بلدیاتی الیکشن ءُ بلوچستان

!بلوچ راج

اے یک تچک ءُ پدّریں گپے کہ بلوچستان یک جنگی جاورہالے ءِ تہءَ گْوزگ ءَ اِنت۔ھمک روچءِ ھسابءَریاستی زلم ءُ زوراکی ءُ آئیءِ پندل گوں تُرندی ءَ دیم ءَ آہگ ءَ اَنت۔ کہ اے زلم ءُزوراکیانی تہءَ بلوچ ورنا ءُ کماشاں بگر تاں زہگ ءُ زالبول کل گرگ ءُ گار ءُ بیگواہ کَنگ ءُ جَنگ بوگ ءَ اَنت۔ زورآوریں ریاستءَاے جنگی کیفیت گوں دلجمی ءَ برجاہ داشتگ۔بلوچستان ءِ تہءَ اے وھداں یک نیمگے زورآوریں ریاستءِ زلم ءُ جبر ءُ دومی نیمگءَ آئیءِ ووٹ ءُ الیکشنانی ڈرامہ پدا بندات اَنت۔بلوچستان ءِ تہءَ یک نیمگے ریاستی جبر ءِ ھلاپ ءَ سرجمیں بلوچستان ءَ بلوچ مہلوکءِ زہر شانی انت ، بلوچ لس مہلوکءَ جتائیں دمگانی راہ ءُ دگ بند کتگ اَنت ءُ آئیءِ زوراکیانی ھلاپ نندانک داتگ۔ ءُ دومی نیمگ ءَ سرجمیں بلوچستانءِ نامی ئیں راجدوستیں پارلیمانی پارٹی گوں وتی ٹولیاں پہ ووٹ ءُ الیکشنءِ ھاترءَ یکبرے پدا لوگ پہ لوگ اَنت۔ پُرسءِ پترے بیت کہ سیر ئے اے مہلوک ھمادءَ اَنت، یکبرے پدا بلوچ مہلوکءَ ریپینگ ءُ یک بے مکسدیں امیتےءِ پُشتءَزندگ دارگءِ جہدءَ اَنت۔ چہ ایشاں ھمک ٹولیءِ داوا اِنت کہ مئے پارٹی ءُ ادارہ اگاں واکداریں جاھاں سر بوت گڑا بلوچ “دیمروئی ءُ وشہالی” ءِ دنیاءَ سر بیت۔ بلئے بلوچ لس مہلوکءَ شعوری بستارءَ اے سرپد بوگی اِنت کہ دنیاءِ ھچ زورآور(قبضہ گیر)یں تاکتاں گلام ءُ ایردستانی زندگی کدی پہ وشہالی ءِ نیمگءَ نہ برتگ اَنت(ءُ نہ بر اَنت)، بگندئے آھانی ھاسیں پالیسی ھمیش اِنت کہ ایردستءِ ڈیھءَدیمروئیءِ نامءَ لٹ ءُ پُل بہ کن۔
اے وھداں زورآوریں پاکستان جتائیں پندلانی بنیاتءَ بلوچءَ جنگءَ اِنت ءُ چہ ھمے پندلانی تہءَ اے وھدءَ یکے بلدیاتی ووٹ ءُ الیکشنءِ ڈرامہ اَنت۔ چوشکہ ما ءُ شما سرپدیں اے ووٹ ءُ الیکشنانی تہءَ چاگردءِ بدکرداریں مردم ،ریاستی کاسہ لیس ءُ ریاستی ڈیتھ اسکواڈءِ مردم یکجاہ کرتگ اَنت ووٹءِ ڈرامہ یے جوڑ کتگ۔اے ھما ریاستی ٹولی اَنت کہ ایشانی دست ءَ نہ بلوچ زندمان ر ک اتگ، نئیکہ بلوچ ءِ زمین ءُ نابلوچ ءِ مال ءُ مّڈی ۔ بلوچستان ءِ تہءَ بلدیاتی الیکشن بہ بنت یا کہ عام الکیشن ، آھانی واکدار پئوج انت کہ آئیءِ لسٹءِ بنیاتءَ چہ ھمک دمگاں مردم گچین کنگ بنت، ءُ ھرچ ھما مردم کہ گیش پئوجءِ پائیدگانی ھاترءَ کارامد بیت آ گچین کنگ ءُ دیمءَ آرگ بیت۔ اے پئوجءِ مپاد بلوچءِ جنگ ءُ کشگ ءُ آئیءِ لٹءُ پل کنگءَ ابید دگہ ھچ نہ اِنت، بزانکہ ھرچ ھما بلوچے کہ ووٹءِ بہر جوڑ بیت آ راجی مجرمے زانگ بیت۔

