بلوچ چاگڑد ئٹی ڈیتھ اسکواڈ آک

!شرف دار آ خوانوک 

بلوچ راجی جنز ءِ ایسر کننگ و بلوچستان ئٹ تینا کوزہ ءِ سوگو کننگ کن ریاست نا کنڈان جتا جتاؤ چم کننگانے ہرافتیٹی سافٹ پاور نا دروشم ئٹ کیڈٹ کالجز ، پروپگینڈا چینلز ، ترقی نا پن ئٹ بیانیہ ، یا الیکٹرونک و سوشل میڈیا نا زہم شاغوک کارمرزی ، مذہبی پروپگینڈا ، کتاب آتیا بندش ، سکول و سینٹرز آتیٹی جلہو، ءُ اسہ بھلو خلیس نا چاگڑد ئس ودی کننگ و داڑتون اوار پین بھاز پالیسیک اریر، و ہندا وڑ بلوچ راجی جنز ءِ ایسر کننگ و لس مخلوق نا تہٹی راجی جنز نا باروٹ بدگمانی ودی کننگ نا کوشست ہم کننگانے۔ دژمن تینا سافٹ پالیسی تتون اوار ہارڈ پالیسی تے ہم ترندی ئٹ برجا تخانے۔ ہراڑے بلوچستان ئٹ ہڑدے نا بنیات آ کیہی فوجی آپریشن، خلنگ بٹنگ، فیک انکاؤنٹر ئٹ بلوچ ورنا تے کھسفنگ، بیگواہ کننگ و لٹ تننگ ، چیک پوسٹ آتیا بے شرف کننگ و دافتے ٹی کل آن زیات اہمیت ڈیتھ اسکواڈز نا جوڑ کننگ ءِ تننگانے، ہرافتے ریاست باقاعدہ توفک تسنے و ہر علاقہ ٹی جاگہ تسنے۔ آزاتی پسند آتے نسخان رسیفنگ تون اوار سیاسی ورکرز آتے ٹک کننگ، اوفتا سیاسی کاریم آتا زی آ بڑزی ادارہ آتے حوال رسیفنگ، بلوچ جہدکار آتا خاہوت آتے خلیس نا گواچی کننگ، بلوچ جہدکار آتے نسخان تننگ آن بیدس ریاست دافتے بلوچ چاگڑد ءِ خانہ جنگی ، دود و ربیدہ آتا لتاڑنگ، و ہر وڑ ئنا دزی، لُٹ و پل نا اختیار و اقتدار تسنے۔

!بلوچ راج

ہندنکہ نم جوانی ئٹ سرپند اُرے کہ قوزہ گیر نا فوج، اونا ڈھکوک ادارہ (آئی ایس آئی و ایم آئی) نا کماشی ئٹ جوڑ مروکا خلقی ڈیتھ اسکواڈ ٹولیک تیوہ بلوچستان ئٹ قوزہ گیر نا زلم و زوراکی تتون اسہ رنگ ئٹ اوار ءُ۔ اوفتا پارہ غان دزی و لٹ و پل مرے، بلوچ ننگ و ناموس ءِ لتاڑنگ مرے، بندغ آتے بیگواہ کننگ، ڈغار تے کوزہ کننگ، سکول آتے ہشنگ ، بلوچ نیاڑی تتون زیادستی، دافتے زہنی دباؤ تننگ، ریاستی چاپلوسی تون اوار غٹ ظلم و بدکاری تتون شریک ءُ۔ دافتا سوب آن بلوچ چاگڑد ئٹ نہ پیر انگا بندغ آتا شرف رکھوک ءِ نئیکہ چنا و زالبول آتا شرف۔ فوج و آئی ایس آئی نا مہکشی ٹی دا بلوچستان ءِ دوزخ ئس جوڑ کرینو۔  دا ٹولی تے ہنداخس تاغت و اختیار تننگانے کہ اینو بیرہ پن ئنا راجدوست آ سیاسی پارٹیک دافتا آسرہ ٹی بلوچستان ئٹ تینا روتہ آتے رکھفنگ کن کوشت ٹی لگوک ءُ و دافتے سمبالنگ نا لڑ برجا ءِ۔ 

ہندنکہ تدوکا دے تیٹی وڈھ ئٹ مونا بروکا اختر و شفیق نا اسکواڈز آتا نیام ئٹ جنگ بنا مسنے و داسکان برجا ءِ و دا ٹولی تا جنگ ئنا سوب آن لس مخلوق نا زند، کاروبار ہر وڑ ئٹ خلیس نا گواچی ءِ، تومکا اسکواڈز آتا پارہ غان بھلا بھلا سلہہ تے کاریم ئٹ ہتنگ، السی ٹرانسپورٹ و شار ءِ بند کننگ، ہر کنڈ آ اسہ خلیس ئس ودی کرینو۔ دا ہیت چاہنگوک ءِ کہ وفاقی پارٹی و ایلو ٹولی تا نیام ئٹ ہراتم کہ ویل ئس ودی مریک گڑا اونا بھلا سوب بڑزنگا ادارہ (اوفتا آقا) آتا پارہ غان مریک، ہندنکہ پاکستان دا خلقی ڈیتھ اسکواڈ آتے بندوای وخت ئٹ ہنداخس تاغت و اختیار تسنے کہ اینو پاکستان کن مننگ کیک دا ٹولیک اونا کنٹرول آ پیش تمر، نن خننہ کہ ہندا خلیس نا بنیات ئٹ ریاست بھاز وخت ہندا ٹولی تا نیام ئٹ، زمینی، کاروباری، قبائلی یا پین لُٹ و پلی سواد آتا بنیات ئٹ ویل ودی کیک تاکہ دا ٹولیک تینے ریاستی کنٹرول آن پیشن اسل سرپند مفس۔

