اوغانستان نا حالتاک و”بلوچ جہد آجوئی“نا باروٹ ہیت و گپاک
19 July 2021
بلوچ ورناک۔۔۔
انقلابی جہد مدام سختی سوری ٹی مریک۔ دنیا ٹی دونو ہچو جہد ئس خننگپک ہرا کہ سخت سوری آن بیدس قومی آجوئی کونا مزل ئے دوئی کرینے۔ انقلابی جہد ئے مدام کاٹم تننگ، سگ و سینہ و اندن شعوری آفیصلہ غاک سرسوب کیرہ۔ اوغانستان(افغانستان) اٹ ودی مروکا حالاتاک و طالباتا اسے وار ولدا حکومت اٹ بننگ نا خیالی آ ہیت و گپ آتا نیام اٹ ”بلوچ جہد آجوئی“ نا باروٹ ہر ا سطحی او گمان آن پیشن جاچ آک پیش کننگ انگ او۔تو دا رد اٹ سوچنگ المی ئیکہ دا ہیتاک اسے سطحی جاچ او چنکو سوچ اسے آن بیدس پین ہچ ئس افس کہ اوغانستان(افغانستان) اٹ اقتدار نا بدل مننگ آن ”بلوچ جہد آجوئی“ نا سختی سوری تیٹی پین ودکی مرو۔۔”بلوچ جہد آجوئی“ نا بنائے بلوچ قوم تینا کوپہ، تینا طاقت و تینا شعورآن کرینے نہ کہ اوغانستان او ایلو ہمسایہ ملک تا کمک اٹ۔اندن ”بلوچ جہد آجوئی“ نا روتہ غاک پیشن ملک آتیٹی پین بدرئسے نا دو تیٹی افس بلکہ انداڑے بلوچ قوم ئنا دوٹی او۔ جاری آ ”بلوچ جہد آجوئی“ ناعملی وڑاٹ بنا خیر بخش مری نا اوغانستان اٹ ساڑی مننگ نا وخت آن نہ بلکہ واپس بلوچستان آ بننگ آن پدمریک:ہرا کہ اینو ام کہیی سرسوبی،نزوری تیتون اوار جاری و ساری ئے۔ بلوچ ورناک ئسے ہیت اسے تینا مزغ اٹ تخر کہ قومی آ جہداک پیشن نا ملک آتا کمک اٹ سرسوب یا پدگام مفسہ بلکہ قومی جہداتا سرسوبی و پدگامی نا تعلق محکوم قوم ئنا تینا کاٹم تننگ نا جوزہ، سگ و شعور آن ئے۔”بلوچ جہد آجوئی“مدام اُلسی طاغت و اُلس نا کمک اٹ شون الکونے۔ ساڑی جہد ئنا ام تعلق بلوچ اُلس تون گنڈوک ئے۔ہرا فک دا وختاقومی فکر و سوچ ئسے تون جہدکاراتے کن گڑتی و دعا کیرہ۔ دون تو ہر علاقہ و خطہ نا حالت آتا تینا چپ و چاگڑد نا ملک و قوم تیا اثر تمک ولے دااثرآتا تعلق دا ہیت ئتون گنڈوک ءِ کہ دا قومی جہد یا قوم تینٹ تہہ آن اخس سوگوءِ۔جہداک خطہ نا منفی آ اثر آتیان امو وخت متاثر مریرہ ہرا وختا کہ قومی جہداک غیر منظم و تہہ آن نزور مریرہ۔ایلو کنڈا سوگوآ جہد آک بدل مروکا حالاتاتیٹی تینے پین سوگو کیرہ۔
قومی جہدکاراک۔۔۔
نن خنینہ کہ اگہ اسے جہد ئس یا ملک ئس پین ملک آتا کمک اٹ آجو مسکہ توکشمیر، فارس موومنٹ، تامل، کرد، فلسطین کیتالونیا ایلو ملک آک اینو آجو مسُرہ، انتئے کہ آجوئی و جہد ئناتعلق امو اُلس تون گنڈوک ءِ ہرا کہ تینا آجوئی کن جہد ئسے نا بنائے کرینو ایلو کنڈا پیشن نا ملک آتا بیرہ تینا مفاداک مریرہ۔ وخت ئس کہ اگہ اسے جہد(تحریک) ئسے نا شیف بڑزی ایلو ملک ئنا حالت تون جوڑنگک تو نن پاننگ کینہ گڑا امو جہد اسے نزور جہد ئسے۔ ”بلوچ جہد آجوئی“نا سرسوبی دادے کہ ریاست نا ظلم و زوراکی آن پد ام اینوبلوچ قوم سوگوی اٹ تینا آجوئی ئنا شڑط آ سلوک ئے۔اندن ریاستی ظلم و زوراکی بلوچ اُلس ئے خلیفنگ نا ہندا اونا شعور اٹ ودکی نا سوب جوڑ مننگ ئے۔ اینو بلوچ قوم ”بلوچ جہد آجوئی“ئے تینا قومی وئیل آتا ایسری سرپند مریک ہراکہ ئسے جہد ئسے نا سوگومننگ نا چیدہ ئے۔ ”بلوچ جہد آجوئی“ نا باروٹ ساڑی نزور آ ہیت و گپ آک یقیناً سطحی او اندن سیاسی گشاد نا کمتی ئے درشان کیرہ۔”بلوچ جہد آجوئی“ ئے پین ملک ئسے نا حالت آتیتون جوڑنگ نا ہندا اودے اُلسی شعور و فکر ئتون جوڑینگے،انتئے کہ ”بلوچ جہد آجوئی“ نا سرسوبی ئے بلوچ اُلس تینا کوپہ غاتیا ہرفینے۔”بلوچ جہد آجوئی“ ئے مزل ا سرکننگ نا جوزہ ہی دشمن ئے نفسیاتی وڑٹ مات تننگ اونا قوضہ ئے ایسر کننگ نا سوب جوڑ مریک۔
باشعور بلوچ اُلس۔۔۔
بلوچ جہد آجوئی نا اواری(وابستگی) بلوچستان نا ہر اُرا و گدان تونے۔ بلوچ لُمہ غاک تینا چنا تے بلوچ سرزمین نا رکھ ءَ کن لولی ایترہ۔ بلوچ آتا ساڑی چِین(نسل) اندا قومی جہد ئنا سیخا ٹی مسونے۔ساڑی ءَ”بلوچ جہد آجوئی“ ٹی بازا نزوریک مرور ولے ہمسایہ ملک ئنا حالت آتیٹی بدلی ئے گڑاس بندغ(ہراکہ سیاسی گشاد نا کمی نا شکار او)جواز جوڑ کریسہ داکوشست ئے کننگ او کہ ”بلوچ جہد آجوئی“ اسے وار ولدا پد تمے او پدگام مرے یا تینا ماضی نا کُنڈا کائے،ہرا کہ دشمن نا پروپیگنڈا وگڑاس ناپختہ سیاسی کارکنان تاذہنی پدگامی آن بیدس پین ہچ ئس اف۔ بلوچ قوم دا ہیت ئے یات تخے کہ ”بلوچ جہد آجوئی“ نا سرسوبی یا پین سوگوی نا تعلق بیرہ بلوچ قوم ئناشعور و فکر ئتون جوڑوکے۔بلوچ ورناک تینے بروکا سختی وسوری تے کن ہر وڑاٹ تیار تخر۔انتئے کہ ”بلوچ جہد آجوئی“ نا مُستی سرسوبی اوفتا کوپہ غا تیاٹی۔قومی جہد اٹ سختی او سوریک بریرہ۔ نن است آن دپن کہ 2009 آن بنا مروکا بدترین ریاستی کریک ڈاؤن کونامکراک ام بلوچ جہد ئے ایسر یا نزور کننگ اٹ بے سوب مسونو بلکہ وخت ئتون اوار اوارجہد اٹ پین سوگوی و پختگی بریسہ کرینے۔اندن بروکا سختی سوریک ننے پین ہُشار کرور، قومی جہد آتیٹی سخت انگا دیک تنظیم او پارٹی تے تینا ردی(غلطی) تیان ہیل کننگ نا موقع ایترہ۔ ڈغار نا بدل مروکا ساڑی حالتاک بلوچ جہدکاراتے بروکا دے تیٹی خطہ او جہانی سیاست نا شیفی بڑزی اوجہد ئے مون مُستی دننگ نا سوب مریرہ۔
بلوچ جہدکاراتاعظیم فکر و قربانیک ہر بلوچ ئے یقین تریفرہ کہ سرسوبی ہرحالت اٹ ننامروئے۔