بی ایس او بلوچ راجی آجوئی جُنز ءِ کلچرل فورس ءِ نگاہ ءَ
بنجاہی کماش بلوچ اسٹوڈنٹس آرگنائزیشن آزاد

‏‎بی ایس او چہ وتی بنداتی روچاں یک کلچرل فورسے ءِ دروشم ءَ دژمن ءِ مکسدانی دیم ءَ چو کوہ ءَ مہکم انت ءُ بلوچ چاگرد ءِ سیکولر پگر، جنسی ناانساپی، کٹمی و مذہبی پرک و پیر ھاس بلوچ تحریک ءِ تہ ءَ نگد ءَ را تحریکی سوبمندی یے سرپد بوگ، بلوچ ورناھاں نسلی، زبانی، دمگی ءُ دژمن ءِ ایندگہ داتگیں زہنیتاں چہ کشگ، ایوک ءَ بلوچ، بلوچستان ءُ بلوچ راجدوستی ءِ بنیاد ءَ گلامی ءِ ھلاپ ءَ شعور، آجوئی ءِ ھکی ئیں مانا ءَ چہ آھاں آژنا کنگ ءَ اِنت۔ بی ایس او ءِ سیاسی مزن پگری ءِ چیدگ بوگ ءِ منانک آئیءِ جھدکارانی یکشل ءَ اوشتگ ءُ دیمونی دیگ انت کہ مرچی ہمک جہد کار گوں پہر ءُ شان ادارہ ءَ بلوچ جہد ءِ یک مہکمیں منُکے سرپد بیت گُڑا آ تھنا بی ایس او ءِ ھمے پگری لیکھی ءُ مکسدی تچکی ءُ کربانیانی سوب اِنت کہ ھمک کس اے ھبر ءَ پہ وت شرپے سرپد بیت کہ من بی ایس او ءِ لیکھی پگری ھیلکاری ءِ بھرے بوتگ آں۔

‏‎بی ایس او علمی و پگری درسگاہ ءِ بستار ءَ کساس دو سد سالی گلامی ءُ ایردستی ءِ سانکلاں بندوکیں زنگ بستگیں زہنیت ءَ وتی مھکمیں کرد ءِ وسیلہ ءَ پروش دیگ ءَ اِنت ءُ چہ وتی کار ءُ کُرتناں بلوچ ڈسکورس ءُ بیانیہ ءِ بلوچ راجمان ءِ تہ ءَ جاہ دیگ ءَ ھوار بلوچ ورناھانی انچیں علمی دابے ءَ تربیت کنگ ءَ اِنت کہ آ بلوچ جُنز ءِ آدگہ گل ءُ پارٹیانی تہ ءَ وتی کرد ءَ پیلو کنان ءَ بلوچ جُنز ءَ یک پیسلہ کن جاہے ءَ سر کنگ ءَ سوبمند بوتگ اَنت۔ اے سرجمیں کرد بلوچ راجی ھذمت ءِ مستریں درور انت۔

‏‎بہ گپت ء یک نمیرانیں جہدکارے ئیگ ءَ “بی ایس او مئے پگری مات اِنت کہ مئے سیاسی تربیت ئِے کتگ، اگاں مئے زند ءِ تہ ءَ بی ایس او مہ بوتیں گڑا ما وتی سرجمیں زند ءَ ایردستی ءِ سانکلاں بندوکیں چاگرد ءِ بہر بوتگ ات اِیں ءُ بلوچ جہد ءَ ھوار بوگ مئے بستار ءَ چہ در بوتگ ات”۔

‏‎بی ایس او ءِ سیاسی ءُ پگری سپر ءِ تہ ءَ مہلوکی موبلائزیشن، ھاس نودربراں دژمن ءِ پندل، آئی ءِ سیت ءُ نپ، لالچ، مراعات ءُ آدگہ شوربندیاں چہ رکینگ ءُ سرپدی دیگ ءَ ھوار بلوچ ورناھاں آجوئی ءَ پہ سِنچ ءُ سرپدی دیگ ءَ انت۔ بی ایس او ءَ اے مزنیں ءُ دراجیں سپر ءِ تہ ءَ وتی ازیمیں نام ءُ مقام وتی کربانیانی برورد ءَ رستگ۔

‏‎بی ایس او جُنز ءِ ہما گمنامیں فلسفہ ءِ نام انت کہ ہمک جہدکار ءَ وتی زند ءِ سرجمیں وشی پہ بلوچ جُنز ءَ ندر کتگ انت ءُ روچ ء مروچی ہم وتی زند ءِ ہمک سہت ءَ کربان کنان ءَ پہ بلوچ راجی آجوئی ءِ واستہ جد ءُ جہد کنگ ءَ انت۔

