بولان آپریشن ءُ بلوچ زالبولانی بیگواہی
!باسمائیں بلوچ راج۔۔۔
چوشکہ ما ءُ شما پنجاپی زورآوریں پئوج ءُ آئیءِ زلم ءُ زوراکیانی گْوستانکءَ شر سرپد اِنت۔ اے ھمے پئوج اِنت کہ سال 1971 ءَ وھدے بنگالی راج چرائیءِ جناوری روشت ءُ زوراکیاں تنگ کیت ءُ وتی آجوئیءِ گپءَ کنت گڑا اے زوراکیں پئوجءِ لشکر ماں بنگلادیشءَ یک کُشت ءُ کوش ءُ مردمی ھونریچیءِ چاگردے جوڑ کنت۔ ءُ آ ایش لشکر کشی، مردمی ھونریچی ءُ جناوری زلم ءُ زوراکیاں “آپریشن سرچ لائٹ “ءِ نامءَ دنت کہ اے آپریشنءِ میانءَ یک مزنیں کساسےءَ بنگالی لس مہلوک جتائیں زوراکیانی آماچ کنگ بیت۔ پنجاپی پئوج ھمک آجوئی لوٹوک ءُ سرجمیں بنگالی راجءِ ھلاپءَ یک نہ اوشتوکیں زوراکی یے بندات کنت کہ آئیءِ زلم ءُ زوراکی تاں بنگلادیشءِ آجوئیءَ برجاہ بیت۔ بلئے چوشکہ اے پنجاپی پئوجءِ تب (نفسیات) اِنت کہ وھدے کہ آ وتی ایردستیں کجام راجےءِ آجوئیءِ جہدکارانی ھلاپءَ جنگ کنت گڑا جنگی سرجمیں روایتاں بیھال کنت ءُ زوراکیءِ سرجمیں سیمسراں پروش ایت۔ بلئے چریشیءَ ابید ھم وھدے کہ آ وتی تاکتءَ آجوئی لوٹوکیں مہلوکءِ دیمءَ بے سوب گند ایت گڑا وتی بے سوبیءِ زہراں ھما ایردستیں راجءِ نزور ءُ بزگیں لس مہلوکءِ سرءَ کش ایت۔ ھمے ڈولءَ بنگلادیشءِ گوستانک مئے دیمءَ اِنت کہ پنجاپی پئوج گوں وتی بے سوبیءَ بنگلادیشءِ زالبولانی گومءَ چونیں گیر انسانی روشت پیش داریت، آھانی زالبول گار ءُ بیگواہ کنگ بنت، پئوجی بنجلءَ جنسی گلام جوڑ کنگ بنت ءُ چہ آھاں یک انچیں نسلے پیداک کنگءِ جہد کنگ بیت کہ آ وتءَ بنگالی گُشت کت مہ کن اَنت، بزانکہ آھانی رگاں پنجاپی پئوجءِ ھون بہ تچیت۔
آپریشن سرچ لائٹءَ بِگر داں بنگلادیشءِ آجوئیءَ کِساس دو لک (2,00,000)ءَ بُرز بنگالی زالبولانی گومءَ بدکاری کنگ بیت۔ چہ اے گپءَ ھمے پدّر بیت کہ اے پئوجی لشکرءِ جنگی روشت ءُ تب چے اِنت۔ اے یک پدّریں گپے کہ کجام اوں ایردستیں ڈیھءِ ھندی مردم کہ وھدے زورآوریں راج ءُ تاکتانی دیمءَ سرجہل بہ بنت گڑا ھما زورآوریں تاکت ءُ مہلوک اے کوشستءَ کنت کہ من دومی نزوریں راجانی زبان، دود ءُ ربیدگ ، گوستانک ءُ دومانءَ سرجمءَ ھلاس بہ کن آں، تاکہ آ راج ءِ لس مہلوکءِ تہءَ وتی راجی پجارءِ ھیال سرجمءَ ھلاس بہ بنت۔زورآور ایردستیں راجءِ سرجمیں پجار ءُ سوچءَ ھلاس کنگ لوٹ ایت پرچا کہ آئیءِ جتائیں ھیال ءُ سوچ زورآورءَ مدام ترسءِ آماچ کن انت۔ ھمے عمل کہ زی بنگلالی راجدوستیءِ پروش دیگءِ ھاترءَ کارمرز کنگ بوتگ اَنت، ھمے رنگیں عمل مرچی بلوچستانءِ جتائیں دمگاں چہ پنجاپی پئوجءِ نیمگءَ گوں بلوچ زہگ ءُ زالبولاں کنگ بوگءَ اَنت کہ آئیءِ نوکتریں درور گوستگیں دو ھپتگاں بولانءِ پئوجی آپریشنءَ مزنیں کساسےءَ زالبول ءُ گونڈوانی بیگواہی ءُ ازیت دیگ انت۔
بلوچ راج
