” دا ڈغار بیرہ ننا ء “

ننا بلوچ راج
نن اندنو ڈغار اسے نا خواجہ اُن کہ داٹی ننا روح ، ننا یاداشت ننا نسل نا ہمو خیُسن خَنی آ مخلوق کہ اوفک تینا کاٹم تے تینا سرزمین کِن ندر کریر تینے چُنڈ چُنڈ کریر ولہ دائسکان مزاحمت کرسہ ءُ تینا ڈغار نا رَکھ اکن سلوکو ہئو اندُن شہیدی آ فلسفہ نا مونا اوفتا خَنک بڑزا مرسا و ننے آن اِننگ ءُ یا ہمو غازیک کہ اینو تینا ڈغار نا پاسداری کن مَش تے تینکن سنگر جوڑ کرینو بولان نا گچین آ پاک آ دیر آن وضو کرسا ڈغاری آ عشق اٹ تینا بلوچستان ء طواف کَننگ ءُ، کوہ ماران، کوہ باتیل ، شورپارود و چلتن و آماچ آتیٹ ننا شہیداتا ہمو زگر آ دترک گواہی ایترہ کہ ” دا ڈغار بیرہ ننا ء ” نن دانا خواجہ اُن داڑکن نن اِچ وڈہ دتر تِننگ ان پدی مفرون۔

ننا ڈغار نا باتیک 
اینو نمے کُل ءِ سما مرے کہ جہاں نا کل ئنا خَنک بلوچستان آ توروک/ سخت ءُ اونا گچین آ سیم و دنگ ئنا سوب آن ، اینو اگہ غیر ئس ننا زِی آ قوضہ ءِ اوہم اندا سوب آن کہ دا ڈغار نا شیف و زی آ کل قیمتی آ گڑاک ساڑی ء ۔ اندن مہالو نا قوضہ گیر آک بسونو بلوچستان آ ولہ مدامی اوفتو مزاحمت کَننگ آن ءِ ولہ ڈغار ءِ اوفتا حوالہ کَتہ نو دُنکہ حمل جیئند مرے، نورامینگل مرے، شہید میر علی دوست مرے یا خان مہراب اونا سنگتاک مریر کہ او کل تینے ندر کریر, اینو ساڑی آ وخت اٹ ہم ننا بلوچ نا مزاحمت برجا ءِ او تینا ڈغار نا رکھ اکن مزاحمت کننگ ءِ ننا سرمچار و جہد کار آک اینو ہم تینا اندا خیسن آ ڈغار کن اینو ہم سلوکو جنگ کرسہ ءِ مون ترسہ ءِ ، تینا کل ذات ء اِلار بیرہ بلوچ و بلوچستان نا آجوئی کن پارہ کہ ” دا ڈغار بیرہ ننا ء “

ننا شہید آک ننا نسل نا ضامن ءُ 
اینو نن تینا ڈغار و تینا شہیداتا کاٹُم تے آ فخر کیمبو کہ او ننا ڈغار نا پاسداری کن ندر مسُر ، ننا اینو نا شہیداتا دے ننا ڈغار نا پچار ءِ ، شہید آک ننا بروکا نسل آتا کسر شون آکو ، اندا شہیداتا دتر تے آن بروکا وخت ئنا بلوچ قوم تینکن کسر اَلیسہ اینو روان ءِ ارافتا تُغ ء ننا شہید آک خَنیسہ تینے قربان کریر ، شہیدآک ننا ڈغار نا ہمو مَش کو ارا ساندہ سلوکو اینو ننا بلوچ قوم تینا شہیداتا کاٹم تے آ ناز و فخر کیر ہمو شیہداتا دترک ننا بروکا ڈغار ء آجو کَننگ نا ضامن ءُ او تینا باسُن آ دتر تون پاریرہ کہ ” دا ڈغار بیرہ ننا ء”

بلوچستان نا خواجہ غاک ،ننا بلوچ قوم 
ننا بلوچ قوم اینو نن تینے تینا ڈغار نا رکھ کن تینا شہیداتا فلسفہ و کسر تے اَلین ہموتا رند آتے تینکن خُڑدہ کرسا گام خلینَ اگہ نن اینو ہمو شیہداتا دتر تون انصاف کتون گڑا ہمو شیہدا آتا دترک ننے آ لعنت کرور اگہ نن اینو مہراب ، کریمہ، استاد اسلم ، کمبر چاکر ، مجید، فتح و کل شیہد آتون انصاف کتون گڑا اوفک ننے آ قبر آن لعنت کرور۔ اگہ بلوچ قوم تینا آجوئی نا کسر نا چَپ مَس تینا ڈغار نا رکھ اکن بَش متو گڑا او تینا ہمو یاداشت ء تینا روح ء تینا پچار و دود و ربیدگ آتے ہم اُست آن درو او تینے پو ہم مفرو کہ نن دیر اُن۔
ببو ہمو شہیداتے تینکن کسر شون کیمبو و پامبو ” دا ڈغار بیرہ ننا ء “