پاکستان نا واڑ خلنگ و بلوچ آخبت

غلام ءُ راج ئسیکن کلّان زیات اہمیت تخوکا گڑا اونا ڈغار ءِ، ہمو ڈغار کہ اودے کُننگ کن اِرغ ایتک و کلان زیات دا کہ اونا ننگ ءِ رکھک. فرانز فینن

:بلوچ راج

اگہ نن جہان نا دیہاڑ ءِ خوانن گُڑا اسہ گڑاس سما تمک کہ ہر ہمو جاگہ ءِ کہ ہراڑے قوضہ گیر آک لٹ ءُ پل نا وسیلہ ئٹ غلام ئنگا راج آتے تینا ظلم نا گواچی کرینو گڑا او جاگہ ئٹ الم السی مزاحمت و تحریک آک کاٹم ارفینو و غلامی نا زمزیر آتے پرغنگ کن بندغاک تینا ساہ ءِ ندر کرینو۔ ہندا ڈول 1839 ئٹ برطانیہ نا قوضہ آن مست ہم بلوچ ڈیہہ ئنا زی آ پیشن نا راج و ملک آتا خنک سخت مسنو و دا ڈیہہ ئنا زی آ خواجہی کننگ خوائسنو۔ ولے بلوچ ڈیہہ ئنا باتیک ہر حالیت ئٹ قوضہ گیر آتا برخلاف برطانیہ آن ہلیس زورآک ئنگا پرتگیز آتا برخلاف جنگ کرینو تینا ساہ ءِ ندر کرینو و تینا ڈغار نا رکھ ءِ کرینو۔ اینو ڈیہہ ئنا ہمو تونگر ئنگا چُنا تا سوب آن بلوچ راجی پجار رکھوک ءِ۔ اگہ بلوچ راج تینا بلوچ ڈیہہ ئنا رکھ ئکن جہد کپ گڑا اونا ہستی جہان ئٹ ہچ سلپرو۔ زورآک ئنگا پاکستان 1948 آن الیس اینو دے ئسکان جتا جتا ئنگا وسیلہ آتا کمک ئٹ بلوچستان نا پجار، دود ءُ ربیدہ، بولی، دریاب و ساحل آتون اوار مال و مڈی تے پھلنگ ئٹی ءِ، و ہڑدے ئنا بنداو آ تینا چم و اٹکل تیٹی مٹی و بدلی اتنگ ءِ۔ ہندا سوب آن بلوچ الس کن المی ءِ کہ دافتا مونتس کن تحریک نا بشخ مریر و عملی دروشم ئٹ دافتا مون آ سلیر۔ اگہ ساڑی ئنگا وخت ئٹی بلوچ راج زورآک ئنگا پاکستان نا برخلاف بش متو گڑا بروکا وخت ئٹی اونا ہستی زیات کمبوتی ئٹ مرو۔

:چاہندار آ الس

گوادر ءِ باڑ خلنگ بیرہ گوادر نا ویل اف بلکن تیوہ غا بلوچ ڈیہہ ئنا ویل ءِ۔ داڑکن ہم کوپہ مننگ و اواری وخت ئنا خواست ءِ۔ گوادر ء باڑ خلنگ پوسکنو ہیت اس اف داکان مست ہم گوادر ءِ باڑ خلنگ نا چم پاکستان نا پارہ غان ہتنگانے ولے الس نا مزاحمت اودے بےسہب کرینے۔ بلوچ نا ڈغار، مخلوق، دود و تہذیب، زند و بولی تے قوضہ گیر لتاڑانے۔ اونا پجار آ پاکستان تینا پنجہ ءِ تخانے و بلوچ قوم ءِ بھس کننگ ءِ۔ داخس وخت ءِ بلوچ نا تحریک اونا باز ئنگا مکر و چم آتا مون ءِ تورینے ولے داسا قوضہ گیر اسہ پین مکر ئسینا پارہ غا ہننگ ءِ دنکہ او بلوچ نا جند ئنا ڈغار و شار آتے بلوچ کن بند کنِنگ و بلوچ نا سرڈغار ءِ باڑ خلنگ خواہک۔ دانا پوسکنا مثیل بلوچ ڈیہہ ئنا سیم آتیتون ہوار داسا شار و خلق آتے باڑ خلنگ نائے۔ دنکہ گوادر ءِ باڑ خلنگ داسا نا چم ءِ، گوادر ہرا کہ بلوچستان نا است ئنا بند ءِ اوڑکن بھلو مکر و چم جوڑ کننگ نا جہد ءِ کننگے تاکہ گوادر نا مخلوق ءِ مِڑنگ کننگ کے، ہندنکہ اسرائیل فلسطینی تے امر ویسٹ بینک آن مِڑا کہ اینو او تینا جند ئنا شار ئٹی بدر آتا وڑ ءُ ۔ داکان بیدس سامراجی طاغت آک گوادر کن لٹ ءُ پلی پروجیکٹ ٹہیفینو و گوادر نا ساحل اسہ پارہ غان تیوہ واڑ خلوک ءِ ہراڑے لس ماہیگیر آک مچھی ہلنگ کن ہِننگ کپسہ، ارٹمیکو پارہ غان گوادر نا شار ءِ خلنگ تاکہ شار ئنا ہیب کیب ئٹ ساڑی خلقی بندغاک بننگ کپس۔ دا تیوہ غا چم آک ہندا سوب آن مننگ ءُ تاکہ پیشن نا مخلوق (پاکستانی و چینیک) اوڑے آباد کننگر۔ ایہن تو گوادر ئٹ بھلو ڈغار ئس پاکستان نا نیوی زور ئٹ تینا قوضہ ٹی کرینے و ہرادے او تینا فوجی مفاد آتے پورو کننگ کن کاریم ئٹ ہتنگ ءِ۔ دژمن نا گدرینگوک ئنگا مکر و چم دا ئس کہ پنچ لکھ چینی گوادر ئٹی آباد کننگ مرے و ہندافتون پنچ آن الیس دہ لکھ پنجاپی ہم ہوار کننگ کن ئسر۔ دا متکن ئنگا سازش بنا مس ولے بلوچ نا مزاحمت نا سوب آن دا سازش بے سہبی نا گواچی مس، ولے پاکستانی ریاست دا سازش نا زی آ اسہ وار پدا کاریم کننگ ءِ و مچِٹ مچِٹ آ وختس سیکیورٹی ویل آتا سوب آن کسر تے بند کیک وختس سی پیک نا دیمروئی نا نیمون ئٹ باڑ خلنگ نا مکر و چم آتے کننگ ءِ۔

