بیست و ہفت مارچ کوزہ نا دے

!شرفمند آ بلوچ الس

بلوچستان نا ڈغار، اسٹریٹجک اہمیت نا خواجہ مننگ نا سوب ساندہ پیشن نا جلہوکار آتا گواچی مسنے۔ بلوچ آک ہر دور اٹی پیشن نا تاغت آتا برخلاف تینا ڈغار ءِ رکھانو و تینا ریاست نا آزاتی ءِ برجا تخنگ کن مزاحمت ءِ اول اہمیت تسنو۔ ہرا وخت انگریز آک کوزہ گیری نا نیت اٹ اوغانستان ، بلوچستان و ہندوستان آ مون کننگ ئسر او وخت دا خطہ ٹی بلوچستان اسہ آزات ءُ ریاست اس ئس۔ ہراتم انگریز آک بلوچستان نا زی آ جلہو کریر گڑا بلوچستان نا حکمران خان محراب خان انگریز آتا برخلاف مزاحمت کرسا شہید مس و بلوچ آک کوزہ گیر نا برخلاف مزاحمت نا دود ءِ برجا تخیسہ انگریز آن بلوچستان نا آجوئی اسکان جہد ءِ برجا تخار۔ آخر 11 اگست 1947 نا دے اکن بلوچستان نا آجوئی ءِ مننگ مس۔ ہراتم انگریز تینا شابیت پالیسی تا رد اٹ ہندوستان ءِ بشخ کرے و پاکستان نا وڑ انگا تھیوکریٹک ریاست ءِ وجود اٹ ہیس تاکہ برطانیہ تیوہ ایشیا ٹی تینا زیم ءِ برجا تخنگ کے گڑا ہندا نظر اٹ پاکستان آزات و خودمختار ریاست بلوچستان نا زی آ کوزہ کننگ کن جتا جتا ءُ چم جوڑ کرے۔ بلوچستان نا زی آ کوزہ غان مُست بلوچستان نا پارلیمنٹ دیوانِ خاص و دیوانِ عام اٹ ساڑی باسک آک پاکستان نا دا سازش آن جوان پوہ ئسر ۔ ہندا خاتران اوفک سیاسی بنیات نا زی آ شرہ نا بناء ءِ کریر کہ پاکستانی حکمران آک اسلام نا پن آ بلوچستان آ کوزہ کننگ نا کوشست اٹی ءُ ، ہندن کہ نن ہچ وڑ اٹ تینا ڈغار نا آجوئی ءِ ندر کننگ کن تیار افن۔ بلوچ ریاست نا ہڑتوما ایوان نا گیشتر باسک آک دا درشان کریر کہ “ہراڑے اسکان کہ ہیت اسلام نا پن آ اوار مننگ نا ءِ گڑا جہان نا تیوہ مسلمان ڈیھ تے پاکستان تون اوار کروئی ئس ولے پاکستان ننا ڈغار نا اہمیت و ساحل وسائل ٹی اُست خلوک ءِ و اسلام نا پن ءِ اسہ ازباب اسے نا رد اٹ کاریم اٹ ہتنگ ءِ۔ بلوچ پارلیمنٹ نا بھازیک پاکستان تون الحاق نا سخت برخلافی ءِ کریر گڑا پاکستان فوج کشی کرسا 27 مارچ 1948 انا دے اکن توفک نا زور آ بلوچستان نا زی آ کوزہ کرے۔

!چائندار آ بلوچ ورناک

بلوچ الس بنائی دے تیان دا ناجائز کوزہ ءِ مننگ آن نمن کرے و پاکستانی کوزہ نا برخلاف براہ راست مزاحمت ءِ بناء کرے ہرا اینو اسکان برجا ءِ۔ بلوچ راجی آجوئی نا جہد ءِ ایسر کننگ نا خاتران پاکستان بنائی دے تیان تینا تاغت نا درشانی ءِ کرسا ءِ ولے داڑان پد ہم پاکستان ءِ بلوچستان اٹی بےسہبی تون مون تروئی تمنگ ءِ۔ مزاحمت نا دا بھلا وخت اٹی بلوچ راجی تحریک سختی و سوری تا سفر تیٹ گدرینگسہ اینو ہمو ہند آ سر مسنے کہ بلوچ راجی ویل ءِ جہانی پڑ آ قبول کننگانے۔ پاکستان تینا عسکری تاغت نا بھلو بشخ اس کاریم اٹ ہتنگ آن پد ہم بلوچ تحریک نا لڑ ءِ توننگ ٹی بےسہب مننگان گڈ بلوچ نسل کشی نا پالیسی ٹی دے پہ دے ترندی ہتنگ ءِ۔ پاکستان بیرہ بلوچ نسل کشی ٹی ترندی ہتنگ اف بلکن بلوچ دھرتی نا مڈی تے بےرحمی اٹ لٹ و پل و دیمروی منصوبہ آتا لالیچ ٹی ننا آباتی ءِ اقلیت ٹی مٹ کننگ نا کوشست اٹی ءِ۔ بلوچ دھرتی نا باتی مننگ نا رد اٹ ننے کوزہ گیر نا تیوہ منصوبہ غاتے مون آ تخیسہ راجی بقاء کن اسہ شابیت و سرجم ءُ پالیسی اس تینا کروئی مرے تاکہ نن دشمن نا دا گندہ انگا چم ءِ مِش اٹی اوار کین ہراڑان ننے راجی آجوئی دو برے و اسہ آزات و خودمختار چاگڑد اس جوڑ کننگ ٹی سرسہب مرین۔

!بلوچ الس

پاکستان تینا کوزہ ءِ شابیت تننگ کن آبادکاری نا لڑ ءِ اسہ وار پین بلوچستان نا تہٹی ترندی اٹ تالان کننگ ءِ۔ بلوچستان نا جتا جتا غا علاقہ غاک ہراڑے بلوچ راج ءِ اقلیت ٹی مٹ کننگانے ہرانا پاش مثیل شال، حب چوکی و کراچی ءِ۔ اینو آبادکاری نا دا لڑ ءِ بلوچستان نا دریابی علاقہ خاص وڑ اٹ گوادر ٹی شابیت تننگ نا کوشست مننگ ٹی ءِ۔ پاکستان نا دا وڑ انگا بیم بش کروک خواہشت آتے بےسہب کننگ کن بلوچستان اٹ فعال بلوچ آزاتی پسند پارٹی تے شرہ کروئی تمو کہ امر و ارا وڑ کوزہ گیر نا دا گام تے توننگ کینہ، داڑتون اوار تینا ڈغار نا آزاتی ءِ بحال کننگ کن اواری اٹ کسر گچین کروئی مرو۔ داسا وخت و حالیت آک بلوچ راج آن خواست کیرہ کہ تینا راجی رکھ انا خاتران تیوہ تاغت آتے راجی آجوئی نا جہد اٹی کاریم اٹ ہتیر ہرانا سوب ننا بروکا نسل آک خوشحال مرور و بلوچ راج 27 مارچ ءِ موْن انگا دے انا رد اٹ اڈ ترسا پاکستان تون تینا سوختئی نا درشانی ءِ کیر ہرا دے آ کہ پاکستان تاغت نا زور آ ننا آزاتی ءِ پلاسس۔

جہد گڈیکو فتح اسکان
نوشتہ و شینکار: بلوچ اسٹوڈنٹس آرگنائزیشن آزات