بیگواہ بلوچ ورنا تا جشوک جونک و بے سما غا راج

قوضہ اسہ بے دادی آن پُر ءُ ویل ئسے، ہرا وخت کہ ڈیھ آ زوراک قوضہ کیک، گڑا او ہر وخت طاغت نا زور آ ہندی بندغ تا بندغی بستار ءِ ایسر کیک، اندنکہ غلام انگا راج ءِ بندغی بستار اف۔ اندا سوب آن پاننگک کہ آجوئی نا جنگ بنائی دے تیٹ تینے بندغ جوڑ کننگ نا جنگ مریک، قوضہ گیر نا بننگ آن مُست او نا توفک نا توار مظلوم نا ڈغار ءِ سر مریک۔ دا نا بنیاتی سوب دادے کہ زوراک بنائی دے تیان غلام آ راج ءِ دا باور کرفک کہ او طاغت نا زور آ اوفتا ڈغار ءِ قوضہ کننگ ءِ۔ اندن جتا جاگہ تیٹ قوضہ نا دروشم جتا مریک، ولے زوراک نا نفسیات مدام اسہ وڑ مریک، او بس طاغت نا زبان اٹ ہیت کیک و قوضہ ءِ برجا تخنگ کہ او نا کل آن بھلا کمک طاغت و بے دادی ءِ۔ اولی وار انگریز بلوچ ڈغار آ 1839 ٹی قوضہ کرے، داڑان پد سد سال نا ظلم و زوراکی آن گڈ 11 اگست 1947 آ بلوچ ڈیھ آجو مریک، ولے دا آجوئی ہرے اسکان سلپک۔27 مارچ 1948 ہمو تہار آ دے مریک ہرا دے آ پاکستان نا پنجابی لشکر قلات نا زی آ جلہو کیک و بلوچ ڈیھ اسہ وار پدا قوضہ نا گواچی مریک۔ہمو دے آن الیس اینو اسکان بلوچ مڷ آتا دتر وہنگ ءِ۔ 1948 ٹی وختس کہ پنجابی قوضہ گیر تینا نتے بلوچستان آ تخیک ہموکان بلوچ نا دتر ءِ وہفنگ نا بناء کیک، کل بلوچ راہشون تے الیک زندان اٹ بند کیک و بلوچستان اٹ خون کننگ و بٹنگ نا ماحول ئس جوڑ کیک۔ داڑان گڈ 1958 و پدا 70 نا دہائی تیٹ بھلو فوجی آپریشن مریک اوفتا تہٹی ہزار تا کچ بے ڈوہدار بلوچ مڷ آک شہید مریرہ، و بلوچ چنا و زالبول آک بندی کننگرہ۔

!شرفمند آ خوانوک آک۔۔۔

سال 2000 آن پد وختس کہ بلوچ آجوئی نا جہد ترندی تون اوار مونا بریک، اندن پاکستانی لشکر نا ظلم و زوراکی تیٹ ہم ترندی برسا کیک۔ مارچ 2005 ڈیرہ بگٹی ٹی پاکستان نا زوراک آ لشکر جلہو کیک و دا جلہو ٹی 70 آن زیات بلوچ ورنا، چنا و زالبول ، پیر و کماش شہید کننگرہ۔ داڑان گڈ بلوچ خوانندہ، سیاسی باسک، استاد، نوشتکار و ایلو تپہ تیان تعلقداری تخوک بلوچ مڷ تا دزگیر کننگ نا اسہ پوسکنو لڑ اس بناء مریک۔ سال 2009 ئٹ کماش غلام محمد، لالا منیر بلوچ و شیر محمد بلوچ تون اوار بیگواہ کننگک، پدا اوفتا دتر چر آ جونک مرگاپ ئٹ خسنگرہ۔ اندا وڑ شہید کمبر چاکر، الیاس نزر، احمد داد و ایلو بے کچ بلوچ ورنا، چنا و زالبول آک دزگیر کننگ آن گڈ شہید کننگرہ۔ایمنسٹی 2010 ئٹ اسہ پریس ریلیز اس شینک کیک و او ٹی پاکستان نا “خلنگ و بٹنگ” نا پالیسی ءِ “The kill and dump policy “ نا پن ایتک۔ دا پالیسی نا رد اٹ ہزار تا کچ اٹ بلوچ ورنا، سیاسی باسک، نوشتکار، استاد بزغر و دوکاندار تون اوار چنا و زالبول آک بیگواہ کننگرہ و پدا اوفتا سم کُنوک آ جونک شار، بازار و بیابان تیٹ خسنگرہ۔ اندا وڑ جنوری 2014 ٹی خضدار نا علاقہ توتک اٹ 169 بلوچ مڷ تا جونک رسینگرہ اوفتیان بیرہ مُسٹ نا چاہنداری مریک،
دا ہر مُسٹ بیگواہ مروک بلوچ آتیان مریرہ، ایلو جون تے جون نا تُو ئٹ شال آ رادہ کننگک۔ ترند برانز تیان گڈ اسہ کمیٹی اس جوڈ کننگک ، ولے دا کمیٹی کل آن مُست پاکستانی لشکر نا دتری دو تے سِلک۔ 2019 ٹی ایدھی فاؤنڈیشن ءِ شال آن دوانزدہ نادرست جون رسینگک و اوفک بیدس چاہنداری آن کڈ کننگرہ۔ اینو اسکان دا نادرست جون تا چاہنداری مفک۔ تدوکا سال لاھور آن 200 جون خننگرہ، اندا وڑ برجاء دے تیٹ پنجاب نا شار ملتان آن 500 جون خننگار دافتا باروٹ ہچو حوال اس شینک متو، ولے بھاز زو دا ہیت پیری کرے، اندنکہ ہزار تا کچ اٹ بلوچ آک بیگواہ اریر و مُست آن بلوچ راج دا حالیت آن گدرینگانے، انتئے کہ بلوچ راج ءِ بیگواہ بلوچ آتا دتری جونک رسینگانو، اندا سوب آن گمان کننگک کہ دا جونک ہرا لاہور و ملتان آن خننگانو دا بیگواہ بلوچ آتا جونک مننگ کیرہ۔

