فیک انکاؤنٹر، ریاستءِ نوکیں پالیسی

بلوچ راج
بلوچستانءِ تہءَ ھر وھدءَ کہ بلوچ راجی آجوئیءِ جنز گیش مہکمی نیمگءَ روگءَ بیت گڑا زورگریں ریاست پہ بلوچءِ جہدءِ کاؤنٹر کنگ ءُ بلوچ لس مہلوکءَ چہ جہدءَ دور دارگءِ واستا نوکیں پندل سازی بندات کنت۔ سال 2008 ءَ وھدے کہ لس مہلوک پاکستانی ریاستءِ بلوچستانءِ سرءَ زوریں کبزہءِ ھلاپ ءَ پاد کیت ءُ بلوچ جہدءِ آجوئیءِ عملی بہر جوڑ بیت، گڑا بلوچستانءَ زوگریں ریاست “چست کنگ ءُ بیگواہ کنگ” نا اوشتوکیں پالیسی یے بندات کنت، چوشکہ دنیاءِ تہءَ زورگریں ریاستانی تاریخ گوں بے رحمیں زلم ءُ زوراکیاں بندوک انت، بلئے ادا اے زورگریں ریاست سوبمند نہ بیت۔ وھدے کہ اے ریاست وتی اے پالیسی ءِ تہءَ سوبمند نہ بیت ءُ جہد یکشلہ برجاہ بیت گڑا زورگر یک دگہ نوکیں پالیسی یے “کُش ءُ دور دئے” (Kill and dump) ءِ پالیسی یے دیمءَ کار ایت، ایشیءِ بنداتءَ چہ بلوچ نیشنل موومنٹءِ سروک ءُ بلوچ راھشون غلام محمد، لالا منیر ءُ شیر محمد ءَ چہ بندات کنگ بیت۔ ھمے رنگ ءَ گار ءُ بیگواھیءَ ھوار ، کُش ءُ دور دئے (Kill and dump) پالیسی ھم یک پیمءَ ترند کنگ بیت۔ چہ ریاستءِ نیمگءَ اے گار ءُ بیگواھی ءُ جنگ ءُ کُشگءِ پالیسی انگت برجاہ اِنت کہ برے آئیءِ تہءَ ترندی ءُ برے کمی کیت اِنت۔ ریاستءِ اے سرجمیں زوراکیاں بلوچ لس مہلوکءَ را چہ بلوچ ءِ جہد ءَ دور داشت نہ کُتگ بلئے اے یک راستی یے کہ ریاستءِ چہ اے رنگیں زوراکیاں مزنیں کساسےءَ مردم ترسءِ آماچ بوتگ اَنت ءُ ریاستی زوراکیءِ ھلاپ ءَ ھاموش بوتگ اَنت۔

شرپمندیں بلوچ راج
چوشکہ راجی جنزانی تہءَ مدام کمی گیشی، جہلی برزی کیت ءُ روت اِنت بلئے وھدے کہ یک راجی جُنزیے، پہ وتی ھاسیں منزلےءَ شعوری بنیادءَ جنزگءَ بہ بیت گڑا آئی تہءَ اے رنگیں ھاموشی مدامی نہ بنت بلکیں یک کسانیں مدتےءِ واستا بنت اِیں، بلئے ریاستی زوراکی مدام برجاہ بیت ءُ آ وت مہلوکءِ شعور یافتہ کنگ ءِ تہءَ کردے ادا کنت اِنت۔ گوستگیں بیست سال بیت کہ زورگریں ریاستءِ لشکر سرجمیءَ بلوچستانءَ ایر کپتگ ءُ بلوچ ءِ چُکچینی ءَ کنگ ءَ اِنت، بلئے ھر وھد ءَ یک نوکیں دروشمےءَ کئیت اِنت۔ چوشکہ ما زانیں کہ بلوچ راجی جنز ءِ ھلاس کنگ ءِ واستہ ریاستءَ ایوکءَ وتی لشکری زوراکی کارمرز نہ کُتگ اَنت بگندئے ھمک دمگاں ڈیتھ اسکواڈ ھم جوڑ کُتگ، آئیءِ ھوار مذہبی شدت پسند ٹولی ھم ایکٹیو کُتگ اَنت کہ آھانی فنڈنگ ءُ اِدا مہکم کنگءِ تہءَ یک مزنیں مکسدے بلوچ راجی جنگ ءَ کاونٹر کنگ انت۔ ھمے رنگءَ بلوچستان ءِ تہءَ سرداری نظامءَ مہکم کنگ ءُ آئیءَ را بلوچ جہدءِ ھلاپءَ کارمرز کنگ، بلوچستانءِ تہءَ دراھیں منشیات فروش ءُ دومی چاگردی اسمگلرزاں کمک کنگ ءُ آھاں سلاہ بند کنگءِ مول ءُ مراد ھم بلوچ جہد ءِ کاؤنٹر کنگ بوتگ, آئی ءِ ھمبرائی ءَ جتاجتاہیں این جی اوز جوڈ کنگ ءُ سرجمیں بلوچستان ءَ ھمے این جی اوز ءَ بلوچ راجی جُنز ءِ ھلاپ ءَ کار گرگ ءَ اِنت۔ بلئے ریاستءِ اے سرجمیں زوراکی ءُ پندلاں پد ھم لس مہلوکءَ یک برے پدا ریاست ءِ زوراکی آنی ھلاپ ءَ توار چست کنگ بندات کُتگ ءُ بلوچ راجی جُنز یک نوکیں دروشمےءَ دیمءَ اَتکگ۔ وھدے کہ ریاستءِ علاقائی ٹولی لس مہلوکءِ توار ءَ ھاموش کنگ ءَ بے سوب بوتگ اَنت گڑا ریاست ءَ بلوچ مہلوک ءِ جہد ءِ کاؤنٹر کنگ ءُ مہلوک ءَ را ھاموش کنگ ءِ واستہ زوراکیءِ یک نوکیں دْرچے بندات کُتگ کہ گار ءُ بیگواھیں مردماں فیک انکاؤنٹرءِ نامءَ کُش ءُ دور دئے دانکہ لس مہلوک یک ترسے ءِ آماچ بہ بیت ءُ جہد ءَ چہ وت ءَ دور بہ داریت۔

