بلوچ  راج سرداری نظام ءَ  پرچا بائیکاٹ بہ کنت؟

گیرتمندیں بلوچاں

                اے راستی ءَ  ھچ کس رد نہ کنت کہ بلوچستان ءَ سردار مدام پہ زورگیر  ءَ ھما تاکتوریں راجمانی کارندگ جوڑ  بوتگ  کہ آئی ءَ بلوچستان ءِ سر ءَ کوزہ کنگ ءُ بلوچ  راج ءِ مال ءُ مڈیانی  لٹ ءُ پل ءَ زور گیر ءِ کمک ءُ مدت کرتگ۔ سرداراں مدام زورگیرءِ پلہ مرزی کنانءَ مہلوک وتی گلام دارگءِ جہد کرتگ ءُ استانءَ ہمک سردار واکدار کرتگ اَنت کہ آ مہلوکءِ سرءَ زلم ءُ زوراکی بہ کن اَنت،آیاں علم ءُ زانتءِ مادنیں راہءَ چہ دور بہ دار اَنت۔ بلوچ کُشندہیں سردار  مدام سرکار ءَ پروٹوکول ءُ تاکت داتگ  اَنت، سلاہ ءُ مڈی داتگ اَنت کہ آ بلوچ ءَ گیشاں گیش گلام دارگ ءُ  زلم ءُ زوراکی کنگ ءَ پہ کارمرز بہ کن اَنت۔ سردارنی بلوچ  دژمنی  چہ کس ءَ چیر ءُ اندر نہ اِنت بلکیں دراھیں راج ءِ دیم ءَ اشانی کردار پاشک  اِنت۔ انگریز بہ بنت یا بلوچستان ءِ سر ءَ  پاکستان ءِ کبزہ ءَ رند پنجاپی جرنیل ءُ کرنل، گیشتریں وھد ءَ اے سرداراں گوں  کرنل ءُ جرنیل ءَ مذاکرات کتگ ءُ آھانی ھمبراہ داری ءَ بلوچستان ءِ سرءَوتی کبزہ برجم داشتگ۔ سردارنی کردار بلوچ تاریخ ءَ بلوچاں چہ علم ءُ زانت ءَ دور دارگ، آھانی سیاسی ءُ علمی ءُ فکری شعور ءَ چہ دور دارگ، آھاں وانگ ءُ زانگ ءَ چہ دور دارگ، آھاں پاکستان ءُ ایدگہ زورگیراں پہ مخبری کنگ ءَ کارمرز کتگ اَنت۔ بلوچستان ءَ زالبولانی سرءَزلم ءُ زوراکی ءُ آھاں انسانی کٹ ءُ بستارءَ در کنگ  ءَ ھم سردارنی مزنیں کردارے بوتگ ءُ تنی وہدی ھست اِنت۔ دژمن ءَ اے راجمانی کارندگ پہ چاگردءَ بلوچ مہلوک ءِ ھلاپ ءَ مہکمیں رنگے ءَ کارمرز کرتگءُ مروچی ھم کارمرز  اش کنگ ءَ اِنت۔

