بلوچ چاگردءَ ڈیتھ اسکواڈ

!شرپداریں وانوک

پہ بلوچ راجی آجوئی جنزءِ ایرموش کنگ ءُ بلوچ ڈیھءَ وتی کبزہءِ مہکم دارگءِ ھاترءَ زورآوریں پاکستان وڑ وڑیں ھُنر ءُ ھِیلّا سازگءَ انت کہ آیانی تہءَ سافٹ پاورءِ شکلءَ کیڈٹ کالج، پروپیگنڈاءِ جتائیں رنگ ءُ دروشم، دیمروئیءِ نامءَ جتائیں درشان یاکہ الیکٹرونک ءُ سوشل میڈیاءَ بلوچ جنزءِ ھلاپ کار بندگ، مذہبی پروپیگنڈا، کتابانی سرءَ بندش، اسکول ءُ لینگویج سنٹرانی سرءَ اُرش ءُ یک مزنیں ترس ءُ بیمءِ چاگردےءِ ودی کنگءَ ھوار دگہ چوشیں بازیں پالیسی ھست اَنت کہ آیانی بُنیادءَ بلوچ راجی جنزءَ را ایرموش کنگ ءُ مہلوکءِ دلاں پہ جہدءَ بدگمانی پیداک کنگءِ کوشست کنگ بوگءَ انت۔ دژمن وتی سافٹ پالیسیءِ ھمرائیءَ ہارڑ پالیسی ھم گوں ترندیءَ برجاہ داشتگ انت۔ چوشکہ ھمک روچءِ بنیادءَ بلوچ ڈیھءَ پوجی لشکرکشی(آپریشن)، مردمی کُشت ءُ کوش، فیک انکاؤنٹرءَ بلوچ ورنا ءُ لس مردمانی نمیران کنگ، آوار جنگ، گار ءُ بیگواہ کنگ ءُ بندیگجاھانی تہءَ ازیت دیگ، ھمے کشکانی سرءَ جوڑ کتگیں چیک پوسٹاں مہلوکءَ بزگ ءُ وار کنگ، ءُ چہ اے درستاں گیش استانی سرپرستیءَ ھَندی اسکواڈانی جتائیں ٹولیانی شکلءَ مہکم کنگ، آھاں سِلاہ ءُ مڈّی دیگ، واک ءُ اختیار دیگ ءُ ھلک، میتگ ءُ شہراں کارمرزگ ءُ کاربندگ، کہ آھانی مستریں کار آجوئی لوٹوکیں مہلوکءِ دیمءَ اڑاند جوڑ بوگ، آھانی نشانگ کنگ ءُ آھاں جانی ءُ مالی تاوان دیگ، سیاسی باسک ءُ ورکرانی سرءَ نگاہ ایر کنگ ءُ آھانی سیاسی چست ءُ ایرانی بنیادءَ برزی ادارہاں ھال سر کنگ، بلوچ جہدکارانی کہولاں بیم ءُ پاتراپاں گوں ترسینگءِ جہد کنگ، ءُ چہ ایشاں ابید بلوچ چاگردءَ خانہ جنگی، ربیدگ ءُ دودمانانی پامالی ءُ ھر چونیں دزی، ڈنگی ءُ لٹ ءُ پلءِ واک ءُ اختیار دیگ بوتگ انت۔