!شرفمند آک۔۔۔

دا ہیت راست ءِ کہ ظالم ہر وخت تینا قوضہ ءِ برجا تخنگ کن طاغت ءِ کاریم اٹ ہتیک، ولے او وخت تون اوار تینا زوراکی تا رہبند ءِ بدل کیک۔ اند سوب نن ہُرین کہ 2006 آن گڈ وختس کہ پاکستان بلوچ نسل کشی ءِ درشان کیک اندن 2020 اٹ اندا نسل کشی اسہ پوسکون ءُ دروشم اسیٹ ننا مونا بریک۔اندا نیام اٹ پاکستان نا ڈھکوک ادارہ غاک بلوچستان اٹ سی ٹی ڈی نا ادارہ ءِ اتیرہ۔ سی ٹی ڈی تیوہ پاکستان نا ڈھکوک ادارہ تیان جوڑ مروک اسہ ادارہ سے، دا نا کاریم بیگواہ بلوچ آتا خون کننگ و اوفتے مونتس نا پن تننگ ءِ، گواچن اٹ دا غٹ دروغ نا مونتس مریرہ۔ 2020 ٹی سی ٹی ڈی راجن پور اٹ پنچ بلوچ ءِ شہید کننگ نا دعوی کیک و اوفتے دروغ نا مونتس اٹ خلیک۔ اندا وڑ سی ٹی ڈی اگست 2022 اٹ یانزدہ بلوچ مڷ ءِ شہید کیک و دافتیان ہفت بندغ نا چاہنداری مالو آن بیگواہ مروک بلوچ آتیان مریک۔ یاتی مرے کہ زیارت تدینی آن گڈ بیگواہ بلوچ آتا خاہوت آک 50 دے بلوچستان نا بنجائی شار شال ( کوئٹہ) ٹی گورنر ھاؤس نا مونا تولوک برانز کریر، و برانز اٹ انٹیریئر منسٹر رانا ثناء اللہ برسا بلوچ بیگواہ بندغ تا خاہوت آتون گپ و تران کرے و پارے کہ داکان گڈ دنو تدینی اسُل مفرو، دا تدینی نا باروٹ اسہ جوڈیشل کمیٹی اس ہم جوڑ کننگا۔ زیارت تدینی داسکان ننا مون اٹ اس کہ سی ٹی ڈی نصیر آباد اٹ چار پین بلوچ ءِ دروغ نا مونتس اٹ شہید کرے۔اندا وڑ تدوکا دے تیٹ سی ٹی ڈی مستونگ نا علاقہ قابو آن پنچ بلوچ و اندا تُو ئٹی نوشکی نا علاقہ زرین جنگل اٹ چار بلوچ ءِ دروغ نا مونتس اٹ شہید کرے۔ شہید مروک بندغ تیان عبید اللہ ساتکزئی ہرا منہ سال مالو بیگواہ کننگاسس، تابش وسیم ہرا 2021 اٹ خضدار آن بیگواہ کننگا، و سلال بادینی و فرید بادینی ہرا منہ وخت مُست شال آن بیگواہ کننگاسر۔

!بلوچ راج۔۔۔

ننے گڑا دا یخین کروئی ءِ کہ پاکستان نا لشکر و ڈھکوک ادارہ غاک اسُل بلوچ نا غمخوار مفسہ، و نئے کہ اوفتا گچین کروک دُتک آک بلوچ نا ہمدرد آکو۔ دا کمیٹی و کمیشن بھاز وار جوڑ کننگانے ولے بلوچ نا نسل کشی ہمو وڑ برجا ءِ۔اندن کہ پاکستان نا لشکر و اوفتا ڈھکوک ادارہ تے بلوچ نسل کشی آن کس توننگ اف، اندن تیوہ بلوچ راج نا زمہ واری ءِ کہ او بلوچ نسل کشی نا برخلاف بش مریر، ہر راج تینا رکھ ءِ ہموتم کننگ کیک ہراتم او اسہ جاگہ آ مرے۔ دا بے لغام آ دشمن بلوچ نسل کشی ءِ ترند کیک۔ ببو ہمگام مرین و اسہ توار اس جوڑ مرین و دا ظلم و زوراکی تا مون اٹ سلین۔