ماتی زبانانی ارزشت ءُ راجی زمّہ واری
!مڈاھداریں بلوچاں
زبان راجی پجّارءِ بُنکی اوزارے زانگ بیت ءُ یک راجےءِ گْورءَ چہ یکےءَ گیش زبانءِ بوگ آ راجءِ شاھگانی ءُ ھمسنّتیءِ چیدگ اِنت۔ اے وھدءَ یک زندگیں راجےءِ بستارءَ بلوچءَ پہ وتی ڈیھءِ آجوئی ءُ راجی استانءِ دوبر گرگءِ ھاترءَ آشوبی جنزےءِ بار کوپگءَ اَنت ءُ گام پہ گام جُنزان اِنت۔ زورگیریں پاکستانءِ زوراکی ءُ بلوچءِ چُکچینیءَ ھوار پاکستان چاگردی رنگءَ ھم چہ بنداتءَ ھمے وڑیں پالیسی اڈّ دیان اِنت کہ چرائیءَ بلوچءِ ھمسنّتی ءُ یکمُشتیءَ بہ پروش اِیت، ایشیءِ ھاترءَ بلوچءِ ماتی زُبانانی دیمروئیءِ دیم ءَ اوشتگ آئیءِ ھاسیں پالیسیانی بہر اِنت۔ زورآوریں پاکستانی استان ءُ آئیءِ ادارہ مدام انچیں پالیسی اڈّ دینت کہ ایردستیں راج ءُ مہلوکءِ زُبان دیمروئیءِ جاہءَ گیش پدمنتگیءِ دیمپان بہ بنت، ایشیءِ مستریں درور پہ زبانءِ گہبودیءَ جوڑ بیتگیں سرکاری نام نہادیں اکیڈمک ادارہانی زوال کنگ انت، کہ مرچی چوشیں باز ادارہ ھست انت کہ آ پہ بلوچءِ ماتی زبانانی گہبودیءِ نامءَ بلوچءِ زبانانی روتگاں بُرّان انت۔ زورآور ھمے سرپد بیت کہ چرے عملاں من بلوچ راجی پجّارءَ ولگوج کن آں بلے بلوچ راجءَ دژمنءِ کلیں پندل زانگی انت ءُ وتی ماتی زبان زندگ دارگی انت۔
!رُژناپگریں بلوچ پُسگاں
ماتی زبان ءِ رکینگ ءِ ھاتر ءَ بنگالی نودربرانی زوراکءِ سُھرسریں تیرانی دیم ءَ اوشتگءِ ویل گوں زُبانءَ داں گُڈّی ساہ ءَ مہر ءُ آئی ءِ زندگ دارگ ءِ ھاتر ءَ ھرچ وڈیں زوراکانی زوراکی ءِ دیم ءَ دارگ ءِ گچینی دَرور اِنت۔ ھمے وھداں کہ بنگلادیش پاکستانءِ بہرے بیت، اردو وتگڑیں پاکستانی اِستانءِ راجی زبانءِ بستارءَ اے دمگءِ ایردستیں راجانی سرءَ مُشگ بیت کہ آئیءِ ھلاپءَ ایردستیں راج گہگیریءِ نیمگءَ رو اَنت۔ چوشکہ بنگالیانی گوں وتی زبانءَ اے کِساسءَ مہر دارگءِ بنیاتءَ سال 1999 تپاکیں راجانی گلءِ ادارہ یونیسکو ءِ نیمگءَ ھمے ھاسیں بُندپتری ویلءِ روچ بہ زانکہ 21 فروری 1952ءِ یاتءَ اے روچ ماتی زبانانی میان اُستمانی روچ نامینگ بیت ءُ چہ آئیءَ رند دنیاءِ تہءَ اے روچ گوں وتی ماتی زُباناں مہر ءُ دوستی ءُ زبانانی دیمروئی دیگءِ کول ءُ سوگندءِ روچءِ بستارءَ ماں جہانءِ کُنڈ کُنڈءَ دارگ بیت۔ بلوچءِ ماتی زبانانی پدمنتگیءِ مستریں سوب آئیءِ راجی ایردستی ءُ گلامی انت۔ بلے ایشی مانا ءُ متلب ھچ ڈولءَ ایش نہ اِنت کہ گلامیءِ میانءَ بلوچ پہ وتی ماتی زباناں ھچ کت نہ کنت۔ بلکیں ما گوں یکمُشتی ءَ پاکستان ءُ آئیءِ وتگڈیں ادارہانی پندلاں بے سوب کنانءَ گوں وتی وس ءُ واکءَ بلوچءِ ماتی زُبانانی ھاترءَ باز کار کُت کن اِیں ءُ اے گُشاد گامیں دنیاءِ دیم ءَ وت ءَ یک زندگیں راجےءِ بستارءَ منّارینت کن اِیں۔
!زندگیں بلوچاں
بلوچ ڈیھءِ استیں لوٹ ھمیش انت کہ ما یکجاہ ءُ تپاک بہ بیں، ءُ پہ راجی یکمُشتی ءُ تپاکیءِ ھاترءَ الّمی اِنت کہ ما پہ راجی بہر ءُ بانگءِ ھاترءَ جوڑ کتگیں دژمنءِ ایدگہ زات ءُ زریات، رنگ ءُ نسل، دین ءُ مذہبءَ ھوار ماتی زبانانی نامءَ بہر ءُ بانگءِ پندلاں سرپد بہ بیں۔ ءُ اے بہ زان اِیں کہ بلوچ ءِ دراھیں ماتی زبان بلوچءِ راجی مڈّی اَنت ءُ ایشانی پہریزگ ءُ دیمروئی دیگ بلوچءِ دیمروئی اِنت۔ پہ ما الّم اِنت کہ ما دژمنءِ بکشاتگیں پکر ءُ سوچ ءُ وت ماں وتی کَست ءُ کینگاں یلءَ بہ کن اِیں ءُ بلوچ راجی آجوئیءِ جُنزءِ لوٹ ءُ گُزرانی بنیاتءَ وتی راجی کردءَ پیلو بہ کن ایں۔ چےءَ یک گلامیں راجےءِ بستارءَ زندگ بوگ ءُ پشت کپگءِ یکیں وسیلہ راجی آجوئیءِ جنزءِ برجاہ دارگ ءُ ادارہانی مہکم کنگ انت۔
بلوچ اسٹوڈنس آرگنائزیشن آزاد