!استیں جاوراں بلوچ نودربرانی زمہ واری

!بلوچ نودربراں

بلوچستانءِ استیں جاورانی تہءَ بلوچ نودربر چے پیمیں زوراکیانی آماچ اَنت؟ اے گپءَ ابیدئے بلوچ نودربراں دگہ کس سرجم سرپد بوت نہ کنت۔ پاکستانءِ “کالونیل تشدد”ءَ بلوچ نودربر   یک “زہنی صدمہ” یےءِ تہءَ چگل داتگ اَنت۔ وتی جندءِ گِساں بگر تاں وانگجاھاں ھچ چوشیں جاہ نیست کہ اودءَ بلوچ نودربر وتی زندءَ رکینت کت بہ کن انت۔ آ ھرچ جاہ پاکستانءِ کالونیل تشدد ءِ دیمپانیءَ کنگءَ اَنت۔ مروچگیں بلوچستانءِ جاور چو اے ڈولءَ اَنت کہ اگاں یک ورنایے کہ آئیءِ اُمر شانزدہ سال اِنت گڑا آ وتی لوگءَ نشت کت نہ کنت، پہ آئیءَ الم بیت کہ آ پہ وتی زندءِ رکینگءَ چہ وتی میتگءَ در بہ کپ ایت ءُ دومی مزنیں شہرانی نیمگ ءَ بہ رؤت، بگندئے اودءَ آئی ءِ زند رَک اِت بہ کنت  بلئے نوں ما ھمے گندیں کہ اسلام آباد ءِ ڈولیں مزنیں شہرانی مزن شہدربرجاھانی تہءَ ھم  آھانءَ تہنا “بلوچ”ءِ نامءِ سرءَ ترسینگ ءُ گار ءُ بیگواہ کنگ ءُ لٹ ءُ کنگ بوگءَ اَنت۔ پاکستان اے گپءَ چارگءَ نہ اِنت کہ کجام بلوچ نودربر سیاسی انت ءُ کجام گیر سیاسی انت، کجام بلوچ نودربر گوں سیاسی گلاں سیادی دار اَنت ءُ کجام نہ دار اَنت ،آ تہنا “بلوچ” کنگ ءُ نشانگ کنگ ءَ اِنت ءُ “بلوچ” کنت ءُ نشانگ کنت۔

! سرپدیں بلوچ نودربراں

اے وھدءَ شُما چے پیمیں جاورانی دیپمان ات، اے جاورانی سیادی گوں کالونیل ازمءَ اِنت۔ پاکستان ءَ ھوار دنیا ءِ ھرچ کالونیل تاکتے کہ گْوستگ آئیءِ رویہ گوں وتی کالونیءَ ھمے وڑ  بوتگ ، پرچہ کہ کالونیل ازمءِ بنیات گوں زُلم ءُ زوراکیءَ انت۔ اے گپءَ ما ءُ شما درست زانیں کہ بلوچ نودربر تہنا وتی “بلوچ پجار” ءِ سر ءَ گار ءُ بیگواہ کنگ بوگءَ اَنت۔ نودربرانی سیاسی بنیات ءَ گار ءُ بیگواہ کنگ جتائیں جیڑہے بلئےھمے زوتاں گیشتر نودربر کہ آوار جنگ ءُ بیگواہ کنگ بوتگ انت یا بوگءَ انت ایشانی تہ ءَ یک مزنیں کساسے ءَ ھما نودربر ھوار اَنت کہ آ پاکستان ءِ سول سروس بزانکہ بیوکریسی ءِ چکاسءِ تیاری کنگ ءَ بوتگ اَنت ءُ مزنیں نودربرےءَ ایم فِل کُتگ ءُ پاکستان ءِ جتائیں مزن شہدربرجاھاں لیکچرارشپ ءِ تیاری ءَ بوتگ اَنت ۔ چہ ادااے گپ تچک بیت کہ پاکستان اے گپ ءَ نہ چاریت کہ کجام بلوچ نودربر سیاسی اِنت ءُ کجام گیر سیاسی، آ  تہنا بلوچ کنت ءُ گار ءُ بیگواہ کنت۔ کالونیل تاکتانی مدام کوشست ھمیش اِنت کہ آ وتی کالونی ءَ چے پیمءَ وتی تُرس ءُ بیم ءَ برجاہ بہ داریت۔ ما گندیں کہ پاکستانءِ رویہ گوں بلوچ مہلوکءَ مدام ھمیش انت۔تہنا ھنوں گْوستگیں دہ روچانی تہءَ چہ بلوچستان ، کراچی ءُپنجاب ءِ وانگجاھاں سدانی کچءَ بلوچ نودربر گار ءُ بیگواہ کنگ بوتگ انت ، لہتیں چہ لٹ ءُ کٹءَ پد یلا کنگ بوتگ ءُ بازیں انگت گار اَنت ۔ اے ھمے عمل ءِ بہر اِنت کہ یک زورآورےءِ بستارءَ پاکستان بلوچستان ءِ تہ ءَ وتی تُرس ءُ بیمءَ برجاہ دارگ لوٹ ایت۔ پرے تُرس ءُ بیم ءِ برجاہ دارگءَ پاکستان لس بلوچ نودربراں انچو پہ دیم گار ءُ بیگواہ کنگ ءَ اِنت ۔

