بی ایس او ءِ کریمہ
شولان بلوچ
ترجمان بی ایس او آزاد

چہ کریمہ ءِ نام ءِ اِشکُنگ ءَ بنی آدم ءِ ہستانک تہ ءَ چہ کُد ایت، اے نام ءِ گِرگ ءَ چہ انسان ہزار جیڑگاں گوں دُچار بیت کہ اے پاک ءُ مزن شانیں کِردار ءِ نام ءِ گِرگ ءَ گوں آئی ءِ کِرد ءَ چنچو انساپ بوت کنت۔ اے تہنا یک نامے نہ یے بلکیں یک باریگے، یک آشوبے ءُ کاملیں بنی آدمے، پمیشکا وہدیکہ انسان اے باریگ ءِ سر ءَ کہ چِزے نبشتہ کنت گڑا ہزار رند ءَ جیڑ ایت کہ آئی ءِ لبز آئی ءِ کِردار ءَ گوں انساپ کنگ ءَ سوبین بنت یا ناں۔ بانک ءِ ستا کنگ بگندے بانک ءَ وت ءَ وش مہ بیت ءُ مئے لبز آئی ءِ ستا ءِ ناں مھتاج اَنت ءُ ناکہ ما آئی ءِ ھُشکیں ستا ءَ گوں آئی ءَ پجار ایت کنیں۔ اے باریگ ءِ بابتہ دمانے جیڑگ ءَ پد دست ءِ ند ھُشک بیت ءُ لبز ہیالانی تہ ءَ گار بنت۔

دنیا ءِ تہ ءَ دُرستاں چہ گرانتریں کاراں یکے، نوکیں چِزے ءِ بنگیج کنگ، ہما کار کہ سرجم ءَ نوک اِنت ءُ پیسر ءَ کس ءَ نہ کُرتگ، اے گام ءِ بندات کنوک دُرستیں بنی آدماں چہ مستر ءُ تونگرتریں انسان بنت۔ ہمے فیصلہ ءُ اوشتگ ءِ برورد ءَ بلوچ راجی سیاست ءِ تہ ءَ آشوبے اتک داں روچ ء مروچیگ ءَ برجاہ اِنت۔ پرچاکہ کارے کہ بندات بوتگ گڑا آئی ءَ دیم ءَ برگ اینچوکیں مزنیں عملے بگندے مہ بیت اینچو کہ کار ءِ جِند ءَ بندات کنگ ءِ بیت۔ نوکیں کارے ءِ بِندات کنگ ءَ چہ انسان یکبرے وت فیصلہ کنت ءُ وت ءَ گوں جنگ کنت، چوشکہ مبارکیں قاضی گوش ایت” وت ءَ گوں جنگ کنگ مردم ءَ را گران کپ ایت”۔ وت ءَ گوں جنگ کسے ءَ باج بُرت بزاں آ سرجمیں دنیا ءَ گوں جنگ کت کنت۔ کریمہ ہما اَت کہ آئی ءَ وت ءَ گوں جنگ کُت ءُ باج بُرت، وت ءَ گوں باج برگ ءَ پد ما دِست کہ آ بلوچ راجمان ءَ گوں دیمپان بوت، پاکستان ءِ وڑیں رستر ءُ لجوزیں دُژمنے ءَ گوں جنگ کُت، نپ پرست ءُ زات پرستاں گوں مِڑ ایت، راجمان ءِ مُہر ءُ تندبستگیں سانکلانی پروشگ ءَ پہ گِر ئِے بست ءُ گُڈسر ءَ دنیا ءِ وتگڑیں کانود ءُ رواجاں گوں جنگ کنان ءَ بلوچ ڈیھ ءِ آجوئی ءِ ہاتر ءَ وتی ساہ ئِے دات اَنت ءُ بلوچ گُلزمین ءِ باہوٹ بوگ ءَ گوں داں ابد نمیران بوت۔

ہما دور ءَ کہ ہچ نیست، آ دور ءَ بلوچستان ءِ سُھر، سبز ءُ شِنزیں بیرک ئِے دست ءَ کُت ءُ دژمن ءِ چماں چم ئِے پیش داشت۔ اے وہد ءِ دژمن نہ تہنا پاکستانی اِستان اَت بلکیں راجمان ءِ وتگڈیں رواج ءُ کانوداں ہم آ داشت بلے آئی ءَ گوں وتی دلیری ءَ وت ءَ سرجمیں بلوچ راجمان ءَ منارینت ءُ پہ زالبولاں بلوچ سیاست ءُ راجی جُنز ءَ بھر بیگ ءِ نوکیں رواج ایر کُت۔ اے آشوب نہ تہنا آئی ءِ وتی تہ ءَ آورتگ اَت بلکیں آئی ءِ اے یکیں فیصلہ ءَ سرجمیں بلوچ راجمان مٹ کُت۔ آئی ءِ اے تونگری لس انسانی کالب ءَ بگندے چو ارزانی ءَ اتک مہ کنت بلے انچو کہ گوش اَنت یک آشوبی یے چہ لس بنی آدماں جتا ءُ مستر بیت، بانُک ہما کاملیں آشوبی یے اِت۔

