پاکستانی چانوگریں بلوچ پارلیمانی ٹولی 

!بلوچ راج

چوشکہ شمئے زانتءَ ھست انت کہ بلوچ ڈیھ ڈنی تاکتانی زوریں قبضہءِ تہءَ اِنت، زوراکیں استان پاکستان، ایران ءُ ایدگہ دنیاءِ قبضہ گیریں تاکتاں بلوچ ڈیھ پہ زور گپتگ ءُ قبضہ کتگ۔ بلوچ سرزمینءِ مال ءُ مڈی پہ زور لُٹ ءُ پُل کنگءِ دروشم مارا زمینی رنگءَ اوں گندگءَ کاینت ءُ دومی ھسابءَ زر ءُ پْراھگ(Space) ھم زورگیرءِ لٹ ءُ پُلءِ دیمپان اَنت۔ یک نیمگے بلوچ مہلوک پہ چُنڈے نانءَ چمدار اِنت ءُ دومی نیمگءَ ڈنی تاکت یا پاکستانی مہلوک ءُ ایدگہ زورگیر چہ بلوچ ڈیھءِ مال ءُ مڈیاں سیر ءُ آبات اَنت۔ بلوچ ڈیھءِ مڈی گوں تیزیءَ انچو کشّگ ءُ برگ بوگءَ انت کہ بلوچ لس مہلوکءِ گُمانءَ ڈن اِنت۔ چوشکہ چہ بلوچءِ پُرچکاریں ڈیھءَ درآؤکیں مڈی تیل، گیس، سِنگءِ مرمر، کوبالٹ، یورینیم، سُھر، پیتل، نُگرہ ءُ ایدگہ کلیں مڈی چہ  بلوچستانءَ پُلگ ءُ ڈنءَ برگ بوگءَ اَنت۔ یک نیمگے بلوچءِ مڈیانی لُٹ ءُ پل برجاہ اِنت ءُ دومی نیمگءَ بلوچ راجءِ چکچینی(نسل کشی) ھم یکشلءَ برجاہ اِنت، بزانکہ بلوچ ڈیھءِ مڈیانی لٹ ءُ پُلءَ ھوار بلوچ مردمانی چکچینی ھم بوگءَ اِنت۔ پاکستانءِ ڈولیں نزوریں استانےءَ مرچی بلوچءِ ڈیھ دنیاءِ ایدگہ کسان مزنیں ملکانی گورءَ لیلام کتگ، پمیشکہ دنیاءِ ھرچ تاکتءِ چم بلوچ ڈیھءَ سک انت۔  

!باسمائیں راج

اے سرجمیں زلم ءُ زوراکی ءُ پاکستانی قبضہءِ برجاہ داروک نہ تہنا پنجاپی  ءُ پاکستانی لشکر ءُ استان اَنت، بلکیں اے قبضہءِ برجم دارگءَ پاکستانءَ گوں نام نہادیں بلوچ پارلیمان پرست ھم ھوار انت۔ بلوچ ڈیھءِ مڈی ءُ مہلوکی چکچینیءِ ھاترءَ دژمنءِ ھلاپءَ اے نہ تہنا بے توار اَنت بلکیں ھمپَت ءُ  ھمکار اَنت۔ اے نام نہادیں پارلیمان پرست پارٹیانی تہءَ نیشنل پارٹی،  بلوچستان نیشنل پارٹی، پاکستان پیپلز پارٹی، بلوچستان عوامی پارٹی ءُ ایدگہ کسان ءُ مزنیں سرکاری داشتگیں ٹولی کہ بلوچءِ نامءَ سیاست کنگءَ اَنت گڑا سرجمءَ بلوچءِ چکچینیءَ ھوار اَنت۔ چہ نوک جوڑ بوتگیں استان پاکستانءِ جوڑ بوگءَ بگر دانکہ مرچی اے پارٹی ءُ اِشانی پشپد بلوچ آجوئی جنزءِ ھلاپءَ سرجمءَ دژمنءِ ھمکوپگ بوتگ ءُ ھست انت۔ ھمکءِ مکسد وتی پارٹیءَ را پاکستانی سسٹمءِ واکداریں جاھاں رسینگ دانکہ چرائیءَ وتی بینک بیلنساں مضبوط بہ کن انت، چوشکہ اے پاکستانءِ ھاکمانی سیاستءِ نیچر اِنت کہ انچو جوڑ بوتگ۔ بلے بدبھتیءَ مرچی ھمیش پارلیمانی بلوچ مہلوک نشتگ ءُ بلوچ راجءِ سوداءَ جنگءَ انت، بلوچ لس مہلوکءَ را سالاں سال پاکستانی سسٹمءِ بنیاتءَ وشھالیءِ امیتءِ آسراں ریپینگءَ انت۔ دنیاءِ قابض ءُ مقبوضہءِ چوشیں ھچ تاریخ نیست کہ اودءَ قابض ایردستءَ ایمن ءُ وشھال بہ کنت، گڑا چوش چون بوت کنت کہ پاکستان بلوچستان ءِ مہلوک ءَ را ایمنی ءُ وشھالی بہ دنت؟ بلے بلوچ پارلیمان پرست وتی زاتی مفادانی بنیاتءَ بلوچ لس مہلوکءَ دروگیں آسرانی بنیاتءَ کارمرز کنگ ءُ ٹگگ ءَ اِنت۔ قابضءِ فطرت انت آ ھردیں یک جاھے وتی قبضہءَ کنت گڑا ھما جاہءِ مفادپرستیں مہلوکءَ وتی گوما کنت۔ گڑا چوشیں جاوراں بلوچ لس مہلوکءَ وتی راستیں جھگیرانی نشاندہی کنگی انت ءُ چرے مفادپرستیں مہلوکءَ گستا بوگی انت، ءُ چہ پاکستانءَ ھچ پیمیں امیت دارگی نہ انت۔ 

