زوراکی ئٹ بیگواہ مروک بلوچ آتا دے و بلوچ الس نا زمہ واریک
شرف مند آ راج
دا ڈغار نا زی آ ہر بنی آدم ءِ زند گدریفنگ نا تیوہ حق و اختیار ارے، دنکہ بندغ آجو ودی مسنے و دا ڈغار ءِ تینا باہوٹ جوڑ کرینے و زند گدریفنگ ءِ۔ ہر بندغ اسہ ڈغار ئسے آ ودی مریک و او ڈغار اونا لمہ وطن یا سرڈغار مریک، ہندا زمین مریک ہرا اودے رُدفک و بھلن کیک و گڈیکو وخت ئٹ کہیک گڑا اودے تینا سینہ ٹی جاگہ ہم ایتک۔ بندغ نا ودی مروکا دے آن او ڈغار نا پن آ مریک و پدا زند نا ایسری اسکان ڈغار اونا پجار جوڑ مریک۔ جہان ئٹ منہ ہندن ءُ ڈیہہ و ڈغار مریرہ ہرا تینا تہٹی تینٹ زیات نہاد و بہشت آنبار مریرہ ہرافتیا پیشن نا راج و ڈیہہ تا خنک سخت مریرہ۔ بندغ نا دیہاڑ آ کہ نظر ئس شاغن گڑا خننگ ئٹ بریک کہ بندغ مدام نزور نا زی آ زوراک مسنے و اونا زی آ ظلم و زوراکی کریسہ اونا بہشت آ ڈغار ءِ پُلنگ کن جہد کرینے، و ہمو مخلوق نا مال و مڈی و وسائل آتا لُٹ و پُل ءِ کرینے، دا لُٹ و پلُ تون اوار زوراک نزور نا ڈغار نا زی آ قوضہ کرینے و اونا ڈغار ءِ پُلانے۔ ولے ہر ہمو جاگہ غا کہ زوراکی مسنے اوڑے مزاحمت ہم مسنے و قوضہ نا ایسر مننگ نا سوب ہم غلام آ راج آک مسنو ہرا اواری ئٹ جہد ئتون تفوک مسنو۔ ہندا ڈول ئٹ بلوچستان ہمو سرڈغار ءِ ہراڑا کرن آتیان بد انگا خنک سخت ءُ و اینو زوراکی ئٹ پاکستان کون آ غیر فطری ریاست نا قوضہ ٹی ءِ، ولے بلوچ اونا خلاف سوگوی و ترندی تون مزاحمت کننگ ءِ۔
ظلم ئنا گواچی بلوچ راج
ہر ہمو جاگہ غا کہ زوراکی مریک اونا خلاف جک ءُ ورندی اس تننگ کن راج مزاحمت نا پارہ غا مون کیک، مزاحمت کہ مریک گڑا زوراک نا زوراکی زیات مریک۔ اخس کہ زیات مزاحمت مریک زوراک آ ریاست ظلم و زوراکی تے ہم زیات کیک و اسہ ہندن ءُ وختس بریک کہ زوراک تینٹ ہم تپک کہ او دا ظلم و زوراکی ٹی اخس بائفنگ ءِ انتئے کہ وختس مزاحمت زیات مریک و نزور آ راج نا مخلوق ئٹ زیات چاہنداری و سرپندی ودی مریک گڑا ولدا ہمو زوراک آ ریاست نت و دو خلیک و زوراکی نا تیوہ غا سیم آتیان گدرینگک۔ ہندا مثیل اینو قوضہ گیر آ پاکستان نا ءِ کہ اینو بلوچ راجی جنز ہنداخس زیات و ترند مسنے کہ پاکستان نا لشکر نت و دو خلنگ ءِ ہندنو زوراکی کننگ ءِ کہ بلوچ راجی آجوئی نا جنز پدی ہِننگ نا جاگہ غا سوگو مریسہ ءِ۔ ہندا زوراکی تیٹی اسہ بھلو زوراکی ئس زوراکی نا بیگواہی تا ءِ کہ پاکستانی ریاست دا پالیسی ءِ ہرفینے و بلوچ آجوئی نا جہدکار آتے زوراکی ئٹ دننگ و تہار آ کوٹی تیٹی بندی کننگ ءِ۔ پاکستان بلوچ راجی جنز ءِ پرغنگ کن ہندا پالیسی ءِ ہرفینے و ترندی ئٹ بلوچ جہدکار آتے ٹک کننگ ءِ۔ اینو لکھ آتا کچ ئٹ بلوچ خوانندہ و ورنا، پیر و کماش، استاد و نوشتہ کار آتیتون اوار ایلو تپہ آتا بندغ آک زوراکی ئٹ بیگواہی نا گواچی کننگانو ہرافتیٹی ہزار آتا کچ بندغ آتا جشوک جونک بیابان تیٹی چغل تننگانو و ہزار آتا کچ ئٹ جہدکار آک اینو اسکان ہم تہار آ کوٹی تیٹی بندی ءُ و ناجائز تادی سگنگ ءُ۔
شرف مند آ بلوچ الس
