگیجمنٹ پالیسی ہم اندا پالیسی تا بشخ ئسے۔

بلوچ ورناک

ساندہ کوزہ گیر آتا نفسیات ئٹ اندا مسنے کہ ہراتم جاگہ ئسے آ کوزہ کرینو گڑا اوفک ہم اندا وڑ ئنا پالیسی ہیسنو و ہمو جاگہ نا غلام آ راج ءِ ریفنگ کن سافٹ پالیسی نا دروشم جوڑ کرینو۔ تانکہ ہمو جاگہ نا اُلس ننے آ باور کے و نن تینا کوزہ گیریت ءِ برجا تخن۔ دا وڑ ئنا تدینیک ننے افریقہ، گڑاس یورپی ملک آتیٹی، ایشیاء، و امریکہ نا اندن دا کل براعظم تا لٹریچر آتیٹ خننگ ٹی بریرہ۔ کسس امر تینا کوزہ ءِ برجا تخانے یا کسس امر ءُ تینکن پالیسی جوڑ کریسس۔ گڑا اینو ہم ناجائز ریاست پاکستان اندا وڑ ئنا پروگرام و پالیسی تے مقبوضہ بلوچستان ئٹ بنا کرینے۔ دا یوتھ انگیجمنٹ پالیسی تون اوار اوار پین بھاز آ پالیسی تے جوڑ کرینے دنکہ ہر جاگہ جرگہ اڈ تننگ، سیاسی و مذہبی پالیسی تے مونا زیات کننگ، خوانندہ غاتتون اوار اوار ایلو ہر پیر و کماش و زالبول تے ہرفنگ و بیگواہ کننگ، پوریاگر آتیکن ڈغار ءِ تنک کننگ، سیاسی ادارہ غاتیا کریک ڈاؤن کننگ و سَٹی ءُ دوبہ خلنگ، زوراکی ئٹ بلوچ زنک ایسری ءِ کننگ ہڑدے نا کچ آ بلوچ نا ورنا و کماش آتے شہید کننگ، قبائلی جیڑہ غاتے بلوچ قوم نا نیام ئٹ ہتنگ و اوفتیکن جیڑہ ودی کننگ، پین دن انگا بھاز آ چم آتے تینا کننگ ءِ۔ دا کل ئنا پد آ ہمو گپ ودی مریک کہ بلوچ قوم ءِ بلوچ قومی تحریک آن مُر تخنگ۔

ننا ورناک و بلوچ مخلوق

اینو تیوہ بلوچ قوم ناجائز ریاست پاکستان نا ہر ہر پالیسی تے آ تینا نظر ءِ شاغر۔ اگہ اینو بلوچ قوم تینے پد بِٹے یا دا جیڑہ غاتے تینا جیڑہ سرپند متو گڑا دا غلامی نا توک اونا ساندہ لِخ ئٹ مرو۔ اینو بلوچ قومی تحریک ہر ہر پِڑ آ تینا کاریم تے کننگ ءِ۔ تینا کل اُلس نا مونا ناجائز ریاست پاکستان نا ہر ہر پالیسی تے درشان کرینے و کننگ ءِ۔ بلوچ قومی ادارہ غاک کوزہ گیر نا ہر ہر ناجائز آ عمل ءِ نما مونا پاش کننگ ءُ۔ گڑا بلوچ مخلوق نا دا حق مریک کہ اوفک ریاست نا پالیسی تیان مُر مریر ہرافتے اینو کوزہ گیر بلوچ قومی تحریک نا کاؤنٹر کننگ کن جوڑ کرینے۔

یوتھ انگیجمنٹ پالیسی و بلوچ ورناک

بلوچ ورنا تیکن مونا داسہ اِرا کسر سلوک ءِ اولیکو آیا اوفک تخلیق، لائخی، علم، عمل، و زانت نا کنڈ آ کار و تینا قومی آزادی نا تحریک نا بشخ مریر۔ یا ارٹمیکو یوتھ انگیجمنٹ پالیسی تا بشخ مریر ہراٹی گُنگ و کر مننگ آن بیدس پین ہچ اف۔ دا بلوچ ورنا تا زمہ واری ءِ کہ اوفک دا وڑ ئنا پروگرام آتا مونا سلر و کوزہ گیر ریاست نا پالیسی تے بلوچستان و بلوچ قوم نا مونا پاش کیر و کوزہ گیر نا دا پالیسی تے عملی دروشم ئٹ کاؤنٹر یا ایسر کیر۔ اینو اندا پالیسی تا سوب آن بھاز آ ورناک ذہنی ناجوڑ مسنو، ہچ سما تمنگ اف تا کہ انت کروئی ءِ مونا انتیکہ اندا ریاستی پروگرام تا سوب آن اوفتا لائخی و علمی ہنر ایسر کننگانے۔ بلوچ ورناک مونا اخس کہ مریک عملی دروشم ئٹ دا وڑ ئنا ہر ہر پالیسی و پروگرام تیا تینا پام ءِ تخبو۔ کوشست نما اندا مرے تینا علمی و ایلو لائخی تے تینا بلوچ قومی آزادی نا تحریک کن کاریم ئٹ ہتبو۔