کریمہ ہمت، جزبگ، سیاسی جرت، دلیری ءُ ترندیں جاوراں مایوس نہ بوگ ءِ نام اِنت۔
بنجاہی کماش بی ایس او آزاد: زرّین بلوچ
بلوچ راج ہزاراں سال کوہنیں راج دپترے ءِ واہند انت۔ اے کرن ءُ وہد ءَ بلوچ ڈیھ ءِ رکینگ ءِ ہاترا ہزاراں گمنامیں جہدکار یاتانی، لبزانک ءُ مارشتانی تہ ءَ مارگ بنت بلے لمہ کریمہ گوست ءِ کَلیں سرجمیں کارست ءُ انوگیں پدریچ ءِ میان ءَ یک bridge یے کہ گوست ئِے سرجم ءَ وتی اندر ءَ جاہ داتگ ءُ یک ہست ءَ یک منزلے ءَ سر کنگ ءِ جہد ءَ بوتگ دانکہ راجی جنز وتی مکسد ءَ سر بہ بیت۔ گوست ءِ کارست ما وتی سیاسی لٹریچر ءِ تہ ءَ ونتگ اَنت بلے کریمہ مئے اہد ءِ عملی کردار انت کہ بلوچ ءِ ہزاراں سالی جنگی، گھگیری پڑ ءَ ابدمان انت۔ ما کریمہ ءَ وان ایں، گڑا مارا وتی گوست ءِ ہما کارست کہ جہد ءِ مساپر بوتگ اَنت آ زندگ گندگ ءَ کاینت۔ بلوچ راج ءِ مھکمیں گوستانکی یات ءَ جنزان ءَ انچیں جہدے ءَ پہ ساڑی بوت کہ اودا کریمہ ءِ دابیں کردے ءِ لوٹ اَت۔
انسانی گوستانک ءَ کریمہ ہما کرداں چہ یکے کہ آئی ءَ زالبولانی جتائیں پرنٹ، زالبولانی ھکانی ہاترا جنگ ءِ جاہ ءَ ھالی ئیں اسپیس ءَ ھلاس کنگ ءَ جہد ءِ بہر بوت۔ کریمہ جنس ءِ بنیات ءَ جنگی گھگیری ءِ بہر بوگ ءَ چہ گیش وتی ماتیں وتن ءُ آجوئی ءِ لوٹ ءَ ہوار بوت۔ زالبول بلوچ راج ءِ شرپ، گیرت انت بلے وہدے کبزہ گیر راج ءَ سرجم ءَ ولگوج کنگ ءَ بندات کنت گڑا جنس ءِ ارزشت پشت نہ کپ ایت۔ جنس ءَ چہ دیمتر گلزمین ءِ لٹ ءُ پُل، بزگی ءُ توہین بوگ ءَ انت گڑا ہمے گلامی ءِ مارشت ترجیح داتگ ءُ یک جہدکارے ءِ بستار ءَ جہد ءَ ہوار کپتگ۔
ہمے راستی پدر بیت کہ درست گلام انت پمیشکہ بلوچ راج ءِ گھگیری پلسپہ ءِ سرا عمل گلزمین ءِ پرزندانی پرز بیت۔ کلیں جنس تہنا وتی راجی شرپ ءَ چہ زورگیر ءَ پچ گرگ ءِ واستہ کربانی ءِ یک درچے بندات بیت۔ اے درچءَ چہ یک گھگیری ربیدگے جوڈ بیت کہ اشاں ما پگرء کریمہ گش ایں۔
بلوچ راج ءَ مدامی مردگ پرست ءِ تنز و شگانی کنگ مئے بے علمی انت بابا ھیر بکش مری، لمہ کریمہ ءِ کرد ءُ کربانیاں ءَ مزنیں شرپ رستگ۔ بانک کریمہ ءَ بلوچ راج ءِ نیمگ ءَ چہ وتی زند ءَ ہما شرپ رستگ کہ درستاں لمہ ءِ نام ءَ توار پر جتگ۔کریمہ ءِ زند کربانی ءِ انچیں درورے کہ آ بلوچ راج ءَ مردگ پرستی ءِ لیبل ءَ چہ درکنت۔
