چاغی ءِ تپتگیں بدن

 چم نہ دیستگیں نِدارگ 

غنی بلوچ

بلوچستان کہ 76 سال اِنت زورگیریں پاکستان ءِ ایردست اِنت، اے 76 اِیں سالانی میان ءَ پاکستان ءَ بلوچ سرڈگار ءِ سرءَ وڑوڑیں ناشرکاری کُتگ ءُ ایش ناشرکاریانی درچ روچ پہ روچ گیش بوان  اِنت ۔  اے  ناشرکاریانی تہ ءَ بلوچ ءِ دود ءُ ربیدگانی پادمال کنگ، بلوچ ءِ چُکچینی کہ بازیں وڑ ءُ پیماں  بوھگ ءَ اِنت، بلوچ ڈیھ ءِ بھر ءُ بانگ ، بلوچ ڈیھ ءِ پہ وتی  ایٹمی  تراکانی واستہ کارمرز کنگ (ایٹمی تراک ءُ میزائل ) ءُدگہ بازیں تھرے ھوار اِنت ۔ اے سرجمیں ناشرکاری پہ بلوچ ڈیھ ءِ مادنانی لُٹ ءُ پُل ءَ  پہ بوھگ ءَ اَنت ۔ اے میان ءَ اِستان ءِ مستریں  زور پہ  بلوچ راج ءِ ھستانک ءِ گار کنگ ءِ سرءَ انت دانکہ آ  ارزانی ءَ بلوچ راج ءِ مالءُ مڈّیانی لُٹ ءُ پُل ءَ بہ کنت ۔   بلوچ راج ءِ پجّار ءِ گارکنگ ءَ  پہ ا ِستان   جتا جتائیں ترز کار کار مرز کنگ ءَ اِنت ۔ یک  نیمگے  آئی  ءَ وتی سرجمیں مشینری پہ بلوچ راج ءِ  دودمان ءِ گار ءُ گُمسار کنگ ءَجتگ کہ ایشی ءِ سان  مرچی مارا  بلوچ راج ءِ تہ ءَ گندگ ءَ کاینت کہ آ چہ وتی بُندپتر ، دودمان ءُ بلوچ راج ءِ ھستیں جاورالاں چہ بے سما اَنت  ءُ اِیشانی چیرترّینگ ءَ بے سمائی اِستان ءِ ھمراہ اَنت  ۔ اے رد ءَ اِستان ءِ زور گیشتر  بلوچ ورناھانی سرءَ اِنت   دانکہ آیاں  بے سِنچ ءُنا بود  بہ کنت  ءُ آچہ   بلوچستان ءِ راستیں جیڑہ ءَ  نا آژناگ بہ بنت   ۔ چوشکہ ھستیں وھد ءَ بلوچ راجی زُرمبشت تُرندی ءَ گوں بلوچ مھلوک ءِ تہ ءَ جاہ کنگ  ءَ اِنت ءُ بلوچ لس مھلوک راجی جُنز  ءَ ھوار بوھگ ءُ بھر زورگ ءَ اَنت  ءُ آیانی میان ءَ یک راجی سِنچے ودی بوھگ ءَ اِنت ۔  پمیشکہ اِستان وتی کوھنیں شوربندیاں  نوکیں دروشُمے ءَ دیم ءَ آرگ ءَ اِنت ۔  دومی نیمگ ءَ اِستان ءِ ھما ڈلگیں شوربندی اَنت کہ ایشی ءِ رِد ءَ اِستان تچکءَ  بلوچ راج ءِ چُکچینی ( نسل کُشی) ءَ کنگ ءَ اِنت  ۔ اشی ءِ  درور بلوچ  ڈیھ ءِ سرءَ ھرروچیگیں داب ءَ لشکر کشی ، بلوچ ورناھانی  آورار جنگ ءُ آیانی کُنٹانی ماں ویرانگاں دوردیگ ،  بلوچ ڈیھ ءِ سرءَ جوھری تراک کنگ   کہ ایشاں چہ سرزاھری بلوچ راج ءِ  چُکچینی بوھگ ءَ اِنت  ۔   اے ترزکار  ءَ زورگیر ھما وھد ءَ کار مرز اِیت  وھدے چہ ایردستیں راج ءَ لھتیں با سمائیں مردُم  آئی ءِ زوریں  کبزہ گیری ءَ نہ من اَنت   ءُ گوں آئی ءَ  جاک ءُ جنگ کن اَنت ۔ چوشکہ بلوچ  راج   بنداتی روچ ءَ گوں پاکستان ءَ جنگ ءَ اِنت پمیشکہ اے ترزکار  ءَ پاکستان   بنداتی روچاں بہ گِر داں انوگ ءَ کارمرز کنگ ءَ اِنت  ءُ وھد ءِ ھمراھی ءَ ایشی ءِ تہ ءَ گیشی  ہم آرگ ءَ اِنت بلے اَنگت آ بلوچ راجی زُرمبشت ءِ ھلاس کنگ ءَ سوبین نہ بوتگ کہ اے بلوچ راج ءِ باسمائی ءُ بلوچ راجی جُنز ءِ  سوبینی  ءِ چیدگ اِنت ۔

ھمے داب ءَپاکستان ھمے ترزکار ءِ کارمرزی ءَ 28 سوچکان 1998ءَ  چاگی  ءَ راسکوہ ءِ دلبند ءَ گوں  وتی ایٹمی  تراکاں  ٹپیگ کنت ءُ بلوچ راج ءِ سرءَ کھرے دور دنت ۔ پاکستان پد ماں پد ءَ راسکوہ ءِ سرءَ پنچ ایٹمی  تراک کنت کہ اے روچ ءَ بلوچ دائم پہ وت ءَ یک سیاھیں روچے لیک اَنت ۔ اے ھمے زمانگ اِنت کہ یک نیمگے  بابا ھیر بکش مری  بلوچ ورناھاں راجدوستی ءِ لیکہ ءَ چہ آژناگ کنگ ءَ اِنت  ءُ دومی نیمگ ءَ بلوچستان ءِ وتگڑیں راجدوست اختر مینگل  کہ آ زمانگ ءَ  بلوچستان ءِ سر وزیر بیت ءُ گوں پاکستان ءِ  مزن وزیر نواز شریف ءَ ھمدست بیت ءُ بلوچانی تباھی  ءِ ندارگ ءَ  کنت ۔ جھانی پٹ ءُ پولکارانی رِدءَ ایٹمی  تراک یک سرجمیں چاگردے ءِ تباہ  بوھگ  ءِ سوب بوت کن اَنت اگاں ایشی ءِ سانانی گِر ءُ دار کنگ نہ بوت ۔ آیانی رِد ءَ جوھری تراکاں چہ موسُمی جاورال مٹ بنت ءُ  زمین ءِ چیر ءَ آپ جھل روت ءُ ھما ھند ءَ  سالانی سال ھَور نہ بیت   ءُ زمین ڈُکّال ءِ آماچ بیت ۔ ایشی ءَ ابید ھما چاگرد ءَ وڑوڑیں نادُراھی سرکش اَنت  چوشکہ شومُک ، دم ءِ نادُراھی ،  چمّانی نادید بوھگ ، نا توامیں زھگ ءِ ودی بوھگ ءُ دگہ بازیں جانی ھلّت ئے ھوار اِنت  ۔ اے دابیں جاورال  ھیروشیما ، ناگا ساکی ءُ دگہ بازیں جاھاں  ھم گندگ بوتگ اَنت کہ اودءَ ایٹمی  تراک کنگ بوتگ  ۔انچوش بلوچ راج ھم مرچی  ءَ چہ 25 سالاں ھمے جاورانی  آماچ اِنت  کہ جوھری تراکانی سوب ءَ چاگی  ءِ  لس مھلوک  وڑوڑیں نادُراھیانی آماچ اَنت ۔اودءِ مھلوک پہ ترمپے آپ ءَ تلوس اَنت ءُ مھلوک ءِ روزگار کہ دھکان کاری ءُ  مالداری بوتگ چہ ڈُکّال ءُ نادُراھیاں مال ءُ دلوت ھم مرگ ءِ آماچ بوتگ اَنت   ۔  چاگی  کہ مال ءُ مڈّیاں چہ سرچکاریں سرزمین ئے ءُ ریکوڈک ءُ سیندکانی واجہ اِنت مرچی اودءِ مھلوک اِستان ءَ پاد مال  کتگ اَنت ءُ بے وسی ءِ زندے گوازینگ ءَ اَنت ۔ ایٹمی  تراکاں  چہ دنیگہ ھزارانی کچ ءَ لس بلوچ بیران بوتگ ءُ   ھزارانی کچ ءَ آ یاں    لڑءُ بار کُتگ ءُ وتی ھنکین یل داتگ  اَنت   ۔  