من بانُک ءِ کِردار ءِ سر ءَ ہمنچو وتی دست ءِ ند ءَ زور بہ دیاں ءُ وتی مجگ ءَ بہ پِرنچاں کم اِنت۔ بلے اے سرجمیں سپر ءَ کہ بانُک ءَ اے مقام رستگ یک چِزے ءَ ما ڈالچار کنیں، آ بی ایس او آزاد اِنت۔ بانُک ءِ اے کاملیں آشوبی جوڈ بیگ ءِ مستریں کارِست بی ایس او آزاد اِنت۔ بانُک ءِ آشوبی کردار جوڈ بیگ ءَ بانک ءِ وتی ھمت ءُ دلیری، دانوئی ءُ سِنچ ہست اَنت بلے کریمہ ءَ لمہ ء وتن جوڑ کنگ ءُ سرجمیں بلوچ راج ءِ دلانی درْکگاں ہوار کنگ ءِ زمہ وار بی ایس او اِنت۔ بلوچ راجمان ءِ تہ ءَ ہمک مٹی یے اتکگ آئی ءِ بندات کنوک بی ایس او ءِ پتر بوتگ۔ بی ایس او اَت کہ کریمہ ئِے زُرت ءُ آئی ءِ کِردار ئِے تراشت ءُ کاملیں آشوبی انسانے کُت ئے، بلوچ سیاست ءِ تہ ءَ اولی بلوچ زالبولے سیاسی ادارہ یے ءِ سروک ئِے کُت۔

بی ایس او آزاد ءِ آشوبی پِگر ءِ مہکمی ءَ بانک ءِ کِرد درْنگاز ایت ءُ بلوچ راج ءِ توانائیں رہشون ءُ امیت ءِ چیدگ جوڑ کُت۔ بانُک اَت کہ سرئِے چِست کُت بی ایس او ءَ اَت، سُہرچکیں بیرک ئِے دست ءَ اَت ءُ بلوچستان ءِ ہمک میتگ ءَ گولان اَت۔ بانُک ہرچ جاہے کہ شُت بی ایس او ءِ درس ئِے دات ءُ بلوچ زالبول ءُ مردین، زہگ ءُ کماش پہ راجی آجوئی ءِ ہاتر ءَ جہد کنگ ءِ سکین دات اَنت۔ اے تیوگیں سپر ءَ آئی ءَ ہمک وڈیں تورشت اوپار کُت، بلے بی ایس او ءِ داتگیں فلسفہ ءُ کاروان ءِ سنگتانی دلبڈی ءَ آ نہ تہنا سکین دات بلکیں گیش تونگر کنان کُت ءُ راجی سیاست ءَ یک درپشوکیں استالے ءِ دروشم ءَ منارینت۔

مئے گور ءَ انسانانی ہمنچو توسیپ ءُ ستا کنگ بیت کہ آ انسان ءِ کُرتگیں کار ہم وت پشل بنت۔ لہتے رواج اَنت کہ بلوچ راجی جُنز ءَ دیریں ہوار اَنت ءُ پیداگ اَنت پہ درور انسان ءِ کار ءُ عمل ءُ آئی ءَ بندوکیں فلسفہ ءُ ادارہ ءِ چارگ ءَ گیش آئی ءِ سر سری گپ ءُ جِند ءَ زان اَنت۔ بہ زاں آئی ءِ زُرتگیں فلسفہ ءِ زورگ ءِ جاہ ءَ آئی ءِ ستاہ ءَ گوں وت ءَ رد دیے اَنت ءُ ساجو کن اَنت۔ کسے انسان ءِ ہمنچو توسِپ ءَ کنت کہ توِسپ ءِ جِند ہم پشل بیت، بہ زاں آ کوریں سِتک ءَ گوں ابید ہما کِردار ءِ زانگ ءُ پہمگ ءُ آئی ءِ کرتنانی سر ءَ عمل کنگ ءَ لہتے سرزاہری ستاہاں گوں گیروشگ بیت۔ اے منی نِز ءَ ہما کِردار ءَ گوں مستریں بے ایمانی ءُ نا انساپی اِنت۔

بانُک ءِ رودینوک ءُ آئی ءَ سیاسی سِنچ دیوک بی ایس او اِنت، آئی ءِ فلسفہ ءُ کِردار یکشل ءَ بلوچ آجوئی جہد ءَ عمل کنگ بوتگ، آئی ءِ چیدگ بلوچ ءِ گُلامی ءَ مارگ ءُ گوں دژمن ءَ جنگ کنگ بوتگ۔ بانُک ءِ زِند ءِ متاہ، وشی ءُ اندوہ، زِند ءُ مرگ بلوچستان ءِ آجوئی جُنز بوتگ۔ بانک ءِ سر ءَ وش وشیں گپ ءُ لبزانی سِنگاروک مُچ اِنت بلے آئی ءَ گوں انساپ کنوک ءُ ایماندار بووک گچینی کِردار اَنت۔ اے پہ ما جوریں شِگانے کہ کسے آئی ءِ ستاہ ءَ ہمنچو کپ ایت کہ آئی ءِ فلسفہ ءُ جہد ءَ ہم بیھال کنت۔ پمیشکا کسے کہ کریمہ ءِ نام ءَ گِپت گڑا اے کُل آئی ءِ مجگ ءَ بیا اَنت کہ ابید ءِ اِشاں تہنا کریمہ ءِ نام گِرگ ءُ آئی ءِ ستاہ کنگ کریمہ ءَ گوں مستریں بے ایمانی ءُ نا اِنساپی اِنت۔
کریمہ ءَ وابے چماں بوتگ ءُ اے واب ءِ مانا دیوک ءُ سرجم کنوک ہستیں بلوچ پدریچ اِنت۔ کریمہ ءَ گوں انساپ آئی ءِ عمل ءُ فلسفہ ءِ رندگیری کنگ اِنت، آئی ءِ سیاسی سپر ءِ پہمگ ءُ آشوبی کِردار ءِ رندگیری کنگ بی ایس او آزاد ءِ داتگیں فلسفہ ءِ سر ءَ عمل کنگ اِنت ءُ کریمہ ءَ گوں ایماندار بوگ بلوچستان ءِ آجوئی ءِ جہد ءَ عملی دروشم ءَ ہوار بوگ ءُ جہد کنگ اِنت۔