اِرا مارچ، بلوچ نا ربیدہ و ربیدئی مزاحمت
شرفمند آ خوانوک آک
جہان ئٹ بے حساب آ راج آک ساڑی ءُ ہرا جتا جتا انگا دروشم آتیٹ زند گدریفنگ ءُ، جہان نا تیوہ راج آتے اسٹ ایلو آن جتا کروکا، گچین کروکا گڑا اوفتا دود و ربیدہ ءِ۔ دود و ربیدہ ہمو راجی مڈی ءِ ہرا اگہ ساڑی مف گڑا مخلوق نا مچی اسہ راج اس پاننگپک، راج ئسے نا جوڑشت نا تمبہ غاتیٹی اسٹ اس دود و ربیدہ ءِ، اسہ راج ئسے نا پجار ءِ جوڑ کروکا اوفتے شرف بشخوکا گڑا اونا دود و ربیدہ ءِ۔ دود و ربیدہ ٹی بیرہ پچ و پوشاک آک افس دا ہم بشخ ءُ ربیدہ نا ہرافتے نن مادی ربیدہ پانہ ولے دافتون اوار ربیدہ نا بھلا بشخ ئٹ راج ئنا پجار، چاگڑد، طب و زند گدریفنگ نا راہبند آک اوار ءُ۔ اگہ اسہ راج اس تینا ربیدہ ءِ گیرام کے گڑا او راج ئکن ہچ اس سلپک اونا وجود جہان آن ایسر مریک۔ راج آتا ہست و بقاء ءِ رکھوک آ اولی گڑا اوفتا ربیدہ ءِ ہرا راج ءِ اسہ ارتقائی عمل ئسے آن گدرینگسا تینا دیہاڑ ءِ جوڑ کرسا دو بریک۔ دنکہ اسہ بندغ ئسے پجار تروکا گڑا اونا پن مریک ہندن اسہ راج ئسے نا پجار اونا ربیدہ ٹی تخوک ءِ۔ قوضہ گیری نا دور آن ننے خننگ ئٹی بریک کہ امر اسہ راج اس ایلو راج ئنا زی آ قوضہ کننگ کن اونا ربیدہ ءِ ایسر کننگ نا کوشست کیک، گڑا ننے سماء تمک کہ راج آتیکن اوفتا ربیدہ انتئے ارزشت تخک۔ راج آتا زی آ قوضہ کننگ کن قوضہ گیر آک دا ہیت ءِ مارار کہ راج ئسے آ قوضہ کننگ آن مست یا قوضہ ءِ برجاء تخنگ کن المی ءِ کہ اوفتا مغز آتیا ہم قوضہ کننگ مرے تاکہ او تینا و ننا نیام ئٹ فرخ کننگ کپس، داڑکن گڑا او راج آتا دود و ربیدہ غاتے شیف خلکنو، بے شرف کرینو و ہندی آ الس ءِ رد تسنو، تینے مہذب پارسا او راج آتے ناسرپند و جاہل نا پن تسنو و اوفتے نفسیاتی نزوری و ناجوڑی تا گواچی کننگ نا کوشست کرینو کہ او مخلوق تینے تینٹ کم
شرف سرپند مرے و تینا دود آتیان و ربیدہ غان بد دے۔
ہندن بلوچ راج ہم غلامی نا زمزیر آتیٹی تفوک ءِ گڑا قوضہ گیر آک مدام ننا دود و ربیدہ غاتے لتاڑنگ نا کوشست کرینو، ننے بد تہذیب، جنگول، دز و جاہل نا پن تننگ نا کوشست کرینو، دا اٹکل آتا مسخت بیرہ ہندا مسنے کہ بلوچ تینے اسہ کمتر ءُ راج اس سرپند مرے تاکہ نن اودے تہذیب تننگ نا پن آ رد ایتن و اونا مال و مڈی تا زی آ قوضہ کین۔ انگریز تینا وخت ئٹ ننا زی آ قوضہ کننگ آن مست ننا دود آتا بابت ئٹ پٹ و پول ءِ بناء کرے، ننا چاگڑدی جوڑشت ننا طب و مارشت آتے ننا بولی تے و ننا بست و بند ءِ خوانا و ولدا ہندنو بیانیہ جوڑ کرے ہیس کہ بلوچ رد
کُنے و ننا برخلاف مزاحمت کننگ کپ۔
