اوگانستانءِ جاور ءُ پہ بلوچ آجوئی جنزءَ مہلوکءِ گُمان ۔

18 July 2021

بلوچ ورنا آں۔۔۔

آشوبی جھد مدام نگیگ ءُ نا وشیں جاورھالانی دیمپان بنت۔ دنیا ءِ تہا چوشیں ھچ جنزے نیست انت کہ آ راجی آجوئیءِ پیمیں منزلاں پہ آسودگی ءُ بیدئے جنجالاں سر بہ بیت۔ راجی آجوئی جنزاں بے کچءَ کربانی، سگ اوپار ءُ شعوری لیکہ ءُ سنگینیں پکر سوبمندیءِ کشکانی نیمگءَ بر انت۔

اوگانستانءِ تہءِ آؤکیں جاور  یکرندے پدا اودءَ تالبانءِ بادشاہی ءُ ھاکمی تھت ءُ تاج پوشیءِ گُمان ءُ دومی نیمگءَ بلوچ راجی آجوئی جنزءِ بابتءَ مردمانی وتگڑ ءُ نزوریں چار ءُ بیچار راہ رواجی ءُ اجب درا بنت۔ انچو گوشگ بوگءَ انت کہ اوگانستانءِ ملکی اقتدارءِ مٹ بوگءَ گوں بلوچ راجی آجوئی جنز یک مزنیں تاوانے ءِ نیمگءَ روت انت بلئے اے یک نزور ءُ نا پھتگیں گُمانےءَ چہ ابید دگہ ھچے نہ یے۔ چوشکہ بلوچ راجی آجوئی جنزءِ بندات بلوچ راجءَ شعوری بنیاتءَ بنھشت ایر کتگ۔ اوگانستان یا ایدگہ ھمساھگ ءُ دگہ ملکانی کمکاں چہ جوڑ بوتگیں جنزے نئے کہ آئیءِ مہار دگہ دری ملک ءُ تاکتےءَ گون انت۔

ھستیں دور ءِ بلوچ راجی آجوئی جنزءِ عملی بندات نواب خیربخش مریءَ چہ اوگانستانءَ نہ کتگ بگندئے اوگانستانءَ چہ واتر بلوچستانءِ آھگءَ گوں کتگ، کہ اے راجی جنز تاں مرچیءَ جتائیں کمی ءُ گیشی ءُ سوبمندی ءُ بے سوبی آنی میانءَ جنزگءَ انت۔ بلوچ ورناہانءَ یک گپے سرپد بوگی انت کہ راجی آجوئی جنز چہ دگہ ملک ءُ راجانی کمکءَ چہ بندات ءُ آسر نہ بنت بگندئے راجی جنزانی سوبمندی ءُ بے سوبیءِ دار ءُ مدار گوں ایردستیں راجءِ وتی کربانی، اوپار ءُ سگ ءُ شعور ءَ گوں بندوک انت۔ بلوچستانءِ تہا راجی آجوئی جنز مدام چہ راجی تاکت ءُ مہلوکی کمکاں چہ بوتگ۔ اے وھداں ھم بلوچءِ جھد گوں بلوچ راجءَ بندوک انت کہ بلوچ مہلوک یک سوچ ءُ پکرےءِ بنیاتءَ اے جنزءَ گوں بندوکیں جھدکارانی ھمکار ءُ ھم کمک انت۔ 

اے وَ راستی یے کہ کجام ھم دمگےءِ سیاسی جاور وتی ھمساھگیں ملک یا راجانی سرا سان (اثر) دور دینت بلئے ھمے سان اے چیزءَ گوں کار دار انت کہ ھما راج یا کہ راجی جنز چہ تہا وت چینکس مھکم انت۔ جنزانی سرا دمگءِ جاور بدیں سان ھما وھدءَ کپنت کہ جنز مھکم مہ بنت ءُ چہ تہا نزور بہ بنت۔ چوشکہ مھکمیں جنز چہ مٹ بووکیں جاوراں وتی واستا گیش راہ گیشین انت۔

راجی جہدکاراں۔۔۔

ما بچار ایں کہ اگاں تہنا پہ دومی ملکانی کمکءَ ڈیھ آزات بوتین انت گڑا مرچی کشمیر، فارس جنز، تامل، کرد، فلسطین ءُ کیتالونیا ءَ ھوار دگہ ھمے ڈولیں ڈیھ مرچی آزات ءُ وتواجہ اتنت۔ چیءَ کہ آزاتی ءُ آزاتی جنزءِ دار ءُ مدار گوں ھرچ راجےءِ وتی سرءَ انت۔ دری ملک تہنا وھدی ھسابءَ وتی پائیدگانی ھاترءَ دومی راج ءُ مہلوکانی کمکار بوت کن انت۔ اگاں کجام ھم جنزےءِ دار ءُ مدار تہنا دری ملکےءِ جاوراں گوں بندوک بہ بنت گڑا آ جنزءَ ر ادارُکی جنزے گوشگ بوت کنت کہ آ کجام ھم وھدءَ کٹیت ءُ ھلاس بیت۔ بلوچ راجی آجوئی جنزءِ مستریں سوبمندی ایش انت کہ بلوچ راج زورگرءِ اے گنجیں زلم ءُ زوراکیاں ابید ھم بے ھد مھکمیءَ گوں وتی راجی آزاتیءِ لیکہءَ گوں اوشتاتگ۔ ءُ زورگرءِ زلم بلوچ مہلوکءَ را ترسءَ چہ بید آئیءَ شعوری ردءَ گیش مھکم کنگءَ انت۔ مرچی بلوچ مہلوک وتی راجی جیڑہءِ ھلءَ راجی آجوئی جنزءِ باندات سرپد بیت۔