چاگی  ءَ ابید بلوچستان ایندگہ دمگاں ھم پاکستان ھرروچیگیں داب ءَ وتی جنگی سلاھاں کارمرزگ ءَ اِنت کہ ایشی ءَ چہ ڈیرہ غازی خان ءُ ڈیرہ بُگٹی گیشتر سانمند  اَنت ءُ اودءَ ھزارانی کچ مھلوک شومُک  ءُ آدگہ نادُراھیانی آماچ اَنت ۔ جوھری بمب کہ گیشتر  یورینیم گیس ءَ چہ جوڑ بنت ھم چہ بلوچستان ءِ دمگ ڈیرہ غازی خان ءَ  درکپ اِیت کہ اودءَ زورگیر ءَ 8 مائننگ پلانٹ  پہ  یورینیم ءِ لُٹ ءُ پُل ءَ جوڑ کُتگ کہ ادءَ سالے کساس 25000 کلوگرام یورینیم کشّگ بیت ۔  ھمے یورینیم ءِ   مائننگ پلانٹ گوں آبادی ءَ نزیک اَنت   کہ ایشی ءِ سوب ءَ زھرناکیں  یورینیم گوں دم زورگ ءِ گوات ءَ گوں ھوار بنت ۔ایش اگاں دم زورگ ءِ گوات ءِ  تہ ءَ  ھوار بہ بیت گُڑا بازیں نادُراھیانی سوب جوڑبوت کنت کہ ایشی ءِ تہ ءَ شومُک  مستریں نادُراھی اِنت کہ مرچی ڈی جی ھان ءَ مھلوک گیش ھمے نادُراھی ءِ سوب ءَ مِرگ ءَ اَنت ۔ پاکستان یورینیم گیس ءَ ھم لُٹ ءُ پُل کنگ ءَ اِنت ءُ پہ کزدنی ایشی ءِ (Waste  )کچرایاں لس مھلوک ءِ آبادی ءِ سرءَ دور دیگ ءَ اِنت  دانکہ مھلوک چہ ایشی ءَ سانمند بہ بیت ۔   Institute for Science and International Security کہ یک پٹ ءُ پولکاری ادارہ ئے  ایشی ءِ رِد  ءَ بلوچستان ءِ سرءَ جوھری تراکاں پد پاکستان ءَ بلوچستان ءَ وتی جوھری سلاھانی یک امبارے جوڑ کُتگ کہ ایشی ءِ بُنجاہ حضدار اِنت  کہ اودءَ پاکستان کسان ءُ مزنیں جوھری سلاہ جوڑ کنت ۔ھمے  جوھری سلاھانی واستہ کارمرز بوؤکیں  زھرناکیں گیس  دم زورگ ءِ گوات ءِ تہ ءَ ھوار بوھگ ءَ اَنت کہ ایشی ءَ چہ حُضدار ءُ  کش ءُ گور ءِ سرجمیں ھند سانمند اَنت ءُ بلوچستان ءِ مھلوک گیش چہ شومُک ءِ وڑیں نادُراھیانی آماچ بوھگ ءَ اَنت ۔ دی بلوچستان پوسٹ ءِ 2017ءِ  پٹ ءُ پول ءِ رِد ءَ  بلوچستان ءَ شومُک  ءِ نادُراھانی کچ  3500 ءَ چہ گیش اَنت  کہ اے تھنا ھما  اَنت کہ ڈاکٹرانی گورءَ اتکگ اَنت  ءُ پیش بوتگ اَنت   ءُ بلوچستان ءِ  ھما ھند کہ اودءَ نا اسپتالے ءُ نا ڈاکٹرے گوائیت آ بئے نہ اَنت ۔  ایشی ءَ چہ پد وائس آف امریکہ ءِ  2018 ءِ پٹ ءُ پول رِد ءَ ایشانی کساس 4000 اِنت ۔چوشکہ اے6 ءُ 7  سال پیسریگیں پٹ ءُ پول اَنت  ءُ ایشی ءَ چہ پد چُشیں پٹ ءُ پولے گندگ ءَ نہ  پمیشکہ بلوچستان ءَ کینسر ءِ نادُراھانی راستیں کچ زانگ نہ بیت ۔ بلے ایشانی کچ گیشتر ودّان اِنت ءُ بلوچستان ءِ ھردمگ اے نادُراھی ءِ آماچ اِنت ۔

