آشوبی سیاست ءُ گیر آشوبی اِیں عمل
29 April 2021
جہدءِ سرا بیسہ داروکیں سنگتاں۔۔۔۔
دنیاءِ تہا ایردستیں راجاں بگر تاں آزات ءُ وتواکیں راجاں دَر بیا کجا ھم سیاستءِ تہا سنجیدگیءِ عمل نہ بوت یا کہ آشوبی پگر ءُ سوچ ءُ سیاسی عمل ءِ مکسد راجی پائیدگانی ھاترا نہ بوت انت تاں اودءِ بووکیں سیاست کدی ھم یک راجےءَ را شریں بانداتے دات کت نہ کنت۔ گیر سطحی عمل وھدءِ ھسابءَ بگندئے پہ مپاد پرستیں ٹولیءَ پائیدگ مند بوت بہ کن اَنت، بلئے اے ڈولیں عمل یک راجےءِ توجیل سازیءَ کت نہ کن اَنت۔ راجی جنزانی تہا گیشتر چوش بیت کہ اگاں کجام اوں آشوبی جھدےءِ تہا آشوبی رھشون نہ بوگءِ ھسابءَ بوت ءُ آشوبی کارگلانی(ادارہانی) جاہءَ فرد جنزءِ سروک بوت اَنت گڑا اودءَ راجی جھد ھمے چندے فردانی بئیپار جوڑ بیت کہ آئیءَ چہ آ وتی بئیپاری یے ٹہین اَنت۔ دنیاءِ اے نوکیں دورءِ جاورانی تہا آشوبی جنز گھتریں شوربندی ءُ مھکمیں سیاسی کِرد رھبند ءَ چہ ابید سوبمندیءِ نیمگءَ گام جت نہ کنت۔ آشوبی جھدءَ گوں ھواریں ھمک جہدکارءَ ھمک وھداں اے جیڑگ لوٹ اِیت کہ آ ھما جنزءَ کہ ھوار بوتگ آ بہ جیڑ ایت کہ آ پرچیءَ ھوار بوتگ۔؟ ءُ آئیءِ جھد کنگءِ مول ءُ مراد چے اَنت۔؟ یک آشوبی ورکرےءَ ھچ وھدانی تہا چم بند کنگ ءُ ھرچ کارےءِ تہا گون کپگی نہ اِنت بگندئے آشوبی کَس ءَ را لوٹ ایت کہ ھمک وھد آئیءِ پکر ، سوچ ،لیکہ ءُ پیسلہ تچک بہ بنت۔ سیاست وھدے کہ مہلوکءِ پائیدگ ، راجی لوٹ ءُ آشوبی پکر ءُ ھیالانی بنیاتءَ کنگ بوت گڑا اودءَ ھچ کسےءِ زاتی پائیدگ ، کَست ءُ کینگ ، دوستی نا دوستی ، ہیرو ازم ءُ دگہ زاتی سوچ ءُ پکر وت پشت نہ کپ اَنت۔ آشوبی جہدءِ تہا یک فردےءِ کار تہنا ایش بیت کہ آ اجتماعی مراگشءِ تہا وتی کردءَ پیلو بہ کنت۔ یک آشوبی جہدکارےءَ کجام ھم گلےءِ ھوار بوگءَ پد وتی دراھیں واک (اختیار) گلءِ دستءَ دیگی اَنت۔ گلءِ بنیاتی ءُ سیاسی مانا ھم ھمیش اِنت ، ھم پکریں باسکانی ھواریں مچی ھم ھمے ڈولءَ گل ءِ دروشمءَ ٹہ انت۔ اے پکر ءُ سوچاں چہ ابید کجام اوں کسے بوت کنت سوبمندیں ءُ جوانیں مردمے جوڑ بہ بیت بلئے آ یک آشوبی جھدکارے ھچ وھداں جوڑ بوت کت نہ کنت۔
آشوبی عملءِ سرا بیسہ داروکیں سنگتاں ۔۔۔۔
آشوبی جنزءِ بہر جوڑ بوگءَ چہ پد مئے ھرچ کارے جتا یک ارزشتے دار اِیت۔ یک آشوبی جہدکارےءَ یکبرے اے ھبرءِ سرپدی بہ بیت کہ آشوبی عمل ءِ جند چی یے۔ ؟ تہنا وتی زندءَ چہ سرگوزگءِ نام آشوبی پھتگی اِنت؟ تہنا وتی ھونءِ ریچگ آشوبی لوٹانی سرجم کنگءِ نام اِنت؟ یا کہ جہدءِ فلسفہ اے چیزاں چہ باز بالا اِنت؟ ھمے سوچ کہ یک مردمے اے ھاترا کربانی بہ دنت کہ باندا روچ مہلوک آئیءِ ستا ءُ توسیپءَ بہ کن انت، ایش سوچ وتی تہا وت یک لب ءُ لالچے ، ایشیءَ را کربانی دیگ نہ گش اَنت ، بگندئے کربانی ءِ سوچ ایشیءَ چہ باز دیمءَ اِنت۔ یک آشوبی جہد کارےءَ وتی سوچ انچو جوڑ کنگی اِنت کہ آئیءِ دلءِ تہا آئیءِ زاتءِ واستہ ھچ پشت مہ کپ ایت بگندئے آئیءِ ھرچ عمل جہدءِ لوٹانی ردءَ بہ بنت۔ تاں ھما وھدءَ کہ یک جہدکارے وتءَ گلءِ لوٹ ءُ گزرانی پابند مہ کنت تاں آ جہدءَ را پائیدگ دات کت نہ کنت۔ مرچی ایں وھدءِ آشوبی جہدکارءَ اے گپ شر سرپد بوگی اِنت کہ جنزءِ سوبمندی ءُ بے سوبی ءِ دار ءُ مدار گوں گلاں بندوک اَنت۔