!مڈاھداریں وانوک
زوآوریں پاکستانءِ کسان تاں مزنیں ادارہانی تہءَ ابید کرپشن ءُ بئیمانی ءَ دگہ ھچ نیست۔ یک انچیں کرپٹیں چاگردے جوڑ بوتگ کہ پاکستانی مہلوک ھوار ھما راجانی مردم کہ آ پاکستانی کجام اوں ادارہےءِ بہر بنت آ الم کرپٹ جوڑ بنت۔ چہ وانگی ادارہاں تاکہ سماجءِ ایدگہ شعبہ آں کل کرپشنءِ آسءَ ستکگ اَنت۔ آئیءِ سوب ایش اِنت کہ نامی ئیں ریاست پہ دنیاءِ تاکتانی ھاترءَ لٹ ءُ پلءِ ھاترءَ جوڑ اِنت۔ ھمے ڈول پہ بلوچ ڈیھ ءِ لٹءُ پلءِ ھاترءَ آ یک وسیلہ یے پہ دری تاکتاں۔ ھمے سوبءَ بحیثیت بلوچ مارا نا چہ یک قابضیں ریاستےءَ دگہ امیتے دارگی اِنت ءُ نئیکہ چہ آئیءِ جہلءِ داشتگیں مردماں۔
ووٹ ءُ الیکشنانی اوشتوکیں مپادپرستاں یکبرے پدا بلوچ مہلوکءِ یات اتکگ، یکبرے پدا دمک پہ دمک اَنت۔ بلئے انچوشکہ ھاس 2013 ءُ 18 ءَ بلوچ لس مہلوکءَ پاکستانی ووٹءُ الیکشن سرجم بائیکاٹ کت انت مرچی ءُ آؤکیں وھدءِ پاکستانی ووٹ ءُ الیکشن ھم بلوچءَ ھما پئیمءَ بائیکاٹ کنگی اَنت۔ ءُ مہلوکءَ شیوار بوگی اَنت کہ پاکستان پہ ووٹانی سوبمند کنگءَ وڑ وڑیں پندل ساز ایت، چوشکہ ھاس ووٹانی وھداں بلوچءِ گار ءُ بیگواہ کنگءِ پالیسیءَ گیش کنت تا کہ ھمے بیگواھیں مردمانی کہول لاچار بہ بنت ءُ ووٹءِ پترءَ بیا اَنت۔ بلئے بلوچ لس مہلوکءَ ھرچ نگیگیں جاوراں وتی پیسلہ شعوری بنیاتءَ کنگی اِنت، زورآور مہلوکءِ نزوریانی بنیاتءَ آئیءَ دارگءِ جہدءَ کنت بلئے لس مہلوکءَ چہ وتی جزبہ ءُ مارشتاں گیش وتی ھمک پیسلہ گوں شعورءَ کنگی اِنت۔
ایشاں ھوار اے وھداں کہ بلدیاتی ووٹ بوگءَ اَنت ، پاکستانءَ یک دگہ پندلے ایش ساز اتگ کہ چہ ھمک الاکہاں، چہ ھمک کہولاں یک کنڈیڈیٹے الم زورگ بہ بیت۔ ءُ باقائدہ ھمک کہولاں چہ مہلوک گرگ بوگءَاَنت کہ چہ وتی کہولاں کسے پہ کنڈیڈیٹےءِ ھاترءَ دیمءَ بیار اِت۔ چہ ایشیءَ یکے پاکستانی پئوج اے واھشت داریت کہ چہ ھمک کہولاں وھدے مردے کنڈیڈیٹ بیت گڑا ھما کہول لاچار بیت کہ ووٹءَ بہر بہ زور ایت۔ دومی وش وشءَ مردم پدا اے ھیالاں چہ دربیا اَنت کہ ووٹ دیگی نہ اِنت۔ سئیمی ما ءُشما اے ھم گندگءَ اِیں کہ یک کسانیں میتگےءَ کہ شش، ھپت کنڈیڈیٹ دیمءَ کئیت گڑا ھمے ووٹانی ھاترءَ یکے دومیءِ ھما سماجی سیادی اَنت آئیءِ تہءَ گستائی ءُ نا وشی ھم پیداک بوان بیت، بزانکہ بلوچءَ بہر ءُ بانگ کنگ، وت ماں وت میڈینگءِ ھم یک پندلے۔ بزانکہ پاکستانی پئوج یک ھڈّے بلوچانی دیمءَ چگل دنت، دراہ کہ رمب کن اَنت ءُ رو اَنت تاں جنگ ءُ چوپ ھم بیت ءُ نا وشی ءُ دلگرانی ھم ۔ پدا ھم ھڈ وَ ھُشکیں ھڈے آئیءِ ھاترءَ وت ماں وتی ہزاراں سالانی گوستانکی یکجاہی ءَ چیءَ نزور بہ کنیں؟ پمیشکہ بلوچ بوگءُ چہ پاکستانی کرپٹیں چاگردءَ وتءَ رکینگی اِنت۔ وتی امیت ءُ واھشتاں ھوار زند ءُ مرگ گوں بلوچ راجی آجوئیءِ زرمبشتءَ ھمگرنچ کنگی انت۔