اے مئے راج ءِ زندگ دلی ءِ درستاں چہ مستریں درور انت کہ کریمہ وتی زند ءَ کربانی، جرت ءِ سَوب ءَ زالبول بوگ ءَ پد ہم یک گھگیری راھشونے ات۔
دگنیا ءِ جُنزاں چہ دربرگ، روایاتاں مٹ کنگ، دومیاں چہ سان زورگ ءِ جاہ ءَ بلوچ راجی جنز ءَ نیشنل نیٹورک ءَ گوں جوڑینوک لمہ ءَ اسل ءَ مئے آشوبی موٹیویشن انت۔ چوناہا آشوبی کرد چاگرد ءِ تہ ءَ وت موٹیویشنل کردار بنت پمیشکہ کریمہ مئے ہما موٹیویشنل کردار انت کہ آئی ءَ چہ مارا ھاٹیگ، سبر، ھوسلہ، مستقل مزاجی، کاروان ءَ گوں جنزگ ءُ ایدگہ آشوبی سپت مارا دربرگ ءَ رستگ اَنت۔
کریمہ ہمت، جزبگ، گل ساز، گل ءِ اندری جہد ءِ دیمپانی، ترندیں جاورھال ءَ مایوس نہ بوگ، جیڑھاں تاکت ءِ تہ ءَ مٹ کنگ، دم نہ برگ، جہدءمسلسل، لیکھی پھتگی ءُ آشوبی تب ءَ چہ سرچکاریں کردارے۔
کریمہ بلوچ راج ءُ بلوچ جنز ءِ ہما ایمان انت کہ وتی مچانکی پلسپہ ءِ بنیات ءَ دژمن ءِ ناپاکیں گام ءِ ھلاپ ءَ گھگیری تاکتے ءِ دروشم ءَ مرچی گھگیری کنگ ءَ انت۔ کریمہ کلچرل روایات ءُ گھگیری عمل ءِ وینگارڈ انت پرچاکہ لمہ ہمے ہیال ءِ سرا بیسہ داریت کہ پرسودگیں ءُ گلامیں زہنیت ءِ دارگ یک مزنیں آشوبی بے سوبی یے۔ لمہ ءِ پیسلہ سازی ءِ تہ ءَ جرت، نترسی، مزن پگری، رہشونی، گل ءِ اندری جیڑہ ءَ گوں بودناکی ءَ گیش ءُ گیوار کنگ ءَ ہوار بی ایس او ءَ یک رندے پدا وتی راستیں دروشم ءَ آرگ لمہ ءِ کرتگیں مستریں کاراں چہ یکے۔
بلوچ راجی جہد ءِ تہ استاد اسلم ءَ اے شرپ گون انت کہ بلوچ راج ءَ ادارہ جاتی ھیال، نوکیت یا آشوبی ٹرانسفارمیشن ءِ نیمگ ءَ بارت البت بی ایس او ہم ہم 2013 ءَ بگرداں 2015 کرائسز ءِ آماچ بیت۔ اے وھد ءَ تحریکی چست ءُ ایری، کانسٹیوٹیشنل بلاک ءِ جوڈ بوگ، لیڈرشپ ءِ بیگواہی ءَ پد ہم بی ایس او ءَ وتی ٹریک ءَ آرگ لمہ کریمہ ءِ کرد ءِ برورد انت۔ بلوچ جہد ءِ تہ ادارہ جاتی بنیات ءَ یک گلے ءَ کرائسز ءَ چہ کشک ءُ پدا ہمے گل ءَ تاکتور کنگ ءِ جہد وانگ ءُ پھمگ کرزیت۔