شئے پَکیرے

کریمہ بلوچ

شئے کم روچ زندگ بیتگ، بلئے پہ مردی ءُ مَکسد زندگ بیتگ۔ ھمے واستہ گُمان بیت کہ شئے ھزاراں سال زندگ بیتگ ءُ انگت زندگی کنگءَ اِنت۔ یک ابدمانیں زندے گوازینگءَ اِنت۔ روچءِ کُٹءَ زندگی کنگءَ اِنت، ماھیکانءِ دمکاں زندگی کنگءَ اِنت۔واھگانی نہ سِستگیں ساھانی کلکشان انگتءَ شئےءِ چمّانی تہءَ دْرپشگءَ اِنت۔ھمودءَ کہ زندگی وتءَ مانا دنت، ھمودءَ کہ روچءِ ھُنڈال کَل اَنت۔ منءَ کمو اوں گُمان نہ بیت کہ شائریں شئے منی ھمبراہ نہ اِنت۔

مرچی شئے مئے آجوئیءِ زِریں واھگانی تہءَ چول جنگءَ اِنت۔ واھگ کہ ھچبَر دم نہ بَر اَنت۔ شئے مئے چمانی نہ مُرتگیں وابانی تہءَ آگہ اِنت، واب کہ ھچبَر نہ وپس اَنت۔
شئے مرچی ھم گُشگءَ اِنت کہ لُمّہ دژمنءَ بگوش شئےءِ گوما مہ کن، شئے دیوانگے، شئے ابدالے۔ منی ارس کند اَنت پہ شئےءِ بامردیءَ۔۔ شئے منءَ دمبَرگءَ نئیل ایت۔ شئے کمبر ءُ کَندیلءِ کّسّہاں کار اِیت، شئے زاکرءِ نامءَ ھر روچ گِپت، شئے پہ سُہرابیں مریءَ ھر روچ گال پِر بند ایت۔

شئےءَ منءَ مدام گُشت لُمّہ آوارانءِ گوات وتی تبءَ بدل کنت، وھدے من آوارانءَ گاماں ایر کن آں، منءَ پہ مہر سمار ایت۔ مرچی ھم آوارانءِ گوات پہ مُدامءِ واستہ آتار اِنت، چہ شئےءِ ھاکءِ بوہءَ
شئے کُجا نہ اِنت؟
کئےءِ گوما نہ اِنت؟
کئےءِ کِّسہانی تہءَ نہ اِنت؟
کئےءِ نازینکاں ھوار نہ اِنت؟
کُجام سرمچارءِ گامانی جُنزگاں گون نہ اِنت؟
بولانءِ بُرزیں بالاد ھم شئےءِ دروشمءَ داریت۔۔۔
مکرانءِ تبد ھم چو شئےءَ بیھار ایت۔۔۔
منءَ بزگ کنت ھما بزگانی سرءَ ءُ کندگ ھم کئیت ھمایانی سرءَ کہ آ سرپد بنت کہ ما شئے ھلاس کتگ۔۔۔
ءُ
شئے انگت گُشگءَ اِنت کہ “لُمّہ دژمنءَ بگوش شئے پَکیرے، شئےءِ گوما مہ کن۔”