ولدا پاکستان پنی آ قوضہ گیر ہم ہندا مکر آتے کاریم ئٹ ہتسہ بننگ ءِ۔ ننا راجی سوچ، سماء و مارشت آتے لتاڑنگ و ننے تینا راج و پجار آن ناولد کننگ نا کوشست ئٹی اختہ ءِ تاکہ ننے تینا راج و پجار نا رکھ آن مر تخنگ کے و ننا لٹ و پل ءِ کرسا بلوچ راج ءِ ایسر کے۔ ہمو راج آک ہرا تینا دود آتے، ربیدہ ءِ گیرام کپسہ اونا رکھنگ کن جہد کیرہ گڑا او راج آتے جہان نا ہچ ءُ طاغت اس رد تننگ کپک ایسر کننگ کپک۔
چاہندار آ بلوچ راج
بلوچ راج ہم دا بیدادی تا دور ئٹ تینا دود و ربیدہ غاتے رکھنگ نا خیال آن بےسماء متنے، و مدام تینا پجار نا زی آ مروکا جلہو تا مون آ اسپر مسنے، ہندا سوچ ئنا بنداو آ 2 مارچ 2010 نا دے آ بلوچستان نا ہند خضدار ٹی بی ایس او آزاد بلوچ نا دود و ربیدہ نا رکھنگ کن و الس ئٹ چاہنداری و سرپنداری ودی کننگ کن اسہ دیوان اس اڈ تس کہ دا دے بلوچ نا دود و ربیدہ ءِ درشان کروکا دے ئنا ہند تخو، گڑا اوڑے پاکستان نا لشکری ٹولیک بمب و سمکاری کریر ہرا نا سوب آن اِرا خوانندہ شہید مسر و ہژدہ ٹپی مسر، داڑان دا ہیت پاش مریک کہ قوضہ گیر مظلوم آ راج ئنا دود و ربیدہ غان اخہ در خُلیک۔ ہموکان گڈ بلوچ مدام دا دے ءِ تینا پجار، دود و ربیدہ و اسٹی نا
درشانی کن اڈ ترسا کرینے۔
دا دے دا سوب آن ارزشت تخک کہ دا دے ننے دا احساس ءِ بشخک اگہ پاکستان زوراکی ئٹ ننا پجار ءِ ایسر کننگ نا کوشست ءِ کننگ ءِ گڑا بلوچ ہم کاٹم ترو ولے تینا پجار نا لتاڑنگ ءِ سگپرو۔ و دا مزاحمت اسہ یکدم ودی مروکو عمل اس اف بلکہ بلوچ نا ربیدہ نا بشخ ئسے ہرا اونا طب ئٹ مارشت ئٹ دیہاڑ ئٹ مدام اوڑتون تد مسنے کہ امر ءُ ہم راج اس یا قوضہ گیر اس بد انگا نیت تون بلوچ نا ڈغار آ نت تخانے گڑا بلوچ مدام مزاحمت کرینے و مون تسنے ولے خن تے شیف کتنے۔
شرفمند آ بلوچ الس
دیہاڑ نا چر ئٹ گوادر نا حمل جیئند آن ہلیس اینو نا بلوچ راج ئنا کیہی حمل و جیئند آک اوار ءُ ہرا تینا ساہ و کاٹم تے ندر کرینو ولے تینا راج ئنا غلامی و تینا ڈغار نا زی آ قوضہ ءِ منتنو۔ دا ہمو دیہاڑ ءِ ہرا مزاحمت ءِ بلوچ راج ئنا ربیدہ نا پاش ءُ بشخ اس جوڑ کرینے ہرا بلوچ نا ہست و وجود تون گنڈوک ءِ۔ دا ہمو ریسہ ءِ ہراٹی ہزار آ بلوچ خواجہ غاتا قربانیک اوار ءُ و دا مرغن آ لڑ ئنا استار آنبار بلبلوکا ہر کڑدار بلوچ راج ئکن چیدہ جوڑ ءِ ہرافک دا مزاحمت نا دود ءِ بلوچ نا ربیدہ نا بسند ءُ بشخ اس جوڑ کریر ہراڑان ہچو طاغت اس بلوچ ءِ کشکنگ کپک۔
بلوچ راج
