بلوچ ءُ آئیءِ ماتی زبان

مڑاھداریں بلوچ۔۔۔
راجی ھستانکیءِ تہءَ ماتی زبانانی یک مزنیں ارزشت ءُ بستارے ھست انت، پہ یک زندگیں راجےءَ الم اِنت کہ آئیءَ زندگیں زبانے ھم بہ بیت(چہ یک زبانےءَ گیشتر زبان ھم بوت کن انت چوشکہ بلوچ ھم بازیں زبانانی واھندیں راجےءِ بستارءَ زانگ بیت۔) زبان کہ بیت تہ آ ھما راجءِ دود ءُ ربیدگ ءُ دودماناں ھوار راجی تب ءُ مئیلاں زندگ داریت، پمیشکہ زبان راجی ھستیءِ ساہ ءُ ارواہ زانگ بیت۔ بلوچ یک گلامیں راجےءِ بستارءَ مرچی دژمنءِ زلم ءُ زوراکی ءُ جتائیں پندلانی آماچ انت، زورگریں ریاستءَ پہ وتی زورگریءِ برجم دارگءَ زوراکیءِ دراھیں وس ءُ واک جتگ انت ءُ مروچی ھم بازیں جتائیں پالیسیانی رنگءَ بلوچ راجی پجارءَ نیست ءُ گمنام کنگءِ ھاترءَ وتی شپ ءُ روچاں دیگءَ انت۔ انچوشکہ یک نیمگے بلوچ مہلوکءِ چکچینیءَ کنگءَ انت گڑا دومی نیمگءَ بلوچءَ را چرائیءِ جندءِ باھڑ ءُ باسکاں نزور کنگءِ جہدءَ انت، برے مذہبءِ (زگری ءُ نمازی)ءِ نامءَ وتی کاسگ چٹاں دیمءَ کار ایت، برے جہد کنت کہ کٹم ءُ ٹکانی بنیاتءَ بلوچءِ راجی تاکتءَ نزور بہ کنت ءُ برے بلوچءِ جتائیں زبانانی نامءَ راجءِ تہءَ پرشت پروش آرگءِ جہدءَ گوں گلائیش انت، بلئے یک نیمگے اگاں دژمن بِلّے کہ چینکس کوشستءَ انت، دومی نیمگءَ پہ بلوچءِ ڈیھ ءُ آئیءِ زبانانی رکینگءَ یک مہکمیں راجی آجوئی جنز ءُ زرمبشتے اوشتوک انت، کہ اے زرمبشت آشوبی ادارہ ءُ راھبندانی سرءَ بیسہ دار ایت ءُ ادارہ جاتی رنگءَ وتی جہدءَ کنگءَ انت۔ اگاں مرچی دنیاءَ بلوچ یک راجےءِ بستارءَ زندگ انت گڑا آئیءِ زندگ بوگءِ مستریں مانزمان ھم ھمے راجی آجوئی جنز انت، اگاں ناں دگہ دژمنءِ کاسگ چٹانی بیسہءَ دیری بلوچ ڈیھ، آئیءِ ربیدگ ءُ دودماناں ھوار زبانانی ھستی ءُ راجی پجار گار ءُ گور بوتگ ات۔ پمیشکہ مرچی ئیں جاورءَ بلوچ مہلوک دنیاءِ کجام کنڈءَ کہ نشتگ آئیءَ بلوچءِ کلیں آشوبی ادارہ ھمک ھسابءَ ءُ ھرچ پیمءَ کمک کنگی اَنت، چیءَ کہ بلوچ راجی آجوئیءِ مانزمان گوں ھمے آشوبی ادارہاں بندوک انت۔

وانندگیں بلوچ پرزنداں۔۔۔
بیست ءُ یک فروری سرجمیں جہانءَ ماتی زبانانی میاں استمانی روچءِ درگتءَ جتائیں مراگش ءُ دیوانانی شکلءَ یات دارگ بیت۔ میان استمانی ماتی زبانانی روچ 1999ءَ اولسرءَ یونیسکوءِ گوشگءِ پدءَ نامینگ بوت ءُ پدا سرجمیں دنیا ھمے روچءِ درگتءَ مراگش تنی وہدی ھم برجاہ دار ایت۔ اے روچءِ برجم دارگءِ مکسد ءُ مانا وتی ماتی زباناں گوں مہر ءُ دوستی، ھب ءُ ھدوناکی پیشدارگ انت، کہ ایدگہ راج ھم بہ زان انت کہ ما یک زندگیں ءُ ازگاریں زبانانی واھندیں راجے ایں، پمیشکہ ھر راج پہ وتی زباناں گوں مہر کنگءَ لانگ بند انت تاکہ آئیءِ ارزشتءِ بابتءَ سرپد بہ بیت۔ دنیا ءَ ھزارانی کچ ءُ کساسءَ راج ھست انت ءُ آیانی وتی جتائیں ماتی زُبان ھم ھست اَنت۔ چیزے ازگاریں زبان انت ءُ چیزے نیزگاریں۔ازگاریں زبان ھما انت کہ آ راج وتی زبانءِ باندات ءُ آکبتءِ سرءَ شپ داں روچ کارءَ انت ءُ زیکیں روچءَ وتی زگریں ھون اش ریتکگ انت، چوشکہ ایشیءِ مستریں درور بنگالی زبان انت کہ مروچی ھمے روچءِ دارگءِ ھاترءَ سرجمیں دنیا گوں آیاں اوشتوک انت۔ مروچی چہ بنگالانی سوبءَ مڑاھداریں راج وتی ماتی زبانانی ارزشتءَ چہ آشنا انت ءُ وتی زبانانی ھاترءَ بے کساس کار کنگءَ انت، ءُ نیزگاریں زبان ھما انت کہ آیاں پہ وتی زبانانی رکینگءَ جہد نہ کرتگ، چوشکہ افریکی ملکانی تہءَ چوشیں درور باز دست کپ ایت کہ آ زبان مروچی پشت نہ کپتگ انت، وہدءِ دنزانی توکءَ گار ءُ بیگواہ انت یاکہ دومی رنگءَ چوشیں زبان مرگءِ سیمسران انت۔ چوشکہ وھدے بلوچی زبانءِ سرا چمشانکے دیگ بہ بیت تہ زبانزانت ءُ راجدپتر نویسانی ھیال ھمیش انت کہ بلوچی زبان سکیں ازگاریں ءُ کدیمیں زبانے بلئے ایردستیءِ سببءَ چہ آئیءِ ردوم توانائیں رنگےءَ نہ بوتگ، پرچہ کہ گلامیءِ طوق بلوچ راجءِ گٹءَ انت اگاں بلوچ وتی راجی پجارءِ رکینگءَ جہد مہ کن انت تہ گمان ھمیش اِنت کہ آ ھم چو افریکی راجانی پیمءَ در پہ در ءُ ھاک پہ سر بیت۔