!گیرتمندیں بلوچاں

پاکستانی اقتدارءَ نندوکیں بلوچ مہلوک مرچی نشتگ ءُ بلوچستانءِ نامءَ سیاست کنگءَ اَنت، بلوچستانءِ مہلوکءَ آھانی بنکی زلورتانی نامءَ رد دیگ ءُ سیاست کنگءَ اَنت۔ پہ درور ھپتاد سال اِنت کہ بلوچ راجءَ ھمے بیانیہءِ سرءَ رد دیگءَ اِنت کہ من ترا مردمی زندگ بوگءِ بنکی آسراتیاں دیاں۔ چوشکہ آپ، دگ، لین ءُ نوکری، نادراھجاہ، وانگجاہ  دئیں، ءُ نوں وَ دگہ نیمونے ساز اتگ ئِے ءُ مہلوکءَ سولر، پہ ڈگارانی بندگءَ ٹکٹری کلاک، چات ءُ بورءِ دیگءِ نامءَ رد دینت۔ سکیں اجبیں ھبرے کہ بلوچ مہلوک ءَ را وتی جند ءِ مڈیانی نامءَ رد دیگ بوگءَ اِنت، بلے اسل گپ اِش اِنت کہ بلوچ وتی مڈیانی واجہ وت اِنت، اِش کئے اَنت کہ پنجاپی لشکرءِ گلامیءَ کن اَنت ءُ بلوچءِ جِندءِ مڈیاں بلوچءَ پہ ھیراتءَ دیگءِ گپءَ کن اَنت۔ اِشانی نامءَ کہ پارلیمانی ٹولی گِر انت اِش، انسانءَ بُنکی آسراتی اِنت نئیکہ دگہ مزنیں آزمانی کار اَنت۔ مرچی اشانی بستار بلوچ راجءِ دیمءَ اِنت کہ اِے چوں راجءِ دیمءَ سیاہ رو ءُ رُسوا اَنت کہ وتی یک سیٹّےءَ پہ گریوگءَ اَنت، ھما سِیٹّ کہ بھا بوتگ انت بلے آھاں بھا گِپت نہ کُتگ انت۔  

!بلوچ سرزمینءِ پُسگاں

بلوچستان بھشت ءُ پُلءِ زمینءِ ھواریءَ مرچی مارکیٹے ھم جوڑ بوتگ کہ ھرچ پارلیمانی ءُ کاسگ چٹیں مردم کیت سیٹّے زیر ایت ءُ پاکستانی لشکرءَ گوں وپاداری ءُ گلامی کنگءِ سوگندءَ وارت ءُ آ نہ تہنا نِشتگ بلوچ ڈیھءِ لُٹ ءُ پُلءَ زورگیرءِ ھم کمکار اَنت بلکیں بلوچءِ چُکچینیءَ اولی سرْپءَ اوشتاتگ اَنت۔ لہتے گپ ءُ راستی تچک کنگ بہ بیت کہ اِے بلوچءِ نامءَ کاینت ءُ مئے مہلوکءَ آھانی وتی جِندءِ راجی مڈیانی نامءَ رد دئینتءُ سالاں سال بلوچءِ درداں گیش کن انت بلے کمیءِ نام نیست۔ ھما مردم کہ پاکستانءِ پارلیمنٹءَ منّ انت آ راجی گدّارے ءُ اشانی زانگ ءُ پاشک کنگ ءُ اشاں نہ منّگ مئے راجی زمہ واری اِنت کہ یک نیمگے بلوچ ورنا ءُ مہلوک وتی ساہاں پہ آجو بلوچستانءَ نْدر کنگءَ اَنت ءُ دومی نیمگءَ اِے پیمیں چاپلوسیں مردم کاینت ءُ بلوچءَ رد دئینت، اِش ہچبر منگی ءُ اوپاری گپے نہ اِنت کہ ما بہ نِند ءُ اشاں بہ چاریں۔ اے دانکہ پاکستانءَ گوں وپادار اَنت بلوچءِ درد گیشتر بنت ءُ بلوچ راجی جُنزءِ اڑاند بنت پمیشکہ اِشانی راستی مئے دیمءَ اِنت ءُ اے سوشل بائیکاٹ کنگی اَنت ءُ داں زلورت بیت سزا ھم دیگی اَنت پرچاکہ راج انچو پہ دیم ایمن نہ بنت ءُ نئیکہ یک ڈیھ یے انچو پہ ھرچیءِ اوپارءَ آجو بیت۔ اِے بلوچ سرزمینءِ دُژمن اَنت، اگاں اشاں گوں نرمی آرگ بہ بیت گُڑا مئے راجی شہیدانی ریتکگیں ھوناں گوں دگا ءُ راجدروہے ءُ  مئے نمیرانیں سرانی وارتگیں سوگند مارا پَہل نہ کن اَنت۔ 

چاپ ءُ شنگکار سگار پبلی کیشنز بی ایس او (آزاد)