پاکستانءِ ٹٹ بندی ءُ گوادرءِ باندات

پہ اِیر دستیں راج ءَ درستاں چہ اَرزشت داریں شئے آئی ءِ زمین اِنت؛ ہما زمین کہ آئی ءَ ورگ دنت ءُ درستاں گیش آئی ءِ ننگ ءَ پہاز اِیت۔  فرانتز فینن

:بلوچ راج
چُشکہ ما دنیاءِ بُندپتر ءَ اردیں وانیں تہ یک چیزے سما بیت کہ ہر ہما جاہ ءَ کہ زُورگیراں لُٹ ءُ کُٹ ءِ وسیلہ ءَ گُلامیں راج وتی زیردست کُتگ اَنت گُڑا اُود ءَ الم ءَ اُلسی زرمبشت ءُ جُنز پاد اتکگ اَنت ءُ گُلامی ءِ سانکلانی پُروش دیگ ءِ ھاتر ءَ وتی جان ندر کُتگ اَنت۔ ہمے ڈول ءَ 1839 ءَ برطانیہ ءِ کبزہ ءَ پیسر ہم بلوچ ڈیھ ءِ سر ءَ دری راج ءُ مُلکانی چم سک بُوتگ اَنت ءُ ڈیھءِ سر ءَ حاکمی کنگ لُوٹ اِتگ۔ بلے بلوچ ڈیھ ءِ مہلوک ءَ ہمک جاور ءَ دری زُورگیرانی ھلاپ ءَ برطانیہ ءَ بِگر داں زُورگیریں پُرتگیزانی ھلاپ ءَ جنگ کُتگ وتی ساہ ءُ جان ندر کُتگ اَنت ءُ وتی زمین پہاز اِتگ۔ مرچی ہمے کُنگریں پُسگانانی سوب ءَ بلوچ راجی پجار رک اِتگ۔ اگاں بلوچ راج پہ بلوچ ڈیھءِ رکینگ ءَ جہد مہ کنت تہ آئی ءِ ھستی جہان ءِ تہ ءَ ھِچ نہ مان اِیت۔ زُورگیریں پاکستان 1948 ءَ بگر داں روچ ء مروچی جِتا جِتائیں وسیلہاں بلوچستان ءِ پجار، دود ءُ ربیدگ، زبان، زر ءُ تیاب ءَ ھوار مال ءُ مڈیاں پُلپانچ کنگ ءَ اِنت ءُ ھمُک روچ ءِ بُنیات ءَ وتی شُوربندیانی تہ ءَ مٹی ءُ بدلی آرگ ءَ اِنت۔ پمیشکہ بلوچ مہلوک ءَ اِشانی دیمپان بُوگ ءِ ھاتر ءَ الم اِنت کہ آ جُنز ءِ بہر بہ بنت ءُ عملی دروشُم ءَ اِشانی دیم ءَ بہ اُوشت اَنت۔ اگاں ھستیں وھد ءَ بلوچ راج زُوگیریں پاکستان ءِ ھلاپ ءَ پاد مئیت تہ آھوکیں وھد ءَ آئی ءِ ھستی گیش گپچل ءِ تہ ءَ بی؛ت۔

