رژنءِ کُلوہ

بلوچ بْراھمدگاں!

            سَرسوبیں راجءِ مَنّ ءُ مراد اِش نہ اِنت کہ آھاں ھَزار گنجیں مال ءُ متاہ ھست اِنت نئیکہ ھما اَنت کہ آھاں پراہ ءُ شاھگانیں سرڈگارےپہ وت نامینتگ بلکیں مزنیں راج ھما اَنت کہ آ دنیاءِ بُندپترءَ را مٹ ءُ بدل کنگءِ ھاٹیگ داشتگ۔یا ھما اَنت کہ آھانی یک پدکردےءِ سببءَ سرجمیں جہانءِ سیاسی، راجمانی، روزیگی، ءُ زانشتی پڑءَ مزنیں سان کپتگ۔ انچوکہ ما روسءَ ولادیمیر لیننءِ کردءَ دیست کت کنیں کہ آئیءَ نہ تہنا روسءِ بُندپتر مٹ ءُ بدل کت بلکیں آئیءَ میاں اُستمانی بُندپترءَ یک نوکیں نکش ءُ نشانے ایر کت ءُ ہمے لیننءِ آؤرتگیں آشوب اَت کہ دنیاءِ ایردستاں سکین رَست ءُ آھاں وتی گلامیءِ ھلاپءَ گہگیریءِ راہ گچین کت دانکہ باند ءَ روچ وتی راج ءُ پدریچاں وشھال ءُ پُر آسراتیں زندےءِ واھند بہ کن اَنت۔ ھمے کردارءِ درچءَ ماؤزے تنگءَ بگر  داں لیو شاؤچی سانمند کُت اَنت کہ آھاں ھم وتی سرڈگارءَ پہ جد ءُ جہد کنانءَ جہانءِ بُندپترمٹ ءُ سٹ کت۔ پمیشکہ راجانی مزنیں دودمان، کدیمیں راجدپتر ءُ گنجیں مال ءُ متاہ سربُلندیں راجےءِ سبب جوڑ بوت نہ کن اَنت پرچا کہ کدیماں چہ کدیم تریں دودمان پرشت ءُ پروشءِ آماچ بوتگ اَنت، کوھنءَ چہ کوھن تریں دود ءُ ربیدگ ھلاس بوتگ اَنت، کدیمءَ چہ کدیم تریں راجدپتر مروچی تہنا میوزیمءِ زینتءَ ابید دگہ ھچ کارءِ درءَ نیا اَنت، بلکیں دنیاءَ ھما راج منگ بنت کہ آھانی گورءَ مزن ءُ توانائیں لیکہ، ھیال، جوزگ، جکانسری کشگءِ توان بوتگ گڑا آھاں راجدپتر مٹینتگ گڑا پمیشکہ دنیاءَ گیشاں گیش ھمے بامرد یات کنگ بنت۔ دنیاءِ ھمے ویل ءُ بدلیاں  وتی دیمءَ کنانءَ یک نوکیں ھیال ءُ لیکہاں گوں دیمروئیءِ راہاں در چن اَنت۔

وانندگیں بلوچ راج!