بلوچ پرتگالی نوآبادکار تون حمل جیئند نا دروشم ئٹ، ولدا چم باز آ انگریز تون ہم گل بی بی، نورا مینگل، شہید میر علی دوست، یوسف عزیز مگسی، عبدالعزیز کرد و پین کیہی کڑدار آتا دروشم ئٹ، و پاکستان تون پرنس آغا عبدالکریم، بابو نوروز خان، جنرل شیروف مری، فکری آ بابا خیربخش مری و بالاچ نا دروشم ئٹ جنگ ترسا بسنے و اینو ہم بلوچ تینا بقاء و پجار نا رکھ ئکن سنگر آتیٹی تینا ربیدئی چیدہ دنچا مزاحمت نا پلو ئٹ ہلکنے۔ دنکہ قوضہ گیری بیرہ جنگ اسکان اف بلکہ جنگ ئتون اوار قوضہ گیر غلام آ راج ئنا بولی، دود، مارشت و ربیدہ ءِ ایسر کننگ نا تیوہ کوشست کیک، گڑا ہندن مزاحمت ہم بیرہ جنگ و سمکاری اسکان اف، بلکہ تینا راج ئنا رکھنگ کن ہر ہمو گڑا کن مزاحمت کروئی تمک ہرا نا ایسری نا رند ئٹ قوضہ گیر اختہ ءِ۔ اسہ ہندنو وختس اس ئس کہ بلوچ نا زی آ بھلو شلوار بیننگ آ رکھ خلنگا دا ہمو چم آتیان اسٹ ئس کہ ربیدہ ءِ ایسر کننگے مرے بلوچ نا، گڑا بلوچ مزاحمت کرے ولے اوفتے منیتو، ہندن اینو بلوچ نا بولیک مریر، اونا دود آک مریر یا چاگڑدی جوڑشت مرے دا غٹ ءِ ایسر کننگ کن پاکستان وڑ وڑ ئنا مکر و چم مننگ ءِ، بلوچ نا دیہاڑ ءِ مسخ کننگ نا کوشست ہم برجاء مسنے، بلوچ نا دود آتے، دیہاڑ ءِ طب و مارشت آتے رد ءُ و مسخ ءُ دروشم اس تننگ نا کوشست مسنے کہ راج ءِ اڑزانی ئٹ رد تننگ کیر، دنکہ ہندا 2 مارچ نا دے ءِ پاکستان ہم تینا ادارہ غاتا کمک ئٹ جتا جتا انگا جاگہ غاتیٹی اڈ ایتک کہ بلوچ نا دود و ربیدئی آ دے ءِ و بلوچ کنتون تفوک ءِ کنا وجود ئنا بشخ ئسے، دا چم ئٹ او جہان ءِ ہم رد تننگ نا کوشست ئٹی ءِ تینا مخلوق تون اوار بلوچ نا مخلوق ءِ ہم رد تننگ نا کوشست ئٹی ءِ۔ او ننا بھلا شلوار ءِ ہم بینک دستار ءِ ہم تخک ولے بیرہ ننا ریفنگ کن، گواچن ئٹ او بلوچ نا چاگڑد ئٹی انت انت کتنے؟ زالبول آک ہرا بلوچ چاگڑد نا کل آن شرف ئنا لائخ آ تپہ ءِ کہ ہرا نا شان بلوچ نا دود و ربیدہ ٹی بھاز بڑز ءِ ولے پاکستان اینو ننا نیاڑی تا گد آتے تار تار کننگے اوفتے بیگواہ کننگ ءِ، ننا پیر و کماش آتے ہڑدے بےشرف کیک، ننا چنا تے بین آن کسفنگ ءِ، اسہ نیمہ غا او ننا مال و مڈی تے لٹنگ ءِ و دا خیسن تا و خزانہ غاتا خواجہ غا بلوچ الس بارن ءُ باخو ئسے کن سکنگ ءِ، ہڑدے نا بنداو آ سد آتا کچ ئٹ ورناتے بیگواہ کیک و اوفتا جشوک آ بےساہ غا جون آتے سڑک و گیابان تیٹی چغل ایتک و ایلو نیمہ غا او ننے ریفنگ کن دا پائک کہ بلوچ کنے آن ءِ۔ دا تیوہ مکر و چم آتا مونتس ئکن ہم بلوچ ءِ سنگر تفوئی ءِ، انتئے کہ اگہ بلوچ نا بولیک، دود آک، چاگڑدی طب و مارشت آک اگہ ایسر مسر گڑا نن تینے جہان نا مونا اسہراج ئسے نا دروشم ئٹ درشان کننگ کپرون۔
مادی و غیر مادی ربیدہ نا رکھ ئکن پانے او بلوچ نا بولیک مریر، دیہاڑ مرے، چاگڑدی و راجی طب مرے، یا اشتماعی یاداشت آک مریر دافتا رکھ ءِ کروئی ءِ تینا راج ءِ سرپنداری تروئی ءِ کہ اگہ بندغ نا زندہ مننگ کن ساہ ہلنگ المی ءِ گڑا ہندا ڈول ئٹ راج ئنا زندہ مننگ کن اونا دود و ربیدہ نا ساڑی مننگ المی ءِ۔