:باسمائیں مہلوک
گوادر ءَ ٹٹ بند کنگ اِیوک ءَ گوادر ءِ جیڑہ نہ اِنت بلکیں سرجمیں بلوچ ڈیھءِ جیڑہ اِنت۔ پہ اِیشی ءِ واستہ یکمُشت ءُ یکجاہی وھد ءِ پکار اِنت۔ گوادر ءِ ٹٹ بندی نٗوک نہ اِنت چِد ءُ پیسر ہم گوادر ءِ ٹٹ بندی ءِ شُوربندی پاکستان ءَ دیم ءَ آؤرتگ اَت بلے مہلوکی زرمبشت ءَ بے سُوب کُتگ اَت۔ بلوچءِ زمین، مہلوک، دود ءُ دودمان، زِند ءُ زُبان ایردست کنگ بوتگ اَنت۔ آئیءِ پجارءِ سرءَ پاکستان ءَ وتی پنجگ ایر کرتگ اَنت ءُ بلوچءِ ھستمانءَ ولگوج کنگءَ انت۔ اینچو وھد اِنت بلوچءِ جنزءَ آئیءِ بازیں پندلانی دیم داشتگ بلے زورگیر نوں دگہ پندلےءِ نیمگءَ روگءَ اِنت چوشکہ آ بلوچءِ جندءِ  زمین ءُ شہراں بلوچءَ پہ بند کنگ ءُ بلوچ ءِ سرڈگار ءَ ٹٹ بند کنگ لوٹگ ءَ انت۔ اشیءِ نوکتریں درور بلوچ ڈیھ ھد ءُ بند (سیمسراں) ھوار نوں شہر ءُ میتگاں ٹٹ بندان انت۔ چوشکہ انوگیں گوادرءِ ٹٹءَ کنگءِ پندل اِنت۔ گوادر کہ بلوچستانءِ دلبند اِنت آئیءَ پہ مزناں چہ مستریں پندل سازگءِ جہدءَ کنت دانکہ اودءِ مہلوک تاچینگ بوت بہ کن اَنت انچوشکہ اسرائیلءَ پلستینی چو چہ ویسٹ بینکءَ چہ گلینت اَنت کہ مروچی آ وتی جندءِ شہرءَ درآمدانی پیمءَ اَنت۔ اِشیءَ ابید سامراجی تاکتاں گوادرءِ لُٹ ءُ پُلی پروجیکٹ ٹہینتگ اَنت ءُ گوادرءِ مہلوکءِ جندءِ واستہ زمین تنگ کنگ بوتگ۔ گوادرءِ زِر یک نیمگے سرجمءَ ٹٹ بند اِنت کہ اودءَ لس ماھیگیر ءُ دریاورد پہ ماھیگ گرگءَ شُت نہ کن اَنت، دومی نیمگءَ گوادرءِ شہرءَ ٹٹ کنگ دانکہ  شہرءِ کش ءُ گور ءِ میتگانی مردم اتک مہ کن اَنت۔ اے کُلیں پندل پمیشکہ سازگ بوگءَ انت دانکہ دری مہلوک( پاکستانی ءُ چائنیز) اودءَ آبات کنگ بہ بنت۔ چوناھا گوادرءَ مزنیں زمینے پاکستانی نیویءَ زور وتی قبضہءَ کُتگ ءُ آئیءَ وتی لشکری(فوجی) نپانی کشگءَ پہ کارمردکنگءَ اِنت۔ دُژمنءِ گوستگیں شوربندی یے کہ پنچ لک چینی گوادرءَ آرگ ءُ آبات کنت بیت ءُ ھمیشیءِ ھمبرائیءَ پنچءَ بگر داں دہ لک پنجاپی ھم ھوار اَنت۔ اے کوھنیں شوربندی یے بوتگ بلے بلوچءِ گہگیری ءِ سوبءَ اے شوربندی اوشتءِ آماچ بوتگ ءُ بے سوبیءِ دیمپان بوتگ، بلے پاکستانی استان اے شوربندیءِ سرءَ پدا یکبرے کار کنگ اِنت ءُ کم کمءَ برےسیکورٹیءِ جیڑہءِ سببءَ راہ ءُ دراں بند کنت برے سی پیکءِ دیمروئیءِ بہانہءَ ٹٹ بندیءِ پندلءَ سازگءَ اِنت۔

