آزاد بلوچ ریاست بلوچ نا خوشحالی نا ضامنءِ
19 July 2017
ارا قوم آک قوضہ گیر نا خلاف جدوجہد کرسٹ تینا آزادی الکونو۔امو قوماک اینو نا دے نہ صرف معاشی حوالہ ٹی تینے سوگو کننگ ٹی لگانو بلکن سائنس، دفاع و ایلو شعبہ غاتیٹی ام جوانی وڑاٹ کامیابی الننگ ٹی اُو۔دنیا نا ارا ملک آک اراڑے مخلوق آزادی خوشحال و ایمنی نا زند گدریفسٹءِ امو جاگہ نا اُلس باز کبینا قربانی تان پد دا خوشحالی الکونو۔فطرت نا دا قانونِ کہ ارا وخت اسکان قوماک تینا آزادی کن، ایمنی کن، تینا بروکا وختے سوگو کننگ کن جدوجہد کپہ سا گُڑا ہچو طاقت ئس اوفتا خرابنگا حالت بدل کننگ کپک۔
معزز بلوچ اُلس۔۔۔
اینو بلوچ قوم تینا شناخت نا جنگ کننگ ٹیءِ دا جدوجہد نا آخری مقصد اسے اندنو معاشرہ ئس جوڈ کننگ نائے اراڈے مخلوق معاشی وڑٹ کسنا محتاج مف اراڑے ہچو طاقت ئس بلوچ اُلس نا حق پلننگ کننگ کپ۔آزادی نا دا جنگ نا مسخت کہ بلوچ اُلس اسے اندنو ریاست ئس تننگ کہ اراڑے او زندنا غٹ شعبہ غاتیٹی ترقی کے۔اینو بلوچ اُلس اگہ تعلیمی حوالہ ٹی پدی گُڑا اونا سَوب صرف قومی غلامیءِ انتسیکن اَسے غلام قوم دا اختیار اف کہ او تینا خاطر کن تعلیمی پالیسی جوڑ کے۔بلوچستان نا 80 فیصد عوام غریبی نا زند گدریفسٹے دا غریبی نا سوب بلوچ قوم نا غلامی ءِ۔بلوچستان نا وڑنگا اہم و قدرت نا وسائل آتن پُر دا خطہ نا اُلسے اینو پاکستان دا جاگہ غا سَر کرینے کہ او اِرا وختنا اِرغ کن پریشان ءُ۔بلوچستان نا بروکا وختے تارمئی تخنگ کن تعلیمی نظامءِ پاکستان ڈاکٹر مالک نا وڑنگا علاقائی گماشتہ غاتون اوار مرسٹ تیوی بربادی نا نیمہ غا درے اَرانا سوب آن اینو بلوچستان ٹی 70 فیصد چناک اسکول آتن پیشن ءُ۔بلوچ قوم کن واگو نا خڑینک شولسٹ ڈاکٹر مالک نا نیشنل پارٹی، جماعت اسلامی تون اوار ایلو پارلیمانی پارٹی تا دورِ حکومت ٹی دَرزن نا کچ اسکول آک فوج نا قوضہ ٹی انار ہزار ہا گھوسٹ اسکول پاش مَسُر۔دا مثال آتن دا اندازہ خلننگ مشکل اف کہ پاکستانی ریاست تون اَوار مرسٹ تینا حق پلننگ نا کوشست کروکا پارٹیک صرف اُلس دھوکہ تننگو دا پارٹیک تینا دا عمل آتیان نہ صرف ریاست تون اُوار تینا وفاداری ثابت کرسٹ ءُ بلکن بلوچ قومی آزادی نا تحریک ءُ شہید آتا قربانی تے نقصان تننگ نا ام کوشست کننگو۔
بلوچ قومے اینو دا ایت منوئی تمک کہ پاکستان نا سیاست کروکا پارٹیک بلوچ اُلس نا خیر خواہ اَفس اندا پارٹیک باز کم قیمت اٹ بلوچستان نا سودائے خلکنو اندا ہی پارٹی تا نمائندہ غاک بلوچستان نا ساحل ءِ دشمن نا حوالہ کرسٹ ءُ۔سیندک و ریکوڈک نا وسائل آتے باز کم قیمت آ بہا کننگو۔ دا بلوچ قوم نا اجتماعی ذمہ واری جوڑ مریک کہ او تینا آزادی کن دشمن نا خلاف ہر محاز ٹی بیدار مرے آ زادی نا دا جدوجہد ٹی بلوچ اُلس نا ضرورتے انتسیکن اُلس نا تیوی شامل مننگ بلوچ قومی آزادی نا تحریکءِ آخوبت اِسکان سَر کننگ کیک۔بی ایس او آزادءِ یقین کہ بلوچ اُلس دشمن نا خلاف اسے جاہ مرسٹ آزادی نا جدوجہد ٹی شامل مریک۔
دا ننا ایمان ءِ کہ فتح ہر حال ٹی بلوچ اُلس نا مریک