‏‎ کماش زاھد جان ءِ اے تران “وتی زات ءَ پہ ھاندان ءَ، وتی ھاندان ءَ پہ راج ءَ، وتی راج ءَ پہ زمین ءَ کربان کنگ، سرزمین ءَ گوں مہر ءِ مستریں نشانی انت”۔
ہمے کول ءَ گوں پاسداری کنان ءَ کماش زاھد جان ءَ کربانی ءِ یک انچیں درورے پیش داشت کہ مروچی ہم آ اِستانی زندان ءَ بلوچ آجوئی ءِ لیکہ ءِ جھگیری ءَ کنگ ءَ انت ءُ زاھد جان ءِ آشوبی جزبگ بی ایس او ءِ سروکاں بگر داں باسکانی امانت انت۔ لمہ کریمہ ءِ ھون ءُ نمیرانی مئے زندگیں زمیر ءِ یک مستریں بہرے۔ کمبر چاکر ءِ وتی مکسد ءَ چہ یک رزھے ہم پشت نہ کنزگ، گلزمین ءَ گوں مہر، پگری ءُ آشوبی ھیال ءُ لیکہ مروچی ہم بلوچ نوجواناں وتی گرنچ ءَ بستگ اَنت ءُ دیم ءَ روان اَنت۔
‏‎لمہ بانُک کریمہ ءِ گل ءِ چیئر پرسن بوگ بلوچ راجدپتر ءِ ربیدگی ربیتاں سیاسی پگر ءِ تہ ءَ مٹ کنگ ءِ نام انت کہ یک زالبولے ایوک ءَ یک وئیل یا ادارہے یے سروکی ءَ نہ کنت بلکیں راجی آجوئی ءُ سیاسی جہد ءِ تہ ءَ ھوار بوگ ءِ ھمبراہی ءَ کربانی ءِ کِشک ءَ نمیران بیت۔ مروچی لمہ ءِ کربانیاں چہ بلوچ چاگرد ءُ جُنز چہ بی ایس او ءِ ربیدگی گہگیری ءِ سر ءَ مزنے سان کپتگ۔

بی ایس او بلوچ راجی جہد ءِ ترندیں ءُ جنگی جاورانی پیداوار انت کہ آ وتی راجدپتر، گوستانکی تجربگ ءُ وتی زگریں سیاسی راستی ءَ چہ آژنا بوتگ پمیشکا بی ایس او مدام بلوچ جہد ءِ مہکمیں ادارہانی سرپ ءَ اوشتاتگ۔ جہد ء آجوئی ءِ تہ ءَ ھواریں ہمک جہدکار بی ایس او ءِ شرپ ءَ چہ شیواریں داب ءَ آژنا انت گڑا بی ایس او ءِ راہشوناں بگر داں باسک جہد ءِ نوکیں لوٹاں چہ ھم آژنا بہ بنت۔ بزاں علم ءُ عمل ءِ نوکیں رھبندے جوڈینگ۔ بلوچ ورنا وتی آشوبی وانگ ءَ یک جانداریں مانائے دات بہ کن انت ءُ کِسہ گوئی داب ءَ وانگ ءِ جاہ ءَ آئیڈیاز جوڑ بہ کن انت دانکہ بلوچ راجی جُنز ءَ پہ جانداریں دابے ءَ پروگرام اڈ دیگ بہ بیت۔ بلوچ ءِ سیاسی جیڑہانی توجیل مئے گوست ءِ زانشت ءَ گوں بندوک انت پمیشکہ بلوچ ورنا نوکیں دؤر ءِ لوٹاں بلوچ جُنز ءِ لوٹ ءُ گزراں گوں ہمدپ بہ کن انت ءُ بلوچ تحریکی جیڑہانی گیشواری ءَ وتی کرد ءَ پیلو بہ کن انت۔

‏‎کلچر ءَ راجی زمہ واری سرپد بوگ ءَ ھوار ایش وتی کوپگاں زورگی انت ءُ سیاسی پِگر ءَ گوں ما ہمے زمہ واری ءَ سرپد بہ بئیں کہ زانت، مئے سیاسی لوٹ ءُ گزرانی ترجمانی ءَ کت بہ کنت۔ بی ایس او ءِ آشوبی جہد کار جُنز ءِ ہما ورنا انت کہ اے جہد ءَ تونگر کنگ ءُ پہ بلوچ جہد ءِ مزنیں امیت ءَ مدامی ساہ بکشاھگ ءَ گوں وتی زمہ واری ءَ پیلو کنگ ءَ انت۔