!شرفدار ئنگا راج 

مدام پیشن نا قوضہ گیر آتا سوب آن بلوچ آک تینا ہنکین آتیان بدر کننگانو، یا کہ ہندنو شار ارے ہرا بلوچ آتیان پھلنگانو مثیل ئسینا، کراچی، ڈیرہ غازی خان، راجنپور و تونسہ و سندھ تون ہوار کننگوکا ایلو شار آک کہ بلوچ نا سرڈغار نا شار آکو ولے اینو بلوچ اوڑے بدر تا ڈول ئٹ بے وسی ٹی زند گدریفنگ ءِ۔ داسا دا شار آتیان بلوچ بدر کننگانے و بلوچ آتیان مارکیٹ و ہر وڑ ئنا خواجہی پھلنگانے۔ دا غٹ بلوچ ءمدان مدان آ تینا ڈغار آن بدر کنِنگ نا عمل ئسے تاکہ پیشن نا مخلوق ہتنگ مرے و آباد کننگے, ہندا سوب آن اینو نن نظر شاغن کہ بلوچ آک ہندا جاگہ تیٹی اقلیت نا حساب ئٹ زند گدریفنگ ءُ۔ ایلو باز ئنگا شار تیٹی درآمد آتیکن جتاو زون ساڑی ءُ ہراڑے بلوچ آتے تولنگ و ہِننگ نا موکل اف مثیل ئسینا، شال ئٹی گڑاس جاگہ(کینٹ)، خضدار ئٹی، اورماڑہ و تربت تون ہوار پین کیہی ہند آتیٹی ہندنو زون جوڑ کننگانے کہ اوڑے درآمد آک تولوک ءُ آسراتی ئٹ آباد ءُ ولے ایلو نیمہ غا بلوچ ءِ کہ نہ بیرہ بےآسراتی و بے خواننگ تون لاچار ءِ بلکہ اوڑکن بینگُنی، ناجوڑی و مرگ تنک دستی زند ئنا بشخ جوڑ مسنو۔ ہندا ڈول ئٹ گوادر نا مثیل ننا مون آٹے ہراڑے بلوچ نا ڈغار تون انت مننگ ءِ۔ داسا وا پیشن نا مخلوق ہندن زوراک ءِ کہ او جاگہ نا باوہ پیرئی جہی آ بندغ آتا بستار ہچ ئس سلتنے، نہ مچھی ہلوکاک تینا باوہ پیرئی آ کاریم تے برجا تخنگ کیرہ نئیکہ ہیب کیب ئنا بلوچ ئس بننگ کیک۔ قوضہ گیر نا تینا جوڑ کروکا بڑز ئنگا لَٹ و بند آتا سوب آن اگہ گوادر ئٹی چنکو پِر ئس ہم کرے گڑا گوادر نا مخلوق نا زند عذاب و مرگ ءِ۔

!بلوچ خوانندہ غاک 

بنا ئٹ گوادر ءِ باڑ خلنگ تون بلوچ ءِ مچٹ مچٹ آ جتا کننگک، اوڑان مچھی ہلنگ نا کاریم پھلنگک، اوڑان شار نا تہٹی کاروبار پھلنگک، اودے علاج، خواننگ و روزگار کن شار ئٹی بننگ نا موکل ہم مفک، اوڑان گوادر نا خواجہی پھلنگک و مخلوق تینا باوہ پیرئی آ ڈغار آن بدر کننگک۔ دا ہمو دے ءِ کہ بلوچ گوادر ئٹی بے وس و پوک ءُ زند ئس گدریفنگ مریک و بلوچ نا خن تا مونا درآمد آک عیش ءُ نوش کرسا مریرہ، و گوادر نا زی آ خواجہی کرسا مریرہ۔ داسا فیصلہ بلوچ ورنا و مخلوق نا دوٹی ءِ کہ او امر بلوچ ءِ کسفوک و بلوچ دژمن نا مکر آتا مونا سلیرہ و اودے بے سہب کیرہ یا آخہ؟ اودے بے سہب کننگ و بلوچ ڈغار ءِ رکھنگ کن بیرہ اسہ کسر اس رہینگانے او کسر مزاحمت و جدوجہد نا کسر ءِ۔ بلوچ ورنا و مخلوق آجوئی نا جہد ءِ سوگہو کریر و مزاحمت نا کسر ءِ ہلیر و تینا ڈیہہ ئنا رکھ ئکن جہد کیر گڑا جہان نا ہچو طاغت ئس بلوچ نا گنج آتیان پُر ئنگا گلزمین ءِ پھلنگ کننگ کپک۔

چھاپ و شینک : سگار پبلیکیشنز بی ایس او آزاد