بلوچ راجی آجوئی جنزءِ بارہءَ اے مہلوکءِ گُمان آھانی نزور ءُ سیاسی نا پھتگیءِ بستارءَ درا کن انت۔ بلوچ راجی آجوئی جنز دری ملکےءِ جوڑ کرتگیں جنزے نہ یے پمیشکہ آئیءَ دری ملکےءِ جاوراں گوں ھمگرنچ کنگءِ جاہءَ بلوچ مہلوکءِ پکر ءُ شعور ءَ گوں ھمگرنچ کنگ بہ بیت۔ چیءَ کہ بلوچ راجی آجوئی جنزءَ را آجوئیءَ داں سر کنگءِ ھاٹی وتی بلوچ لس مہلوکءَ چہ زرتگ۔ بلوچ راجءِ تہا ساڑی ئیں سیاسی ءُ راجی شعور دژمنءَ را نفسیاتی ھوالہءَ بے سوب ءُ آئیءِ زورگریءِ پروش دیگءِ سوب جوڑ بیت۔

پُرسمائیں بلوچ راج۔۔۔

بلوچ راجی آجوئی جنزءِ سیادی گوں بلوچ مہلوکءَ بندوک انت۔ مرچی بلوچ مات وتی زھگانءَ پہ بلوچ ڈیھءِ ھاترءَ ندر بوگءِ درونتءَ دیگءَ انت۔ بلوچ نوکیں پدریچ ءِ ھیلکاری ھمے راجی جنزءِ ساھگءَ چہ بوتگ۔ ھستیں راجی آجوئی جنزءِ تہا بوت کنت ھزاراں کمی بہ بیت۔ بلئے ھمساھگیں ملکےءِ جاورانی بدلی ءَنیمونے جوڑ کنگ ءُ چہ وتی نا پوھیءَ اے پیش کنگ کہ بلوچ راجی آجوئی جنزءَ یک رندے پدا وتی گوستءِ یاتاں نوک کنت بزانکہ پرش ایت یا نزور کنت، اے زورگرءِ  پروپیکینڈہ ءُ چیزے نا پھتگیں سیاسی مردمانی ذہنی نا پوھیءَ چہ ابید دگہ ھچے نہ یے۔

بلوچ راجءَ را اے گپ سرپد بوگی انت کہ بلوچ راجی آجوئی جنز ءُ آئیءِ گیش مھکم کنگءِ دار ءُ مدار گوں بلوچ ءُ بلوچءِ سیاسی پکر ءُ شعورءَ گوں بندوک انت۔ اے وھداں بلوچ ورناہانءَ وتی سرکلانءَ گیش مھکم کنگ ءُ دیمءِ آؤکیں جنجالانی ھاترا وتارا جاڑیگ کنگی انت۔ چیءَ کہ بلوچ راجی آجوئی جنزءِ باندات ءُ آئیءِ بانداتءِ مھکمی ءُ سوبمندیءِ ڈبہ ھمیشانی کوپگءَ انت۔ اے جھدءِ تہا گران ءُ نا وشیں جاور کاینت۔ مارا چوش گُشگی نہ انت کہ 2009 ءَ چہ بندات بوتگیں زورگرءِ گیشیں کریک ڈاؤن ءِ ڈولیں پندل بلوچ راجی جھدءِ نزور یا ھلاس کنگءَ بے سوب بوتگ۔ چوشکہ وھدءِ ھمبرائیءَ آئیءِ تہا گیش ترندی ءُ پھتگی اتکگ۔ دیمءِ آؤکیں نگیگیں جاور بوت کنت مارا باندات ءِ بارہءَ گیش کار کنگءِ پائیدگ بدے انت۔ راجی جنزانی تہءِ گٹگیریں جاور گل ءُ پارٹی آنءَ وتی ردی آنی سرپد بوگءِ موہ ءَ دنت۔ ھستیں وھدءِ مٹ بووکیں جاور بلوچ جہدکارانءَ اے دمگءِ باندات ءُ میاں استمانی سیاستءِ پیچ ءُ تاباں سرپد بوگ ءُ وتی جھد ءَ برجاہ دارگءِ سوب جوڑ بیت۔ بلوچ جھدکارانی مزن شانیں پکر ءُ اے جہد ھرچ پیمءَ بلوچ ءَ را اے دلجمیءَ دینت کہ باج ھرچ ھالءَ بلوچءِ بیت۔