بی ایس او ءَ یک کلچرل پورسے ءِ دروشم ءَ سرپد بوگ ہمے واستہ اژدری انت کہ آ ابید سلاہ ءَ پنجاہ ءُ ہشت سال اِنت کہ اِستانی زوراکیانی دیم ءَ وتی وجود زندگ داشتگ۔ ایشی ءَ ابید بی ایس او ءِ جُہد اِنت کہ آ یک انچیں تونگر ءُ بودناکیں پدریچے پیداک بہ کنت کہ آ گوں وتی بودشتاں راجمان ءُ جُنز ءِ سرجمیں پرسودگیں پگر ءُ ھیالاں پروش دیان ءَ دژمن ءَ سرجم ءَ پروش بہ دیے اَنت۔ اِیشی ءَ ابید بی ایس او راجی جوڈشت ءِ چیدگ اِنت کہ آ یکوئی ہمے کوشست ءَ اِنت کہ گوں سائنسی رھبندانی بنیاد ءَ زانشت، جُنز، تکنیکی علم ءُ عمل ءِ برورد ءَ نوکیں اھد ءِ زلورتاں پیلو بہ کنت۔ بی ایس او ءِ ورناھانی گور ءَ مستریں سلاہ پِگری سلاہ اِنت۔ ہمے سلاہ ءِ وسیلہءَ آ منظم ایں استانی جوڑشت ءِ نیمگ ءَ شُت کن اَنت ءُ زورگریں پاکستان ءِ ھمک تب ءُ مئیلاں چہ وت ءَ رکینت کُت کن اَنت۔

دژمن ءِ نوآبادیت نظام ءِ اندر ءَ کوھنیں ءُ پرسودگیں وانگی نظام ءَ چہ کشگ ءُ آشوبی وانگ ءَ چہ نوکیں نسل ءَ نوکیں اھد ءِ لوٹانی نیمگ ءَ برگ یک مزنیں سوبمندی یے زانگ بیت پرچاکہ نوآبادیاتی وانگی نظام ءَ چیلنچ کنگ ءُ آئی ءَ پروش دیگ ءَ ہوار وتی راج ءَ گلامی ءِ ھلاپ ءَ نپرپ ءُ آجوئی ءَ گوں مہر بی ایس او ءِ ہما کربانی انت کہ مدامی بلوچ گوستانک ءِ تہ ءَ نکش بیت۔

‏‎بی ایس او بلوچ راجی جُنز ءِ کلچرل فورسے ءِ بستار ءَ دو مارچ ربیدگی روچ ءِ ارزشت ءَ بلوچ چاگرد ءِ تہ ءَ زندگ دارگ ءَ ہوار کلچرل سنچ ءَ را شریں مانا بکشاتگ۔ بی ایس او ءِ شہیدانی روچ ءِ دارگ ءِ پیسلہ ءِ سوب ءَ مروچی سرجمیں شہیداں یکیں رتبہ دیگ راجی شعور ءِ تہ ءَ یکجاہی ءِ چیدگ زانگ بیت ءُ گل ءَ ہمے ہیال باور کنائینتگ کہ کلیں جہدکاراں یکیں پلسفہ ءِ بنیاد ءَ کربانی ءِ راہ گچین کتگ گڑا شرپ ءِ تہ ءَ پرچا برز ءُ جہلی بہ بیت۔ ہمے ھساب ءَ 8 جون ءُ بلوچ گار ءُ بیگواہیں روچ ءَ ہوار بانُک ءِ نمیرانی ءِ روچ ءَ بلوچ زالبولانی روچ نامینگ ھم بی ایس او ءِ مزنیں پیسلہ اَنت۔

‏‎دژمن وتی سرجمیں مشینری، ہزاراں پندل ءُ سوفٹ پالیسیانی وسیلہ ءَ چہ بلوچ ورناھاں بلوچ جہد ءَ چہ دور کنگ ءِ واستہ ہرچ کنگ ءَ انت بلے بی ایس او ءِ جہدکارانی یکشلی، جہد ءَ گوں مخلص بوگ ءُ گل ءِ بنھشت ادارہی مھکمی انت کہ استان ءِ ہمک ڈسکورس، بیانیہ، شوربندی چو روچ ءَ پدر کُتگ انت۔ انوگیں وھد ءِ جاور، بی ایس او ءِ گوستانکی سپر ءَ چہ بلوچ ورنا ہمے سرپد بہ بنت کہ بلوچ ءِ آجوئی جُہد دگہ ترندیں جنگی فیزے ءِ تہ ءَ سر بوتگ کہ اود ءَ مئے سیاسی باوست ھاس استان ءِ جوڑشت، نوکیں وانگی راھبند، سیاسی منظرنامہ ءِ سر ءَ وتی گرپت، سائنسی و پگری پڑانی تہ ءَ وتی بہرشت ءَ ھوار کنگ، انوگیں جاورانی رد ءَ بی ایس او ءِ مزنیں کرد زانگ بہ بنت۔

‏‎بی ایس او روچ ء مروچی ہم بلوچ ورناھانی ءُ بلوچ لس مہلوک ءِ ہما سیاسی ءُ ربیدگی فورس انت کہ دژمن ءِ جوڑ کتگیں ہمک پندلانی پروش دیگ ءُ وتی راجمان ءِ تہ ءَ نوکیں تب دیم ءَ آرگ ءَ اِنت۔