یک نیمگے اگاں پاکستان بلوچانی چُکچینیءَ کنگ ءَ اِنت تہ دومی نیمگ ءَ اختر مینگل ءُ ڈاکٹر مالِک ءِ وڑیں بلوچ ھم گوں آئی ءَ شریداراَنت  ءُ گیش وتی وڑیں چانوگر  پہ بلوچ ءِ دیم ءَ اڑاند بوھگ ءَ ودی کنگ ءَ اَنت ءُ لس مھلوک ءِ دیم ءَ گُربگی پوست ئے مانپوش اِتگ ۔ ھمے اختر مینگل چاگی  ءِ سرءَ بوھوکیں تراک  ءَ پد وتی روتاکی درشانے ءِ تہ ءَ شاتکامی کنت ءُ پہ پاکستان ءَ جوھری تراک ءَ نیکیں پالے لیک اِیت ۔ بلے مرچی اَنگت کئیت  لس مھلوک ءِ دیم ءَ وتءَ آیانی درد وار گُوش اِیت  ۔ دومی نیمگ ءَ وھدے 2013 ءَ بلوچ جُنز  دُگنیا ءِ دیم ءَ جوانیں وڈے ءَ پجارگ  بوھگ ءَ بیت داں  پدا ھمے اختر مینگل ءَ پاکستان چہ دری مُلکاں لوٹائینیت ءُ اسلام آباد ءَ بارت دانکہ دُگنیا ءَ پیش بہ داراِیت کہ بلوچ گوں پاکستان وش اَنت۔ اے وڑیں کِرد دُگنیا  ءَ ھرچ راجی جُنزانی تہ مارا گندگ ءَ کیت کہ ھندی مھلوک ءَ چہ لھتیں مردُم پہ چیزے ملام ءَ زورگیر ءِ ھمراھداری ءَ کن اَنت   بلے راجی جُنز وتی جاگہ ءَ مھکُم بوتگ اَنت ءُ سوبین بوتگ اَنت ۔

پاکستانءِ   ماں چاگی   ءَ جوھری تراک کہ آ ایشی ءَ چکّاس ءِ نام ءَ دنت ءُ دومی نیمگ ءَ بلوچستان ءَ وتی جوھری سلاھانی امبارے جوڑکنگ  ، مجگ ءِ تہ ءَ ھزاراں جُست ودی کن اَنت کہ پاکستان ءِ گورءَ دگہ ھم چُشیں ھند  ھست اَت کہ آ  آبادی ءَ  چہ گسِتا اَنت  پہ جوھری تراکانی چکّاس ءَ گُڑا بلوچستان چیا گچین کنگ بوت ؟ یا پاکستان ءِ گورءَ بلوچستان ءَ چہ  گیگ تریں ھند  اَست کہ آ اودءَ وتی جوھری سلِاھاں  رکّینت کنت  ، بلوچستان کہ یک جنگ آماچیں   ھلکے ءُ اودءَ وتی جوھری سلاھانی  امبارے جوڑکنگ  وتی چم ءَ وت کُنٹگ  جنگ ءِ برابرءَ اِنت ، گُڑا بلوچستان ءَ پر چا آئی ءَ وتی جوھری سلاھانی امبارے جوڑکُتگ  ؟  ایشی ءِ ساپیں مکسد ھمیش اِنت کہ پاکستان ءَ بلوچستان ءِ زمین ءَ گوں مھر اِنت نئیکہ گوں بلوچ راج ءُ مہلوک ءَ ۔ پمیشکہ آئی ءِ دائم جُھد ھمیش اِنت کجام ھم وڑ ءَ  بلوچانی چُکچینی ءَ بہ کنت ۔ءُ  اے گپ آئی ءَ بنداتی روچ  ءَ چہ گشینتگ ۔ نوں بلوچ ءِ واستہ اے گپ ارزشت دار اِیت کہ آ چوں وتی  راہ ءَ گشینیت ؟ آ زورگیر ءِ گُلامی ءَ کنت ءُ بلوچ ءِ چُکچینی ءَ آئی ءِ ھمکوپگ بیت یا پہ وتی راجی ھستانک ءِ منّارینگ ءَ  پند بُرایت  ءُ زورگیر ءِ  شوربندیاں پروش دنت،   پرچاکہ توکی راہ نیست ۔