بی ایس او ءِ پنجاہ ءُ پنچُمی بنھشتیءِ روچ

!بلوچ راج

سیاست دنیاءِ راجمانی ردوم ءُ دیمروئیءِ بنزہ زانگ بیت، کہ چہ آئیءِ وسیلہءَ چہ مرچیءَ ہزاراں سال پیش مردم زندمانءِ جتائیں راجمانی پدیانکاں چہ گوزانءَ پیدک اَنت۔ کجام راجمان ءُ مہلوکءِ نیامءِ جوانیں سیاستءِ پہنات مہکم بوتگ انت ءُ انگت داں است انت۔ آ راجمان ءُ مہلوک مرچی وتی ڈیھ ءُ سیمسرانی پاہازگءَ ھوار جتائیں ربیدگی ءُ دودمانی جوانیں زندمانےءِ واھند انت۔ ھمے ڈولءَ اگاں بلوچ ڈیھ ءُ راجمانءَ سیاستءِ گپ بہ بیت گڑا اودءَ بی ایس او بلوچ سیاستءِ روتگانی مہکم کنگءِ بنزہ زانگ بیت۔ بی ایس او یک انچیں دورےءَ دیمءَ کئیت کہ آ وھداں جہانءَ جتائیں راجی آشوبی جنز جنزگءَ بنت۔ چوشکہ چہ وتی جوڑشتءِ سری روچاں داں مروچی پہ بلوچ ورناھانی یکجاہ کنگ ءُ آھانی زنشتی ھیلکاریءَ بلوچ راجمانءَ بی ایس او ءِ یک جتائیں کردے۔ پمیشکہ ما گند ایں کہ بلوچ دژمن ءُ زورآوریں تاکت گوں بی ایس او ءِ جوڑ بوگءَ آئیءِ دیمءَ یا میانءَ جتائیں اڑاندانی دراں پچ کن انت، کہ چہ آئیءِ سببءَ بی ایس او وتی جوڑ بوگءِ چندے سالاں پد پرشت ءُ پروشءِ آماچ بیت۔ بلے چہ بدیں واھگانی جتائیں پندل سازیاں ابید پنجاہ ءُ پنچ سالاں رند مرچی اوں بی ایس او برجائیں بلوچ راجی جہدءَ وتی کردے پیلو کنگءَ انت۔

!بلوچ وانندگاں

بلوچ راجی پجار ءُ استانی دوبر بحالیءِ ھاترءَ گوں پرایمنیءَ بی ایس اوءِ سیاسی سپر برجاہ انت۔ اے وھداں بلوچ چاگرد دژمن ءُ زورآورءِ جتائیں پندلانی دیمپان انت، بلوچ ورناھاں چہ بلوچ جہد ءُ زرمبشتءَ دور دارگءِ ھاترءَ ھمک روچءِ بنیاتءَ وڑ وڑیں پندل سازی کنگ بوگءَ انت، یک نیمگے زورآورءِ وانگی نظام انت کہ اودءَ بلوچ ورنا زہنی بستارءَ جنَگ بوگءَ انت، آیاں انچیں موٹیویشنل یا رومنٹک لٹریچر دیگ بوگءَ انت کہ ورنا وتی زاتی کید ءُ بندءَ چہ در میا انت، بزانکہ آئیءَ کمپارٹ زونءِ وڑیں دامے پہ بلوچ وانندگیں ورناھاں ساز اتگ پمیشکہ آ ذہنی بستارءَ وتی ذاتءَ چہ در اتک کت کنگءَ نہ انت۔ یا کہ زورآورءِ وانگی راھبندءَ آیانی دل ءُ دماگاں انچو جاہ کتگ کہ آھانی وانگ پہ زانت یا کہ پہ نازانتی آھانی جندءِ ڈیھ ءُ مہلوکءِ ھلاپ کارمرز بوگءَ انت۔ چوشکہ گوستگیں چندے ماہانی میانءَ ہزاراں گیش بلوچ ورنا سی ٹی ڈیءِ بہر جوڑ بوتگ انت۔ کہ سی ٹی ڈی مرچی گوں ترندیءَ پاکستانی پئوج(ایپ سی۔ آرمی)ءِ گوما برجائیں بلوچ چکچینیءِ مستریں بہرے جوڑ بوتگ۔
ایشیءَ ابید دومی نیمگءَ بلوچ راجمانءَ راجی سیاست سرءَ سرجمءَ بندش جنگ بوتگ۔ بی ایس او ءَ ھوار بلوچ جہدءِ ایدگہ گل ءُ پارٹیانی ہزاراں باسک ءُ راھشون آوار جنگ ءُ نمیران کنگ بوتگ انت، بے کساس سنگت مرچی چہ دہ دہ سالاں گیش زورآورءِ ٹارچرسلانی تہءَ بندیگ انت ءُ بلوچ راجمانءَ انچیں جاورالے جوڑ کنگ بوتگ کہ کسے شریں سیاستءِ نامءَ گیپت نہ کنت۔ ادءَ تہنا زورآورءِ دزچیرءِ ھما گل ءُ پارٹیاں سیاست کنگءِ موکل است انت کہ آ بلوچ راجی جہدءِ سرجم ھلاپءَ اوشتوک انت ءُ بلوچءِ مادنانی لٹ ءُ پُلءَ گوں زورگیرءَ وڑے نہ وڑے ھمگرنچ انت ءُ گلامیءِ زمزیلاں گیشتر مہکم کنان انت۔ بلوچ ڈیھءِ مال ءُ مڈیانی بیپاریءَ ھوار بلوچ راجی پجار ءُ ربیدگءِ ھلاس کنگ ءُ بلوچ چکچینیءَ پہ زانت یا کہ پہ نازانتی زورآوریں استانءِ بہر جوڑ انت۔ بلئے چہ اے دراھیں زوراکی ءُ پندلاں ابید بلوچ راجی جہدءِ گل ءُ پارٹیانی باسک ءُ راھشونانی مہکمیں توکل ءُ راجی جوش ءُ جوزگاں بلوچ جہد برجاہ داشتگ۔

!بلوچ ورناہاں

دنیاءِ ایردستیں راجانی راجی جہداں ورناہانی یک مزنیں کردے بوتگ ءُ است انت۔ یک گلامیں راجےءِ بستارءَ اے وھدءَ بلوچ ڈیھءَ بلوچ ورناہانی یک ھاسیں کردےءِ پکار انت۔ بلوچ ورناہاں لوٹ ایت کہ آ چہ وتی زاتی زند ءُ عیش ءُ نوشءِ دنیاءَ در بیا انت ءُ سرجمءَ بلوچ جہدءِ بہر جوڑ بہ بنت۔ بلوچ جہدءِ جتائیں پہناتاں وتی بود ءُ وس ءِ ردءَ وتی گڈی وسءَ وتی سرجمیں کردءَ پیلو بہ کن انت۔ راستے کہ اے سپرءِ لوٹ باز ترند ءُ ترسناک انت بلے راجی سما ءُ آشوبی پگرءِ دیمءَ دنیاءِ ھچ پیمیں تاکت داشت نہ کنت۔ ءُ ورناہانی مرچی ئیں مہکمیں جوزگ بلوچ ڈیھ آجوئیءِ دوبر بحالی ءُ راجی بانداتءِ وشھالیءِ مانزمان زانگ بیت۔

شنگ ءُ تالاں: بی ایس او آذاد