ہشت جون کہ ہراد بلوچ بیگواہ فرزند آتا پن آٹے و دا دے ئکن تیوہ بلوچ راج زوراکی ئٹ بیگواہ مروک جہدکار آتے یاد کیک و اوفتا کڑدار نا ستا ءِ کیک۔ دا دے ءِ بلوچ اسٹوڈنس آرگنائزیشن آزاد اڈ تس انتئیکہ ہندا دے ئکن تنظیم نا بنجاہی کمک کماش (وائس چئیرمین) زاکر مجید زوراکی ئٹ بیگواہ کننگاسس۔ زاکر جان تون اوار گل ئنا بنجاہی کماش زاہد بلوچ، بنجاہی حال رسانی کارگشاد شبیر بلوچ و پین ہزار آتا کچ ئٹ بلوچ جہدکار آک اینو پاکستان نا تہار ئنگا زندان تیٹی ازیت سگنگ ءُ۔ دا ہمو روشن ئنگا مسخت ءِ کہ داڑکن ننا فرزند آک تینا ساہ ءِ ندر کرینو و بھاز آک زندان نا ازیت آتے ہڑدے سگنگ ءُ، ہمو مسخت کہ اوڑان تینے پدی کشنگ نا جاگہ غا کمبر جان تینا بالاد ءِ ڈریل کرفِک ولے دا روشن ئنگا تغ ءِ تینا خن تیان اودیم کپک و رد تروکا خوشی و مفاد آتیان رد تمپ۔
چاہندار آ بلوچ راج
دا ننا راجی چاہنداری و شعور نا طاغت و سوگوی ءِ کہ جہدکار آک چارہ ہم کہ دے ئس خنورے دژمن ہوفتے زوراکی ئٹ بیگواہ کیک و اوفتیتون ناروا و بندغی آن پیشن نا کاریم کیک ولے دافتا چاہنگ آن پد ہم اینو بلوچ نا جہدکار آتا تہٹی کمی نا جاگہ ءِ دے پہ دے زیاتی بننگ ئٹی ءِ۔ دا ہمو رویہ ءِ کہ پرغنگ مفک و دا ہیت آن دژمن ہم است ئٹ سہی ءِ ہندا سوب آن او ہر بلوچ ورنا ءِ ہندن کہ او مون ءِ بڑزا کرے اودے دیک و زندان تا گواچی کیک۔ ہندا سوب آن اینو پاکستانی ریاست بلوچ ءِ زوراکی ئٹ بیگواہ کننگ ءِ، گڑا نن ہم پہہ مرین ننا ہم وار بروئے دے اس زندان ئٹ بندی مرون و سختی تے سگنگ مرون۔ داسا دانا تو جیل دادے کہ یا بلوچ تینا وار کن ہُروک مرے یا مونی مرے و دا نا برخلاف مزاحمت کے۔ دانا تو جیل تنیا پاکستانی ریاست ءِ بلوچ سرڈغار آن کشنگ ءِ، ہندا سوب آن اخس کہ زوو کننگ مریک و زیات کننگ مریک دا اوبا ایسر کننگ مرے۔
خودار آ بلوچ راج
دا دے ہمو گمنام آ جہدکار آتیکن ءِ کہ ہرا ننا راجی آخُبت نا خاطر تینا زند ءِ سودا کریر ولے گلزمین تون دغا کتور۔ ہمو جہدکار آک کہ دے ئٹ سد وار دژمن نا خن تیٹی خن خلیرہ و آجوئی نا ہیت ءِ کیرہ، ہمو جہدکار آک کہ دژمن نا بد ئنگا نیت نا جِک ءُ جواب ایترہ۔ ببو تینا راجی مڷ آتے است آ ہتنگ تون ہوار اوفتا برجا ئنگا جہد و کاروان ءِ مونی دین و اوفتا بارّیم ءِ کوپہ تیان تا سبک کین۔ زندان ئٹ بلوچ مڷ آتا اسہ ساعت ئسے نا ازیت ننا لس زند ئنا سد سختی تیان ہم زیات ءِ و نئے کہ دنو لس سد زند اوفتا اسہ شہادت نا بریبر مننگ کیرہ۔ ہندا سوب آن ننے تینا جہدکار آتا نظریہ ءِ سلام کروئی ءِ کہ تینا فکر و فلسفہ تون اخس مخلص ءُ و ہمت و جذبہ تون ہردے تہار آ کوٹی تیٹی دژمن تون جنگ تننگ ءُ۔ او است جم ءُ کہ او بندی ءُ ولے بلوچ ورنا و مخلوق اوفتا سلوکا کاریم تے تینا کوپہ تیا ارفینو و جہد ءِ گام ئس مونی دننگ ءُ ہندا سوب آن ننے تینا بیگواہ آ مڷ آتا ہرفوکا جہد ءِ تینا کوپہ تیا ہرفوئی تمک و بلوچ راجی آجوئی جہد ءِ سوگو و دا سفر ءِ مزل ئسکان سر کروئی تمک۔ دا دے بلوچ گم و بیگواہ آ مڷ آتا قربانی تے است آ ہتنگ نا دے تون ہوار ننے اوفتا جہد ءِ عملی دروشم ئٹ مونی دننگ نا پیمان کننگ نا دے ءِ۔
زوراکی ئٹ گم و بیگواہ آ بلوچ فرزند آتا قربانی تا مٹ بلوچستان نا آجوئی ءِ۔
چاپ و شینک: سگار پبلیکیشنز: بی ایس او آزاد