!بلوچ راج

چوشکہ شما شر زان اِت ءُ سرپد اِت کہ زورآورءِ پوج، آئیءِ چیریں ادارہ(آئی ایس آئی ءُ ایم آئی)ءِ دزچیرءَ جوڑ کتگیں ھَندی ڈیتھ اسکواڈ ٹولی سرجمیں بلوچستانءَ زورآورءِ زلم ءُ زوراکیانی میانءَ یک ھسابءَ ھوار انت۔ چرایانی نیمگءَ دزی ءُ ڈنگی بہ بیت، بلوچ ننگ ءُ ناموسءِ پامال کنگ ءُ مردمانی آوار جنگ ءُ بیگواہ کنگ، مہلوکی زمین ءُ ڈگاراں کبزہ کنگ، وانگجاہاں ماندارگ، بلوچ زالبولاں شزاریگ کنگ ءُ آیاں ذہنی نادراہ جوڑ کنگ، استانی دلاریءَ ھوار ھر وڑیں زُلم ءُ ناشرکاریاں ھوار انت۔ ھمے ناشریانی سوبءَ بلوچ چاگردءَ نا کماشانی ازت رک اِتگ ءُ نئیکہ زہگ ءُ زالبولانی شرپ۔ پوج ءُ آئی ایس آئیءِ پشت پناہیءَ آیاں بلوچ ڈیھ مہشرے جوڑ کتگ۔ اے ٹولی ھمینکس واک ءُ تاکت دیگ بوتگ انت کہ مرچی نام نہادیں راجدوستیں سیاسی پارٹی ھمیشانی ساہگءَ پہ وتی ھستیءِ رکینگءَ جہدءَ انت۔ ھمک پارٹیءَ وتی جتائیں اسکواڈ ٹولی یے داشتگ کہ ھمائیءِ کمکءَ وتی سیاسی پائیدگاں سرجم کنگءِ جہدءَ انت۔ چوشکہ ھمے زوتاں وڈھءَ دیمءَ اتکگیں اختر ءُ شفیقءِ اسکواڈ ٹولیانی گوں یکے دومیءَ جنگ ءُ جیگ کہ دوبر بندات بوتگ ات کہ اے جیڑہ دانی برجاہ انت، کہ چرے ٹولیانی جنگ ءُ میڈءَ لس مہلوکءِ زندمان، کار ءُ بار سرجم ترس ءُ بیم ءُ مزنیں تاوانےءِ آماچ بوتگ، چہ ھردو نیمگاں مزنیں مزنیں سلاہانی کارمرزگ، مہلوکی ٹرانسپورٹ ءُ کارجاھانی بند کنگ، کَش ءُ گورانی دمگاں یک ترس بیمءِ ماحولے ودیگ کنگ بوتگ۔ زانگ بہ بیت کہ زورآورءِ وفاقی پارٹی ءُ ایدگہ ٹولیانی میانءَ کجام اوں وھدےءَ کہ مزنیں اڈاند پیداک بیت گڑا آئیءِ مستریں سبب برزی ادارہ (آھانی آقا)ءِ گورءَ بیت، چوشکہ پاکستانءَ ایش ھندی ڈیتھ اسکواڈ بنیادی زمانگءَ ھمینکس واک ءُ تاکت دات انت کہ مرچی پہ پاکستانءَ اے نوبت اوں اتک کنت کہ اے ٹولی چرائیءِ مہار ءُ پنجگءَ در بیا انت، ما گند اِیں کہ ھمے ترسءِ بنیادءَ استان باز وھد ھمے ٹولیانی میانءَ زمینی، بئیپاری، قبائلی یاکہ دگہ لٹ ءُ پلی پائیدگانی بنیادءَ اڑاند پیداک کنت، تاکہ ھمے ٹولی چہ استانی مہارءَ ڈن وتءَ ھچبر جیڑ اِت مہ کن اَنت۔
پہ وتی زاتی ءُ کہولی پائیدگانی بنیادءَ ھمے ٹولی زورآورءِ لٹ ءُ پلی عملءَ بگر (چوشکہ بلوچ ڈگارءِ سائل ءُ وسائلانی کَشّگ ءُ برگ) تاکہ مہلوکی کُشت ءُ کوشءَ بیا کلیں عملانی میانءَ زورآوریں استانءِ گوما جتائیں شکلاں اوشتوک انت۔ بلوچ ڈگارءِ بلڈوز ءُ بُر اتگیں کوہ بہ بنت (کہ چرایاں ڈیھءِ ھزاراں وسائل کشگ بوگءَ انت) یاکہ توتکءِ ھما سدانی کچءِ جون کہ تاں مرچیءَ کسےءَ نہ زانت کہ کئے بوتگ انت؟ وت شاہد انت کہ اے نامی ئیں میر ءُ سردار کبزہ گیر پاکستانءِ کارانی میانءَ چینکس شریدار انت۔ ءُ چوشیں ٹولی نا تہنا خضدارءِ دمگءَ اڈ دیگ بوتگ انت بگندئے اے بلوچ ڈیھءِ چاریں کُنڈاں مہکمیں شکلےءَ ساڑی انت، جاھے مذہب ءُ دینءِ نامءَ کار کنگءَ انت، جاھے قبائل ءُ زات ءُ پات دیمءَ آؤرتگ انت، جاھے میانی تبکءِ مردم انت، بلئے کار درستانی یکین انت، تہنا بلوچ راجی آجوئی جنزءِ ایرموش کنگ، پاکستانی زورآوریءِ مہکم دارگ ءُ پہ وتءَ چرپیں دپارءِ گرگ ءُ ورگ، پمیشکہ بلوچ مہلوکءَ چرے دز ءُ ڈنگانی سیاسی بٹاک ءُ چست ءُ ایراں سرجم دور دارگ لوٹ ایت ءُ ایشانی ھلاپ بلوچ مذاحتمی پروگرامانی گیشا گیش بہر بوگ لوٹ ایت۔