دنیاءِ ھچ عمل ءُ کردوتی گوستگءَ چہ نہ سستگ بلکیں ھر ویلےءِ سبب وتی گوستگیں عملءَ گوں بندوک اِنت۔ انچوکہ دنیاءِ مستریں ویلے کائناتءِ جوڑ بوگءَ ات، ھمے پدکردءَ انسان وجودءَ اتکگ ءُ دنیگہ ھمے ویل ءُ واکیات اَنت کہ دنیاءِ رنگ ءُ دابءَ مٹینگءِ سبب بوگءَ اَنت، بلے اے ھما مردم دار اَنت کہ آھانی گورءَ ویلءِ ارزشت ھست ءُ آئیءَ چہ نپ ءُ سیت چست کنگءِ واک ءُ تاکتءَ دار اَنت۔ اے ردءَ فرانسیسی شہزانت مشل فوکوءِ ھیال انت کہ”چیز انچو وتی گوستءَ گوں ھمگرنچ اَنت وھدے کہ چونیں ویلے پاد بئیت گڑا اشیءِ بنگیج گوستگیں لیکہ ءُ ھیالءِ سببءَ پیداک بیت ءُ اشیءِ سان دگہ ویلے ودی کنت۔” ھمے پیم بلوچءِ ھستیں جُنز وتی گوستگیں ویلءِ سبب اِنت کہ تنی وھدی اشیءِ درچ یکشلءَ برجاہ اِنت ءُ اے داں ھما وھدءَ ھلاس بیت وھدے کہ  تضادءِ جند نیست ءُ نابود بہ بیت۔ اے تضادءِ میانءَ انچیں کرد پیداک بوان بیت کہ آ وتی گوستگیں ویل ءُ کردارنی سببءَ ودی بنت ءُ بانک کریمہ ھما ویل ءُ کردارانی برورد اِنت۔ بزانکہ اگاں شیرزالیں بانڈیءِ ویل پیداک مہ یتکیں گڑا بوت کنت کہ بلوچ راجءِ اندرءَ چوشیں ویلانی پیداک بوگ مزنیں جنجالے بوتگ ات۔۔ اگاں ما بہ گش ایں کہ لمہء وتن بلوچ ربیدگ، بلوچ راجدپترءِ دوبر زندگ کنوک اِنت یا کہ بلوچءِ گوستگیں باجنانی نوک ھیاتی(Renaissance)ءِ اھدسازیں کردار اِنت گڑا اے گپ ھچ پیم رد بوت نہ کنت۔

گلیں راج!

            لمہء وتن یک انچیں وھدےءَ دیمءَ کیت کہ اے وھدءَ زورگیر وتگڑیں مذہبءِ نامءَ بلوچءِ پاک ءُ پلگاریں دود ءُ ربیدگ ءُ بلوچءِ راجمانءَ لگتمال کنانءَ مزنیں ھدےءَ داں سوبین بیت۔ پمیشکہ ما گند ایں کہ بلوچ راجمان وتی گوستءَ انچوش سست ءُ سید بیت کہ آ مردیناں گوں ھوار زندءِ ھچ تک ءُ پہناتءَ ھوریءَ ھمکوپگ بوگءَ گندگءَ نئیت اِنت بلے بانک کریمہءِ سیاستءِ پڑءَ آھگءَ گوں بلوچ سیاستءَ گینسارتے رسیت؛ بلکیں بلوچ سیاست یک مانترےءَ آرگ ءُ سر کنگءِ مستریں ویلءِ پاد آھگءِ سبب بانک کریمہ بیت۔ ھمے بانکءِ جد ءُ جہدءِ سبب اِنت کہ مروچی بلوچ جُنزءِ ھمک سرپءَ مارا زالبولانی مزنیں بہرشت ءُ کردے گندگءَ کیت۔ مروچی مہلوکی سیاستءِ دیمروئی دیوک ھمے زالبول اَنت۔ ھمے پیم بانکءِ سیاستءِ سبب اِنت کہ مروچی سلاھبندیں گلاں سدانی کچءَ زالبول نہ تہنا ھوار اَنت بلکیں شاری، سُمیہ ءُ ماھلءِ دروریں سرمچار جند ندر بوگءَ چک ءُ پد بوگءَ نہ اَنت۔ اے درستیں پدکرد ءُ ویل انچو پہ دیم بوگءَ نہ اَنت بلکیں اشیءِ پشتءَ بانکءِ ھما عظیمیں پیسلہ ات کہ آ بی ایس اوءِ وڑیں آشوبی گلےءِ بہر بوانءَ مسالی کردارے بوت۔ ءُ بلوچ زالبولانی سکین ءُ دلبڈیءِ نہ تہنا مانزمانیں کردارے ات بلکیں لمہء وتن یک اھدسازیں کردارےءِ رنگءَ بلوچ جُنزءَ چہ آئیءِ جسد ھاکءِ میار بوت بلے آئیءِ فلسفہ داں روچء مروچی بلوچ سیاستءَ بگر داں زہرشانی ءُ روانک ءُ اوگامانی دروشمءَ گندگ بیت، برے مراگشانی اندرءَ سہرا بیت، برے زالبولیں کردارانی دروشمءَ دیست کت کنیں۔