!بلوچ مہلوک
انوگیں بلدیاتی الیکشن بہ بنت یا کہ عام الیکشن ، ادءَ تہنا راجدوستیءِ نامءَ وتی زاتی دنیا یےءِ اڈ دیگ اِنت۔ راجءِ نامءَھمے لٹ ءُ پلءِ تہءَ وتی ونڈے گرگ انت۔ ما گندیں کہ کسے کئیت ءُ بلوچءِ مڈیانی سرءَ سیاست کَنت ، کسے بلوچ گار ءُ بیگواھیں مردمانی نام ءِ سرءَ سیاست کَنت ، کسّے راجدوستی ءِ نام ءِسرءَ سیاست کَنت ، بلئے ھمے نامی ئیں راجدوستاں بچار اِت کہ گوستگیں روچ ءَ کہ دو بلوچ زالبول چِست کَنگ ءُ گار ءُ بیگواہ کنگ بوتگ اَت ، اے سرجم ھاموش اِت اِنت ۔ بلوچ نودربرانی گارءُ بیگواہ کَنگ ءَ ھاموش اَنت ، بلئے بلوچ دوستی ءِ داوا ءَ کن انت ءُ بلوچ ءِ راجی مڈیانی لٹ ءُ پلءِ ھاترءَ لانک بند انت۔ بلوچ زرءِ سودا کَنگ ءَ ھوار اِنت، زورآوریں ریاستءِ زوراکیانی تہءَ ھوار اَنت۔اے ھما بہا بوتگیں مہلوک انت کہ ایشانی دستءَ بلوچءِ نسل کُشی بوتگ ءُ بوگءَ اِنت، ہزاراں مہلوک ایشانی دستءَ شہید کنگ بوتگ۔ اے ھما راج دژمن اِنت کہ ایشانی مہار تہنا زورآوریں پاکستانءِ پئوجءِ دست ءَ اِنت، پئوج وتی چے پیمیں پائیدگےءِ پُشتءَ ایشاں کارمرد کت کنت۔
ایشان ءَ نہ راج ءِسُد ءُسمایے اَست ءُ نئیکہ راجی سیت ءُ نپانی ، ایش زورآورءِ چاگردءَ انچو کرپٹ جوڑ کتگ انت کہ ایشانی دین ءُ دنیا بس وتی زات ء ُ زاتی پائیدگ انت۔ پمیشکہ چہ زورگرءُ آئیءِ مہلوکءَ ھچبر گھبودی ءُ گھتریءِ امیت دارگی نہ انت۔ بلوچ ءُ زورآوریں پاکستانءِ میانءَ تپاوت زورگر ءُ ایردست ئیگ انت۔ءُ بلوچءِ زندمانءِ وشہالی ءُ آسودگیءِ مانزمان گوں بلوچ ڈیھءِ آجوئیءَ بندوک انت۔ یک آذاتیں بلوچ ریاستے بلوچ ڈیھ، بلوچ مہلوک ءُ بلوچءِ مال ءُ مڈیانی پاہازگار بوت کنت۔ بلوچءَ لوٹ ایت کہچہ زورآورءِ اے پیمیں پندلانی گپچلاں وتءَ بہ پہریز ایت ءُ گیشا گیش ھرچ ھما عملءِ بہر جوڑ بہ بیت کہ آ بلوچ راجی زرمبشتءَ ، بلوچ راجی آجوئیءِ جنزءَ پائیدگ بہ بنت۔

:چاپ ءُ شنگ
سگار پبلیکیشنز

بی ایس او آذاد