! بلوچ نودربراں

استیں وھد ءُجاوراں دو انچیں جیڑہ است اَنت کہ بلوچ نودربرانءَ آھانی سرءَ جیڑگ لوٹ ایت ۔ یکے کالونیل تشدد ، دومی یکجاھیں جدءُجہد۔ ما گندیں کہ پاکستان ءَ بلوچانی گار ءُ بیگواہ کنگ ءِ سرءَ یک بیانیہ یے جوڑ کُتگ کہ ” ھرچ بلوچ نودربرے کہ گارءُ بیگواہ کنگ بوگ ءَ اِنت ،آئیءَ الم پاکستانءِ ھلاپءَ چیزے کتگ، اگاں نا بے بنیاتءَ گار ءُ بیگواہ کنگ نہ بوتگ ات۔” ایش اے وھدءِ کالونیل بیانیہ یے ، کالونیل تاکت وتی تشدد ءِ دفاع کنگ ءِ ھاترءَ ھرچ وھد ھمے وڑیں بیانیہ جوڑ کنت ۔بلئے جیڑہ ایش اِنت کہ لس بلوچ مہلوک یا نودربر پاکستان ءِ ھمے بیانیہ ءِ آماچ بوگ ءَ اَنت (بزانکہ آئیءِ وتگڈیں بیانیہ ءَ باور کنگءَ انت)کہ ھئو ھرچ بلوچ نودربرے کہ آوار جنگ ءُ گار ءُ بیگواہ کنگ بوگءَ انت آئیءَ الم پاکستانءِ ھلاپ چیزے کتگ۔ پہ درور باز جاھاں ما گندیں کہ اگاں یک بلوچ نودربرے گار ءُ بیگواہ کنگ بیت گڑا آئیءِ نزیکءِ دومی نودربر پاکستانءِ داتگیں ھمے بیانیہ ءِ بنیاتءَ ھما بیگواھیں نودربرءِ بیگواھیءِ ھاترءَ توار چست نہ کنت، چیءَ کہ آئیءَ ھمے باور کتگ کہ ھما بیگواھیں نودربرءَ المءَ سرکارءِ ھلاپءَ چیزے کتگ۔ بلئے ایدگہ روچءَ کہ ھمے نودربرءِ جند چست کنگ ءُ گار ءُ بیگواہ کنگ بیت گڑا نوں آئیءَ را ھمے احساس بیت کہ گلامیں چاگردءَ زورآورءِ ھلاپءَ چیزے کنگ ءُ نہ کنگءِ ضرورت نہ انت، بگندئے ادا تہنا مردمءِ گوں ایردستیں راجءَ سیادی دارگ انت۔ چہ درستاں پیش مارا چہ ھمے کالونیل بیانیہ  ءَ درکپگی اِنت ءُ اے سرپد بوگی اِنت کہ بلوچ نودربرانی گار ءُ بیگواہ کنگ “کالونیل تشدد ” ءِ بہر اِنت ۔کالونیل تشدد ھمے ھاترءَ بیت کہ ما پاکستان ءِ گلام اِنت ءُ اے کالونیل تشدد داں ھما روچءَ  برجاہ بیت کہ بلوچستان ءِ سر ءَ پاکستانی کبزہ برجاہ اِنت ۔دانکہ پاکستانی کبزہ بلوچستان ءِ سرءَ برجاہ اِنت، اے میانءَ بلوچ نودربر چیزے کن اَنت یا نہ کن اَنت گار ءُ بیگواہ کنگ ءُ پاکستانی زوراکیءِ دیمپان الم بنت۔  

