سینزدہ نومبر بلوچ شہیدانی روچ

البرز بلوچ

سینزدہ نومبر بلوچ شہیدانی روچءِ درگتءَ دارگ بیت اِنت۔ ھما شہید کہ آھاں وتی جان پہ بلوچ راج ءُ بلوچستان ءِ آجوئیءَ ندر کتگ انت۔ ھما شہید کہ آ پہ منزلےءَ راہ کپتگ انت ءُ پدا آھاں پُشت نہ چار اتگ بگندئے یک رُژنائیں بانداتےءِ ھاترءَ آجوئیءِ واب وتی چمّاں سمبہینتگ ءُ آئیءِ سرجم کنگءَ گوں یک درامدیں استانےءَ جنگ داتگ۔ ھما شہید کہ زر ءُ مال، نوکری ءُ روزگار، پرپٹ ءُ موٹل ءُ دنیا ءِ ایدگہ معادی شے آں چہ دیر یک عظیمیں مکسدےءِ نیمگءَ رہادگ بیتگ انت کہ آئیءِ منزل بلوچ سر ڈگارءِ سرجمیں آجوئی اِنت۔

سینزدہ نومبر ھما روچ انت کہ انگریز بلوچستانءِ سرءَ اُرش کنت ءُ میر مہراب خانءَ شہید کنت ءُ بلوچ سرڈگار ءِ سرءَ کبزہ کنت۔ دنیا ءِ تہءَ بازیں مہلوکے اتکگ شُتگ ءُ بازینے آیگءَ اِنت۔ بازینےءِ نام ماں راجدپترءَ سہریں تاکاں گوں نکش اِنت۔ بازینے ماں راجدپترءِ مُجاں گار اِنت۔ ھر ھما انسان کہ آھاں وتءَ چہ ڈن پہ کش ءُ گوراں جیڑ اتگ ھما آں مرچی دنیا مٹ کتگ۔ ھما انسان کہ چہ وتی زاتءَ در کپتگ انت ءُ یک لیکہے ءِ سرءَ اوشتاتگ ءُ چہ آئیءَ ھچ چَک ءُ پد نہ بیتگ انت، ھما آنی بدولتءَ مرچی دنیا اے جاہءَ سر اِنت۔
دنیا ءِ تہءَ کجام ھم راج بہ بیت آ راج اگاں مرچی ایمنی ءُ آجوئی گومءَ زند گوازینگءَ اِنت آئیءِ پُشدرءَ شہیدانی یک دراجیں لَڑیے ھست کہ آھاں پہ آؤکیں نسل ءَ وتی جان ندر کُتگ انت ءُ وتی راجی استان جوڑ کُتگ۔
دنیا ءِ تہءَ ھر دور ءُ ھر وھدءَ ھر راج ءِ سرءَ زلم ءُ زوراکی بیتگ بلئے آھانی تہءَ لہتیں ورنا ، زالبول ءُ پیر ءُ آجز مُدام بیتگ کہ آھاں زُلم ءِ ھلاپءَ وتی گہگیری داشتگ ءُ زُلمءِ ھلاس کنگ ءِ ھاترءَ جُہد کُتگ۔ کسےءَ رُژنائیں باندات دیستگ ءُ کسے شہید بیتگ۔ بلئے آئیءِ جہدءِ برورد آئیءِ آؤکیں نسلءَ دیستگ۔