بلوچ راجءِ یلیں پسگاں۔۔۔
چوشکہ بلوچءِ گورءَ چو ایدگہ راجانی پیمءَ سرجم ءُ برجمیں راجےءِ عنصر است انت بلئے بلوچءَ چہ آئیءِ وتواجہی پچگرگ بوتگ ءُ زور پاکستانءِ وڑیں یک بے جوڑشتیں استانےءَ ایردست کرتگ کہ چریشیءَ چہ زورآورءَ بلوچ ڈیھءِ برگءَ ابید بلوچ راجی پجار، دود ءُ ربیدگ، دودمان ءُ زبان بہر ءُ بانگ کرتگ انت ءُ دانستہ پرشت ءُ پروش یاکہ مسخ کنگءِ جہد کرتگ یا روچ مروچی ھم بہر ءُ بانگیءِ سرءَ دنیاءِ زرّاں ببا دیگءَ انت۔ بلئے اگاں زانندگیں بلوچ نودربر زبان ءُ ایدگہ مڈیاں پہریز ات کت مہ کن انت،گڑا چوشیں بازیں راج ھست انت کہ آھانی زبان ءُ راج ماں دنیاءَ پشت نہ کپتگ انت۔ مروچی مڑاھداریں زبانانی کارگلاں(ادارہ) ھم ترسے چیر کپتگ کہ بازیں زبان مرگءِ سیمسران انت، ایشیءِ سبب ھمیش انت کہ راجاں راجدوستیءِ لیکہ یلءَ کرتگ پمیشکہ مروچی اے راجاں وتی راجی زبانءِ پجیگءَ راجی پجار ھم ببا داتگ۔
راستی ءُ زانشتی رنگءَ چار ءُ بیچار بہ کنیں گڑااے زبان اسلءَ بلوچ راجی مڈّی اَنت کہ ایشانی سازگ ءُ پاھازگ بلوچ راجدوستانی سرا اژدری انت کہ ما وتی زبانانی رکینگ ءُ پاھازگءِ ھاترءَ وتی شپ ءُ روچاں نْدر بہ کنیں، پرچہ کہ بلوچ راجدوستیءِ تہءَ زبان ھم یک اھمیں عنصراں چہ یکے۔ پمیشکہ بلوچ راجءِ ھر پڑءَ گوں بندوکیں مردم وتی ماتی زبانانی ارزشت ءُ مہرءِ ھمراہیءَ وانگ ءُ نبشتہ کنگءَ ھم وتی بنگیجی ھب ءُ واھگانی توکءَ ھوار بہ گیج ایت دانکہ بانداتءَ زورگرءِ ھمک ساز اتگیں پندلانی دیمءَ اوشتات کت بہ کنیں۔آئیءِ داتگیں کٹمی، ٹکی، مذہبی ءُ زبانی پرک ءُ تپاوتانی پروش دیگءَ لانگ بند بہ بئیں اگاں نہ گڑا مئے درور ھم ھما بیت چوشکہ ریڈانڈینانی گوما بوتگ۔ پمیشکہ مارا یونیسکوءِ زبانانی بابتءَ شنگ کرتگیں ءُ بیمناکیں سائرن پجّارگی انتءُ پہ وتی راجی زبانانی ھاترءَ ادارہ جاتی بنیاتءَ کار کنگی انت ءُ ھاسکر گلامیں راجانی توکءَ اے مستریں زمہ واری وانندگیں نودربرانی کوپگاں کیت انت کہ وتی پڑانی (فلیڈز) توکءَ سرجم ءُ برجمیں رنگےءَ کار بہ کن انت، اگاں کسے کجام ھم سبجکٹےءَ گوں بندوک بہ بیت تہ بائد انت آ وتی وس ءُ واکءِ بنیاتءَ بلوچ راجی زبانانءَ ارزشت بہ دنت ءُ وتی زبانءُ پجارءِ رکینگءَ شپ داں روچ کار کنگءِ ھاٹیگءَ بہ دار ایت، پرچہ کہ بلوچ ءُ آئیءِ زبان انوں انچیں نازرکیں دور ءُ باریگےءِ تہءَ گوزگءَ انت کہ آئیءِ راجی زبان ءُ پجارءِ سرءَ دری مہلوکے پہ زور الگار انت، کہ آئیءِ ھمک پندلانی بے سوب کنگءِ ھاترءَ یک پادءَ اوشتگی انت۔

بلوچ اسٹوڈنس آرگنائیزیشن آذاد