بیست ءُ ھپت مارچ یوم سیاہ

!بلوچ ڈیھءِ وارساں

بلوچ ڈیھ زمینی ءُ اسٹریٹجک ارزشتءِ سوْبءَ مدام ڈنی زورآوریں اُرشانی دیمپان بیتگ۔ بلوچاں ھرچ دور ءُ زمانگءَ ڈنی تاکتانی ھلاپءَ ، پہ وتی ڈیھءِ پاہازگءَ ءُ وتی استانءِ آجوئیں بستارءِ برجاہ دارگءِ ھاترءَ گہگیریءِ راہ در چِتگ۔ وھدے کہ انگریز پہ لٹ ءُ پُل ءُ ایردستیءِ نیتءَ کَساں بَر ءِ دمگ ہندوستان، اوگانستان ءُ بلوچستانءِ نیمگءَ آھان اِت اَنت، آ زمانگءَ اے دمگءَ بلوچ ڈیھ یک آجوئیں بستارےءِ واھند اَت۔ وھدے کہ انگریزاں بلوچستانءِ سرءَ اُرش کُت گڑا بلوچستانءِ ھاکم خان محراب خان انگریزءِ ھلاپءَ گہگیری کنانءَ نمیران بوت ءُ بلوچ راجءَ انگریز زورآورانی ھلاپءَ وتی گہگیریءِ جُہدءِ رواج تاں ھما وھدءَ برجاہ داشت کہ انگریزءَ چہ بلوچ ڈیھءَ وتی پاد کش اِت اَنت ءُ بلوچ ڈیھ وتی آجوئیءِ نیمگءَ شت۔ گُڑسرءَ داں 11 اگست1947ءَ بلوچستان سرجمءَ آجو بوت۔ وھدے انگریزاں وتی مکر ءُ پریباں گوں ہندوستان بہر ءُ بانگ کُت ءُ پاکستانءِ وڑیں وتگڑیں استانے جوڑ کُت دانکہ انگلستان سرجمیں ایشیاءَ وتی اسر ءُ دزمانجنیءَ برجاہ داشت بہ کنت۔ ھمے دِرچءَ پاکستان آجو ءُ وتواجہیں استان بلوچستانءِ ایردست کنگءِ ھاترءَ جتائیں پندل سازیت۔ بلوچستانءَ ایردست کنگءَ پیسر بلوچستانءِ پارلیمنٹ دارالعوام ءُ دارالامرا ءَ نشتگیں بلوچ ھُگمران چہ پاکستانءِ اے پندلاں آژنا اِت اَنت، پمیشکا آھاں سیاسی بستارءَ گپ ءُ تران ءُ شوربندی بندات کُت کہ پاکستان اسلامءِ نامءَ بلوچستانءِ سرءَ کبزہ کنگ لوٹ اِیت بلے آ وتی سرزمینءِ آجوئیءَ کُربان کنگءَ ھچبر منگءَ نہ اِت اَنت۔ بلوچ استانءِ ھردوئیں ایوانانی گیشتریں باسکاں گْوشت ”اگاں اسلامءِ نامءِ بنیادءَ شما بلوچستانءَ گوں پاکستانءَ ھوار بوگءِ ھبرءَ کن اِت گڑا دنیاءِ ایدگہ سرجمیں مسلمان ملکاں گوں پاکستانءَ ھوار بوگی انت، پاکستانءَ بلوچ ڈیھءِ دراج ءُ شاھگانیں زِر (ءُ مادنانی) پکار اِنت پمیشکا آ اسلامءِ نامءَ مارا رد دیگ لوٹ اِیت۔“ بلوچ پارلیمنٹءَ پاکستانءَ گوں یکجاہ بوگءِ منگ نامہ نہ من اِت گڑا پاکستانءَ لشکرکشی کنانءَ 27 مارچ1948ءَ پوجی تاکتءِ زورءَ بلوچستانءِ سرءَ اُرش کُت ءُ اے زمینءِ سرءَ کبزہ کُت۔

