بلوچ راجی زْرمبش ءِ ھِلاپ ءَ پاکستان ءِ پندل

29 June 2016

دُنیا ءِ ھر کُجام مُلکے ءَ وھدے راجی زْرمبش بِندات بنت گُڑا آ مُلک ءَ دو جِتائیں تَبک پیداک بنت۔یک تَبکے ءَ ھما مردم اَنت کہ ھواریں نپ ءُ سیتاں(مجوعی مفادات)اَرزِشت دے اَنت ءُآجوئی ءِ زْرمبش ءَ سوبمندی ءِ نیمگ ءَ برگ ءِ ھاتر ءَ وتی دْرواھیں واھگ،آسراتی،آسائش ءُُ وتی زند ءَ ھم ندر کنگءَ چَک ءُُ پد نہ بنت ءُُ وتی راجی زمّہ واری ءَ پیلو کن اَنت۔دومی ھما تَبک اِنت کہ وتی نپ،لَب ءُلالچ واست ءَ وتی جند ءِ مردمانی ساہ ءِ سود ا ءَ گوں دژمن ءَ جن اَنت ءُ راجدپتر ءِ تہ ءَ وتی نام ءَ پہ دائمی پولنگ کن اَنت۔

بلوچ راج۔۔۔

68سال اِنت کہ پاکستان ءَ وتی زورگِری برجاہ داشتگ ، اَمنچو وھد اِنت کہ بلوچ راجی زْرمبش ھم برجاہ اِنت اَگاں اِے برجاھیں زْرمبش ءِ سر ءَ چار ءُ بچار کنگ بہ بیت گُڑا اِے گپّ ءِ سرپد بوگ ءَ ھِچ مُشکل نہ بیت کہ بلوچ راجی زْرمبش ءِ تہ ءَ اِے دوئیں تَبکانی وتی وتی کِردارے بیتگ۔اِیشانی تہ ءَ لَھتے ھما مردم اَنت کہ ھکیکی راجدوستی ءِ بُنیاد ءَ جُھد ءِ بَرجاہ داشتگ ءُُ ھر دَور ءَ وتی راج ءُ زمین ءِ ھاتر ءَ کُربانی داتگ اِش۔بلے لھتے وتی جندءِ نپ ءُ سیت دوستیں ءُ راج دُژمنیں مردم ھست کہ آ اِیوک ءَ لھتے لَبءُ لالچانی واست ءَ گوں وتی زمین ءُ راج ءَ غداری کنگ ءَ اَنت۔اِے تَبک ءِ تہ ءَ ھما مردم ءُ گَل ھوار اَنت کہ آ بلوچ راجی زْرمبش ءَ ھلاس کنگ ءِ واست ءَ دیریں یکجاہ اَنت ءُ وتی ھمے اِرادھانی سرجم کنگ ءِ واست ءَ وڑ وڑیں ھُنر ءُ ھیلہ کنگ ءَ اَنت۔نیشنل پارٹی مزنیں وھدے ءَ ھکومت ءِ تہ ءَ نہ بوتگ بلے وتی وپاداری پیشدارگ ءِ واست ءَ بلوچ سیاسی سنگتانی پدّر کنگ ءُ آھانی آوار جنگ ءَ گوں پاکستان ءَ ھَمکار بوتگ۔نیشنل پارٹیءَ وتی دو سال ءِ ھکومت ءِ تہ ءَ ھزارانی ھِساب ءَ بلوچ ورنا،بازیں زھگ ءُُ زالبول ھم پاکستانی فورسز ءِ دست ءَ شھید کنائینتگ۔گْوستگیں سال ءِ جولائی ءَ چہ آواران ،کوھلو ءُُ ڈیرابگٹی ءَ زالبولانی آوار جنگ ،چہ سبی ءُُ بولان ءَ 40ءَ گیش زالبول ءُُ زھگانی آوار جنگ ءُُ داں یک ماھے ءَ آھاں بندیگ کنگ ءِ ھِلاپ ءَ ڈاکٹر مالک ءُُ نیشنل پارٹی ،بی این اپی مینگل،جماعت اسلامی ءُُ دِگہ وتگڑیں’’راجدوستیں‘‘ گَلاں یک لبزے ھم نہ گْوشت ،چے ءَ کہ آھاں گوں بلوچ مَھلوک ءَ ھِچ وڑیں ھمدردی یے نیست ،اِیوک ءَ وتی نپ ءُُ سیتانی واست ءَ پِگر مند اَنت۔بلوچ زالبولانی شرپءِ،بلوچ ورناھانی زِندگیءِ ءُُ بلوچ آجوئی ءِ سودا اِیشاں ھما وھد ءَ جت وھدے اِیشاں آجوئی ءِ زْرمبش ءِ مخالفت کنگ بِندات کُت۔پاکستان ءِ اِے مشن ءَ سرجم کنگ ءِ واست ءَ نیشنل پارٹی،بی این پی ءِ وڑیں کرپٹ ءُُ پارلیمان دوستیں گَلاںآئی ایس آئی،ایم آئی ءُُ ایف سی ءِ سروکی ءَ چہ اولی روچ ءَ وتی کِردار ءَ اداکنگ ءَ اَنت۔گْوستگیں روچاں چہ ھمے گَلانی نیمگ ءَ زورگِپتگیں بلوچستان ءِ جِتا جِتائیں دمگانی تہ ءَ بلوچ آجوئی دوستیں گَل ءُُ راجی زْرمبش ءِ ھِلاپ ءَ وتساچیں زھرشانی اِیشی ءِ پدّریں مِسال اِنت،کہ آئی ءِ سروکی پاکستانی فورسز ءَ کُت۔