چوشکہ شما سرپد اِت چہ گوستگیں دو ھپتگءَ برز اِنت کہ بولانءَ پاکستانی پئوج بلوچءِ چکیچنیءَ آپریشن کنگءَ اِنت۔ پہ بلوچءَ پنجابی پئوجءِ اے آپریشن نوک نہ اَنت۔ اولی رندءَ کہ پنجاپی لشکر بلوچستانءَ کیت، بلوچءِ چکچینی چہ ھما وھدءَ بندات بیت کہ داں مروچیءَ یکشلہ برجاہ اِنت۔ ھمے دابءَ پاکستانی زورگیریءَ بگر داں روچءِ مروچی بلوچ راج وتی آجوئیءِ جہدءَ چہ یک گامے ھم پد کِنز نہ بوتگ۔ اے ھپتاد سالانی جہدءِ میانءَ بلوچءِ جہد بازیں وھداں بگندئے نزور بوتگ، ھاموشیءِ دور ھم اتکگ اَنت، بلئے بلوچءِ راجی آجوئیءِ جہد ھلاس ھچبر نہ بوتگ۔ بلوچ راجی جُنزءَ تاوان دیگ ءُ راجی جہدکاراں پَد کنزگءِ ھاترءَ پاکستانی لشکرءَ وڑ وڑیں پندل ساز اِتگ۔ پہ درور؛ چِست کنگ ءُ کُشگ ءِ پالیسی، دروگیں دیم پہ دیمی میڑاں لس بلوچانی نمیران کنگ، میتگانی میتگاں سوچگ ءُ آس ماندارگ ءُ دگہ۔۔۔ اِنچو زوراکی ءَ پد ھم مرچی بلوچءِ آجوئیءِ جہد گوں مہکمیءَ دیمءَ جُنزگءَ اِنت۔
دومی ما اے ھم گندایں کہ ھر وھدے کہ بلوچءِ آجوئیءِ جُنز شدّت زور ایت، اِستانءِ زوراکیانی تہءَ ھم گیشی آھان کنت۔ھمے ڈولءَ استان بلوچ جہدکاراں چہ آجوئی ءِ زرمبشتءَ دور دارگءِ ھاترءَ آھانی کہولانی زہگ ءُ زالبولاں گِپت ءُ وتی بندیگجاھانی تہءَ بارت ءُ بند کنت۔ اِستانءِ اے رنگیں پالیسی پہ سرجمیں بلوچ راجءَ انت؛ آ لوٹیت کہ سرجمیں بلوچ راج تُرسءِ آماچ بہ بیت ءُ چہ راجی جُنزءَ پَد بہ کِنز ایت۔ پمیشکہ وھدے ما ایش ھپتاد سالی ئیں گْوستانکءَ چارایں تہ گنداِیں کہ بلوچ زالبول ھمک وھدءَ پاکستانی زوراکیءِ آماچ بوتگ اَنت۔ ھمےسوَب اِنت کہ بابو شیروف مری گُشیت کہ 1970 ءِ دہکءَ وھدے کہ بلوچستانءَ پئوجی آپریشن کنگ بیت تہ بلوچ زالبول نا تہنا زندانی کنگ بنت، بگندئے لاھورءِ دمگاں آھانی بولی لگّیت۔ اے آپریشنءَ ھزارانی کساسءَ بلوچ زالبول گار ءُ بیگواہ کنگ ءَ ھوار پنجابءَ بہا کنگ بنت۔ ھمے ڈولءَ سال 2005 ءَ زرینہ مری آوار جنگ بیت ءُ رندءَ ھال کیت کہ گوں آئیءَ زندانءَ بدکاری کنگ بوتگ۔ زرینہ مری داں روچء مرچیءَ پاکستانی بندیگ جاھانی تہءَ بند اِنت۔گوستگیں چیزّے سالانی تہءَ شال، آواران، سبی، کراچی، پنجگور، تربت ءُ بلوچستانءِ جتائیں ھندءُ دمگاں بے کساس بلوچ زالبول آوار جنگ ءُ پئوجی زوراکیانی آماچ کنگ بوتگ۔
شرپداریں بلوچاں
مرچی بلوچستان جنگی جاورانی تہءَ اِنت۔ بلوچ ڈیھءَ پاکستان ءِ پنجاپی لشکر ھر وڑیں زورگیری کنگءَ اِنت۔ بلوچ ورناآنی آوار جنگ ءُ آھانی زانگولیں کُنٹانی دور دیگءَ بگر داں میتگانی میتگاں ماندارگ ءُ راجی سزا ءِ دروشمءَ بلوچ زالبولانی بیگواہی، گوں آھاں بدکاری ءُ آھانی کم شرپ کنگ پاکستانی لشکر ءِ ھر روچی ئیں کار اِنت۔ بلئے مارا جیڑگ لوٹ اِیت کہ اے زوراکی یکشلہ چےءَ بلوچ ءِ ھلاپءَ برجاہ اَنت، اے پہمگ لوٹ اِیت کہ ھما کجام سوب انت کہ پنجاپی پئوج گوں بلوچ مہلوکءَ اے کساسءَ کینگ داریت؟ پرچا کہ بلوچ راج ءُ پنجاپی پئوجءِ میانءِ سیادی زورآور ءُ ایردست ئیگ اِنت۔ ءُ بلوچ راج آئیءِ گلامیءِ ھلاپءَ جنگ کنگءَ انت، پہ آؤکیں پدریچءَ یک آسودگیں بانداتےءِ جہدءَ اِنت۔ بلئے ھمے ڈولءَ کہ پاکستانءِ پئوجی لشکرءَ ماں بنگلادیشءَ پروش وارت، بلوچ ڈیھءَ ھم آئیءِ آکبتءَ بے سوبی نبشتہ اِنت۔ نوں یک زندگیں راجےءِ بستارءَ مارا پہ وتی راجی آجوئی، وتی ازت ءُ شرپ ءُ پہ یک آسودگیں زندمانے ءِگوازینگءِ ھاترءَ ھر یک بلوچےءَ وتی زاتی زند پُشت جنَگی اِنت ءُ بلوچستانءِ آجوئی ءِ جہدءَ وتی بہرءِ زمہ واری پیلو کنگی اَنت۔