 !مڑاھداریں بلوچ نودربراں

نوں جُست ایش اِنت کہ اے استیں جاوراں بلوچ نودربرانءَچے کنگ لوٹ ایت؟ما ھمے سرپد بئیں کہ چہ درستاں پیش بلوچ نودربر چہ کالونیل بیانیہ ءَ در بہ کپ اَنت ءُ کالونیل ازم  ءُ کالونیل تشدد ءَ سرپد بہ بنت۔ وھدے کہ ما  کالونیل بیانیہ ءُ تشدد  ءَ سرپد بئیں گڑا کم چہ کم ما آئیءِ وتگڈیں بیانیہ آنی پُشتءَ رد نہ کپ ایں۔ ءُ ھرچ گار ءُ بیگواہ بوتگیں بلوچ ءِ درد ءَ وتی جندءِ درد سرپد بئیں ءُ وتی گار ءُ بیگواھیءِودار کنگ ءِ بدل ءَ پیسرءَ ایدگہ گار ءُ بیگواھانی ھاترءَ توار چست کن ایں ۔ایشیءَ ھوار اے استیں وھدءِدومی ھاسیں لوٹ پاکستانی زلم ءُ زوراکیانی ھلاپءَ یکجاہ ، یکمُشت بوگ ءُ جہد کنگ انت۔ پہ درور اے وھداں مئے جاور ایش انت کہ پہ گار ءُ بیگواھیں مردماں تہناآھانی کہول، سنگت یا ھما وانگی ادارہءَ گوں بندوکیں نودربر زہرشانی کنگ ءَ اَنت ۔ بلئے  ما اے سرپد بوگ ءَ نہ اِنت کہ کالونیل زوراکی تہنا پہ یک کہول، یک میتگ ، یک گل ءُ پارٹی ءِ ھاترءَ نہ اِنت بگندئے اے سرجمیں بلوچ راج ءِ راجی جیڑہ اِنت۔ ھرچ بلوچ کالونیل زوراکیءِ آماچ اِنت ءُ آماچ بوگ ءَ اِنت۔ اے درگتءَ کالونیل زوراکی ءِ ھلاپ ءَ یکجائیں جہدءِ درکار اِنت۔ وھدے کہ یک بلوچ نودربرے چہ خضدار ءَگار ءُ بیگواہ کنگ بیت گڑا  تربت ءِ نودربر وتی باریگ ءِ ودار مہ کن اَنت بگندئے آئیءِ بیگواھیءِ ھلاپءَتوار چست بہ کن اَنت ۔ یکجائیں جہد تاکتءِ مانزمان انت ، بلوچ نودربرانءَ وتی ھمے تاکت سرپد بوگی اِنت۔ اے تپاکیءِ یک درورے ما چوش بہ زوریں کہ گوستگیں روچءَ پنجگورءِ راہءَ یک بلوچ نودربرے چہ بسءَ ایر کنگ ءُ آوار جنگ بوت، بسءِ ایدگہ مہلوک ابیدءِ دگہ پرک ءُ درکےءَ ھما نودربر ءَ وتیگ سرپد بنت ءُ آئی ءِ بیگواھی ءِ ھلاپ ءَ زہرشانی کن اَنت ، چہ بسءَ ایر کاینتءُ دَگ ءَ بند کن اَنت ، ھمے زہرشانی ءِ برورد ءَ پاکستانی پوج لاچار بیت ءُ ھما نودربرءَ یلا دنت۔دگہ درورے ایش انت پنجاب یونیورسٹی لاہور ءَ یک بلوچ نودربرےءِ گار ءُ بیگواہ کنگ ءِ ھلاپ ءَ اودءِنودربر دوانزدہ روچ ھما یونیورسٹیءَ بند کن اَنت ۔  اودءَ ھم پاکستانی چیریں ادارہ ءُ پوج لاچار بنت ءُ آنودربرءَ یلا کن اَنت ۔بلوچ نودربراں! اے شمے یکجائیں جہدءِ تاکت اِنت، شمارا وتی ھمے یکجائیں تاکت زانگی اِنت ءُ یکجاہ جہد کنگی اِنت ۔ وتی بیگواھیءِ باریگ ءِ ودارءَ نندگی نہ انت ، بگندئے چہ بلوچ ڈیھءِ کجام اوں دمگےءَ بلوچے گار ءُ بیگواہ بیت گڑا جھالاوانءُ سروانی چارگی نہ انت ءُ نئیکہ مکران ءُ سلیمانی بگندئے بلوچ بوگ ءُ گوں دومیءِ درد ءُ گماں ھوار بوگی انت، پہ وتی بیگواھانی ھاترءَ یکجاہ بوگی انت ءُ توار چست کنگی انت، راہ ءُ دگ  بند کنگی انت،رسانکدر (سوشل میڈیا)ءَ توار چست کنگی انت ، پاکستان ءِ زُلم ءُ زوراکیانی ھلاپ ءَ نبشتہ کنگی انت،ھرچ پیمیں راہ ءُ درے بیت وتی وس ءُ واکءَ زورآورءِ ھلاپءَ اوشتگی انت۔ مئے یکجائیں جہد  ءُ تاکت بلوچ سرزمین ءَ چہ پاکستان ءِ کالونیل زوراکی ءَ رکینت کنت، پاکستان ءِ کبزہ ءَ ھلاس کت کنت ءُ بلوچءَ یک وشہالیں زند ءُ سرڈگارے دات کت کنت۔ 

بلوچ نودربرانی جہد زندگ بات
بلوچستان آجو بات

:چاپ ءُ شنگ
سگار پبلی کیشنز
بلوچ اسٹوڈنٹس آرگنائزیشن آزاد