!باسمائیں مہلوک

پاکستانی وفاقءِ نشتگیں بلوچ سیاسی پارٹی بلوچ راجدوستیءِ بنیادءَ جتائیں اوگام (نعرہ) آنی شکلءَ بلوچ لس مہلوکءَ مدام ریپینگ ءُ رد دیگءِ جہدءَ انت۔ چیا کہ ایشانی مستریں لوٹ وتی زاتی پائیدگاں پاکستانی کبزہءِ جہلءَ زندگ دارگ انت، پمیشکہ اے تاں ھما وھداں زندگ بوت کن انت دانکہ پاکستان زندگ انت، پہ پاکستانءِ زندگ دارگءِ ھاترءَ ھمائیءِ واھشت ءُ پروگرامانی بنیادءَ سیاست کنگءَ انت۔ چوشکہ مرچی باندا پدا ووٹ ءُ الیکشن نزدیک بوان انت، اے درگتءَ چریشانی نیمگاں بلوچ ڈیھءِ جتائیں دمگاں جتائیں شکلاں چست ءُ ایر گیش بوتگ انت، ھاسکار ھمک پارٹیاں وتی وتی ڈیتھ اسکواڈ ٹولیانی وسیلہءَ بلوچ پرزندانی گار ءُ بیگواہ کنگءِ درچ پدا ترند کتگ، تاکہ لس مہلوک لاچار بہ بیت ءُ پہ وتی بیگواہیں مردمانی یلا کنائینگءِ ھاترءَ ھمے سیاسی پارٹیانی دراں بئیت انت۔ بلئے بلوچ لس مہلوکءَ چرے کلیں استانی پندلاں تا ابد رکّگءِ ھاترءَ مستقل بنیادءَ جیڑگ ءُ باسما بوگ لوٹ ایت۔ داں ھما وھدءَ کہ پاکستانی کبزہ ھلاس نہ بیت، اے آمیدگسءَ نشتگیں نامی ئیں راجدوست، ڈیتھ اسکواڈ ٹولیانی لٹ ءُ پل ءُ زلم ءُ زوراکیاں بلوچ راج رک ات نہ کنت، پمیشکہ پہ یک نوک ءُ وشہالیں بانداتےءَ لس مہلوکءَ شعوری بنیادءَ پیسلہ کنگ لوٹ ایت ءُ بلوچ مذاحمتءِ بہر بوگ ءُ آئیءِ مہکم کنگءَ وتی کرد پیلو کنگ لوٹ ایت، چیا کہ راجی آجوئی تہنا بلوچءِ ابدی وشہالیءِ مانزمان بوت کنت۔

نبشتہ ءُ چاپ: بی ایس او آزاد