شر پمندیں بلوچ پُسگاں

مئے گور ءَمدام یک گپے دیم ءَ آرگ بیت کہ دراھیں سردار ھراب نہ اَنت۔ مئے تاریخ ءِ توک ءَ سرداراں پہ بلوچ ءَ قربانی داتگ، اے گپ ءِ توک ءَ ھچ شک نیست اِنت کہ بلوچانی تہ ءَ انچیں راھبر ءُ راھشون بوتگ کہ آھاں پہ زمین ءُ بلوچ راجی جہد ءَ کربانی داتگ ءُ کار کتگ ءُ جہد ءِ راھشونی کتگ کہ آھانی سیادی گوں سرداری لوگاں بوتگ بلئے اے راستی ءَ چہ کس انکاری  نہ بیت کہ اے مردماں بلوچ نیشلزم ءِ جذبہ ءِ بنیاد ءَ جہد کتگ ءُ یک سردارے ءِ بنیاد ءَ یا سردارے ءِ حیثیت ءَ بلوچ جہد ءِ توک ءَ کار نہ کتگ ۔  بلوچ راجی  آجوئی جُہد ءِ توک ءَ چونیں ھم بلوچے بلوچ نیشلزم ءِ بنیاد ءَ کار بہ کنت  گڑا بلوچ راج  آئی ءِ الم ءَ احترام ءُ توسیپ  ءَ کنت۔ اگاں یک بلوچے ءَ پہ زمین کربانی داتگ گڑا آسرداری نظام ءِ ھلاپ بوتگ چشکہ مارا  یوسف عزیز مگسی گندگ ءَ کیت۔ یا، خیر بخش مری ءُ اکبر  بگٹی یا آدگہ  راھشونانی نیمگ ءَ 1971 ءَ پارلیمنٹ ءَ یک قرار دادے آرگ بیت کہ آ سرداری نظام ءِ ھلاپ ءَ بیت اِنت۔ ھمے ڈول ءَ  ما گنداِیں کہ وھدے نواب خیر بخش مری وتی زندگی ءِ گڈی ساھت ءَ کیت گڑا آ ھچ چشیں مردمے ءِ نام ءَ سرداری نہ کنت بلکیں سرداری نظام ءَ سرجم ءَ ھلاس کنگ ءِ ھک ءَ بیت اِنت۔ اشی ءَ ابید  ما گنداِیں کہ یوسف عزیز مگسی یک سرداری لوگے ءَ پیداک بیت بلئے آئی ءِ  گشگ ھمیش بیت کہ اے سردار کشگ بہ بنت کہ اش بلوچ ءِ ھاتر ءَ کدی ھم پائدگمند بوت نہ کن اَنت۔  وھدے بلوچستان ءِ سر ءَ کبزہ کنگ بیت گڑا اے کبزہ ءَ را منگ ءُ ریشنل کنگ ءِ توک ءَ سردارانی مزنیں کردارے گندگ ءَ کیت اِنت۔  انوگیں سرداری نظام وتی توک ءَ یک گندگیں ءُ انگریزانی جوڑ کتگے نظامے کہ بلوچ ءَ را آئی ءِ ھلاپ ءَ مھکمی ءَ اوشتگی اِنت ءُ اے سردارانی ھلاپ ءَ گامگیج زورگی اِنت ءُ ھرکس وت ءَ را سردارے سرپد بیت آئی ءَ را سماج ءِ توک ءَ بدنام ءُ رُزوا کنگی اِنت۔ مروچی،   ڈیتھ اسکواڈے ءِ   سربراہ ءُ سردارے ءِ توک ءَ ھچ پرک ءُ تپاوت  نیست اِنت۔ دوئیں  دژمن ءِ کاراں کنگ ءَ اَنت۔ مروچی ھم بلوچستان ءِ توک ءَ اے نظام مارا جتائیں دروشم ءَ سرکار ءِ واستہ کار کنگ ءَ گندگ ءَ پیداک اِنت۔ ھستیں وھد ءَ بلوچستان ءِ توک ءَ گیشتریں  دلارانی سربراہ مارا سردار  گندگ ءَ کاینت ۔ پمیشکہ بلوچ راج آھانی ھلاپ ءَ ترندیں گامگیج زورگ ءَ ھچ چک ءُ پد مہ بیت۔ بلوچ راج ءَ را اے گپ زانگ ءُ پھمگی اِنت کہ سردار ھچ رنگ ءَ بلوچ ءِ دوزوا  بوت نہ کن اَنت۔ اگاں یک مردمے وت ءَ را سردار سرپد بیت آ ھچ رنگ ءَ بلوچ ءِ ھک ءَ کار نہ کنت ۔ مروچی سردارنی ءُ پاکستانی پوج  ءِ  میان  ءَیکجائی چیریں گپے نہ اِنت بلکیں بلوچستان ءِ توک ءَ اے نظام ءَ را زندگ دارگ ءُ مھکم کنگ ءِ توک ءَ مستریں کردار پاکستانی پوج ئیگ اِنت کہ آئی ءِ مفاد بندوک اَنت۔

باسمائیں بلوچاں

مروچی مئے زالبول چہ اے سردارانی داشتگیں دلار انی نیمگ ءَ چہ چست کنگ ءُ بیگواہ کنگ بوگ ءَ اَنت۔ بلوچ  ءِ مال ءُ مڈی زالبول ءُ ورناہ اے سرداراں دیریں پنجاپی پوج ءِ گور ءَ بہا کتگ  اَنت ءُ روچ پہ روچ اے سردار بلوچ  راج ءَ گیشتر دژمن ءِ دست ءَ زوراکیانی آماچ کنان اَنت۔ بلوچستان ءِ دراھیں کنڈاں مارا چشیں وتگڑیں  سردار گندگ ءَ کاینت کہ آ بلوچ ءِ دژمنی ءَ دراھیں دوداں  لگتمال کنگ ءَ اَنت۔ جاہے  بلوچ ءِ مال ءُ  مڈیاں  دژمن ءَ را دیگ ءَ اَنت کہ آئی ءِ درور مارا رخشان ڈویژن ءَ گندگ ءَ کیت؛ جاہے بلوچاں چہ زمین ءَ گلینگ ءَ اَنت؛ جاہے دژمن ءِ  واستہ  ڈیتھ اسکواڈزاشاں  جوڑ کتگ؛ جاہے بلوچ   نودربرچہ وانگ ءُ زانگ ءَ چہ زبہر کتگ اَنت۔ ھمک ھند ءُ دمگاں اشانی کردار مارا زوراکانی ھمبرائی ءَ گندگ ءَ کیت اِنت پمیشکہ مارا لوٹیت کہ ما اے  سردارانی  ھلاپ ءَ مھکمیں گہگیری یے چست بہ کن اِیں ءُ بلوچستان ءِ توک ءَ سرداراں سرجم ءَ بائیکاٹ بہ کن اِیں۔ سردار پاکستانءُ دژمن ءِ وفادار اَنت، آھانی کمککار اَنت۔ بلوچ راج ءَ اِشانی مکسد ءُ کاراں چہ آشنا بوگی اِنت ءُ اِشانی بگیر ءَ مھکمیں جُہدے کنگی اِنت۔

آزات بلوچستان زندگ بات

سرداری نظام مردہ باد

بلوچ اسٹوڈنٹس آرگنائزیشن آزاد