نوآبادیاتی نفسیات

کمبر چاکر بلوچ/گزین بلوچ

نوآبادیات (کوزہ گِر) تینا ہزار سال مالو نا عظیم آ تاریخ، دود و رواج، بولی اندنکہ ہر گڑا ءِ درو نا استعماری طاغت آن کم خلنگ، نِزور و غیر مہذب سرپد مریک۔ اندنکہ نوآبادیاتی بندغ نا وڑئٹ جانور جوڑ مریک۔ بے حِس، لغور، غیر مہذب ولے اینو ام تینا مخلوق تون جنگ کیک۔ نوآبادیاتی بست و بند ئٹی مخلوق نا دا حالت ءِ بے دادی ئٹ کیک۔ ہندا وڑئٹ بے دادی کننگ نا سوب آن جہی مخلوق نا بندغی (انسانیت) کُھٹِک، اندن او ساہدار جوڑ مریرہ گڑا اوفتے تینا گُلزمین و مخلوق، بولی، ربیدگ تون مہر و مابت مریک ولے بے دادی نا خلیس آن دافتا درشان ءِ کننگ کپسہ۔ ہندی (جہی) مخلوق نا ہر دود، ڈول ءِ غیر مہذب پائک۔ اوفتا تاریخ، بولی و ربیدگ ءِ بیکار پاننگ تون مخلوق ءِ مُر مننگ کن پائک، جہی مخلوق ءِ دیمروی و مہذب نا جوفہ ٹی اوفتیان ہر ہمو گڑا ءِ پُلِک ہرا اوفتا رکھ ءِ کیرہ او ہر ہمو کاریم ءِ کیک ہراٹی نوآبادیات نا جِند ئنا مفاد مریک۔