اگاں بلوچ راجءِ گپ کیت گُڑا بلوچ راجءِ راجدپترءَ شہیدانی یک نہ کُٹوکیں لڑیے دیمءَ کئیت کہ آہانی تہا ورنا، نودربر، استاد، پیر ءُ کماش، زالبول ءُ زہگ ھوار انت۔ اے ھما لڑ اِنت کہ آھاں پہ بلوچ سرڈگار ءِ آجوئی ءَ وتی نُگرہیں جان ندر کُتگ اَنت۔ بگیر زاتی پائیدگ ءُ لالچےءَ آھاناں وتی ساہ بکشاتگ۔ بلوچ ءِ تبءَ مُدام ھوار بیتگ کہ آئیءَ ڈنی تاگت اوپار نہ کُتگ انت کہ آ بیا انت بلوچ ءِ سرڈگار سرءَ ھاکمی بہ کن انت ءُ لُٹ ءُ پُل ءَ برجاہ بہ دار انت۔ ھر وھدءَ کہ ڈنی تاگتے اتکگ تُری ستر مزن ءُ تاگتور بیتگ بلوچءَ مُدام آئیءِ دیم داشتگ ءُ گہگیری کُتگ۔
مرچی بلوچ ءِ بچاں وتی جان ندر کُتگ تہنا ھمے ھاترءَ کہ بانداتیں نسلءَ آجوئی بہ رس ایت ءُ جنگ کمو کمتر بہ بیت۔ بلوچ ءِ ورنا دلءَ سدّک انت کہ آ بگندئے بلوچ راج ءِ آجوئیءَ مہ گند انت بلئے آ پہ آؤکیں پدریچءَ جنگ کنگ ءَ اَنت ءُ وتءَ راجدپترءَ نمیران کنگءَ انت۔ یک درورے شہید شے حق بلوچ ئیگ اِنت کہ یک کسانیں تامُریے تہءَ آئیءَ جُست کنگ بیت کہ “بلوچستان آجو بیت تو چے کن ئے؟”
آ پسو دنت” من زاناں کہ بلوچستان ءِ آجوئیءَ من زندگ نہ باں، بلوچستان ءِ آجوئی وابءَ من چم وت نہ گند آں بلئے بلوچ گند ایت ءُ اگاں من زندگ بیت آں گُڑا من سیمسرءَ بلوچستان ءَ پہریزاں ءُ دژمن بلوچ سرڈگار ءِ سرءَ چماں چست کنت چار ایت من آئیءِ چماں کَش آں۔”
اے گپ وت یک بلاھیں کسّہ یے آرگءَ اِنت کہ بلوچ آجوئی جُہدکار چنچو وتی زمینءَ گوں مہر ءُ راجی جُہدءَ گوں مُخلص انت۔ بلوچ جُہدکار اے گپءَ سدّک انت کہ آ زندگ نہ بنت بلئے گوں بچکنداں پہ اے راجءَ جنگءَ انتءُ ساہاں دیگءَ اَنت۔ بلوچ ءِ مہر گوں زمینءَ ھمینچو مُہکم اِنت کہ آ بلوچستانءِ آجوئیءَ پد ھم بلوچ سرڈگار ءِ ھاترءَ جنگ کنگ ءَ گوں دلجم ءُ تیار انت بزاں کہ آ پہ عیش ءُ نوش ءُ ایمنیں زندیےءِ ھاترءَ جنگءَ نہ انت بلکہ بلوچ راج ءِ پجار ءُ آئیءِ زمین ءِ رکینگءِ ھاترءَ وتی جاناں ندر کنگءَ انت۔ بلوچ راج ءِ لیکہ ھمینچو مُہکم اِنت کہ مات وت وتی بچاں پہ اے سرڈگار ءِ ھاترءَ آھانی پیشانیاں وت چُک انت ءُ جنگءَ راہ دینت۔ لمہ یاسمین کہ ریہان جان ءِ سرءَ چُک ایت ءُ آئیءَ پہ بلوچ سرڈگار ءِ ھاترءَ فدائین بیگءَ دیم دنت۔ ھما مات کہ زانت نوں آ وتی بچءَ دوبر نہ گند ایت بلئے پہ بلوچ ءُ بلوچستان ءِ آجوئیءِ ھاترءَ وتی چُکءَ گوں نیکیں واھگاں پہ شہیدیءَ دیم دنت۔ یک ماتے ءِ دو چُک ءُ لوگ واجہ ءَ ھوار شہید کنگ بنت ءُ آ انگت چار راہءِ سرءَ چو سیاجیءِ مہکمیں کوھاں اوشتیت ءُ بلوچ سرمچاراناں ساڑائیت۔ عرفان جان شہید کنگ بیت ءُ آئیءِ مات گُشیت کہ منی بچ زندگ اِنت ھما ورنا ءِ شکلءَ کہ آ پہ آجوئی ءِ ھاترءَ شُد ءُ لاپ کوھاں در پہ در اِنت۔ کُل جہدکار منی بچ اَنت۔
بلوچ…