بلوچ راج
چوشکہ ھچ رنگیں راجی آجوئیءِ جنز چہ زورگریں ریاستانی زلم ءُ زوراکیاں ھلاس نہ بیت اِنت، ھمے رنگءَ پاکستانءِ اے نوکیں پالیسی کہ آئیءِ زمہ واری یک نوکیں ادارھے، بزانکہ سی ٹی ڈی (کاؤنٹر ٹیررزم ڈیپارٹمنٹ) ءَ دیگ بوتگ، راستی ءَ اے کاراں سرجم ءَ اے ریاستءِ چیریں ادارہ وت کنگ ءَ انت بلئے وتءَ پارسا پیشدارگءِ ھاترا آ دگہ نامے (سی ٹی ڈی) ءَ کارمرز کنگءَ اِنت۔ اِدا چہ یک گپے پدر بیت کہ ریاست ءِ نوکیں پالیسی ھم ھما کوھنیں پالیسی آنی پیم ءَ چست بؤکیں تواراں ھاموش کنگءِ جہدءَ اِنت بلئے وھدے کہ یک راجے باشعور بیت گڑا زوراکیءَ گوں آ راج ھاموش کنگ نہ بیت بگندئے اے زوراکی راجءَ گیشءَ گیش گلامیءِ مارشتءَ دنت۔ مارا اے گپ سرپد بؤگی اِنت کہ دنیا ءِ تہءَ ھچ راج پہ جنگ ءُ کشگ ھلاس نہ بیت، اوگانستان گوستگیں چِل سال اِنت کہ دنیاءِ مزنیں تاکتانی جنگانی بنجاہ اِنت ءُ بے گناھیں اوگان مرگءَ اَنت بلئے اے راستی یے کہ اے سرجمیں کشت ءُ کوشءَ اوگان ھلاس نہ کُتگ اَنت بلکیں اوگان ھما رنگ ءَ مزن بوان اِنت، راج پہ مرگ ءُ کشگ ءَ ھلاس نہ بنت بلئے ھما راج کہ زوراکیءِ ھلاپ ءَ ھاموش بنت ءُ وتی جندءِ زند ءَ اجتماعی زند بزانکہ کُلیں راج ءِ باندات ءَ ندر کنگ ءَ تیار نہ بنت گڑا آ راج ھمے رنگیں زواکی آنی تہءَ گار ءُ گور بنت یا آھاں کدی ھم شریں بانداتے نام ءَ نہ بیت۔ اے راستی یے کہ مرچی بلوچ زلم ءُ زوراکی آنی آماچ اِنت، بلوچ ورنا، پیر ءُ کماش، زھگ ءُ زالبول زورگرءِ زوراکیانی دیمپان اَنت بلئے الم انت کہ پہ یک وشیں بانداتےءِ واستہ مرچی بلوچءَ را پہ راجی جُنز ءِ واستہ وتءَ ندر کنگءَ تیار بوّگی اِنت ءُ وتی جُنزءِ بہر بوّگی اِنت دانکہ ما یک راجےءِ بستارءَ وتی بانداتءَ رکّینت کت بہ کن اِیں۔