بلوچ راج۔۔۔

دژمن بلوچ مَھلوک ءَ بَھر ءُُ بانگ کنگءِ پالیسی ءِ سر ءَ کار کنان اِنت ءُُ ھر دمگ ءِ تہ ءَ وتی داشتگیں مردمانی وسیلہ ءَ ھر دمگ ءِ نِندوکیں مردمانی ھِلاپ ءَ کار کنگ ءَ اِنت۔چوش کہ جھاؤ ءَ چہ مجید بزنجو ءُُ آئی ءِ چُکانی وسیلہ ءَ مردماں تنگ کنگ بوگ ءَ اِنت۔کوھڑو،زیلگ،وادی،دارو کوچگ ءَ ھوار بازیں دمگاں ھَزارانی ھِساب ءَ مردم چہ میتگاں زور کشّگ بوتگ۔ھمے وڑ ءَ دشت ءَ چہ نیشنل پارٹی ءِ مردمانی نیمگ ءَ ھزاراں مردم چہ لوگاں در کنگ بوتگ اَنت۔مشکے ءَ سردار علی حیدر ءِ سروکی ءَ میتگانی مردم تُرسینگ بوتگ اَنت ءُُ مردم چہ وتی میتگاں درآیگ ءَ لاچار بوتگ اَنت۔آواران،کولواہ،شاپُک،کلات،مستونگ،پروم،کوھلوءُُ ڈیرہ بگٹی ءَ ھوار دْرواھیں دمگانی مردم پہ زور چہ وتی میتگ ءُُ دمگاں کشّگ بوتگ اَنت ءُ دُژمن آھاں چہ بلوچ آجوئیءِ زْرمبش ءَ دور دارگ لوٹ اِیت۔بلے رجدپتر گْواہ اِنت کہ راجانی مستقل مزاجی ءُُ یکجاھی ءَ مزن مزنیں تاکت بے سوب کُتگ اَنت۔ھمے وڑ ءَ بلوچ راج ءِ یکجاھی ءُُ ھِمّت پاکستان ءُُ پاکستان ءِ لب ءُُ لالچ لوٹوکیں مردمانی پندلاں بے سوب کنت۔بلے دُژمن ءَ چہ وتی دمگاں تاچینگ ءُُ پاکستان ءِ داشتگیں مردمانی پدّر کنگ ءِ ھاتر ءَ بلوچ چاگِرد ءِ دْرواھیں تَبکاں وتی کِردار پیلو کنگ لوٹ اِیت،دُژمن ءِ پندلانی زانگ ءُُ مردماں سرپد کنگ ءِ ھاتر ءَ کِردار پیلو کنگ لوٹ اِیت،آجو ءُُ پُراِیمنیں بلوچ اِستان ءِ ھاتر ءَ ھر وڑیں کُربانی ءِ واست ءَ وتارا تیا ر کنگ لوٹ اِیت چے ءَ کہ آجوئی وڑیں مَنگھِیں مول ءُُ مُراد بید ءِ کُربانی دیگ ءَ گِرگ نہ بیت۔

اِے مئے اِیمان اِنت کہ سوبمندی ھر وڑ ءَ بلوچ راج ءِ بیت۔

شنگ ءُ تالان۔ بلوچ اسٹوڈنٹس آرگنائزیشن آزاد