تینا زاتی و خاہوتی سواد آتا ردئٹ ہندا ٹولیک کوزہ گیر نا لُٹ و پلی نا عمل آ ہلیس (ہندنکہ بلوچ ڈغار نا سائل و وسائل آتا کشنگ و دننگ) السی خلنگ و کھسفنگ اسکان غٹ عمل آتیٹی ریاست تون جتا جتا انگا دروشم ئٹ ہم کوپہ ءُ۔ بلوچ ڈغار نا بلڈوز و چاک کروکا مَشک مریر( ہراکان ہزار آ وسائل کشنگ مریرہ ) یا توتک نا ہمو سد ئنا کچ ئٹ لاش آک ہرافتے اینو اسکان کسس تتئو کہ دیر ئسر ؟ دا تینٹ شاہد ءُ کہ دا بیرہ پن ئنا میر و سردار آک کوزہ گیر پاکستان نا کاریم تیٹی اخس بشخ ہلوک ءُ۔ و دننگا ٹولیک بیرہ خضدار ئٹ آخہ بلکن بلوچ ڈیہہ ئنا چار انگا کنڈ آتیا سوگو آ دروشم ئٹ ساڑی ءُ ، جاگہ ئسے آ مذہب و دین نا پن آ کاریم کننگ ءُ، جاگہ ئس نیامیکو کلاس نا بندغ آکو، ولے کاریمک کل ئنا اسٹ ءُ، بیرہ بلوچ راجی جنز ءِ ایسر کننگ، پاکستان نا زوراکی تے سوگو کننگ، و تینکہ چرپ ءُ باخو ئس ہلنگ کننگ۔ ہندا سوب آن بلوچ الس ءِ دا دز و ڈاکو تا سیاسی گر و چیل آن ہر وڑ ئٹ مر مننگ و اوفتا برخلاف بلوچ مزاحمتی پروگرام آتا زیات بشخ مروئی ءِ ۔

!چاہندار آ  الس

پاکستانی وفاق ٹی تولوک بلوچ سیاسی پارٹی بلوچ راج دوستی نا یات ئٹ جتا انگا کوکار آتا دروشم ئٹ بلوچ لس مخلوق ءِ مدام ریفنگ و دروہ تننگ نا جہد ئٹی ءُ۔ انتئیکہ دافتا بھلا مسخت تینا زاتی سواد آتے رکھنگ کن پاکستانی کوزہ ءِ زندہ تخنگ و اونا است خواہی آ پروگرام آتا ردئٹ سیاست کننگ ءِ ۔ ہندنکہ اینو ووٹ و الیکشن آک خڑک تمنگ ءُ، ہندا سوب آن دافتا پارہ غان بلوچ ڈیہہ نا جتا انگا ہند آتیٹ جتا جتا غا دروشم تیٹی کاریمک زیات مننگ ءُ، خاص وڑ ئٹ ہر پارٹی تینا ڈیتھ اسکواڈ ٹولی تا کمک ئٹ بلوچ فرزند آتے بیگواہ کننگ نا کاریم ءِ ترند کرینے، تاکہ لس مخلوق بے وس مرے و تینا بیگواہ انگا بندغ آتا آجوئی کن ہندا سیاسی پارٹی تیا برے۔ ولے بلوچ الس ءِ دا کل ریاستی چم آتے ساندہ سرپند مننگ و مستقل بنیات ئٹ فکرمند مروئی ءِ ۔ ہمو وخت اسکان کہ پاکستانی کوزہ ایسر مفک، دا پارلیمنٹ ئٹی تولوک بیرہ پن ئنا راجدوست، ڈیتھ اسکوڈز ٹولی تا لٹ و پل و ظلم زوراکی تے بلوچ راج رکھنگ کپک، ہندا سوب آن اسہ پوسکن و شرحال ءُ پگہ سیکن بلوچ الس ءِ شعوری بنیات ئٹ فیصلہ کروئی ءِ بلوچ جنز نا بشخ مروئی ءِ و دادے سوگو کننگ کن تینا کڑد ءِ مونا ہتوئی ءِ ، انتئیکہ بیرہ راجی آجوئی بلوچ کن مدام شادمانی نا ضامن مننگ کیک۔

نشر و شینک : بی ایس او آزات