!بلوچ پُسّگاں

بلوچ مہلوکءَ چہ سری روچاں نوک دیمءَ اتکگیں پاکستانءِ ناروائیں ایردستی نہ من اِتگ ءُ پاکستانی ایردستیءِ ھلاپءَ تچکءَ گہگیری بندات کُتگ کہ داں روچ مرچیگءَ برجاہ اِنت۔ بلوچ راجی آجوئی جُنزءِ پروش دیگءِ ھاترءَ پاکستان چہ وتی کبزہءِ سری روچاں وتی سرجمیں توان ءُ تاکتاں کارمرزگءَ اِنت، بلے چہ ایشیءَ ابید ھم آئیءِ ھمک پندل ءُ زوراکی ھاکاں ھوار بوتگ۔ آجوئی جُہدءِ اے دراج ءُ گرانیں پندءِ میانءَ بلوچ راجی جُہد جتائیں سکی ءُ سوری ءُ بُرزی ءُ جہلیاں گوْزانءَ مرچی اے جاہءَ سر اِنت کہ دنیاءِ تہءَ وتی منارینگءَ سوبین بیتگ۔ پاکستان وتی پوجی تاکتءِ گیشتری بہرءِ کارمرزگءَ ابید بلوچ جنزءِ پروش دیگءَ بے سوب بوتگ، ھمے آسرءَ آ بلوچ چُکچینیءِ پالیسیانی تہءَ ھمک روچءِ بنیادءَ گیشی آرگءَ اِنت۔ پاکستان نہ تہنا بلوچ چکچینیءِ تہءَ گیشی آرگءَ اِنت بگندئے بلوچ سرڈگارءِ سرءَ دیمروئیءِ نامءِ سرءَ بلوچ سرزمینءِ راجی مڈیانی لُٹ ءُ پُلءِ تہءَ ھم گیشی آرگءَ اِنت ءُ چہ جتائیں منصوبہانی بنگیج کنگءَ بلوچءَ اقلیتءِ تہءَ برگءِ کوشستءَ اِنت۔ بلوچ ڈیھءِ واھند ءُ وارسیءِ بستارءَ مارا زورگیرانی کُلیں منصوبہ پوہ بوگی اَنت ءُ پہ بلوچءِ بانداتءِ آکبتءَ یک تچک ءُ سرجمیں پالیسی یے اڈّ دیگ لوٹ اِیت، تاکہ ما دژمنءِ کلیں پندلاں ھاکاں گوں ھوار کُت بہ کن اِیں ءُ چرائیءَ ما راجی گُلامیءِ توکءَ درآتک کت بہ کن اِیں ءُ یک آجو ءُ وتواکیں چاگردےءِ اڈّ دیگءَ سوبین بہ بیں۔

!مڈاھداریں وانوک

پاکستان وتی زورگیریءِ مہکم کنگءِ واستہ بلوچستانءَ دری آباتکاریءَ گیش کنان اِنت۔ بلوچستانءِ جتائیں ھنداں بلوچ راج اقلیتءِ تہءَ مٹ کنگ بوتگ(کہ ایشیءِ تہءَ گیشی آھان اِنت) کہ ایشانی تہءَ مستریں درور شال، حب ءُ کراچی اَنت۔ مرچی آباتکاریءِ اے دْرچ بلوچستانءِ تیاب دپی ھَند ھاسکار گوادر ءُ تربتءَ گیش کنگءِ کوشست کنگ بوگءَ اِنت۔ پاکستانءِ اے ڈولیں ترسناکیں پندلانی بے سوب کنگءِ واستہ بلوچستانءِ تہءَ ساڑی ئیں بلوچ آجوئی لوٹوکیں گل ءُ پارٹیاں وتی ادارہانی تہءَ سنجیدہ ئیں باوستےءِ درکار اِنت کہ چون ءُ چے ڈولءَ زورگیریءِ اے پندل دارگ بہ بنت۔ ءُ وھدءِ لوٹ ھمیش اَنت کہ بلوچ ڈیھءِ پُسّگ ھمے ڈولءَ بلوچ ڈیھءِ آجوئیں بستارءِ دوبر گرگءِ ھاترءَ وتی تپاکیں کاراں نا تہنا یکشلا برجاہ بہ دار انت بگندئے آھانی تہءَ گیشا گیش ترندی بیار اَنت۔ مرچی ئیں وھد ءُ جاور چہ بلوچ راجءَ اے لوٹءَ کن اَنت کہ وتی راجی باندات ءُ ھستمانءِ ھاترءَ وتی سرجمیں زوراں راجی آجوئیءِ جُہدءِ واستہ ھرچ بہ کنت کہ چہ ایشیءَ مئے آؤکیں پدریچ وشہال بہ بیت۔

بلوچ راج 27 مارچءَ یک سیاھیں روچےءِ بستارءَ داریت ءُ گوں پاکستانءَ وتی کینگءِ درنگازیءَ کنت کہ آئیءَ تاکتءِ زورءَ گوں بلوچءِ آجوئی ءُ وتواکی چرائیءَ پل اتگ۔

بلوچ اسٹوڈنس آرگنائزیشن آزاد