مرچی دنیاءِ تہا نوکیں باریگءِ زورگیر ءُ زورگیرانی نظام باز مھکم بوتگ اَنت۔ زورگیر چوشکہ چہ مردم گری(انسانیت)ءَ زبھر بنت۔ بلئےآھانی دیم پہ دیمیءَ جہدکار نیکیں جزبہ آنی گوما مردم گریءِ رکھ (بقاء) ءِ ھاترا جہد کن انت۔ راست گوشیءِ عمل زورگیرءِ ھلاپءَ یک با مکسدیں جہدےءَ را سوبمندیءَ گوں ھمگرنچ کنت ایں، وھدے کہ یک راجی جنزےءِ رھشون راجی جنزءَ شوربندی آں چہ ابید تہنا جزباتانی بنیاتءَ دیمءَ برگءِ جہد بہ کن انت تاں اے عمل وت آشوبءِ ھلاپ اِنت۔ اے وھدءَ دنیاءِ زورگیریں ریاست سک باز مھکم ءُ تپاک بوتگ اَنت۔ آھاں گوں مکابلہ کنگءِ ھاترا نوکیں ڈولءِ شور بندی ءُ پروگرامءِ درکار اِنت۔ مرچی مارا اے سرپد بوگی اِنت کہ ما یک ٹولی یے ءَ گوں مڑگءَ نہ اِنت بگندئے یک مھکمیں تاکتےءَ گوں جنگءَ اِنت کہ آئیءِ گورا جنگی تاکتءَ ابید بلوچ جنزءِ پروش دیگءِ ھاترا جتائیں شکلانی شوربندی ھم ھست اَنت، درستاں چہ ارزشتدارتریں گپ ایش اِنت کہ آئیءِ گورا مھکمیں ادارہ ھست اَنت۔ یک اے ڈولیں مشینریءِ گوما مکابلہ کنگ تہنا جزباتاں گوں بوت نہ کنت۔ یک آشوبی جہدکارےءِ ھرچ عملءَ را آئیءِ گلءِ رھشونانی پیسلہانی بنیاتءَ بوگی اِنت ءُ گلءِ سروکانی ھرچ پیسلہ گلءِ گیشیں جہدکارانی سوچءِ بنیاتءَ بہ بیت ، یک آشوبی گلےءِ رھشونانءَ ھمک سھتاں اے ھیال گور بہ بیت کہ آھاں جنزءِ رھشونی ءِ زمہ واری وتی کوپگاں زرتگ اَنت ، آھانی کجام اوں نزوری آشوبی مراگشءَ تاوان بار کنت۔
راجی جنزءِ ھاترا وتا ببا دیوکیں آشوبی جہدکاراں۔۔۔
بہ ھیسیتءِ راجی جہدکار مارا ھمک وھد ءَ اے پکر ءُ سوچءِ تہا بوگی اِنت کہ یک راجےءِ وشیں بانداتےءِ بار مئے کوپگاں اَنت۔ مارا ھرچ وھدءَ چہ ھما عمل ءُ کاراں دور بوگ لوٹ ایت کہ آ کاراں چہ مئے گلءِ مکسد ءُ راجی پائیدگانءَ تاوان بہ رس ایت، بہ ھسیتءِ یک آشوبی یے مارا ھرچ وھدءَ وت نگدی (خود تنقیدی) ءِ عمل دیمءَ آرگی انت۔ جیڑگی انت کہ کجام جاگہءَ منی نز انت کہ من آ نزوریاں در کت کناں، تاں ھما وھدءَ کہ ما وتی سرا وت نگد نہ کن ایں گڑا ما وتی پروگرام ءَ دیمروئیءِ نیمگءَ برت نہ کن ایں۔ یک آشوبی یےءَ را وتی جند ءُ وتی گلءِ ھرچ کسان تاں مزنیں عملانی سرا نگدکاری کنگ لوٹ ایت ۔ آئیءَ ھچ پیمیں بے پائیدگیں عمل ءُ گپ ءُ گالانی بہر بوگی نہ اِنت کہ آھاں چہ آئیءِ وھد زوال بہ بیت، تا کہ یک جہدکارے ترندیں آشوبی کرد رھبندانی پابند مہ بیت تا آ پہ جنزءَ یک جوانیں جہدکارے جوڑ بوت نہ کنت ، گلءِ باسک ءُ رھدربرانی تہا اے پکر ھرچ وھداں یک پیم بہ بیت کہ ھر دوئیں آشوبی عملءِ بہر اَنت، اگاں کجام اوں وھدےءَ گلءِ رھدربراں چہ انچیں عملے کنگ بوت کہ آ عمل آشوبی رھبندانی ھلاپءَ بوت یا کہ گلءَ تاوان دیگءِ سوب جوڑ بوت گڑا گلءِ پلیٹ پارمءَ چہ ترندیءَ گوں آ گرگ ءُ ایر جنگ بہ بیت۔ یک آشوبی ءَ را المی انت کہ آ نگدکاریءَ چہ ھچ ڈولءَ پشت مہ جنت ءُ ھر وھدءَ نگدکاریءِ پائیدگ کلاں سرپد بوگی اَنت ، دانکہ اگاں کسے یکبرے یک ردی یے کنت تاں ھما ردیءَ دوبر پدا مہ کنت۔ یک آشوبی جہدکارےءِ ھیسیتءَ مارا وتارا وت یک مہکمیں کرد رھبندےءِ واستہ چڑکہ ءُ شیوار بوگی انت۔