بلوچ بیگواہ تا دے

!بلوچ راج

اسہ بندغ ئسے زوراکی ئٹ بیگواہی نا گواچی کننگ جہان نا ہر قانود و ریاست ٹی بھاز بھلو جرم ئس پن تننگانے و اسہ کوزہ گیر و زوراک ریاست ئسے آن بیدس جہان نا ہچو ریاست ئس ہمرو زوراکی نا بیگواہی ئس مرے اوٹی دُو تفوک مفک بلکن اسہ زوراکی ئٹ بیگواہ مروک بندغ ئسے پٹنگ و اونا بیگواہی نا دروشم ئٹ پٹ و پول کننگ ہمو ریاست نا زمہ واری مریک ولے ہراتم راج آک غلام مریرہ، تینا ڈغار، بولی، حق و اختیار آتیان پدماندہ مریرہ گڑا اوفتا بندغ آتے بیرہ زوراکی ئٹ بیگواہ آخہ بلکن کھسفنگ بٹنگ و جہان نا دیہاڑ ئٹ دافتا نہاد ئٹ ہلنگ و بہا کننگ نا ہم مثیل ارے ہراتم جہان نا غٹ کوزہ گیر و سامراجی تاغت آک افریقہ نا وڑ انگا ڈیھ تیا کوزہ کریر و پدان اوفتے غلام نا دروشم ئٹ بہا کریر۔ پاکستان بلوچستان نا زی آ تینا دا کوزہ گیری ءِ ترند کننگ و برجا تخنگ نا مسخت ئٹ زوراکی نا بیگواہی تے اسہ سِلہہ سے نا وڑ کارمرز کننگ ءِ تاکہ ورناک و راجی سوچ تخوکا بندغاک راجی آجوئی نا جہد و جنز آتیان مر مریر ولے پاکستان اولی کوزہ گیر اف بلکن سری لنکا ہراتم تامل ٹائیگر نا برخلاف کریک ڈاؤن نا فیصلہ ارفے گڑا اوٹی ہم زوراکی نا بیگواہی ءِ سلہہ نا وڑ کاریم ئٹ ہیس، جہان نا کوزہ گیر آک تینا کوزہ گیری ءِ سوگوْ کننگ کن ہر وڑ ئنا ظلم و زوراکی و نہاری ءِ کاریم ئٹ ہتیرہ۔

جنز آجوئی نا ہمدڑد آک

زوراکی نا بیگواہیک ہراڑے دشمن نا ازباب و زوراکی تا انتہا سے ءُ ہموہن دا کوزہ گیر نا بےسہبی ءِ ہم درشان کیرہ انتئے کہ زوراکی نا بیگواہی جنگ ئنا ایسری گام ءِ ولے بلوچ ڈغار آ کوزہ گیر ریاست تدوکا بیست سال آن اسہ رنگ ئٹ دا عمل ءِ تینا کرینے واہم اینو بلوچستان نا ہر کنڈ ئٹ راجی آجوئی نا سوچ و فکر اسہ سوگوْ ءُ دروشم ئسے ئٹ نظر بریک و جنز دے پہ دے ترند مرسا ٹے ۔ بلوچ ڈغار نا زی آ دا پالیسی ءِ بےسہب کننگ ٹی بھلو قربانی ئس ہندا سیاسی و غیرسیاسی بلوچ جہدکار آتا ءِ ہرا تدوکا کیہی سال آتیان ریاست نا زندان آتے ٹی قید اوفتے تینا حق آ مننگ نا شاہدی تننگ ءُ یا ہمو بلوچ جہدکار آک ہرافتے ریاست زوراکی نا بیگواہی تیان پد سخت بیدادی نا گواچی کرسا شہید کرینے و اینو ہمو جہد آتا نتیجہ ءِ کہ بلوچ راجی جنز تیوہ بلوچستان ئٹ تالان مسنے و ہر بلوچ تینا غلامی و ریاست نا کوزہ گیری نا احساس ءِ تخک۔ دشمن نا پارہ غان زوراکی نا بیگواہی تا ظلم ءِ ہرا وڑ بلوچ الس ءِ خلیفنگ و اوفتے جنز آن مر مننگ نا پاننگانے او چم اینو بلوچ بیگواہ بندغ تا پارہ غان تیوہ وڑ ئٹ بےسہب کننگانے۔ راجی جنز آک ریاست نا زوراکی،جبر و وحشت آن اسل ہم ایسر مفسہ ہرا وڑ سیاسی جہدکار آتے قانودی حق آتیان پدماندہ تخسا زندان تیٹی بند کننگانے دا کوزہ گیر نا وحشت نا انتہا ءِ ۔

!چاہندار آ بلوچ الس

ہچو کوزہ گیری ئس مدامی کن مفک، پاکستان نا وڑ انگا ریاست آک کہ ہرافتا ہچو لیکہی بنداو ئس اف اوفک اسہ نہ اسہ دے الم پنّرہ ولے بیوس و غلام راج آک تینا بروکا وخت ئنا فیصلہ ءِ تینٹ کیرہ، بلوچ غلام دا وخت پاکستان نا فوجی کوزہ گیری ٹی ءِ ہراڑے بلوچستان نا اسہ اسہ کنڈ آ فوج ءِ تولفسا بلوچستان ءِ زور ئٹ تینتون اوار کننگانے ہرانا برخلاف بلوچ راجی جنز برجا ءِ و کیہی ہزار سنگتاک تینا ساہ تے ندر کرینو و ہندا وڑ ہزار آ بندغاک دائسکان ہم دشمن نا زندان تیٹی بند ءُ یا اوفتا جشوک جون آک اسہ اشتماعی قبر ئسے ٹی کھڈ کننگانو یا اوفتے زہنی حوالہ ئٹ کاریم آن درینو گڑا یلہ کرینو۔ بلوچ راج دا غٹ بندغ تا قربانی تے بیرہ قدری ءُ چمشانک ئس تفک بلکن راجی جنز ئکن اوفتا ندریک عظیم ءُ ہرافتے کہ دیہاڑ ٹی مدام یات تخنگ مرو۔ بیگواہ بندغ تا ہندا قربانی تے مونا تخیسہ گل مسکوہی کمک کماش زاکر مجید نا بیگواہی نا دے ءِ “بلوچ بیگواہ تا دے ” ئنا ردئٹ گدریفنگ نا فیصلہ کرے و داسا ہر سال بلوچ بیگواہ تا دے ئنا ردئٹ گدریفنگ مریک ۔ بیرہ زاکر جان آخہ بلکن زیبا غا بلوچستان کن زندان تے ٹی بیدادی تے سگّوکا ہر بلوچ و اوفتا ندر مننگ ءِ دیہاڑ نا پنّو آتے ٹی یات تخنگ مرو۔ راجی جنز دشمن نا دننگا چم آتیان ہچ وڑئٹ بے سہب مروف بلکن پین ترند و سوگوْ مرسا سرسہبی نا مزل آ روان مرو ۔

پارہ غان :۔ بی ایس او آزات نا