اینن فورم نا لٹریچر و آرٹ نا زی آ ہیت

ماؤزے تنگ/نودان بلوچ

ننا نوشتکار و آرٹسٹ تیکن لٹریچر و آرٹ نا کاریم ارے و اوفتے دا کروئی ءُ ، ولے اوفتا بنیاتی کاریم دادے کہ بندغ آتا تب تیان خوڑتی اٹ واخب مریر۔ دا رِد اٹ ننا نوشتکار و آرٹسٹ آک دا وخت اسکان انت کرینو؟ کنا خیال اٹ دانا مثیل ہمو بندغ آتا ءِ ہرافتے جنگ اکن جاہ اف و اوفک زمینی راستوکی آن مر بےسما ءُ۔ زمینی راستوکی آن مر مننگ نا متلب انت ءِ ؟ دانا متلب دادے کہ ننا لٹریری و آرٹسٹ بندغاک مخلوق تون خوڑتی اٹ درستی افس۔ او نہ تینا اُلس آن واخب ءُ، نئے کہ ہمو بندغ آتیان ہرافتا زی آ او نوشتہ کننگ ءُ۔ ننا نوشتکار و آرٹ نا جہدکار آک لس بندغ آن تیوہ وڑ اٹ واخب افس ، جتا ءُ۔ و نئے کہ مزور و بزغر آتے چارہ، نئے کہ سپاہی و تینا جہد کار ءِ! کنا کنڈ آ نا پوہی نا معنہ انت ءِ؟ ناپوہی نا متلب دادے کہ لس بولی اٹ نادرستی۔ ننا نوشتہ کار و آرٹسٹ آک ہرا بولی اٹ نوشتہ کیرہ، او زانتکار (Intellectuals) آتا بولی ءِ، ولے اوفتا خوانوک آک لس السی بولی ءِ پوہ مریرہ۔ ننا خڑک آ بھازا نوشتکار و آرٹسٹ آک اریر ہرا تینے الس آن جتا کیرہ، مر و بے معنہ غا زند نا خواہش ءِ کیرہ، اندا سوب آن فطرتآ اوفتا زبان مخلوق کن ناپوہی نا بستار آن چاننگک۔