!شرپداریں راج
مدام دری قبضہ گیرانی سببءَ بلوچ وتی میتگاں چہ لڈینگ بوتگ اَنت یا کہ انچیں شہر ھست اَنت بلوچاں چہ پُلگ بوتگ اَنت پہ درور، کراچی، ڈیرہ غازی خان، راجنپور ءُ تونسہءُ سندھءَ ھوار کتگیں ایدگہ شہر کہ اے بلوچءِ سرڈگار ءُ شہر اَنت بلے مرچی بلوچ اودءَ درامدیں زندےءِ گوازینگءَ لاچار اِنت۔ نوں اے شہراں بلوچ درامد بوتگ ءُ بلوچءَ چہ مارکیٹ ءُ ھر وڑیں واکداری پچ گرگ بوتگ۔ اے سرجم ءَ کم کمءَ بلوچاں وتی زمینءَ چہ تاچینگءِ عملے دانکہ دری مہلوک آرگ ءُ آبات کنگ بہ بیت پمیشکہ مرچی ما گند ایں کہ بلوچ ھمے جاہاں اقلیتءِ ھساب ءَ زند گوازینگ ءَ اَنت۔ دگہ بازیں شہراں درامدانی جتائیں زون اَنت کہ اودءَ بلوچاں نندگ ءُ روگءِ اجازت نیست پہ درور، شالءِ تہءَ چندیں جاہ (کینٹءِ نام داتگ)،خضدارءِ تہءَ، اورماڑہ ءُ تربتءَ ھوار دگہ بازیں جاہاں انچیں زون ٹہینگ بوتگ کہ اودءَ درامد نشتگ ءُ سکون اَنت، آبات اَنت بلے دومی نیمگءَ بلوچ اِنت کہ نہ تہنا بے آسراتی ءُ نہ وانندگیءَ گوں لاچار اِنت بلکیں  پہ گُژن، نادراہی ءُ مرگ روچ روزینی زندءِ نو بہر جوڑ بوتگ اَنت۔ ھمے پئیم گوادرءِ درور مئے دیمءَ انت کہ اودءَ بلوچءِ زمینءَ گوں چی کنگ بوگءَ اِنت۔ نو وَ دری مہلوک انچو زورآور اِنت کہ اودءِ پت ءُ پیرکی آباتکارانی بستار ھچ پشت نہ کپتگ ناں دریاورد وتی پت ءُ پیرکی کار ءُ کسابءَ شت کنت نئیکہ تر ءُ گردےءَ بلوچے اتک کت کنت۔ زورگیرءِ وتی بُرزیں دگ ءُ بندانی سببءَ اگاں گوادرءَ کسانیں ھم ھورے بئیت اِنت گڑا گوادرءِ مہلوکءِ زند ھزابء مرگ اِنت۔

!مڈاھداریں وانوک
بنداتءَ گوادرءَ ٹٹءَ کنگءَ گوں بلوچ کم کمءَ گستا کنگ بنت، آئیءَ چہ ماھیگری پچ گرگ بیت، آئیءَ شہرءِ تہءَ کاروبار پچ گرگ بیت، آئیءَ پہ الاج ءُ وانگ ءُ روزگارےءَ شہرءَ اجازت ھم نہ بیت، آئیءَ چہ گوادرءِ وتواکی پچ گرگ بیت ءُ بلوچ مہلوک وتی پت ءُ پیرکی زمینءَ چہ درامد کنگ بنت۔ اے ھما روچ اِنت کہ بلوچ گوادرءَ لاچار ءُ بے نپیں زِندے گوازینگءَ بنت ءُ بلوچءِ چمانی کلءَ درامد عیش ءُ نوش کنگءَ بنت ءُ گوادرءِ سرءَ ھُکمرانی کنگءَ بنت۔ نوں فیصلہ بلوچ ورنا ءُ مہلوکءِ دستءَ اِنت کہ آ چون اے بلوچ کُشندہ ءُ بلوچ دُژمنیں پندلءِ دیمءَ اوشت ایت ءُ اشی ءَ بے سوب کنت یا ناں؟ اشیءِ بے سوب کنگ ءُ بلوچ ءِسرڈگارءِ رکینگءَ تہنا یک راہے پشت کپتگ، آ راہ گہگیری ءُ یکشلیں جد ءُ جہد اِنت۔  بلوچ ورنا ءُ مہلوکءَ آجوئی جہد کہ مہکم کت ءُ گہگیریءِ راہ گِپت ءُ وتی ڈیھءِ پہازگءَ پہ جہد کت گڑا دنیاءِ ھچ تاکت بلوچءِ پُرگنجیں سرڈگارءَ پچ گپت نہ کنت۔

 
چاپ ءُ شِنگ: سگار پبلی کیشنز بی ایس او آزاد