بی ایس او ءِ پنجاہ ءُ سئیمی یوم تاسیس
26 November 2020
شرپداریں وانوک۔۔۔۔
بلوچستانءِ تہا نوآبادیاتی نظام ءُ آئیءِ اَسراتاں بلوچ مہلوکءِ پکر ءُ سوچ ءُ آھانی جیڑگءِ بودشت آنءَ نزور کتگ۔ ایشیءِ مستریں سوَباں چہ یکے زورگرءِ وانگی نظام انت ءُ دومی ھما ماحول اِنت کہ چہ زوراکءِ مکراں ودیگ بوتگ۔ اے زورگریں استان پاکستانءِ جوڑ کتگیں ھما پالیسی انت کہ چہ ایشاں بلوچ چاگرد مدام پدمنتگیءِ کشکاں پشت بہ کپ ایت ءُ آئیءَ را وتی گلامی ءِ ھچ پیمیں اھساسے مہ بیت بلئے گلام کہ وھدے وتی گلامیءَ مار ایت ءُ سرپد بیت گڑا آئیءِ تہا اینکس ھاٹیگ نہ بیت کہ واجہءِ زیردستیءَ اوپار بہ کنت، پہ ھمے ھاترا آ چاگردءِ تہا کسان کسانیں ٹولی یا کہ گَل ءُ پارٹی آنی دروشمءَ پاد کیت ءُ وتی چاگردءِ تہا مہلوکءَ ھما ھوالہءَ آگھی دنت کہ مہلوک آئیءَ مارگءَ نہ اِنت۔ ھمے ڈولءَ چہ بلوچ چاگردءِ تہءَ پاد آؤکیں ورنا ءُ وانندہ آنی گَل بی ایس او کہ آئیءِ بنکی لوٹ بلوچ ورنا آنی تہا علم ءُ آگھی ءِ ھاترا جد جھد کنگ ءُ پہ سوبمندی ءِ نیمگءَ سپر کنگ اِنت، کہ مروچی 26 نومبر 2020 بی ایس او ءِ پنجاہ ءُ سئیمی سالروچ اِنت۔ بلوچ راجی آجوئیءِ جنز ءِ تہا بی ایس او ءَ مدام یک بنجاھی کردارے ادا کتگ، سال 1967 ءَ چہ دیمءَ اتکگیں گَل بی ایس او ءَ مروچی پنجاہ ءُ سئے سال سرجم انت، اے پنجاہ ءُ سئیں سال بی ایس او ءَ جتائیں سَکتیں جاوراں گوں گوازینتگ انت۔
مڑاھداریں بلوچ نودربراں۔۔۔۔
بی ایس او یک پرایمنیں ءُ آجوئی لوٹوکیں گلےءِ ھیسیتءَ مرچی بلوچستان ءُ بلوچ دمگانی وانگی ادارھانی تہا ساڑی اِنت ءُ بلوچ ورنا ءُ نودربرانءَ تعلیم ءُ تربیتءَ ھوار پہ ڈیھءِ آجوئیءِ ھاترا شعور ءُ آگھی دیگءِ جھد ءُ کوشستءَ انت، چوشکہ بی ایس او ءِ بنکی لوٹ بلوچ ورنا آنءَ یکجاہ کنگ ءُ آھانی تہا راجی ءُ سیاسی شعور پیداگ کنگ انت، چونھا اے گلءِ بنیاد 1962 ءَ ایر بیت کہ آ وھداں بی ایس ای او ءِ نامءَ چہ زانگ بیت۔ لبزءِ ای بزاں “ایجوکیشنل” ھمے ھاترا ھوار کنگ بیت کہ ایش ایوبی آمریتءِ زمانگ اَت ءُ اے وھدءَ نودربر سیاستءِ سرا بندش جنگ بوتگ ات۔ 26 نومبر 1967 ءَ گلءِ نامءِ تہا لبزءِ ایجوکیشنل در کنگ بوت ءُ ھاس بی ایس او ایر کنگ بوت، ءُ بنجاھی لس دیوان (مرکزی کونسل سیشن) کنگ بوت۔ اولی بنجاھی کونسل سیشنءَ بگر داں مروچی اے دورانیہءَ بی ایس او مدام تقسیم در تقسیمءِ سپر تہا بوتگ، اے بھر ءُ بانگی ایں سپر ءِ تہا گیش اِستانی داشتگیں کَس آنی دست ھوار انت کہ آھاں بلوچ ورنا بازیں انچیں دھڑ آنی نیمگءَ برتگ انت کہ آ مروچی بلوچءِ اھمیں جیڑہءَ چہ سستگ انت ءُ رُنگراھاں سپر کنگءَ انت۔ ءُ بی ایس او ءِ بنکی پکر ءُ سوچ ءِ سرا بندش جنگ بوتگ تا کہ بلوچ ورنا چہ وتی راجی زمہ واری آں پکری ھوالہءَ آجو بہ بنت۔ انچوشکہ اے وھداں زورگریں استان پاکستانءَ بی ایس اوءِ سرا بندش جتگ، آئیءِ بے کساس نامی ایں ءُ گمنامیں باسک ءُ رھشون آوار جتگ ءُ بندیگ جاھاں بند کتگ، یا کہ آھانی زانگولیں جون چگل داتگ اَنت، یک انچیں ترسءِ ماحولے بلوچ چاگردءِ تہا پیداک کنگءِ جھد کنگ بوتگ کہ بلوچ ورنا ھما درسگاہ یا آئیءِ سرکل ءُ دیواناں چہ دور بہ بنت کہ آ درسگاہ آھانءَ زانت ءُ شعور دنت، آھانی زھناں پھتگیں جست وتیگ کنت ءُ جیڑگ پرما ایت۔ بلئے زورآور ءِ اے دراھیں پندل ءُ زلم ءُ جبراں ابید بی ایس او ءِ کار ءُ پروگرام یکشلہ برجاہ انت آئیءِ مستریں سوَب ھمیش انت کہ بی ایس او ءَ پکری ھوالہءَ بلوچ ورنا آنءَ تیار کتگ۔
بلوچ راجءِ بانداتاں۔۔۔
بی ایس او ءِ سرا استانءِ بندشءَ ھوار بلوچستانءِ وانگجاھانی تہءَ استانءِ جتا جتائیں پندل، لیٹریچر ءُ کتابجاھانی سرا بندش جنگ، راجءِ بَہ شعوریں ورنا ءُ استادانی آوار جنگ ءُ شہید کنگ اے گپءِ گواھیءَ دینت کہ تاکتوریں ادارہ بلوچستانءِ تہا سیاسی ءُ علمی سرگرمی آں اوپار کت نہ کن انت۔ ھمے ھاترا استانءِ دراھیں ادارہ یکمشتیءَ گوں سیاسی سرگرمیانی دارگ ءُ ھلاس کنگءِ ھاترا جتائیں وھداں جتائیں منصوبہ بندی ٹہینگءَ انت۔ سیاسی مزاحمت ھر بلوچ نودربرےءِ ھاترا پہ الم انت، ابیدءِ سیاستءَ نودربر نوآبادیاتی نظامءِ تہا تہنا لیبوک جوڑ بنت، پمیشکہ بلوچ نودربر وتی راجی زمہ واری آں سرپد بہ بنت ءُ جرات ءُ بھادریءَ گوں ھر ھما استانی پالیسیءِ ھلاپءَ پاد بیا انت کہ آ پالیسی آھانءَ چہ سیاسی عملءَ گستہ کنت۔ چیءَ کہ مکر ءُ ھیلہ آنی مکابلہ تہنا سیاسی عملءِ وسیلہءَ چہ بیت، پہ ھشکیں گُرّگ، چار سیاسی گالبندءِ جنگ ءُ پیش دارگی کرداں چہ نوآبادیاتی نظامءِ روتگ سندگ نہ بنت بگندئے ایمانداریءَ گوں، مزاحمتی سپرءِ ھمگامیءَ گوں دیمءَ جنزانءَ سوبمندیءِ راہ ءُ در پچ بنت۔
شنگ ءُ تالان۔ بلوچ اسٹوڈنٹس آرگنائزیشن آزاد